JABU SIERSADA IBAS SIMEHULI

BAHAN SERMON KHOTBAH MINGGU

19 NOPEMBER 2017

Invocatio    : jabu ipanteki erpalasken kepentaren ras pengertin (Kuan-Kuanen 24:3)

Ogen          : Perbahanen Rasul-rasul 5: 1-11 (Tunggal)

Khotbah     : Perbahanen Rasul-rasul 18: 1- 3 (Tunggal)

Tema          : “Jabu Siersada Ibas Simehuli”

Kata Perlebe

Jabu eme sada lembaga sipemena lit ibabo doni enda. Leben lit persadan jabu asa persadan sideban, termasuk gereja ras Negara. Ajaren Reformasi ngataken jabu masuk kubas “Orde Penciptaan” (Kej. 2:18). Maksudna eme maka Dibata nge singerencanaken ras sinetapken litna jabu. Jadi, arah enda banci siertiken maka jabu situhuna palas kerina persadan si lit ibabo doni enda. Emaka nina Pdt. DR. Eddy Paimoen situhuna, labo lit masalah ibas gereja, labo lit masalah ibas Negara, sibermasalah situhuna eme jabu. Maksudna maka kalak s imbue masalah ibas jabu, janah lalit ibdatna serpang pulahna, kalak sibagenda me maba persoalen ibas gereja ntah ibas Negara enda. Ertina konvensasi kalak si la malem atena (bahagia) ibas jabu, biasa idarat jabu ipedaratna. Erkiteken Jabu e, rehna ibas rencana Dibata nari emaka arusna min jabu e ibabai ku hal-hal simehuli, sebab Dibata eme ulu kerina si mehuli.

Fakta Teks/ Pemahamen Teks

Ø  Ogen        : Perbahanen Rasul-rasul 5: 1-11

Perpulungen sipemena si tek man Jesus ersada ukurna dingen ersada penggejapenna (4:32), erkiteken si e kerina si lit ibas perpulungen e ipake guna keperlun ras-ras. Tapi kepeken ibas perpulungen sipemena e lit ka nge si la jujur perbahanenna, Ananias ras Safira. Duana ia ndayaken tanehna tapi hasil tukur taneh ndai labo kerina itaruhkenna man rasul-rasul. Sada bagin ngenca iberekenna janah sada bagin nari ibunikenna, Ananias ras Safira ersada arihna ngelakoken sibagenda rupana erkiteken ikuasai iblis ukurna. Lukas nulisken kisah pasangen enda kenca ia nuratken siibahan  Barnabas. Tapi berbeda ras Barbanas, Ananias ras Safira pekulah-kulahna maba hasil tukur taneh e. Ananias ras Safira atena mere kesan meniru bagi siibahan Barbanas. Cinta uang ras cita-cita guna ndatken gelar terhormat eme pintu siipake Iblis ibas merasuki ukur Ananias & Safira.

Kenca ipepayo Petrus kerna hasil tukur taneh ndai, tetap Ananias ras Safira labo ngataken situhuna tapi tetap mekeng ia melasken si la tuhu. La ietehna maka situhuna labo Petrus siibualina e tapi Kesah Si Badia (Kesah Si Badia ndemi dingen ngkuasai ajar-ajar ibas wari Pentakosta). Arah kata-kata Petrus (ay.4) jelas maka kalak enda labo wajib ndayaken ras nyerahken tukur taneh e. entah sope bagepe kenca idayaken pe, hasil tukur e banci ate-atena makesa. Dosa siibahan Ananias ras Safira eme kalak enda duana enggo ncedai persekutun perpulungen alu erbual (berdusta), jadi, lanai sehati ras sidebanna. Erkiteken si e, kata-kata siibelasken Petrus pe dem alu kuasa Kesah Si Badia. Kenca Ananias melasken kata si la tuhu minter ia mbulak dingen mate pe.

