IKUTKENLAH AKU

BAHAN SERMON KHOTBAH MINGGU 22 JANUARI 2017

Invocatio         : Mekuahlah ateNdu man bangku suruh-suruhkenNdu, maka alu bage banci aku nggeluh ngikutken ajarNdu (Mzm. 119:17)

Ogen               : Mzm. 27: 1, 4-9 (Responsoria)

Khotbah          : Matius 4: 18-25 (Tunggal)

Penaruh

Kekristenan labo sada agama ntah pe sada model pengajaren saja, tapi Kekristenan e lebih kubas sebuah gaya hidup (Life Style) siberorientasi man sada pribadi sigelarna Jesus Kristus. Adi sikataken maka geluhta berorientasi ku Yesus janah kit ape pengikut Yesus maka kita wajib nggeluh bali ras cara Yesus nggeluh. Enterem kalak singatakenca ia eme pengikut Yesus (Kristen) tapi kinatana life stylena bertolak belakang ras lifestyle Yesus. Emaka adi si kataken dirinta pengikut Yesus, maka kita harus tuhu-tuhu ngikuti Jejak-jejak Yesus.

Pendalaman

Ibas bahan khotbahta minggu enda lit dua kelompok kalak singikutken Yesus. Kelompok sipemena eme kalak si idilo Yesus secara pribadi. Iidahna otoritas Yesus seh maka responna ku Yesus pe positif, respon si dem alu totalitas. Simon ras Andereas minter itadingkenna jalana jenari ikutkenna Jesus. Yakobus ras Yohanes pe minter itadingkenna perahuna bagepe bapana, jenari ngikutken Yesus. Secara simbolis “nadingken jala/perahu” ertina eme nadingken dahin sindekah gelah banci ngelai Jesus penuh waktu ras pe “nadingken bapa” ertina memprioritasken Dibata lebih asangken keluarga. Simenarik ije eme lit kata “minter”, ertina ibas si e eme lalit penundaan dingen eme titik balik kehidupenna, janah pe banci sikataken eme dampak perjumpaanna ras Jesus.

Kelompok sipeduaken eme kalak si enterem ngikutken Yesus guna megiken pengajarenNa. Kalak e rehna ibas daerah siberbedaa-beda. Kalak si enterem e ngikutken Yesus mungkin erkiteken ngidah tanda sengget ntah pe mengalami kuasa Yesus.

Lit sada kebiasaan ibas anak-anak Jahudi zaman perjanjin baru. Mulai kin kitik denga biasana anak-anak Jahudi rusur ngikuti sekolah-sekolah siibahan rabi setempat (guru) seh anak-anak e umurnaa 13 tahun. Anak-anak siterbaik ras cemerlang nge si ikataken orang-orang yang terpilih. Siterpilih e selanjutna ngilkutken rabi setempat e lawes kujapa pe ia ngajar. Seh kari si terpilih e enggo banci jadi rabi ibas inganna ka. Tapi man anak-anak si la terpilih, biasana ia erbahan usaha-usaha perdagangen, erdahin jadi tukang kayu, peternak, nelayan ras sidebanna.

Adi sihubungken kebiasaan anak-anak Jahudi zaman si e ras kai siidahiken Simon Petrus, Andereas, Yakobus rass Yohanes berarti kalak enda labo kalak siterpilih, labo kalak si ianggap cemerlang ibas pengajaren rabi setempatna erkiteken dahin kalak enda eme nerusken dahin keluargana selaku penjala nurung. Tapi hal si menarikna eme Jesus labo ndarami kalak si terpilih, idaramiNa kalak si itolak rabi setempat. Jesus labo milih kalak si ianggap doni enda sebagai yang terbaik, tapi justru Ia nawarken undangen ngikutken ia alu kata-kata sisederhana “Mari, ikutken Aku” man penjala nurung si la ipandang istimewa. Lebih asa si e ikataken Jesus maka iajariNa me kalak enda gelah banci ndilo kalak sideban jadi ajar-ajar Jesus (penjala manusia). Ajuken enda jelas merupaken sada kehormaten. Kalak si empat enda labo ngikutken rabi setempatna tapi justru ia jadi pengikut Rabi siterbaik, Raja idatas segala raja.

Refleksi

Mari ras-ras sirenungken, Jesus kepeken mereken kehormaten man banta kerina, aku ras kam. Labo erkiteken kita sipaling hebat, si terbaik, terpintar ntah pe cemerlang, tapi erkiteken Dibata perlu orang-orang biasa bagi kita enda gelah ngusih Ia ras ncidahken kekelengen ibas gelarNa man sekelewetta. Kai si inehen Dibata labo si inehen doni enda, tapi pusuh. Bagi si pernah ikataken Dibata man Samuel ibas milih Raja man Israel “ola nehen ku gedangna ras kuga jilene rupana. La ia Kupilih, sabab pertimbangenKu la bali ras pertimbangen manusia. Adi manusia inehenna siteridah arah darat, tapi Aku Kupernehen pusuhna” (I Sam. 16:7). Pusuh si tulus, patuh ras engkelengi Dibata, pusuh sitergerak ibas ngidah kiniseran kalak sideban. Paulus pe negasken ibas suratna nina “ipilihNa pe kalak si la meherga, si hina, dingen si la terpake iakap doni enda, guna engkernepken kai si ianggap doni enda penting” (I Kor. 1:28). Enda labo berarti maka kita siibereken kepentaren ras keahlian bagepe bakap-bakat khusus la pernah ipilih Dibata, tapi ibas sienda Dibata nekankenca maka isepe, termasuk kalak si la terpake man doni enda bage pe terbuang, bali ergana iadep-adepen Dibata ras pe berkesempaten guna ndatken kehormaten ibas Dibata nari jadi pengikutNa.

