MEGEGEH IBAS TUHAM

Bahan Sermon Khotbah Minggu 20 Nopember 2016

(Minggu Pendungi Tahun Gereja)

Invocatio : Tapi erkiteken lias ate Dibata aku lit bagi si genduari enda. Janah lias ate siiberekenNa man bangku e labo sia-sia. Jingkaten aku erdahin asa kerina rasul-rasul sideban, aminna pe si e labo gegehku jine, tapi lias ate Dibata nge sierdahin ras aku (I Kor. 15:10)

Ogen : Mazmur 46:1-12 (Responsoria)

Khotbah : Kolose 1:11-20 (Anthiponal)

Tema : Megegeh ibas Tuhan

Perlebe

Keadaan naik turun kegeluhenta rusur kel erbahanca kita berada pada titik terendah. Titik terendah , e, eme keadaan sierbahanca kita sangat lemah ras kote. Adakalanya ibas kegeluhenta enda, kita berada ibas keadaan tak berdaya, lit waktuna dirinta e pe kepeken sangana mengahdapi masalah si cukup pelik, lit ka waktuna kita ngalami tempa-tempa eme tariken nafas terakhirta. Sanga kita lit ibas paksa kesusahen e rusur kel kita la banci ngidah dalan pulah man banta. Erkiteken enggo picet kel ukur ras pikirenta, bahkan mungkin keadaan e labo kentisik ngenca bahkan sampai berbulan-bulan lamanya. Amin gia kita enggo ngelakoken hal si benar tapi banci saja tetap kita la pulah ibas kiniseran e nari.

Pemahamen Teks

Pengakun Rasul Paulus sinotabene adalah bukan dari antara 12 Murid Yesus si tertuang ibas invocationta mungkin gundari enda sianggap hal si biasa saja. Tapi pernah kin kita ngogeken Invocationta enda arah sudut pandang Paulus? Labo hal si menukah man bana ndahiken dahinna guna jadi perberita si Meriah tapi kepeken icidahkenna kualitas dirina ibas si e. amin gia labo ia salah sada dari ajar-ajar Tuhan Yesus, tapi lebihen nge ia ndahiken dahin selaku perberita si meriah e asangakan ajar-ajar Yesus. Janah ibas kinijingkatenna e pe labo iakapna erkiteken beluhna tapi erkiteken Lias ate Dibata si nggit make ia jadi perberita si meriah.

Bahan ogenta sipemena ibas Mazmur 46:1-12 eme pengakun Pemazmur kerna kebesaren Dibata. Sienda teridah ibas bait-bait puisi/lagu mazmur siituliskenna enda. Ende-enden enda eme sada kesaksin iman yang paling mengesankan kerna Dibata eme penampat ditengah-tengah kesesakan. Harus siakui maka sukacita iman yang dimiliki pemazmur labo hal si mudah ibas manusia sanga ngalaken keadaan nggeluh si la bagi ukur. Kalak si tuhu-tuhu bulat ukurna erpengendes man Dibata ngenca banci erbahan pengakun sibagenda rupana. Kiniteken sinteguh enda banci jadi sikerajangen tep-tep manusia adi tuhu-tuhu tek ras pe meteh maka Dibata e lit itengah-tengahta janah pe meteh kerina siialaken kita ibas geluh enda. Arah tulisen mazmur enda jelas man bantam aka pemazmur paksa si e sangana mengalami ancaman yang dahsyat, “…aminna pe doni mundu-mundu, janah deleng gedap ku teruh lawit…”. Ancaman siimaksud ijenda banci saja gempa bumi. Bencana alam enda rusur terjadi i Palestina, janah menurut kalak Israel sienda terjaadi erkiteken gelora lautan iteruh Bumi. Labo terjeng kerna bencana e saja, tapi pe pemazmur nuriken keyakinenna maka kuta Sion labo banci irebut bangsa sideban erkiteken Dibata hadir i Sion guna njagai bangsa e. ende-enden pemazmur enda banci jadi sada pengajuk gelah kita nggit ngenehen uga luar biasana perbahanen Dibata man bangsaNa. Emaka ibas geluhta pe harus siakuken Tuhan e bagi Pemazmur katawari paksa pe ras ugapa pe keadaanta, harus tetap kita erpengendes ras labo pernah situndalken Dibata tapi setia min kita man Dibata segedang geluhta.

Paulus salah sada tokoh Alkitab, perberita si Meriah si melala mengalami hambaten ibas pelayanenna tapi bagi siisuratkenna ibas kitab Kolose sijadi bahan Khotbahta minggu enda ngakukenca maka adi ibas Dibata lah rehna gegehta e pasti megenggeng nge kita ngalaken kai pe si reh man banta. Tetap ngasup ngataken bujur (ay. 12) eme salah sada bukti nyata kalak si megegeh ibas Tuhan. Kalak singataken maka Dibata eme ulu gegeh situhu-tuhu pasti ngasup ngataken bujur man Dibata ugapape kecibal geluhna, la pernah turah ibas ukurna nalahken Dibata tapi tetap ia nggeluh setia man Dibata. Ngasup kita ngataken bujur e labo erkiteken bagi ukurta lalap siterjadi, tapi erkiteken sigejabken perkuah ate Dibata ibas kegeluhenta. Rasul Paulus tetap semangat ia erberita si Meriah, ibas mpermakani perpulungen erkelangken suratna, aminna pe paksa ia nulisken surat Kolose enda ia sangana ibas penjara (4:3).

Geluhta enda enggo Yesus kap empuna, sebab enggo itebusna kita alu darehNa, janah kit ape gundari jadi sikerajangenNa. Yesus enggo mperdameken kita ras Dibata emaka ulih kita erdame ras Dibata e me erdame ras temanta manusia. Adi Dibata tuhu-tuhu sibahan jadi gegehta pasti ngasup ka nge kita erdame ras temanta manusia. Gegeh Kristus si lit ibas kita sipake guna maba dame, janah pe teridah ibas kita nggit erdame. Adi kalak sideban la nggit erdame ras kita, paling tidak la kita erbalas ibas kejahatenna. Adi enggo sialemi salah kalak man banta, dahinta ilebe-lebe Dibata enggo dung, adi ia la ngasup ngalemi salahta, e enggo urusenna ka ras Dibata.

Aplikasi/Refleksi

Ibas sada paksa i tengah berngi, i rumah sekalak pandita erdering Hp-na. kepeken rumah sekalak perpulungen pasangan muda sangana kebakaren. Pendeta ndai langsung menuju ku TKP. Kenca pendeta ndai se hi rumah perpulungenna si kebakaren e sekalak petugas pemadam kebakaren ngatakensa bahwa keadaan enggo terlambat. siperbulangen kepeken masuk ku rumah siterbakar e guna nelamatken anakna si kitik denga, janah lanai darat-darat. Ieteh pandita e maka sindehara enggo ibaba ku UGD rumah sakit, emaka lawes ka pandita e ku rumah sakit. La kel ieteh pandita e kai si arus ikatakenna man sindehara e, sebab ia enggo kehilangen segalanya. Kai siarus ikatakenna? Kenca ia jumpa ras sindehara, ia sangana kundul, ayona sembab. Sope lenga pandita ndai ngerana sitik pe, sindehara ngenehen pandita e janah nina “Pandita, Dibata kap gegeh ku ibas ndalani geluh enda”. Sindehara labo secara tiba-tiba saja mengambil keputusen sibage, tapi pasti selama enda pe ia enggo melatih kinitekenna gelah megegeh ibs Tuhan.