Ibas ay 7, “kira-kira 3 jam kenca si e……” banci siamati maka situhuna labo minter reh Safira ndahi Petrus. Banci jadi erkiteken enggo ndekah kal iakapna nimai perbulangenna i rumah, seh maka telu jam la mulih-mulih. Kemungkinen besar Safira atena nungkun man Petrus ija nge perbulangenna, engkai maka lenga mulih. Tapi sope lenga lit penungkunen e ipedarat Safira, minter ipepayo Petrus man bana kerna hasil tukur taneh ndai. Erkiteken la ieteh Safira kai sienggo leben terjadi nandangi perbulangenna seh makana tetap mekeng ia, kata bual siipesehna man Petrus. Ibas sienda pe Safira enggo erbual man Kesah Si Badia, janah ulihna eme Kematen.

Ibas paksa si e lit piga-piga anak perana si tedis dingen baluti dingen nguburken mait Ananias ras Safira e. anak-anak perana e kemungkinen ajar-ajar Petrus ntah pe kalak si sangana megiken pengajaren Petrus.

Ibas teks enda sieteh uga ulihna adi kalak ngelakoken si la mehuli, ngataken si la tuhu ntah pe erbual man Kesah Si Badia. Labo lit tersurat kai situhuna motivasi Ananias ras Safira ibas ngelakoken hal si la payo e, tapi tangkas man banta ulihna eme kematen. Tanda sengget si e, labo tanda sengget sipemena ilakoken Petrus, janah kalak si nterem bage pe perpulungen simegi kerna kejadin e mbiar ia. Banci jadi kejadin enda pe jadi persinget nandangi kerina perpulungen si pemena e, gelah ula erbual man Kesah Si Badia.

Kejadin enda isuratken labo sebagai ancamen ntah pe pebiar-biar singogesa tapi jadi peringaten gelah singogesa la isesatken. Ibas kejadin enda justru keutuhen perpulungen si sehati ras sejiwa, terancam. Erkiteken si e me maka Ananias ras Safira datken kematen sebab perbahanen si la mehuli arus itiadaken ibas perpulungen Tuhan nari, tapi amin gia bage tetap lit kesempaten untuk bertobat, sienda pe imaklumken Petrus (3:19)

Ø  Perbahanen Rasul-rasul 18: 1- 3

Kota Korintus jadi tempat kegiaten Paulus si penting. Enterem kalak Jahudi bagepe Junani jadi kalak si tek. Paulus seh i Korinti siletakna lit berkisar 50km Atena nari. Enda me ibukota propinsi Akhaya ras pe ingan tading Gubernur Romawi. Korintus eme Pelabuhen besar, kota e pe terkenal ibas praktik-praktik ketidaksusilaan. Enda me kota koloni Romawi siiduduki enterem kalak Romawi janah nggeluh seturut adat istiadat kalak Roma. Ibas kota e pe lit Rumah Pertoton kalak Jahudi entah pe Sinagoge.

I Korintus Paulus jumpa ras Akwila bagepe Priskila ndeharana, kalak enda duana pengikut Yesus Mesias. Akwila asalna i Pontus nari. Pasangen enda i pelawes Kaisar Klaudius i Roma nari. Kaisar mpelawes kalak Jahudi i Roma nari erkiteken kalak Jahudi i Roma lalap menimbulkan kerusuhen atas hasutan chrestus (ejaan lain dari Kristus. Paulus, Akwila & Priskila erdahin sebage tukang tenda. Pendahin selaku tukang tenda ntah pe tukang kulit eme usaha si mudah ibaba ibas perdalinen. Ibas perikop enda icidahken segelintir kisah ija Paulus kesilang i rumah pasangen enda, janah labo ngenca kesilang tapir as-ras ia erdahin selaku tukang tenda.

Mungkin memang kurang jelas ituriken ibas perikopta kerna uga pasangen enda, Akwila ras Priskila tuhu-tuhu ersada erbahan simehuli. Amin gia bage banci sinehen korelasina ibas kisah selanjutna 18 : 24-27, ija lit sekalak gelarna Apolos, ia sekalak si terdidik dingen ngajar ia kerna Jalan Tuhan ertina Jalan Tuhan Yesus. Erkiteken Apolos hanya meteh kerna peridin Johanes ngenca, seh makana kenca ibegi Priskila ras Akwila carana ngajar ibabana ia kurumahna, dingen ije me iajarken kalak enda man bana kerna Dalan Dibata alu lebih teliti. Labo terjeng Akwila sinjelasken man Apolos tapi pe ikut ije Priskila, ndeharana, bahkan gelarnaa nge leben isuratken. Ibas kisah sienda jelas isuratken maka kepeken Priskila ras Akwila enggo nampati dahin meritaken berita si Meriah, janah eme sada perbahanen si mehuli. Ersada arihna duana ibas erbahan simehuli.