Wari enda Tuhan ndilo kita alu cara si bali sanga Ia ndilo Simon, Andereas, Yakobus ras Yohanes, sue ras profesinta masing-masing. Misalken , man kalak si profesina ibas dunia kesehaten, nina Dibata “mari, ikutkenlah Aku, kubahan kam gelah banci mpepalem pinakit pusuh kalak si deban”. bagepe man insinyur “mari ikutken Aku, kubahan kam jadi pembangun kerina jelma sienggo sempat hancur erkiteken masa laluna”, janah man banta si profesinta selaku perjuma, nina Dibata “mari, ikutken Aku, kubahan kam gelah banci nuanken pengajarenKu ras pengajarenKu ibas pusuh enterem jelma”. Ibas pendilo Dibata sibage, sada undangen kehormaten man banta, siikutilah respon Simon, Andereas, Yakobus ras Yohanes. Ula tunda, ula ragu, ula tulak tapi minterlah patuh ras ikutken Ia. Ije me Dibata ncidahken kuasaNa ibas merubah kita, kalak si biasa guna jadi luar biasa.

Penungkun man banta gundari, Piga kalak si merespon pendilo Jesus? Manusia rusur memikirken untung-rugi ibas ngikutken Yesus janah si rusur iidah manusia eme kerugian ibas ngikutken Yesus erkiteken pemikiren manusia make logikana si terbatas. Enterem manusia la banci ngidah kemuliaan Sorga dibalik kiniseran; manusia la memahami kiniseran i doni enda kentisik ngenca. Emaka labo kita heran adi mayoritas manusia menolak, erbera-bera ibas merespon pendilo Yesus. Ikutkenlah Yesus wari enda, ulanai si tunda-tunda, emaka ibentukNa geluhta.

Pdt. Julia Elprida Br. Ginting’s, S. Th

(0853-6175-3339)

GBKP Runggun Penen Klasis Medan-Delitua

Selamat Melayani

Note : Adi lit tambahen kerna bahan enda, banci ka kita saling berdiskusi ibas kolom komentar. Bagepe adi lit kritik ntah pe saran guna mpehuli blog-ta enda banci ka imasukkenndu. Bujur. 

KITA IPILIH DIBATA JADI TERANG MAN BANGSA-BABGSA

Khotbah Minggu 15 Januari 2017

Invocatio : Surat enda ibas aku nari, Paulus si enggo ipilih Dibata jadi Rasul Kristus Jesus. Aku isuruhNa pembarken kegeluhen si ipadanken guna ialoken ibas persadanta ras Kristus Jesus (II Tim. 1:1)

Ogen : I Korinti 1:1-9 (Tunggal)

Khotbah : Jesaya 49: 1-7 (Responsoria)

Tema : Kita Ipilih Jadi Terang Man Bangsa-bangsa.

Khotbah

Setuju nge kita maka kalak Kristen sienggo nandai Dibata harus berbeda ras kalak sideban si lenga nandai Dibata? Kinatana genduari enterem enggo kalak si  ikataken Kristen, enggo nandai Dibata tapi labo ia nggeluh ibas ajaren Dibata e. Pengajaren kitab Jesaya sekali enda mindo hal lebih man banta. Adi siperdiateken ibas ay. 5 maka kepeken Jesaya ipilih Dibata guna maba bangsaNa mulih, tapi ternyata la bias adi e saja ngenca. Ibas ay. 6 ikataken maka bangsa e pe harus maba keselamaten man kerina bangsa i doni enda. Ibas ndahiken dahin e labo kepeken gampang-gampang saja, tapi jelas ikataken Jesaya ibas ay. 4 “enggo latih kuakap…” mawen ibas kita serayan e pe sigejabken ka bagi siikataken Jesaya. Tempa la siakap lit gunana kai sienggo idahiken kita. Ateta guna mpehuli ngawanta tapi kepeken ngawan e la nggit ipehuli. Siiyahken kebaktin, PJJ, PA-PA ras kegiaten sidebanna, banci ka nge lalap la ralo ibas kita ngajuk ia. Tempa-tempa enggo perlun kita rusur man bana, asangken ia nandangi gereja. Ma e nge si ihadapi kita tengah-tengah ngawanta? Tapi selaku serayan, ibas hal enda Dibata menuntut lebih man banta, asangken si deban.

Adi minggu enda kita ngerana soal terang, ugapa pe enggo semal nge siakap pembahasen e. enggo rusur nge sibegi maka kalak Kristen si tek man Kritus e harus maba terang. janah erkiteken rusurna sibegi kerna si e tempa-tempa anggap sepele kita, padahal ibas kinatana kurang denga nge sipraktekken kerna terang e.

Ibas sekitarta enda macam-macam nge sumber terang e, banci jadi Lilin, Lampu listrik, Obor/cubung bagepe matawari. Adi ngidah kerna sie termasuk kriteria terang si apai nge kita. Tentu terang si paling belin e pasti matawari, sada pe kita enda adi ikataken enggo ngasup maba terang bagi matawari pasti bangga kel kita. Hanya saja perpulungen kekelengen Tuhan, labo ka pas kel adi ateta jadi terang matawari e lalap. Mari cuba sirenungken adi ibas rumahta, si berukuren standard ersinalsal je terang bagi Matawari kai akibatna? Tentuna si tading ibas rumah e pasti ngisah kel akapna sebab terlalu melas kel terang e untuk ukuran rumah standard. Adi sanga ciger idarat rumah, terang ka wari, labo mungkin sisagani lilin, kataken kalak kari kita enggo man pekenan, erkiteken kai? Lit terang Matawari si lebih ersinalsal asangken Lilin ndai.