Lit dua pilihan man banta ibas ndalani kegeluhen enda, kita banci erpenalem man gegehta ntah kita mindo suplemen tambahan tenaga man Dibata gelah reh gegehna kita ngalaken kerina hal si reh man banta. Kemuliaan Dibata eme hal si sangat hakiki. Kemuliaan Dibata terbukti ibelang-belang doni. Lit paksana Dibata ncidahken kuasana arah perbahanen-perbahanenNa si luar biasa (Maz. 46:9), salah sadana tentu ibas geluhta. Endesken geluhta man Bana saja, maka kita pe ndatken gegeh arah Ia. Dibata ipermuliaken adi tek kita man Bana, adi siendesken kerina geluhta ku Ia.

Ibas Tuhan ngenca banci kita megegeh, emaka adi ngasup ateta nggeluh ibas doni si dem keguluten enda tetaplah nggeluh ibas Tuhan. Kalak si nggeluh ibas Tuhan tetap paguh kinitekenna la pernah terugur sebab gejabna Tuhan e ngenca penampat situhu-tuhu ras tetap ngasup ngataken bujur man Dibata segedang geluhna. Emaka tetaplah nggeluh ibas Tuhan gelah malem ateta.

Selamat Melayani ras mejuah-juah man banta kerina

Pdt. Julia Elprida Br. Ginting’s

(0853-6175-3339)

Melayani i GBKP Runggun Penen

Klasis Medan-Delitua

KELUARGA SI SEMPABU

Khotbah 13 November 2016

Invocatio : Kenca bage nina ka Tuhan la mehuli adi manusia nggeluh sisada-sisada. Kubahanlah teman si cocok man bana, guna nampati ia. (Kejadin 2:18)

Ogen : Ende-enden Salomo 2:1-17 (Anthiponal)

Khotbah : Kolose 3:18-25 (Tunggal)

Tema : Keluarga si Sempabu

Khotbah

Perpulungen kekelengen Tuhan, teptep kalak sienggo erjabu ugapa pe ngarapken kesempurnaan ibas jabuna. Erbage-bage situhuna pengakap kita manusia kerna kesempurnaan ibas jabu. Lit sada film drama karo siberjudul “Melumang la Kepaten”, ibas film enda pemeran utamana eme si Jona, erkiteken enggo sirang nande ras bapana emakana geluhna enggo bagi anak melumang, sada paksa tading me ia ras mamana (turang nandena). Mama ras mamina enda kalak si bayak namura, ertana melala, melimpah, lembuna pe melala, mobilna pe lit. tapi kepeken sedekah si Jona enda tading i rumah mamana ibahan kel ia bagi sekalak suruh-suruhen (pembantu) erkiteken keluarga mamana enda ertana kepeken penggurunna, emakana sekali jadi mate me anak lembu mama Jona enda, rempet merawa mamana e ndai ikatakenna “ Ergan kuakap anak lembuku ah asangken batang dagingmu ena”, bage me dalan-dalanna maka ipelawes me Jona arah rumah mamana e. selanjutna lalap me Jona enda pindah-pindah inganna tading erkiteken lalap ia meling ibahan kalak, amin gia rumah inganna kesilang e, rumah kade-kadena denga tapi sada pe la engkelengi ia. Singkat cerita ibas Film e erdahin me Jona ibas ingan susu sapi segar berastagi. Singenan kepeken Jona ras anak empuna inganna erdahin e, orangtua sidiberu pe akhirna setuju maka erjabu me dungna kalak e, kerina urusen-urusen usaha enggo jatuh kutangan Jona, jadi kalak si bayak me ia. Emaka ibas sada kesempaten mulih me Jona enda ku kuta atena mpetandaken Diberuna, sanga reh Jona enda dauh-dauh nari enggo idah mamana ndai, janah kepeken mamana e enggo sakit struk, ertana pe enggo keri guna pertambar, lanai kel lit sibanci isombongkenna, idahna Jona ndai reh tare motor Pajero Sport piah lanai ia pang ncidahken ayona. Tapi kepeken si Jona tetap engkelengi mamana e janah ipekena-kenana mamana e seh sehat.

ibas film e cuba sipergermetken kerna biak mamana Jona e, nggeluh adi erpenggurun man erta labo kepeken maba kedamen man bana, tapi erbahanca turah pinakitna perbahan nangkeli ertana. Ngidah sienda icubaken kami ngubungkenca kubas keluarga. Pepatah ngatakensa “ Darimana datangnya cinta? Dari mata turun ke hati”, payo memang kesan pandangan pertama itu penting, pandangan pertama siimaksudken kami e labo terjeng rupa saja, tapi pe kegeluhenna. melala gundari anak perana_singuda-nguda sindarami teman geluhna yang adalah orang mapan, memiliki harta yang banyak. Tapi perpulungen kekelengen Tuhan apakah e enggo menjamin kegeluhen ibas perjabun e pasti sejahtera?

Melala genduari keluarga Kristen sienggo papak erbahan tujun ibas keluargana. Invocatio nta kembali mabai kita ku visi awal Dibata ibas pejumpaken Adam ras Hawa. Teman siibereken Dibata e eme guna nampati. Berarti gelah sisampat-sampaten. Labo sisampet-sampeten. Adi arah kuta kami Juhar Simbelang lit kuan-kuan nina “Pecat-Pecat TigaBinanga, Ipecatina atena ngena”. Ngena nge situhuna atena egia jual mahal ia, lang nina. Me ayak-ayakna kari atena padahal dungna rusursa ipecati lanai diate kalak pe.

La bali ras Salomo, ibas ogenta sipemena ndai ituriken uga Salomo jelas-jelas alu terang katana nuriken atena ngena man sekalak Diberu, janah si diberu pe njawabsa alu terang-terangen “Aku pe ngena teku kam” bage ia kira-kira. La kepeken mela-mela kalak enda ncidahken atena ngena janah pe ncidahken kualitas dirina ka. Sidiberu ngatakensa (ay.1) ipakena istilah rudang ras bunga ncole, berarti ia berani menggambarkan dirina bagi bunga si mejile ras merim e, janah ipujikenna ka impalna bagi batang apel itengah-tengah kerangen. La ipecatina atena ngena tapi jelas bahanna kata sorana. Tapi amin gia nggo singenan kalak enda duana tapi tetap ietehna batasen-batasen ibas ia erteman-teman e.

Adi anak muda zaman gundari melala kel si lanai meteh batasen-batasen ibas erteman-teman. Kalau suka sama suka apapun bisa dilakukan, bage enggo paham hidup anak-anak modern sekarang. Emakana la kita heran umur perjabun pe enggo mbue si singkat-singkat saja, 3 minggu lanai atena ngena mis isambari saja nggo. Erkiteken sanga erteman-teman pe la tehna batasenna piah enggo erjabu pe lanai ternikmatina, sebab toh sama saja.