Aplikasi/Perenungen

1.      Kisah Ananias & Safira situhuna mengejutkan. Ibas padan simbaru ijenda ngenca banci idapeti kita perpulungen si minter mate erkiteken dosa. Bagin enda banci jadi perenungen ras peringeten man perpulungen segelah ula mendustai Dibata.

2.      Ancaman kerna keutuhen ras kebadiaan Perpulungen ijenda teridah ibas internal perpulungen Kristen e, labo darat nari. Asa bancina situtup min pintu perukurenta terhadap penggodaan guna nipu ibas persekutun

3.      Iblis gunaken cinta manusia gelah terhormat ras cinta uang. Banci jadi isekelewetta pe sigejabken uga sifat cinta uang banci ncedaken kegeluhen pihak tertentu arah nipu ntah pe korupsi skala besar. Payo memaang kita butuh serpi guna keperlun geluh sitep-tep wari. Tapi waspadalah terhadap godaan si lit ibas serpi e.

4.      Dibata ngawasi dingen njagai kebadian Perpulungen. Menurut paulus, ibas keadaan tertentu enda jadi tugas pemimpin Jemaat (band. I Kor. 5:11-13). Tapi labo berarti pemimpin jemaat e harus bertindak bagi polisi. Pemimpin jemaat perlu mpermakani perpulungen si erdosa alu keleng ate (band. Mat. 18: 13-35).

5.      Priskila ras Akwila eme pasangan si memiliki kesehatian. Banci siperdiateken ayat-ayat sinulisken kerna pasangen enda, gelarna tetao itulisken berdampingen. Banci sibandingken ras kejadin Ananias ras Safira si bersehati ibas ngelakoken si la mehuli. Pengajaren sibanci itarik kita ijenda eme, Paulus ngajuk kita gelah sehati sepikir ibas hal si mehuli.

6.      Priskila ras Akwila eme pasangen Suami-Istri simediate nandangi dahin Meritaken berita Simeriah. Catatenna banci siperdiateken ibas ay. 11 ija Paulus tading ras pasangen enda sada setengah tahun dekahna.

7.      Jabu Priskila ras Akwila eme jabu si ngangkai kerna kata Dibata. Seh maka pasangen enda ka pe nuriken alu teliti kerna Dalin Dibata man Apolos, sekalak si terdidik dingen beluh ngerana.

Siterakhir, mari kita erlajar jadi jabu si sehati dingen mediate nanadangi dahin Dibata, janah pe jadi jabu singangkai kerna kata Dibata sekaligus jadi Pelaku Firman. 

TUHAN MULAHI BANGSANA

TUHAN MULAHI BANGSANA

 (Matius 9:35-38)

Ibas bahan ogennta enda siidah tuhu-tuhu kerehen Jesus ku bas kuta e mereken dampak dingen teladan si luar biasa guna man usihenta. Isiari Jesus kuta-kuta si meriah ras kuta-kuta si kitik. Piga-piga hal sinilakoken Jesus, eme:

1.      Ngajar Ia i rumah-rumah pertoton kalak Jahudi.

2.      IberitakenNa Berita Si Meriah kerna Kinirajan Surga.

3.      IpepalemNa erbage-bage pinakit.

Kerina sinilakoken Jesus erpalasken keleng ate. Mekuah ate Jesus ngenehen kalak si nterem e (ibas bahasa Indonesia: tergeraklah hati Yesus oleh belas kasihan), sabap kalak si nterem enda kote dingen lanai lit si ngepkepsa, bagi biri-biri si la ipermakani.