Kai ertina enda perpulungen Tuhan? Kepeken ibas kinata kegeluhenta enda terbeluh ka nge kita nempatken dirinta ibas sada situasi gelah jadi terang. Tentuna terang e ikataken kita terang adi ia reh ibas kegelapen. Bagekalah praktekna man banta manusia, ibas situasi ntah perbahanen si salah min kita ncidahken kebenaren, gelah memang tuhu-tuhu teridah kebenaren e. hanya saja lit ka manusia e kebenarenna ngenca iakapna enggo benar, la iperhadapkenna nandangi kebenaren si tuhu-tuhu ndai. Piah dungna kebenarenna e iibaratken kita bagi terang obor. Uga kin obor e? payo tuhu terang ibahanna tapi kedungenna mbiring ka nge igungta ibahanna. Erkiteken labo ia sumber utama terang e. emaka mari ibas bahan renungenta enda, cuba sisiksiki, terang siapai nge siicidahken kita rusur ibas kegeluhenta?

Surat Paulus man perpulungen Korinti mpertegas man banta maka maba terang e pe berarti kita maba kemalemen ate man kalak si deban, ernanam min tuhu-tuhu e man sekelewetta. Sekali jadi lit sekalak dilaki, ia selaku mantan serayan. Ibas akhir masa jabatenna ikatakenna “Enggo salang kel kuakap” engkai? “uelah, gundari lanai bo perlu aku lampas kel ku gereja, lanai bo perlu aku rusur kel PJJ, lanai bo perlu rutin kel aku er-PA”. enggo iakapna tugasna adi lanai ia jadi sekalak serayan, lupa ia maka lit ka nge kewajiben selaku ngawan ibas gereja. Adi bage terang si lit ibas ia ndai bagi terang obor denga, kenca nggo dung tugasna nerangi itadingkenna mbiring bekasna man banta. Tapi lain ka ras sekalak ngawan perpulungen si memang setia ibas kinitekenna, tep-tep kebaktin minggu irekamna khotbah siibegina mulai dari awal seh pendungina, kenca dung sie iberekenna man temanna sada perpulungen si enggo jompo/lansia, lanai ngasup ku Gereja, iberekenna man perpulungen si sakit. Gelah temanna si la lawes ku gereja pe tetap banci megiken pengajaren ibas kata Dibata. Bage nge maka ernanam terangta ndai man kalak si deban, terangta ndai terakap kel iakap temanta.

Bagi lilin gia ngenca terangta e tapi adi ibas sada ruangen si memang gelap kel tenuna sangat berguna terang e. hanya saja adi siperdiateken adi sisagani sada lilin ibas ruangen si gelap tentu isamping lilin e lit ka nge bayangen lilin e sendiri, gelap warnana. Kai ertina si e perpulungen Tuhan? Kepeken adi siukur-ukuri ija lit ersinalsal terang, ibas si e lit ka nge kegelapen si lalap mengikuti. Tapi amin gia bagepe tetap kita harus berkomitmen ngataken si terang e benar dingen si gelap e salah.

Kita enda enggo ipilih Dibata jadi terang man sekelewetta man bangsa-bangsa nina tema-nta, emaka marilah selaku tinepa Dibata si segambar ras ia berlakulah kita bagi arusna biakta manusia gambaren Dibata. Ula kita bagi ciptaenna sideban, Dibata ciptakenna bebek guna meramaikan doni enda, tapi rusur kel kita membebek la turi-turin, Dibata itepana Beo alu sorana si khas tapi kita manusia rusur kel kita membeo la jelas. Adi bage denga pengkebetta labo mungkin banci sehat kinitekenta. Tubuh jasmani-nta enda gelah sehat ia tentu cukup asupen nutrisina, vitamin, sayuren, buah-buahen ras sidebanna. Emaka ibas kiniteken e pe gelah ngasup kita ncidahken terangta man sekelewetta mari si pan ka buah sibervitamin ku kinitekenta, buah kai e ? buah Salak. Sebab buah Salak e ertina eme Selalu BAik DaLam BertindAK.

Dibata simasu-masu kataNa, Amin.

9Pdt. Julia Elperida Br. Ginting
(0853-6175-3339)
GBKP Runggun Penen
Selamat melayani man banta kerina

Note : adi lit tambahen kerna bahan enda banci ka kita saling berdiskusi ibas Blog-ta enda.
Bujur..

NANDAI DIBATA MUAT BAGIN IBAS DAHINNA (BERTEOLOGIA : BELAJAR UNTUK MELAKUKAN)

BAHAN SERMON PEKAN PENATALAYANEN

BERNGI SI – I

Invocatio : Alu meseksek ipindokenna man kami gelah ibereken kesempaten man bana guna ikut muat bagin ibas nampati kalak Kristen si i Judea (II Korinti 8:4)

Ogen : Ul. 29:10-15

Khotbah : Mat. 28: 20 ; 2 Kor. 8:1-15

Tema : Nandai Dibata muat bagin ibas dahinNa (berteologia: belajar untuk melakukan)