Tapi adi impal Salomo enda ietehna batasenna, banci siidah ibas ay.9. belkih ras balua e hidup berkelompok, sijantan ras jantan bagepe betina ras kelompok betina. Emakana anak balua ras belkih sanga ia kitik denga lalap ia ndeher ras nandena, tapi kenca ia enggo cukup dewasa lawes me ia janah ersada ia ras kawanen kelompok jantan, kenca seh musim kawin, balua ras belkih jantan ndeheri kawanan betina kentisik kenca bage tadingkenna ka, bage lalap mulih-ulih adi kedungenna kari lit sada betina ngikutken ia berarti eme sijadi pasangenna. Ikataken ibas ay.9 nina “Bali ras Balua tedis deherken tembok”, berarti labo sidiberu e mis naring ndahi sidilaki tapi ipernehenna lebe arah renggang-renggang jendela. Ietehna maka lenga bo paksana kalak enda saling kontak fisik, maka tembok e menggambarkan batasan-batasan ibas budaya kayak Israel. Kita pe situhuna kalak karo bage ka nge budayanta emakana mbarenda ibas budaya kalak karo singuda-nguda ibas kuta ibas medem ibas rumah sekalak singgo lansia, irumah tua-tua gelah ula mis ia jumpa ras dilaki.

Arah ogen enda sieteh maka kepeken Diberu e labo terjeng objek ate ngena, tapi Diberu eme pihak yang paling tahu ras menghayati nilai hakiki dari kekelengen e sebagai wujud kehidupan manusia. Ertina kata enda mpersingeti gelah orang-orang muda Kristen ula mengejar kenikmatan sesaat bagepe takluk nandangi sura-sura cinta yang berlebihan. Enda pe pesan siperlu siajarken nandangi anak-anakta si anak perana ras singuda-nguda.

Kembali kita ku tema ibas minggu enda “ Keluarga si Sempabu”, arah kitab Kolose sijadi bahan renungenta sekalenda jelas kel ituriken rasul Paulus uga kin situhuna kesempabun ibas jabu e. keluarga e ikataken sempabu adi ibas jabu e, ndehara patuh man perbulangen, adi perbulangen pe ncidahken kekelengen man ndeharana, adi anak-anak megiken ajar janah orangtua pe la rusur njuguti anakna. Kepeken labo terjeng hubungen dareh siibahas Paulus termasuk ka pe hubungen tuan ras budakna. Ibas zaman Paulus tep-tep jabu enggo umum kel e lit budakna, emaka Paulus mengubah cara pandang perpulungen maka budak e labo terjeng man suruh-suruhen saja tapi ia pe bagin ibas keluarga, emakana selaku bagian dari keluarga budak e pe harus ncidahken Loyalitasna man tuanna.

Kinatana genduari ibas sekelewetta perbulangen lanai engkelengi ndehara bagi arusna, ndehara pe lanai patuh man perbulangen, anak-anak pe lanai begikenna orangtuana, budak pe nangkoi ka i rumah tuanna, tapi lit ka tuan e semena-mena man budakna bahkan ada yang sampai disiram air keras. Adi bage nge kegeluhen keluarga si lit isekelewetta, lit denga kin kesempabun e? erbahanca jabunta jadi jabu si sempabu memang bukan hal yang mudah tapi juga bukan hal yang mustahil. Mari mulihi kita ku visi Dibata sanga pejumpaken si Adam ras Hawa, lit hubungen saling guna Nampati teman nggeluh. Alu bage tek lah kita jabunta sekalak-sekalak pasti jadi jabu si sempabu. Amin..

Selamat Melayani ras mejuah-juah man banta kerina

Pdt. Julia Elprida Br. Ginting’s

(0853-6175-3339)

Melayani i GBKP Runggun Penen

Klasis Medan-Delitua

Note : adi lit saran ntah pe masuken ibas pembaca nari 

banci langsung saja itamakenndu ibas kolom komentar 

ibas blog enda. Bujurrrr…

DIBERU SI ERKEMALANGEN MAN TUHAN

Khotbah Minggu 09 Oktober 2016

Invocatio      :Rupa mejile la terteki, dingen kinijilen bene me tapi diberu si erkemalangen man Tuhan patut ndatken pujin (Kuan-Kuanen 31:30).

Ogen             :Keluaren 1 :15-22 (Responsoria)

Khotbah       : Perb. Rasul-rasul 16:13-15, 40 (Tunggal)

Khotbah

Perpulungen kekelengen Tuhan, ibas minggu Moria enda ate kami mabai kita lebe ngenehen ku Budayanta. uga kin posisi Diberu ibas kita kalak karo enda? mbarenda sope lenga kalak karo megiken berita si meriah, Posisi Diberu seh kel sakitna. posisi selaku Diberu ianggap la meherga, bahkan adi sekalak Diberu la banci mupus anak Dilaki, ianggap kel Diberu e labo kai pe ibas jabuna, kune ka adi Diberu e sama sekali kin la banci mupus, biasana Diberu sibage ianggap membawa sial man jabu. labo terjeng bage saja, Dilaki ntah pe perbapan itengah-tengah jabu pe erkiteken ia pengulu jabu ningen e seh maka ndeharana pe ianggapna bagi budakna. kalak karo si lenga megiken berita simeriah paksa si e namaken posisi Diberu la lebih bagi sapi perah. engkai maka bage ningkami? Diberu ntah pe pernanden harus medak erpagi-pagi kel, lenga pe pultak matawari ia harus enggo medak, kenca bage labo ka sempat pe ia nginem teh manis lebe bagi sigundari e, tapi mis ia kuskas ku dapur, ngampeken nakan, sanga nimai nakan harus ka ia muat lau, labo ka ndeher ingan muat lau e, labo i tapin kuta, tapi harus naik turun bukit ku sungai. kenca dung si e harus ka ia mpesikap anak-anakna kerina muat sekolah, kenca bage mere man asuh-asuhen ka ia lebe. kenca dung dahinna si e emaka medak perbulangenna, harus ka ilayani lebe, sikapken nakanna, gulenna , tehna, perburihenna, adi la entabeh gulen e, ibenterken ka kuayona, ipekpeki, iligas ia, dung si e lawes me perbapan ndai rass teman-temanna kadap ersenang-senang, pernanden ndai harus ka ku juma. kenca enggo gelap wari mulih pe perbulangenna enggo mabuk tuak, igudami ka me ia sekali nari. sangat tersiksa posisi selaku Diberu ibas kalak karo paksa si e.

emakana kenca seh berita si meriah man kalak karo, e nge awalna mulai me iergai posisi Diberu ibas kalak karo. kata Dibata ngatakenca maka harus sikeleng-kelengen sapih-sapih kita emakana Diberu pe harus ikelengi selaku ia ndehara bagepe nande itengah-tengah jabu. tapi kepeken ibas era Modern enda, timbul permasalahen simbaru. mari si nehen uga gundari keadaan Diberu ibas zaman modern enda. wanita-wanita modern menuntut kesetaraan gender, termasuk dalam hal memimpin suatu organisasi, Diberu pe banci jadi ketua ibas sada lembaga. wanita modern genduari melala si sibuk ngurusi urusenna idarat rumah asangken mpesikap jabuna, tentu secara tidak langsung banci sikataken maka enda adalah efek samping dari kebebasen diberu si posisina nai lit ibas ketertindasen.