Pusat pengajaren Jesus emekap keselamaten ras Kinirajan Surga. Banci siidah maka pengajaren si isehken Jesus tuhu-tuhu maba dampak ku bas kegeluhen kalak Jahudi. Pengajaren si tuhu-tuhu berbeda ras ahli-ahli Taurat. Salah sada kelemahan ibas ahli-ahli Taurat, melala ia ngajar guna kepentingen dirina ras melala lanai erpalasken keleng ate ras kebenaren Kata Dibata. Nina Jesus, maka melala pengajaren-pengajaren ahli-ahli Taurat, merupaken peraturan-peraturan manusia (Mat. 15:9).  Jesus mulahi kalak Jahudi ibas pemahamen-pemahamen si salah kerna pengajaren-pengajaren agama.

Iberitaken Jesus kerna Berita Si Meriah kerna Kinirajan Surga. Berita Si Meriah si iberitaken Jesus tuhu-tuhu sirehna ibas Dibata nari ras Ia nge situhuna Berita Si Meriah e. Arah Jesus maka kita banci seh ku bas Kinirajan Surga e (Joh. 4:6). Kerehen Jesus guna mulahi kalak Jahudi ibas maut, sabap ia kap dalan keselamaten ras dalan ku bas Kinirajan Surga.

Ipepalem Jesus erbage-bage pinakit. Banci siidah kepedulian Jesus nandangi kalak si nterem, si erpinakiten. KepedulianNa tuhu-tuhu nyata arah Ia nggit pepalem kalak si sakit. Kerehen Jesus pe mulahi nterem kalak Jahudi ibas pinakit.

Kerina silakoken Jesus enda bukti man banta maka Tuhan mulahi bangsaNa, mulahi ibas kuasa maut erkiteken dosa-dosanta. Penting guna tetap ngejapken kerna keselamaten si enggo ibereken Tuhan man banta kerina arah anakNa Jesus Kristus. Alu bage, pendilo Dibata nandangi kita guna muat bagin ibas pelayanen ras erberita kerna Berita Si Meriah si lakoken alu tutus ras semangat. Mbelang man peranin, tapi kurang si ranisa; alu kata sederhana, melala pelayanen si banci silakoken tapi kurang denga si muat bagin ibas pelayaanan e. Maka arah PJJ-nta sekale enda, mari si ajuk perpulungen Tuhan guna nggit muat bagin ibas pelayanen, erberita ras jadi perpanjangan tangan Tuhan. Tuhan enggo mulahi kita ibas dosa nari. Pelayanan si banci silakoken kita mencakup ibas kerina dampar kegeluhen manusia: kiniteken, pendidikan, kesehatan, ekonomi, rsd.

Lagu si rusur si endeken kita eme KEE 108: Mbelang Me Kap Man Peranin. Lagu enda menjadi penyemangat guna tetap melayani ras erberita kerna Berita Si Meriah.

MPELIMBARUI KEGELUHEN ERSEMBAH

BAHAN SERMON KHOTBAH MINGGU 05 NOPEMBER 2017

(Minggu Reformasi Gereja)

Invocatio    : Sendah kubereken man bandu kuasa nandangi bangsa-bangsa raas kerajan-kerajan lako mbungkarken dingen ngeruntuhken, lako ngkernepken dingen ngeradasken, lako manteki dingen nuan. (Jeremia 1:10)

Ogen          : Markus 11: 15-19

Khotbah      : 2 Kronika 35: 20-26

Tema          : Mpelimbarui Kegeluhen Ersembah

1. Kata Perlebe

Ibas zaman genduari enda lit pandangen maka “manusia genduari lanai perlu iakapna nandangi rumah pertoton (ersembah)”, tapi situhuna pandangen si e la banci sianggap mewakili sikap manusia secara umum. Sebab ibas zaman genduari ka pe labo sitik kalak si perlu iakapna ersembah man Dibata, seh maka la akapna sikap ndalani kegeluhenna sada wari adi la ia ersembah man Dibata lebe (ertoto/saat teduh). Bahkan lit denominasi gereja tertentu situhu-tuhu teridah kemajunna, terkhususna kuantitas perpulungen. Tapi adi si soroti secara kualitas, labo beluh kita menilaisa soal maju mundurna gereja (ingan ersembah) e, sebab ermacam-macam motivasi kalak si reh ku rumah Pertoton. Arah bahan ogen bagepe khotbah ras invocatio-ta minggu enda, ibabai kita guna ngenehen uga kin situhuna kegeluhen ersembah si payo.