Kata Penaruh

Berteologi situhuna labo pernah terlepas ibas percakapan public erkiteken teologi e berhubungen kel ras kegeluhen enda. Sanga kita ndatken permasalahen, pada akhirna teologi ibutuhken guna mereken jawaben. Teologi eme kunci guna ndatken jalan keluar ibas erbage-bage kemelut si terjadi i doni enda. Ibas konteks kehhidupen bergereja, pelayanen si idukung pemahamen teologi harus ndatken soroten tajam. Siakui memang maka pemahamen teologi-ta pemena kel reh ibas Kekristenen Barat nari, tapi uga kin penerapenna ibas gereja Lokalta, tentu iperluken pemahamen lebih mendalam kerna si e. Ula min sempat teologinta e bagi monza, import arah barat nari. Padahal inegrina sendiri lanai ipake, tapi i negrita keberadaenna isyukuri. Lit jelma si mensyukuri kain monza, hargana murah ras terjangkau masyarakat ekonomi lemah, mulai kin pakaian dalam seh ku pakaian Jas. Tapi lit ka si la nggit make pakaian monza enda, erkiteken mela ikataken la bermartabat, lalit erga diri.

Pemahamen Teks

Invocatio : 2 Kor. 8:4.

Perpulungen i Makedoni paksa e pe situhuna sangana ngenanami percuban, perbeben, tapi ibas keadaan sibage rupana pe tetap perpulungen e nggit mereken penampatna guna dahin pelayanen kalak Kristen i Judea. Paksa si e Kalak Kriten i Judea lalit ibas ia sumber dana sicukup guna ngelanjutken pelayanenna i Judea, seh maka kalak Kristen i daerah sideban ipindoken guna ndukung ia kerina.

Ogen : Ul. 29:10-15

Nats enda eme Bagin Pidato terakhir Musa i Deleng Moab. Ibas Bagin enda isingetken Musa man kerina bangsa Israel, amin kai gia jabatenna baik selaku tuan ntah pe budak, baik selaku pemimpin ntah pe pegawai, baik selaku dilaki ntah pe diberu. Kerina ia ngaloken tanggungjawab ibas perpadanen si enggo ibahan Dibata. Perpadanen e eme bangsa e jadi bangsa Dibata janah Dibata ngenca jadi Dibata ibas bangsa e. tentu ibas tanggungjawab siibereken man bangsa Israel guna njaga perpadanenna man Dibata harus ngikutken ketetapen Dibata ibas Torat/ 10 pedah Dibata sienggo ibereken man bangsa e. Perpadanen e enggo ipeseh pemena i Deleng Sinai nandangi angkaten pertama bangsa Israel tapi angkaten e erbahan pemberontaken man Dibata emaka perpadanen e iperbaharui man angkaten simbaru i Deleng Moab, guna jadi persiapenna ibas memasuki Taneh Kanaan. Adi bangsa e patuh nandangi kerina kata perpadanen e maka Dibata pasti masu-masu kegeluhenna tapi man ise si la patuh nandangi perpadanen e ndatken kutuk/ukumen ibas Dibata nari. Sada ngenca carana bangsa Israel banci tetap ringan i Kanaan eme patuh ibas perpadanenna man Dibata.

Mat. 28: 20 ; 2 Kor. 8:1-15

Nats sipemena eme mandat siibereken Jesus man kerina ajar-ajarNa gelah ajar-ajar nerusken pengajaren sibenar sienggo isuanken Jesus sanga Ia i doni enda denga. Alu bage berita kebenaren e banci seh man kerina manusia, janah pe labo terjeng man ajar-ajar saja tapi man kerina kalak sienggo megiken pengajaren e pe arusna ertugas ka mpeseh kerna pengajaren e man sidebanna. Ibas nerusken pengajaren Dibata tentu lit melala tantangen ras hambaten emaka ipadanken Jesus maka Ia tetap ras kita seh ku kedungen zaman.

Nats sipeduaken eme persinget siibereken Paulus man Perpulugen i Korintus gelah nggit nampati dahin pelayanen i Judea. Kalak Korintus memang tipe jelmana susah untuk berbagi. Ibas 1 Korinti 11: 22, salah sada keadaan ija perpulungen Korinti si maba melala pangan merudu kel ia mangani panganna, seh maka lit ka perpulungen sideban enggo lumben bage pe lit ka si mabuk erkiteken besurna. Emaka ibas suratna enda Paulus memperhadapken Perpulungen i Korinti ras Perpulugen i Makedoni, sangat berbanding terbalik kel keadaan 2 perpulungen enda. Teladan Jesus cukup mereken asas: si kaya wajib menolong si miskin. Jesus e bayak, ndatken bagin kemuliaan BapaNa, jadi musil (manusia), nadingken Surga, guna mate i kayu persilang. Ipersingeti Paulus ka mulihi peristiwa i padang gurun nandangi bangsa Israel, eme kerna penimbunen pangan. Penimbunen e la menguntungken, tapi kesederhanaan terbukti mencukupi.

Aplikasi

Tangkas tuhu perkuah ate Tuhan man anak-anakNa. Kita me gundari anak-anakNa e si idilona guna muat bagin ibas dahinNa. Padan Dibata siisehkenNa man bangsa Israel gundari enggo seh man banta. Tentu adi ateta tetap lit iteruh pasu-pasu Dibata harus sijemak perpadanenta ras Ia selaku bangsaNa/anakNa. Bagi perpulungen i makedoni si mindo alu meseksek gelah ibere kesempaten man bana guna ikut muat bagin ibas nampati pelayanen i Judea, bageka lah searusna erburak-burak semangatta ngelakoken dahin Dibata e. arus ibas kiniriahen ukur labo ibas jungut-jungut. Dahin Dibata siiampeken man banta e labo sitik, emaka labo banci sindahiken dahin e sekalak saja. Tapi kerina kalak si tek ras nandai Dibata arus muat bagin ibas ndahiken dahin e.