Saja labo ka kerina Diberu modern bagi siituriken kami ndai pengkebetna, enterem nge Diberu ibas kita khususna kalak karo siikataken nggeluh ibas kinitekenna. bahkan adi siperdiateken gerejanta GBKP enda 70% bangku-bangku gereja dipenuhi oleh perempuan. mayoritas Diberu nge sindemi gerejanta. tapi enda pe la banci sikataken maka kerina Diberu si enggo pergereja enggo pasti erkemalangen man Dibata.

Bahan Khotbahta minggu enda kerna si Lidia, ia sekalak si labo kalak Jahudi, tapi amin gia ia labo kalak Jahudi kepeken pustaka si Badia nta ngatakensa maka ia lit ibas ingan ertoto kalak Jahudi janah pulung ia ras Diberu-diberu si lit ibas ingan ertoto e. Lidia enda ia perbinaga uis ungu, si meherga kel ergana. berarti adi siukuri kerna si Lidia enda, pasti nge ia sekalak si bayak namura, sebab guna erbinaga uis ungu e membutuhkan modal yang besar. tapi hal sijadi perhatin kami ijenda kepeken kebayaken si lit ibas Lidia enda ipakekenna guna nampati Rasul-rasul paksa si e. Tokoh sijadi panutenta selanjutna eme Bidan-bidan i Mesir eme Siprah ras Puah si mempertaruhken nyawana guna mempertahanken prinsiplna si erkemalangen man Dibata. Raja kel si memerintahken kalak enda guna munuh bayi-bayi kalak Israel si tubuh tapi kepeken erkiteken bidan-bidan enda erkemalangen man Dibata, ibereken Dibata jalan keluar, maka sope lenga seh pe Bidan-bidan enda enggo leben lahir bayi-bayi kalak Israel. adi enggo tubuh ma tentu labo banci ibunuhna?. kepeken ibas kita erkemalangen man Tuhan, ibahan Dibata me kuh kerina dalinna gelah kita ndatken keterkelinen.

Perpulungen kekelengen Tuhan, mari kembali kita ku tema ibas minggu enda “Diberu Si Erkemalangen Man Tuhan”, cuba sirenungken uga kin Moria si lit itengah-tengah jabuta? enggo nge Moria, pernanden e banci ikataken Diberu si erkemalangen man Dibata? akap kami adi nande itengah-tengah jabu tuhu-tuhu icidahkenna biakna selaku Diberu si malang man Tuhan pasti anak jabuna sangat mengidolakan ia, seh maka anak sidilaki pe atena ndarami ndehara sibagi nandena e min. tapi kai kinata sijadi itengah-tengahta, adi sungkun sekalak anak Perana beru kai nge kari buatndu jadi ndeharandu, beru si ngumban kin atendu? reh nina anak e ngaloi, “iyahhh… si rumah ah pe latih ngadapisa kune tambah sada nari, e pangen la palah surung, stress nge kari adi beru singumban e buat”. tentu adi enda nge siterjadi berarti Moria/pernanden e lenga cidahken maka ia selaku Diberu si malang man Tuhan.

Menarik akap kami sijadi introitusta, kuan-kuanen 31 enda eme ajar nande raja man anakna gelah bijak ibas milih teman geluhna. tentu ibas hal sienda siidah maka kepeken lit kedekaten nande Raja man anakna, seh maka terjadi sikap saling terbuka antara nande ras anak. kepeken nande Raja enda ngidah maka kesuksesen anakna e pe bergantung uga kari ndehara anakna e itengah-tengah jabu. tentu adi sekalak Raja, uga gia atena jilena ndeharana pasti datkenna, tapi pedah nande Raja ngatakensa “Diberu sierkemalangen man Tuhan” Diberu sibage nge siarus idarami anakna.

Tentuna e pe jadi persinget man bandu permata si Diberu, ula ayo ndu e ngenca pekapal-kapalndu bedakna, ula bukndu e saja ngenca i rebondingndu, ula dagingndu e saja ngenca i lulurindu, tapi kinijilenndu si arah bas lah ipelihara. pangen pusuhndu siibahanndu jadi mbentar asangken ayondu, pangen pusuhndu ndu e ipepinter asangken buk ndu, pangen pusuhndu e iperhalus asangken dagingndu.

Yakin aku maka adi kusungkun kam Permata si Diberu apai nge pangen pilihndu dilaki si bayak namura tapi pekpekina kam rusur ntah Dilaki si mesera pergeluhna tapi erkemalangen man Dibata janah kekelengenna man bandu pe la erkeri-kerin? apai nge pilihndu si mekpeki kam ntah si ngkelengi kam???? adi kin ipilihndu Dilaki ngkelengi kam tentu kam harus meningkatken kualitas dirindu, seh maka layak kam ikelengi. enterem gundari orang-orang muda ndarami teman geluhna si berkualitas tapi lupa ia meningkatkan kualitas dirina.

Bage pe man bandu kerina nande kami Moria, adi atendu kin ikelengi perbulangenndu, ibas kam pe harus lit kekelengen si la erkeri-kerin e. ula kari naik turunnya pendapaten berbanding lurus dengan naik turunnya kekelengen. tapi bahanlah amin gia pendapaten Bapa kami Mamre e naik turun tapi kekelengenndu tetap 100% cidahken ndu man kerina anak jabundu.

Selamat Minggu Moria man bandu kerina Nande kami bagepe selamat Berproses jadi Diberu si Erkemalangen man Tuhan. Amin. 

Selamat Melayani man Banta Kerina
Pdt. Julia Elprida Br. Ginting's, S. Th
Melayani di GBKP Runggun Penen
Mejuah-juah

TUMPAK-TUMPAK PERBERITA SI MERIAH

Bahan Sermon Khotbah Minggu 25 September 2016

Introitus        : O temanku si kukelengi, ertoto aku gelah kai si mehuli jadilah man bandu, janah mejuah-juah bagi kueteh maka kegeluhen pertendinndu pe mehuli. (III Johanes 1:2)

Ogen             : Heber 13:16-21

Khotbah       : Roma 15: 30- 31

Pendalaman Teks

³ III Johanes 1 : 2

Johanes ibas suratna man Gayus enda menyebut dirinya hanya penatua. Gayus eme sekalak si enggo tek nandangi berita si Meriah. ibas kinitekenna e ia ngajuk perpulungenna guna ngaloken bagepe ncukupi keperlun perberita si meriah. Johanes pe eroto kerna Gayus gelah si mehuli sijadi man bana. Biasana Dibata menghendaki gelah kalak si tek man Bana e ndatken kejuah-juahen alu pasu-pasuNa. Ate Dibata pe gelah kerina hal ibas kegeluhenta Pendahin, pelayanen, jabu, rsd banci erdalan bagi sienggo iaturkenNa. Dibata menghendaki ibas kita ndatken pemeraNa man banta si berupa Rumah, pangan, paken guna kita ras keluarganta, cukup ka min waktunta guna nampati kalak si deban bagepe pebelangken berita si Meriah. amin gia ibas totonta tek kita maka Dibata mereken kecukupen man banta tapi harus siakui maka pustaka si Badia ngajarken bahwa Dibata mengizikan anak-anakNa ngenanami masa-masa kekurangen. kita mungkin ngenanami masa-masa kesusahen gelah terdorong lebih tek man Bana ras pe guna mematangken kinitekenta ras pelayanenta. banci ka kesusahen e erkiteken kesaksin ibas kita erberita justru ngerehken penganiayaan ras penindasen man banta. kehadiren penampat ras pasu-pasu Dibata ibas geluh jasmaninta berkaiten ras keberhasilen geluh rohaninta. emaka selaku serayan Tuhan kita perlu tetap njemak alu teguh prinsip guna ndarami lebe Kinirajan Dibata janah dalankenlah singena ateNa (Mat. 6:33).