2. Pemahamen/Fakta Teks

·         Ogen : Markus 11 : 15-19

Jesus lawes ku Rumah Pertoton i Jerusalem, ije ipelawesNa kalak si erbinaga ras sinukur ibas kesain rumah pertoton e, itunggalingkenna meja-meja ingan nukar duit. Kenca si e ilakoken Jesus maka iajariNa kalak sinterem ibas isi Pustaka Si Badia kerna Rumah Pertoton. Kenca bage Iman-iman Simbelin ras guru-guru agama ndarami dalan guna munuh Jesus, tapi la ia pang. Kenca bage lawes me Jesus ras ajar-ajarna ibas kuta e nari.

Jerusalem, eme pusat ingan ersembah kalak Jahudi/Israel. Rumah Pertoton e ibagi jadi 3 bagian, eme : ibas (imam besar, guru agama/lewi, pria dewasa), kesain (diberu), idarat (Non Jahudi, pemungut cuke, kalak cacat, rsd). Pembagin e ibahan erkiteken ibas masa padan si Mbaru orientasi jelma eme kelompokna, emakana identitas ras status sekalak jelma itentuken kelompokna ibas massyarakat. Jesus meteh maka keadaan Rumah Pertoton paksa sie lanai bagi arusna. Rumah pertoton siarusna mereken kenyamanen ras kesetaraan ilebe-lebe Dibata, justru ije terjadi pembedaan stratifikasi masyarakat. Situhuna Jesus sangat menghormati Rumah Pertoton, rasa hormatNa e dungna mendorong ia gelah mpelimbarui orde yang ada, Rumah Pertoton paksa si e ipandang Jesus jadi alat sebagai penutup kegersangan Rohani bangsa e.

Kegersangen e teridah ibas carana ersembah man Dibata. Ibas Jesaya 56:7b ikataken maka Rumah pertoton e ingan ersembah kerina bangsa, tapi kepentingen status kelompok atas (Jahudi) erbahansa kalak si metunggung masuk kubas rumah pertoton e hanya kalak Jahudi saja (Pria dewasa), sementara si labo kalak Jahudi inganna idarat Rumah pertoton e. selanjutna kebobroken spiritual paksa sie itambahi alu litna kalak sierbinaga ras ingan nukari duit i kesain rumah pertoton e, padahal kesain rumah pertoton e itetapkenna jadi ingan ersembah man diberu, tentuna proses jual-beli si gejek i kesain rumah Pertoton erbahansa diberu si ersembah lanai banci fokus man Dibata. Bagi kalak non Jahudi, cacat ras pemungut cuke si inganna i darat rumah pertoton e, tentu terganggu alu litna proses jual-beli i kesain Rumah pertoton e.

ngidah kinilaraturen si lit i Rumah Pertoton e, Jesus ngandingkensa ingan e bali bagi asar Penamun. Tentuna asar penamun ras Rumah Pertoton eme dua hal si sangat bertolak belakang. Sanga Jesus ngajarken kalak sinterem kerna Rumah Pertoton nembeh kal ate Imam-imam simbelin ras guru-guru agama sebab kalak sinterem megiken pengajaran Jesus, emaka idaramina dalan guna munuh Jesus.

·         Khotbah : 2 Kronika 35:20-26

Kata kunci ibas ay. 20 eme “Kenca Raja Josia ngelakoken kerina e …” nandaken maka perlu si perdiateken perikop sebelumna. Ibas pasal 35: 1-19, ituriken uga Raja Josia patuh man Tuhan dingen ngerayaken Paskah bagi siiperentahken Dibata. Selama enda perayaan paskah lanai ilakoken bangsa Israel erkiteken Rajana si memerentah eme kalak si la erkemalangen man Tuhan, tapi kenca Josia jadi Raja kegeluhen bangsa Israel mulai berobah, mulihi ngikutken kata Dibata. Mulana kegeluhen ersembah bangsa e seh kal bobrokna, bangsa e nembah man (dewi asera, baal, rsd), dewa-dewi si lit inegeri e tapi kenca Josia jadi Raja, berhala-berhala e kerina ras ingan ersembah man berhala e iruntuhken (34:3). Kenca si e ibahan Josia me perpadanen ras Dibata guna tetap patuh ras ngikutken undang-undang Tuhan alu bulat ukur rikut pe si jadi perentah man bangsa Israel (34:31).