Pdt. Julia Elperida Br. Ginting

(0853-6175-3339)

GBKP Runggun Penen

Selamat melayani man banta kerina

Note : adi lit tambahen kerna bahan enda banci ka kita saling berdiskusi ibas Blog-ta enda.

Bujur.. 

ARAH DALANNA ME ERDALAN KITA

BAHAN SERMON KHOTBAH MINGGU 27 NOPEMBER 2016

(Advent I)

Invocatio : Emaka sikapkenlah ukurndu katawarri pe. Metengetlah dingen tuhu-tuhu erpengarapen nandangi pasu-pasu si pagin ibereken Dibata man bandu sanga kerehen Jesus ku doni enda (I Petrus 1:13)

Ogen : Matius 24: 36-44

Khotbah : Yes. 2:1-5

Tema : Arah dalanNa me erdalan kita

Pengantar

Ibas pustaka si Badia lit piga-piga ayat sinuriken kerna kerehen Yesus sipeduakaliken. Janah lit ka pe perumpamaan-perumpamaan siituriken Yesus kerna si e. perumpamaan kerna juak-juak si tutus ras si la tutus (Mat. 24:45-51). Teringet pe kita kerna perumpamaan kerna 10 kalak singuda-nguda, 5 diberu si lenge ras 5 diberu si pentar (Mat. 25:1-13). Janah lit ka pe turin-turin kerna telu kalak juak-juak siibereken tuanna guna ngembangken talentana (Mat. 25:14-30).

Arah piga-piga kisah enda banci siidah maka perbedaan upah kalak si tutus dingen setia ndahiken dahinna cukup jauh beda, bertolak belakang ras upah kalak si la tutus dingen la ersikap ibas ndahiken dahinna, la erjaga-jaga ibas nimai kerehen tuanna. Kalak si tutus dingen setia ngaloken kemalemen ate, ngaloken pujin arah tuanna nari, ikut dat bagin ibas pesta si meriah singen itambahi ka upahna erlipat kali ganda. Tapi kai si terjadi nandangi juak-juak si la tutus, ia la ibere atan ibas pesta keriahen e, ia iukum, isampetken kubas ingan sigelap, janah pe ibunuh seh maka mate ia ibas kinisuin.

Enda jadi persinget si cukup keras man banta, maka genduari kita harus koreksi diri sendiri. Juak-juak siapai nge ndia kita, situtus janah setia kah ntah kin si dekahen jungut-jungut tupung ndahiken dahinta, dekahen tertaren-taren, la ersikap piah dungna nimpet me lampu-ta erkiteken keri minakna.

Isi

Bahan khotbah Yesaya 2:1-5 nuriken kerna nubuaten Nabi Yesaya. Nubuatenna si pemena e isina kerna kerehen kerajan dame sibakal terjadi (ay.1). ibas kerehen wari e pagi, kalak si megombang ras kalak si memegahken diri ipeteruk Dibata. Berita keselamaten siipeseh Yesaya berakar pada gagasen Raja sebage Mesias. Isi penting siituriken ibas nubuaten Jesaya enda eme:

Ayat 2-3, ngataken maka ibas wari si arah pudi pagi pajek rumah Pertoton janah bangsa-bangsa e pagi reh ku je, ndengkehken pengajaren Dibata gelah tetap banci erdalan arah dalan siipilih Tuhan man bangsa e.

Ayat 4-5, encidahken situasi erjengil, perang, simulihi isalihken jadi dame. Pedang jadi tenggala, lembing jadi sabi-sabi, ertinaa eme peperangen si ulihna kebenendingen kematen salih jadi dahin guna pehuliken, dahin sierguna janah mereken hasil simaba kegeluhen. Seh maka alu ukur meriah kerina kesusuren Jakup erdalan arah dalan terang siituduhken Tuhan man bana.

Bahan ogen sipemena Matius 24: 36-44 isina eme, ngingetken kerna kerehen Yesus sipeduakaliken e pagi ise pe lalit simeteh tanggalna, wari, bulan, tahun ras pe jamna. Kerina sienda itegasken maka Bapa si i Surga ngenca metehsa, janah e sendiri pe labo ietehna ndigan paksa e (ay. 36). Piga-piga hal sipenting arah nats enda eme:

Ay. 37-39, kerehen Anak Manusia e pagi desken kerehen lau belin tupung masa Nuah. Kerina manusia ndahiken dahinna bagi biasa, lalit sada pe jelma singarapsa maka seh me paksa e.

Ay. 40-41, tupung e lit kalak si ibuat janah lit ka pe kalak siitadingken. Piga-piga tafsiren ngatakensa maka kalak siibuat e me kalak siiangkat ku Surga guna ngaloken kegeluhen sirasa lalap, janah kalak sitading eme kalak si kerajangen doni, siharus ngalaken kiniseran-kiniseran si terjadi ibas doni.

Ay. 42-44, perintah guna erjaga dingen ersikap, sebab kerehen Anak Manusia e bagi sekalak pinangko, ija kerehenNa ibas paksa si la iarap kita.

Enda me sada persinget man banta gelah tuhu-tuhu sipakeken waktu nta alu payo, sidalani geluhta bagi uga arusna sekalak juak-juak sierdahin alu tutus, mengabdi nandangi Tuhan, sebab Ia me simada kita, arah Ia me gegehta guna nggeluh, janah man Bana saja me kita erdahin tupung ndalani wari-wari kegeluhenta.