³ Heber 13: 16 – 21

Surat enda ibereken man kalak Kristen Jahudi sisangana ngenanami penganiayaan ras keputusasaan, seh maka lit piga-piga kalak siatena mulihi ka kukinitekenna si ndekah. surat enda mereken pergegeh ras mpeteguhi kinitekenna man Kristus. perpulungen singaloken surat enda itantang gelah tetap tek, megenggeng ibas ngalaken penderitanna. erkiteken tujun sibagenda rupana me emaka ibas nats ogenta sekalenda perpulungen iajuk gelah tetap erbahan simehuli, sisampat-sampaten (ay. 16). sebab eme singena ate Dibata. tambah si e perpulungen kerina iajuk gelah tetap patuh nandangi pemimpin ras pe ngikutken katana. sebab alu bage me maka pemimpin ibas perpulungen e la erleja-leja ibas ngepkep perpulungenna. perpulungen si nggit ngikuti kata pemimpinna si sue ras kata Dibata tentuna erbahanca turah ukur meriah ibas pemimpin perpulungen e ibas ndahiken dahinna. kesetiaan ras kepatuhen man pemimpin perpulungen, gembala ntah pe Guru Kristen harus erpalasken kepatuhen si lebih tinggi man Dibata, termasuk pe kesetiaan ibass ngelakoken kebenaren ras Prinsip-prinsip kata Dibata.

Sekalak sierdahin guna perpulungen Tuhan tentuna harus bersih ukurnaa ibas ndahiken dahin e, eme guna kemuliaan Dibata labo guna mpehaga dirina sendiri saja. kiniseran si mesangat siinanami perpulungen paksa e erbahanca turah ukur penulis surat enda gelah perpulungen e ertoto kerna ia, gelah banci idahina perpulungen e, segelah banci ia pe secara langsung mpegegehi perpulungen ras ndampingisa labo terjeng arah surat saja.

³ Roma 15 : 30 – 31

ibas Roma 15: 30 – 31, Paulus mindo man perpulungen i Roma gelah ertoto min ia kerina kerna rencana perdalinen Paulus. . Ikataken amin gia pemindon Paulus enda iturikenna ibas pasal terakhir tapi menurutna hal enda sangat penting. Paulus “erkiteken Tuhan Jesus Kristus…”, ibas bahasa indonesia ikataken “Demi Kristus…” sienda ikataken Paulus gelah perpulungen meteh maka Kristus pe situhuna nyuruh kalak enda (perpulungen) gelah  mpeseh pemindon Paulus enda. seh maka kekelengen sienggo ibereken Dibata man ia kerina simendorongsa guna notoken Paulus. ibas pemindon Paulus man Perpulungen i Roma gelah ertoto itambahina alu kata “ ertoto alu tutus ate”, sienda pe ituriken Paulus gelah perpulungen labo terjeng ertoto saja tapi memang alu mengerahken tenaga Rohanina ibas toto e. arah toto e pe persekutun kalak sierkiniteken jadi nyata.

Pemindon Paulus gelah itotoken labo hal si la mendasar. lit kebiaren ibas Paulus kerna bahaya si bakal reh man bana arah kalak Judea si la tek man Kristus. hal enda pe erpalasken piga-piga pengalamen Paulus, ija lit komploten kalak Judea siatena ersura-sura guna munuh Paulus (baca: Perb. 9:29 ; 14:19; 20:3 ; 23:12). Tantangen Paulus sipeduaken eme kerna Pendahinna i Jerusalem la tertolak. Kebiaren Paulus kerna hal sienda erkiteken ope lenga ia se hi Jerusalem enggo lit berita si la tuhu kerna ia ras pengajaren siisehkenna (Baca : Perb. 21: 21-21), enggo lit desas-desus maka Paulus e ibas pengajarenna ngajuk jelma sinterem gelah la ngelakoken undang-undang Musa. adi sempat berita si la tuhu enda erbahanca turah perasaaan curiga ibas kalak i Jerusalem maka gagal me usaha Paulus mpeseh kerna berita si Meriah.

Aplikasi

†  Tugas ngelakoken dahin Erberita kerna Berita si Meriah labo hal simenukah, tapi memang dahin si dem alu tantangen. Sisi kemanusianta tentu erbahansa gelah kai siilakoken kita iergai kalak si deban. Kata Dibata siipeseh kita e, erbahansa lit min perubahen ibas perpulungen ku singena ate Dibata. adi e siterjadi tentu ergiah-giah me kita ndahiken dahin selaku perberita si Meriah. janah pe banci ka labo latih siakap ndahiken tugas pelayanen e.

†  Ibas ngelakoken tugasta selaku perberita si Meriah, kita harus mengorbanken waktunta, pikirenta bahkan pendahinta ibas mengutamaken dahin erberita e. sisi kemanusianta banci saja erbahansa timbul rasa keegoisen guna memikirken keperlun diri sendiri lebe, tapi perlu siinget maka selaku serayan kita enda kalak si enggo ipeserap Dibata gelah erdahin guna Ia labo guna dirinta (Doulos). bukan berarti kita lanai mperdiateken geluh anak jabuta, tapi lit min turah keyakinenta maka ibas kita dahin tugasta selaku Perberita si Meriah, Dibata pasti ncukupi kerina keperlun siibutuhken kita ras anak Jabuta.

†  Tantangen-tantangen ibas ndahiken dahin selaku Perberita si Meriah labo tantangen si biasa saja, tapi banci ka pe tantangen si luar biasa, sibanci saja mengancam nyawanta, keharmonisen jabuta terusik, pergaulen anak-anak lanai terperdiaten. emakana ibas dahiken tugas e labo banci kita mengandalken diri sendiri saja, tapi ngawan perpulungen pe harus Notoken serayanna segelah dahin simberat e pe banci jadi menahang. sebab perpulungen si-ielai pe mereken kemalemen ate nandangi si erdahinna.

†  Hubungen antara sesama serayan Tuhan harus tetap terjaga, saling mendukung ras saling menguatkan. Sebab enda me sijadi pergegeh ibas kita radu ras ndahiken dahinta. Serayan Tuhan sienggo mbue pengalamenna banci mpegegehi, ngarak-ngarak dingen mpetetap ukur serayan Tuhan simbaru dingen lenga mbue pengalamenna. Bas dampar sideban hubungen serayan Tuhan ras perpulungen pe harus nge tetap terjaga keharmonisenna. Sebab adi lit perselisihen antar serayan Tuhan ras perpulungen, e banci mabai maka perdalanen pelayanen e pincang janah la erdalan secara maksimal.