Pengkenaina

Ibas minggu Advent sipemena enda, eme minggu pengarapen, penantian akan kedatangan Yesus Kristus selaku hakim man doni enda. Ibas pengertin sideban minggu Advent ngajuk kita ibas ersikap lako menyambut wari peringeten ketubuhen Yesus. Ibas kita ersikap, payo mbue man pekenan ibass dirinta. Mulai kin arah pola piker, cara bicara ras caranta nggeluh.

Arah nats Jesaya inubuatken maka lit pagi sada paksa maka doni enda dem alu kedamen, lanai lit perjengilen ras peperangen, tapi kegeluhen  si dem alu keriahen ukur ibas pengarak-ngarak Tuhan. Janah enda me kerina jadi arapen man banta gelah arah pengendesen ras kesetianta ngikutken Tuhan, maka atan kita ibas ngenanami kegeluhen s idem alu keriahen e.

Ogenta ngingetken kita guna erjaga-jaga ibas nimai wari kerehen Yesus sipedua kaliken. Wari kerehenNa eme bagi kerehen sekalak pinangko ija la sieteh katawri waktuna ras kuga carana. Wari kerehen Jesus eme wari penghukumen man kalak si ndalani kegeluhen alu ngandalken gegeh dirina jine bagepe kuasa-kuasa sideban sinuduhken dalan si la ngena ate Dibata. Tapi sipentingna pe arus siinget maka wari kerehen Jesus eme wari pengarapen man kalak sindalani kegeluhen alu ngandalken gegeh ibas Dibata nari sinuduhken dalan singena ateNa.

Invocation I Petrus 1:13, negasken ulihi man banta gelah nikapken ukur katawari pe, metenget dingen tuhu-tuhu erpengarapen siibere Dibata. Arah sienda maka banci lit dalanna kita ergegeh janah ngasup kita erdalan arah dalan siituduhken Tuhan man banta. Bali ras Dibata ngarak-ngarak perdalanen bangsa Israel tupung ndarat i taneh Mesir nari menuju ku Kanaan. Ija tupung suari Dibata mereken tiang embun guna narumisa, janah tupung berngi ibahan Dibata tiang api guna nerangi dalan siidalani bangsa e. Bage me belinna kekelengen Dibata nandangi kalak sienggo ipilihNa jadi sikerajangenNa. Teklah janah erlajarlah kita jadi kalak tutus dingen setia man baNa.

Selamat melayani ras mejuah-juah man banta kerina

Pdt. Julia Elprida br. Ginting's (0853-6175-3339)

Melayani i GBKP Runggun Penen

Note: Kritik dan saran silahkan email atau telp

Ke alamat email n no. Hp diatas..

Untuk tambahan masukan 

Banci lgsung koment ndu bas blog-ta enda.

RAJA PENAMPAT SINGUBAHKEN GELUHTA

Bahan Sermon Perpulungen Jabu-Jabu

13-19 Nopember 2016

Nats : Jesaya 9:1-7

Tema : Raja Penampat Singubahken Geluhta

Penjelasen Nats

Mari sipahami lebe konteks ibas kitab Jesaya enda sitertuang mulai bindu7-12. Mulai tahun 745 SM seh piga-piga tahun kudepanna, Raja Assur mengancam kedaulatan bangsa-bangsa i Palestina, erkiteken atena memperkuat kerajaanna. Pada awalnya Raja Assur nawarken bantuan man Raja i Israel Utara, gelah jadi sekutuna guna ngelawan musuh-musuhna, selanjutna iajukna ka Raja Ahas gelah bergabung ras persekutun kalak enda, tapi itulak Raja Ahas, emaka Raja Ahas pe jadi musuh dua kerajan enda (Aram ras Israel Utara). Sebagian besar kota Yehuda hancur ras ribuen kalak tewas, tapi Jerusalem lenga terkuasai. Ancaman bagepe serangen Raja Aram ras Israel Utara erbahan Ahas ras penduduk Yehuda mbiar. Tapi Raja Ahas labo mindo penampat man Dibata, ipindona penampat man Raja Assur ndai alu mereken melala upeti, tapi kepeken Raja Assur sienggo ngaloken upeti e reh labo guna nampati Raja Ahas. Ternyata “Bayaran/Upeti” la menjamin kebebasen, kedamen, ras pe keberhasilen, tapi rusuren ka e jadi bumerang man si mere bagepe singalokenca.

Ibas situasi sibagenda me Jesaya reh guna ngajuk Raja Ahas bagepe penduduk Jerusalem gelah merendahkan diri iadep-adepen Dibata, janah Jesaya pe sekaligus maba berita pengarapen keslamaten man bangsa e. iyakinken Jesaya Raja Ahas maka rencana Raja Aram bagepe Israel Utara labo berhasil, bagepe ancamen arah Assur nari pasti gagal, erkiteken Dibata enggo erpadan man Raja Daud maka tahta kerajaan e keturunenna ngenca banci mimpinsa. Raja Ahas seh kal biarna paksa e, la ia tek nandangi kai siikataken Jesaya. Ituriken Jesaya kerna sada tanda sibanci memulihken kedamen ibas kerajaan e (7:14-17). Ibas waktu dekat seh me tanda bagi siikataken Jesaya, eme kerehen Hizkia, anak Raja Ahas (9:1-7). Ibas masa pemerentahen Hizkia Yehuda ibas keadaan silebih baik. Erkiteken ia erbahan melala perubahan ibas setiap aspek kegeluhen, janah pe ia erkemalangen man Dibata. Kata Dibata pe simenjanjiken kemenangen man Yehuda enggo terbukti, Assur ras Israel Utara si mengancam Yehuda kedungenna banci italuken.

Itengah Situasi kesuraman hidup ras pe terluka erkiteken merasa dikhianati Raja Assur, bangsa Israel ndatken penghiburen ras pengarapen arah Dibata nari. Jesaya labo ngadi ernubuat kerna ketubuhen Hizkia saja, tapi teerdauhen asa si e. inubuatkenna maka reh me pagi sekalak Raja simemerentah Yehuda rasa lalap. Janah tanda-tanda kerna raja simemerentah e ikataken Jesaya alu 4 gelar eme: Penampat simeganjangna, Dibata simada kuasa, Bapa Sirasa lalap, ras Raja dame.

Raja Penampat situhu-tuhu e ngenca banci mengubahken geluhta. Kita banci jadi juru dame itengah-tengah konflik bagepe perselisihen ibas keluarga, ingan erdahin bagepe ibas bermasyarakat. Selaku juru dame, perlu siutamaken kepentaren arah Dibata nari. Selaku juru dame geluhta enda harus ndauh ibas sikap Materialistis, duniawi bagepe keserakahen. Ibas si enda tingkat spiritualitasta harus ncidahken geluhta s idem pengataken bujur man Dibata. Sebab tanpa Dibata labo kita ngasup ngubahken geluhta.

Adi bage, uga dage genduari geluhta? Enggo nge lit tekadta guna jadi juru dame man sekelewetta? Enggo Bersedia kin kita nadingken pola hidup duniawi seh maka keseluruhen geluhta enda banci ngusih perbahanen Yesus? Labo lit sideban sibanci mengubah geluhta, Raja penampat e ngenca si banci ngubahkenca sebab geluhta pe enggo ia empuna.

Selamat melayani ras mejuah-juah man banta kerina

Pdt. Julia Elprida br. ginting's

(0853-6175-3339)

Melayani i GBKP Runggun Penen

Klasis Medan-Delitua 

MEGEGEH IBAS TUHAM

Bahan Sermon Khotbah Minggu 20 Nopember 2016

(Minggu Pendungi Tahun Gereja)

Invocatio : Tapi erkiteken lias ate Dibata aku lit bagi si genduari enda. Janah lias ate siiberekenNa man bangku e labo sia-sia. Jingkaten aku erdahin asa kerina rasul-rasul sideban, aminna pe si e labo gegehku jine, tapi lias ate Dibata nge sierdahin ras aku (I Kor. 15:10)

Ogen : Mazmur 46:1-12 (Responsoria)

Khotbah : Kolose 1:11-20 (Anthiponal)

Tema : Megegeh ibas Tuhan

Perlebe

Keadaan naik turun kegeluhenta rusur kel erbahanca kita berada pada titik terendah. Titik terendah , e, eme keadaan sierbahanca kita sangat lemah ras kote. Adakalanya ibas kegeluhenta enda, kita berada ibas keadaan tak berdaya, lit waktuna dirinta e pe kepeken sangana mengahdapi masalah si cukup pelik, lit ka waktuna kita ngalami tempa-tempa eme tariken nafas terakhirta. Sanga kita lit ibas paksa kesusahen e rusur kel kita la banci ngidah dalan pulah man banta. Erkiteken enggo picet kel ukur ras pikirenta, bahkan mungkin keadaan e labo kentisik ngenca bahkan sampai berbulan-bulan lamanya. Amin gia kita enggo ngelakoken hal si benar tapi banci saja tetap kita la pulah ibas kiniseran e nari.

Pemahamen Teks

Pengakun Rasul Paulus sinotabene adalah bukan dari antara 12 Murid Yesus si tertuang ibas invocationta mungkin gundari enda sianggap hal si biasa saja. Tapi pernah kin kita ngogeken Invocationta enda arah sudut pandang Paulus? Labo hal si menukah man bana ndahiken dahinna guna jadi perberita si Meriah tapi kepeken icidahkenna kualitas dirina ibas si e. amin gia labo ia salah sada dari ajar-ajar Tuhan Yesus, tapi lebihen nge ia ndahiken dahin selaku perberita si meriah e asangakan ajar-ajar Yesus. Janah ibas kinijingkatenna e pe labo iakapna erkiteken beluhna tapi erkiteken Lias ate Dibata si nggit make ia jadi perberita si meriah.

Bahan ogenta sipemena ibas Mazmur 46:1-12 eme pengakun Pemazmur kerna kebesaren Dibata. Sienda teridah ibas bait-bait puisi/lagu mazmur siituliskenna enda. Ende-enden enda eme sada kesaksin iman yang paling mengesankan kerna Dibata eme penampat ditengah-tengah kesesakan. Harus siakui maka sukacita iman yang dimiliki pemazmur labo hal si mudah ibas manusia sanga ngalaken keadaan nggeluh si la bagi ukur. Kalak si tuhu-tuhu bulat ukurna erpengendes man Dibata ngenca banci erbahan pengakun sibagenda rupana. Kiniteken sinteguh enda banci jadi sikerajangen tep-tep manusia adi tuhu-tuhu tek ras pe meteh maka Dibata e lit itengah-tengahta janah pe meteh kerina siialaken kita ibas geluh enda. Arah tulisen mazmur enda jelas man bantam aka pemazmur paksa si e sangana mengalami ancaman yang dahsyat, “…aminna pe doni mundu-mundu, janah deleng gedap ku teruh lawit…”. Ancaman siimaksud ijenda banci saja gempa bumi. Bencana alam enda rusur terjadi i Palestina, janah menurut kalak Israel sienda terjaadi erkiteken gelora lautan iteruh Bumi. Labo terjeng kerna bencana e saja, tapi pe pemazmur nuriken keyakinenna maka kuta Sion labo banci irebut bangsa sideban erkiteken Dibata hadir i Sion guna njagai bangsa e. ende-enden pemazmur enda banci jadi sada pengajuk gelah kita nggit ngenehen uga luar biasana perbahanen Dibata man bangsaNa. Emaka ibas geluhta pe harus siakuken Tuhan e bagi Pemazmur katawari paksa pe ras ugapa pe keadaanta, harus tetap kita erpengendes ras labo pernah situndalken Dibata tapi setia min kita man Dibata segedang geluhta.