†  Hal sipenting kel eme saling mendoakan antara serayan Tuhan ras pepulungen. Berusaha ngenehen hal postif antara sada ras sidebanna. umpama lit hal-hal si la bagi ukur terjadi antara serayan Tuhan ras perpulungen e, eme dalanna maka harus lit komunikasi si mehuli, gelah dat solusi guna pehulisa. Alu bage maka teridah uga serayan Tuhan ras perpulungen tetap ersada arih ibas kiniteken man Tuhan, si teridah buahna arah kegeluhenna si tep-tep wari.

†  Tema : Tumpak-tumpak Perberita si Meriah, enda ngingetken man perpulungen maka penampat dukungen siisehken e labo ngenehen bue kitikna, tapi asa gegeh ras ukur lit radu ras numpak-numpaksa maka paguh, mehuli dingen jadi pasu-pasu me e man serayan Tuhan bagepe man kerina perpulungen. 

Selamat Melayani Tuhan Yesus Memberkati

Pdt. Julia Elprida Br. Ginting Suka, S.Th

Melayani di GBKP Runggun Penen

Klasis Medan-Delitua

TOTOKENLAH SERAYAN TUHAN

Khotbah 18 September 2016

Invocatio    : O Tuhan, periah min ukur suruh-suruhenNdu, man baNdu kupenangkih pertotonku. (Masmur 86:4)

Ogen          : Perb. Rasul-rasul 12:4-12

Khotbah     : Kolose 4:1-5

Khotbah

Ibas sada negara barat si mengenal 4 musim, lit me sada gereja. ibas gereja e enterem kel perpulungenna. iantara perpulungen e kerina lit sekalak perbapan si seh kel semangat er-kebaktin. rajin ia ku gereja, reh ia rusur tep-tep ibadah raya. rende pe ia serius, mbegiken khotbah pe tutus kel. banci sikataken perbapan enda jemaat teladan. sekali jadi, perbapan e lanai idah –idah i gereja. sada minggu, dua minggu seh ku minggu ketelun. emaka sekalak pandita ibas gereja e reh erbahan kunjungen pastoral. ibas kerehen pandita ndai rembang ka sangana musim dingin, iidahna me perbapan si idahina e sangana cudu deherken perapin ibas rumahna. kundul me kalak e duana deherken perapin, tenang ras hening.

Pandita e lalit ia ngerana, sinik saja ia. perrbapan ndai pe la ka ia ngengerana. ibas kebungkamen kalak e, ibuat pandita me penjepit arang. kenca bage ijepitna sada bara api ibas perapin e nari, dungna tamana ku darat. kenca bage kundul ka pandita e. duana kalak enda ngenehen ku bara api si ipedarat pandita ndai, idarat perapian bara si Megara kel ndai berubah warna, reh dekahhna reh redupna, la ndekahsa mate me bara api e ndai, lanai melas tapi nggo mbergeh. kenca bage pandita ras perbapan ndai pe lalap denga la ngengerana. sope lenga lawes pandita e icapitna mulihi bara si nggo mbergeh ndai, tamana ka ku bas perapin. ibas perapin bara api e mulihi ka menyala seperti sebelumnya.

Permisi me pandita e muat mulih. i pintun depan ngerana me perbapan ndai nina “Terima kasih untuk khotbah pak pendeta. minggu depan, reh ka aku ku gereja”.

Perpulungen si ni kelengi Tuhan, sekalak serayan Tuhan eme kalak si enggo ipilih Dibata, janah ipeserapNa bagepe ibadiakenNa guna ngelai perpulungenNa. saja kelemahen si lit ibas kita rusur, erkiteken ngelai ningen e, harafiah nari sibahan ertina budak. payo memang kata serayan, ibas bahasa Indonesia ipake kata pelayan yang tugasnya melayani, ibas bahasa asli Alkitab ipake kata Diakonos bage pe Doulos. bahkan Yesus sendiri ibas pustaka siBadianta ikatakenNa maka Jesus eme Diakonos bahkan Doulos. doulos e ertina budak. memang ibas pemahamenta manusia adi ikataken sekalak budak pasti enggo rendah nari martabatna. tapi situhuna Doulus selaku Serayan Dibata e bukan derajat yang paling rendah melainkan posisi yang ditinggikan.

Erbage-bage mungkin cara Dibata erbahan kita jadi SerayanNa. Pertua-Diaken si lit ibas gerejanta enda pe pasti pelain-lain nge penggejapenna kerna pendilo Dibata. tapi si pasti Dibata enggo netapken kam kerina Pertua-Diaken kami guna jadi serayan, terlepas iakapndu ngasup ntah lang kam ndahiken dahin siiberekenNa man bandu. sada hal si rusur mpegegehi kami selaku Pandita, iinget kami maka “Kemana Tuhan utus pasti Tuhan urus”. bahkan arah ngawan ni perpulungen pe ipake Dibata guna ngurus/mpekena-kena kita selaku serayanNa.

buktina minggu enda eme minggu Notoken serayan Tuhan. ertina maka kerina ngawan ni perpulungen sebelang-belang GBKP enda bakal ersada ukur guna notoken kerina sierdahin i GBKP enda.

Paulus ibas suratna ku perpulungen Kolose, mindoken gelah perpulungen i Kolose ertoto kerrna ia, gelah lit min kesempatenna guna reh ku Kolose. sebab perpulungen i Kolose e lenga pernah i dahi Paulus. tapi kai pinakit si rusur terjadi ibas perpulungenta, ndekah sitik saja la reh serayan e mis nari nge sijuruken. “Kai kin gunana ia jadi serayan ah adi terjeng gelar saja nge, aku pe beluh”. jarang kel nge lit ibas pikirenta “Iyah, labo dalih lenga pe dahina aku, ajari serayan kami kerina Tuhan gelah terbeluh ia ngaturken waktuna”. tek kel aku adi buenlah perpulungen si bagenda, nggit notoken serayanna pasti enggo maju kel GBKP-nta tercinta enda.

Pedah Dibata kataken man serayanNa “Permakanilah biri-biringku”. biri-biri e sifatna penurut kel, ikutkenna kujapa pe permakanna e erdalin. labo kel ia nggit si lebe-leben. ratur kel perdalenna kerina. adi ibandingken kita mpermakani biri-biri ras mpermakani kambing, ndauh kel bedana. kambing e seh kel serana man permakanen, si arah lebe mededat kel erdalin, si arah belakang kurang pedas kapna sidepanna piah enggo sisorong-sorongen ia. adi sekalak permakan biri-biri, tadingkenna biri-birina untuk 5 menit ah saja (buang air), reh ia ije denga kerina. tapi adi kambing tadingken 5 menit ah, adi ndai 10 ekor kin kerina piah tading 2 nari ngenca kari je.

ibas perpulungenta pe lit nge sibage e, adi jemaat kambing, kenca dung pemasu-masun “Amin”, “Byarrr”… mis naring ia kiam ku darat. la ia sabaren. biasana si deherken pintu depan nge sigalangna percuban e. labo main-main ibahan salamen kenca dung kebaktin. sisalam ras serayan Tuhan e ertina “ Dibata ateNa menjamah langsung” bukan penghormatan man pengkhotbah baik e pandita ntah pe Pertua/Diaken, tapi Dibata si langsung ateNa masu-masu kam perpulungen Tuhan. Banci kari perdiatekenNdu kenca dung kita kebaktin apai si jemaat kambing apai jemaaat Domba.