Paulus salah sada tokoh Alkitab, perberita si Meriah si melala mengalami hambaten ibas pelayanenna tapi bagi siisuratkenna ibas kitab Kolose sijadi bahan Khotbahta minggu enda ngakukenca maka adi ibas Dibata lah rehna gegehta e pasti megenggeng nge kita ngalaken kai pe si reh man banta. Tetap ngasup ngataken bujur (ay. 12) eme salah sada bukti nyata kalak si megegeh ibas Tuhan. Kalak singataken maka Dibata eme ulu gegeh situhu-tuhu pasti ngasup ngataken bujur man Dibata ugapape kecibal geluhna, la pernah turah ibas ukurna nalahken Dibata tapi tetap ia nggeluh setia man Dibata. Ngasup kita ngataken bujur e labo erkiteken bagi ukurta lalap siterjadi, tapi erkiteken sigejabken perkuah ate Dibata ibas kegeluhenta. Rasul Paulus tetap semangat ia erberita si Meriah, ibas mpermakani perpulungen erkelangken suratna, aminna pe paksa ia nulisken surat Kolose enda ia sangana ibas penjara (4:3).

Geluhta enda enggo Yesus kap empuna, sebab enggo itebusna kita alu darehNa, janah kit ape gundari jadi sikerajangenNa. Yesus enggo mperdameken kita ras Dibata emaka ulih kita erdame ras Dibata e me erdame ras temanta manusia. Adi Dibata tuhu-tuhu sibahan jadi gegehta pasti ngasup ka nge kita erdame ras temanta manusia. Gegeh Kristus si lit ibas kita sipake guna maba dame, janah pe teridah ibas kita nggit erdame. Adi kalak sideban la nggit erdame ras kita, paling tidak la kita erbalas ibas kejahatenna. Adi enggo sialemi salah kalak man banta, dahinta ilebe-lebe Dibata enggo dung, adi ia la ngasup ngalemi salahta, e enggo urusenna ka ras Dibata.

Aplikasi/Refleksi

Ibas sada paksa i tengah berngi, i rumah sekalak pandita erdering Hp-na. kepeken rumah sekalak perpulungen pasangan muda sangana kebakaren. Pendeta ndai langsung menuju ku TKP. Kenca pendeta ndai se hi rumah perpulungenna si kebakaren e sekalak petugas pemadam kebakaren ngatakensa bahwa keadaan enggo terlambat. siperbulangen kepeken masuk ku rumah siterbakar e guna nelamatken anakna si kitik denga, janah lanai darat-darat. Ieteh pandita e maka sindehara enggo ibaba ku UGD rumah sakit, emaka lawes ka pandita e ku rumah sakit. La kel ieteh pandita e kai si arus ikatakenna man sindehara e, sebab ia enggo kehilangen segalanya. Kai siarus ikatakenna? Kenca ia jumpa ras sindehara, ia sangana kundul, ayona sembab. Sope lenga pandita ndai ngerana sitik pe, sindehara ngenehen pandita e janah nina “Pandita, Dibata kap gegeh ku ibas ndalani geluh enda”. Sindehara labo secara tiba-tiba saja mengambil keputusen sibage, tapi pasti selama enda pe ia enggo melatih kinitekenna gelah megegeh ibs Tuhan.

Lit dua pilihan man banta ibas ndalani kegeluhen enda, kita banci erpenalem man gegehta ntah kita mindo suplemen tambahan tenaga man Dibata gelah reh gegehna kita ngalaken kerina hal si reh man banta. Kemuliaan Dibata eme hal si sangat hakiki. Kemuliaan Dibata terbukti ibelang-belang doni. Lit paksana Dibata ncidahken kuasana arah perbahanen-perbahanenNa si luar biasa (Maz. 46:9), salah sadana tentu ibas geluhta. Endesken geluhta man Bana saja, maka kita pe ndatken gegeh arah Ia. Dibata ipermuliaken adi tek kita man Bana, adi siendesken kerina geluhta ku Ia.

Ibas Tuhan ngenca banci kita megegeh, emaka adi ngasup ateta nggeluh ibas doni si dem keguluten enda tetaplah nggeluh ibas Tuhan. Kalak si nggeluh ibas Tuhan tetap paguh kinitekenna la pernah terugur sebab gejabna Tuhan e ngenca penampat situhu-tuhu ras tetap ngasup ngataken bujur man Dibata segedang geluhna. Emaka tetaplah nggeluh ibas Tuhan gelah malem ateta.

Selamat Melayani ras mejuah-juah man banta kerina

Pdt. Julia Elprida Br. Ginting’s

(0853-6175-3339)

Melayani i GBKP Runggun Penen

Klasis Medan-Delitua