Tugas jadi Serayan Tuhan e labo Tugas si menukah emakana kami kerina pe Serayan Tuhan e perlu nge penampat ibas kam nari kerina perpulungen. amin la gia lit waktuNdu guna nampati dahin kami e, tapi ibas Totondu lah gia iingetndu guna notoken kami serayanNdu e kerina, segelah ngasup kami Ngelai Dibata erkelangken kam kerina perpulungen.

Dibata simasu-masu kataNa. Amin..

Selamat Melayani man Banta kerina Serayan Tuhan

Pdt. Julia Elprida Br. Ginting Suka, S.Th

Melayani di GBKP Runggun Penen

Klasis Medaan Delitua 

MERIAHLAH RAS ISE PE !

Khotbah Minggu 11 September 2016

Invocatio      : Tadingkenlah kejahaten, lakokenlah kai si mehuli, bulatkenlah ukurndu erbahan perdamen (Mazmur 34:15)

Ogen             : Pilemon 1:7-20 (Responsoria)

Khotbah       : Heber 12:12-17 (Anthiponal)

Khotbah

Sekalak bijak pernah ngataken sada statement bagenda “Hanya orang gila yang berharap agar semua orang menyukainya”.Tentuna statement enda idapetina kenca ia ngelakoken perenungen si mendalam. Memang adi siukur-ukuri i doni enda, ugapa pe kita mehulina tetap saja lit si rate segat man banta, ras ugapa pe kita jahatna tetap saja lit si rate senang erteman ras kita. ugapa pe labo piah kepeken adi siukur-ukuri keadaan sibagenda. adi bagenda nge keadaan si terjadi i sekelewetta, uga nge ndia caranta janah kai nge si arus ibahan kita gelah banci kita ermeriah ras ise pe.

Perpulungen si ni kelengi Tuhan, biasana adi ermeriahlah ningen e tentu ras temanta nge kita ermeriah. labo mungkin ras imbangta kita banci ermeriah. adi ras imbang tentu rubat naring nge kita. tapi selain erteman ras kalak si deban, enggo kin kita erteman ras dirinta sendiri? sebab enterem nge gundari jelma la erteman ras dirina sendiri. ula lebe kerna siterjadi ibas geluhna, kerna fisikna sendiri saja banci la terterimana.

Terimalah dirinta uga litna kita, la perlu sitambah-tambahi ntah pe sikurang-kurangi si la perlu ah. Ayo si la mbentar labo perlu tama segala macam produk pemutih erbahanca ayo e pe nggo belang-belang. alis si la mekapalsa ibere Dibata labo ka perlu icukur habis nca dungna sicoret-coret ka pake spidol alis piah nggo seri ras ageng e biringna, sebab la nyambung ras komposisi organ tubuhta sideban. emaka ermeriahlah la lebe kita ras dirinta sendiri.

Bahan ogenta ibas kitab Pilemon mereken pengajaren man banta, maka kita harus ngasup ngaloken kalak si deban sekalipun statusna eme budak. adi enggo ikataken budak, ibas paksa si e amin gia tuanna pe si salah tetap nge budak e si meling, tetap nge budak e si lepak. tapi kepeken hal si luar biasa sikataken Paulus man Pilemon “Buah ateku si kukelengi enda…” (ay.12). sekalak budak siianggap rendah ibas masa e justru iangkat martabatnya oleh Paulus. Paulus mereken sada syarat man banta adi Meriah ateta ras ise pe haruslah kita ngangkatken temanta sideban, derajatna, martabatna, ngasup min kita mpetunggungken temanta.

kai si rusur erbahanca la kita ngasup ermeriah? biasana kel jawaben kalak sinterem klise kal, eme erkiteken melala perbeben. tapi kai nina kitab Heber man banta sekalenda kerna perbeben ras percuban. ay. 12 ngatakenca “angkatlah tan ndu si kote…”, sienda nuduhkeencaa maka sanga lit perrciban ras kiniseran e labo perlu kita ngenehen ku kanan ntah ku kiri, tapi angkatlah ku datas, ertina maka penampat e situhuna rehna arah datas nari, eme Dibata. adi siarapken penampat arah kawes kemuhenta, melala gundari jelma nampati erkiteken ada maunya. ada udang dibalik batu, ada udang dibalik bakwan, ada udang di balik rempeyek, rsd.

kitab Heber secara keseluruhen ngatakenca maka Perbeben e eme “Kurikulum Pendidiken” tai  doni enda. adi kurikulum pendidiken tentu lit tingkatenna SD, SMP, SMA, S1, Rst. labo mungkin kuriken anak SMP ibahan 1+1=2. sebab pengajaren si e enggo idapeti sanga SD. bageka pe kerna perbeben si reh nderpa kita. adi reh beratna siakap perbebenta berarti kita enggo naik kelas, berarti enggo reh meganjangna sekolah kegeluhenta. sukses berarti kita ibas naik level kinitekenta.

adi pengangkanta kerna perbeben geluh endaa enggo tepat, tentu lanai bo berjut ayota amin gia melala kesusahenta. taapi ngasup nge kita ncidahken siaang ayota. sebab nina renungenta sekalenda ibas ay. 15 “Jagalah maka sekalak pe ola surut ibas lias ate Tuhan Dibata…” kalak si la surut ibas nggejabken lias ate Dibata, tek ras yakin ia maka amin gia melala kesusahen reh man bana labo e menghalangi ia guna tetap ermeriah ukur.

Siterakhir kerna tema nta “Meriahlah Ras Ise Pe !”, gelah banci kita ermeriah ras ise pe kitab heber ngandingkensa ibas ay. 15b “ Jagalah maka sekalak pe ola bagi sinuan-sinuan sipagit uratna, siturah nuhsahi nterem jelma alu racunna”. tersinget aku kerna sada lagu dangdut bagenda nina “Madu ditangan kananmu… Racun ditangan kirimu. aku tak tau mana yang akan kau berikan padaku”. Madu ntah Racun duana sienda lit ibas kita, pilihen ibas tan ta genduari enda siapai ateta sibereken man kalak sideban? Racun si pagit kin si banci munuh kalak si erbahansa justru la kita banci erdame ras kalak sideban, ntah mungkin Madu si mereken nanam entebu man kalak sideban. simeriaah iakap kalak ngalokensa janah pe meriah iakapna adi rembak ras kita.

Meriahlah ras Ise pe ! sebab enda singena ate Dibata guna ilakoken kita. Amin.

Selamat Melayani man banta kerina

Written by : Pdt. Julia Elprida Br. Ginting Suka, S.Th

Melayani di GBKP Runggun Penen

Klasis Medan-Delitua

PERMATA GBKP TERTEKI

Khotbah 04 September 2016

Invocatio     : Dage o anakKu, arus maka iusihndu perbahanen kalak si mehuli dingen nggeluh ibas kegeluhen si benar (Kuan-kuanen 2:20)

Ogen           : Kejadin 39: 1-6

Khotbah      : Keluaren 17: 8-16

Khotbah

ise kin iantara kita genduari enda si la pernah ngelakoken kesalahen? ise pang gundari ngangkat tan dingen ngatakenca maka iantara kita kerina si pulung ijenda ia nge si la pernah ngelakoken kesalahen sedekah geluhna. engkai maka sada pe kita la pang ngangkat tan? apakah enda menggambarken kerendahan hati, ntah enda mengisyaratken maka sitandai ise kin situhuna kita enda.

perpulungen si ni kelengi Tuhan, adi gelarna kita enda manusia denga pasti pernah kita ngelakoken kesalahen. janah la jarang ibas kita erbahan kesalahen e, justru erbahansa kalak si deban lanai tek man banta. tema nta sekalenda situhuna tergantung kita kuja ateta sibaba enda, “Permata GBKP Terteki”. engkai maka tema enda iangkatken ibas Minggu Permata si sendah? apakah sebegitu seringnya Permata erbahan kesalahen emaka Permata lanai Terteki seh maka tema enda iangkatken gelah mulihi min Permata GBKP e banci terteki? ibas piga-piga wari enda bergumul situhuna aku pribadi ibas nikapken khotbah enda. sebab enda ngerana kerna orang muda sijadi tiang gerejanta, sijadi penerus gerejanta 10 ntah 20 tahun ku depan enda.

enterem memang si idah genduari anak-anak muda khususna Permata si menyia-nyiaken masa-masa mudana. ibas kiningudanna e atena saja iempetkenna, labo iukurina uga kari kecibal geluhna ku pudi wari enda. padahal situhuna perpulungen kekelengen Tuhan, masa-masa muda, masa-masa Permata eme masa guna mematangkan pikiren, cara rukur ras pe tingkah laku, segelah ku pudi wari enda orang-orang muda e reh dewasana ibas ndalani kegeluhenna.

bahan renungenta sekalenda iajuk kita berfokus ibas piga-piga tokoh, eme : Musa, Harun raas Hur, bagepe Josua. ibas antara kalak enda kerina Josua me singudana. Musa paksa e jadi pemimpin kalak Israel, Harun ras Hur jadi imam si nampati Musa, janah Josua jadi suruh-suruhen Musa kel ngenca ia. tapi amin gia bage kepeken posisi Josua pe ibas peristiwa Israel erperang ngelawan bangsa Amalek, posisina e sangat fital. mungkin selama enda siisoroti kita eme kerna Musa si ngangkat tanna bagepe kerna Harun ras Hur si nampati Musa. tapi adi siperdiateken alu seksama kepeken peran Josua, orang yang masih muda paksa e, sangat ipercayaken Musa. isuruh Musa ia guna milih piga-piga dilaki guna erperang. tentu tugas enda labo tugas sembarangen, sebab adi dilaki si ipilih Josua labo dilaki si kuat, terlatih ibas peperangen ras pe mengandalken Dibata, tentu tetap nge kalak bangsa Israel erperang. tapi kepeken kepercayaan siibereken Musa man Josua, ibuktikenna maka amin gia ia sekalak si nguda tapi terteki ia ibas tugas siibereken man bana.

uga kita genduari? uga kerna tugas siibereken Dibata man banta seh paksa enda? terteki denga nge kita ibas ndalanken tugas e? Misi Dibata man doni enda eme guna ncidahken kedamen Surgawi arah kita. enggo nge kita ncidahken kedamen e i sekelewetta. ntah justru kita si erbahansa rebut keadaan sekitarta enda. mari introspeksi diri kita gundari, ula akri siakap kalak sideban rusur salah, kalak si deban rusur sumber keributen padahal kit ape termasuk nge ije. sierbahan lanai dame sekelewetta.

Permata khususna gundari, uga Permata itengah-tengah gerejanta enda? enggo nge terteki? ula lebe terteki, teridah saja pe lenga bo. anak-anak Permata-nta lenga banci menopang kategorialna sendiri. la ietehna pe kai arus ibahan ibas kategorialna sendiri. berbeda kel ras tokoh bahan ogenta sipeman ndai. “Jusuf”, sekalak si nguda denga tapi ia enggo mengemban tugas si mbelin. memang labo ibas hal perang bagi Josua ndai, tapi dahin-dahin siibereken man Jusuf sedekah ia tading i rumah tuanna eme Potifar, eme tugas kepercayaan si mbelin. seh maka Pustaka si Badianta pe mencatat maka tuanna e lanai kai pe perlu iukurina seakatan man saja ngenca.

labo terjeng dahin ibas rumah tuanna e saja ipercayaken man Jusuf tapi pe ikut raas kerina erta-ertaa tuanna e pe ipercayaken man Jusuf guna njagasa. apakah Jusuf ndatken kepercaayaan sibage alu mudah? tentu lang. Jusuf pe merangkak dari bawah. jadi juak-juak kel awalna Jusuf enda. tapi kepeken ibas ay. 2 ikataken “Tuhan si ngarak-ngarak Jusup, seh maka sangap ia ibas kerina pendahinna”. erkiteken kesangapen siibereken Dibata man Jusup e seh maka Jusuf pe terteki guna njaga kerina urusen rumah tuanna e.

perpulungen si ni kelengi Tuhan, anak-anak Permata itengah-tengah gerejanta enda perlu kal simaksimalken kiningudanna. sibereken ia ruang guna erbahan aksi, bereksperimen seh maka teridah ia itengah-tengah gerejanta, labo bagi kapal selam kecibalna. Tugasta nge ras-ras enda guna mereken pendampingan, pengajaren ras dorongen bagepe motivasi man Permata seh maka permata e pe banci terteki.

Orang-orang muda khususna Permata sigenduari, melala kel tantangen siihadapina. tantangen secara Global, pendidikan, pergaulen, pendahin, seh pe ibas milih teman geluh. tugasta genduari gereja (ngawan perpulungen, orangtua) guna menyiapkan anak-anak Permata nta seh maka ngasup ia ngalaken tantangen global e. ula kari erkiteken salah ambil langkah, lanai terteki anak-anak Permata nta, sebab memang labo sitik orang-orang muda simuat ntah pe ngelakoken perbahan si erbahansa kalak sideban lanai tek man bana.

emaka pengajaren arah invocation nta ndai ngatakensa “Dage o anakKu, arus maka iusihndu perbahanen kalak si mehuli dingen nggeluh ibas kegeluhen si benar” emaka man bandu Permata ula pediat terbuang masa muda ndu alu hal-hal si la erguna tapi pakekenlah kiningudanndu ibas ngalaken tantangen-tantangen geluh alu cara si benar. ibas pertarungen geluh enda tergantung dirindu sendiri nge nentuken posisindu: Menang, kalak ntah seri. ibas posisi siapai atendu dirindu? kam sendiri nentukensa.