Amin gia Josia icatatken, eme sekalak si merentah bangsa Israel gelah jadi bangsa si erkemalangen man Tuhan tapi tetap saja lit kekurangenna, seh makana ia mate ibas peperangen ngelawan pasukan Neko Raja Mesir.

·         Invocatio : Jeremia 1:10

Kenca kematen Raja Josia, raja-raja si memerentah i Israel mulihi lanai erkemalangen man Dibata seh makana bangsa e itaban ku Babil. Jeremia sekalak Nabi si lit itengah-tengah bangsa Isrel, ia tetap mpersingeti bangsa Israel gelah patuh ersembah man Dibata janah nadingken penembahen si la payo. Jeremia pe ikut muat bagin ibas mpelimbarui kegeluhen ersembah bangsa Israel. Selanjutna Dibata make Kores, Raja Persia guna merentah bangsa Israel mulihi i pembuangen nari ku negerina, janah kegeluhen ersembah man Dibata pe ipekena mulihi (30:1-3).

3. Pengkenaina/Aplikasi

(1)   Manusia eme tinepa Dibata, sendalanen ras sie maka patut nge manusia ersembah ban Dibata sinepa ia.

(2)   Rumah Pertoton e, ingan ersembah man DIbata. Tentuna kebadiaan Rumah Pertoton e pe perlu sijaga. Sebab adi Rumah pertoton e la Badia tentu labo banci ije kita jumpa ras Dibata si Badia

(3)   Seiring berjalannya waktu, tentuna cara-cara ibas ersembah man Dibata pe mulai lit perobahenna. Lit perobahen si positif lit ka si negatif. Emakana selaku kalak si erkiniteken tentuna arus kita metenget nandangi perobahen siterjadi. Hal si positif sibanci membangun kinitekenta banci si pake, tapi si negative sincedaken hubungenta ras Dibata perlu sipedauh.

(4)   Pemimpin ntah tokoh pengajar ibas Rumah pertoton e tentuna harus ngajarken simehuli erpalasken mehamat man Dibata ras guna Kemuliaan Dibata labo guna popularitas diri sendiri. (band. Raja Josia, Imam-imam si mbelin ras guru-guru agama, bagepe Jeremia).

(5)   Kegeluhen ersembah man Dibata arus terus ipelimbarui bagi sienggo ilakoken Raja Josia ras nabi Jerema bagepe Tuhan Jesus, tokoh Reformator ibas teks ta enda me sijadi gegeh ras usihenta. 

NANDE SI ERKINITEKEN

BAHAN SERMON KHOTBAH MINGGU 15 OKTOBER 2017

Invocatio : “Kupasu-pasu ia, Kubereken ia mupus anak dilaki man bandu; ia jadi nande bangsa-bangsa janah ibas sinursurna nari lit pagi si jadi raja” (Kejadin 17:16)

Ogen : Rut 4: 13-22 (Tunggal)

Khotbah : Matius 15: 21-28 (Responsoria)

Perlebe

Ibas Sidang sinode GBKP i Tigabinanga tahun 1956 igagas me ide guna erbahan sada organisasi pernanden GBKP. Guru Agama Rahel Br. Sinuraya itugasken guna mpelopori pembentukenna. Ibas tanggal 16 Oktober 1957 terbentuk me kepengurusen Moria GBKP si pemena. Kenca si e organisasi Moria pe isesuaiken rass keperlun si lit ibas wilayah pelayanen GBKP, mulai i pusat, klasis seh ku rungun ras perpulungen bagepe sektor. Tujun Moria GBKP eme guna nampati pernanden GBKP nandai dingen ngelai Dibata ibas persadanna selaku bagin gereja sedoni bagepe anggota i tengah-tengah keluarga ras masyarakat.

Pemahamen Teks

• Ogen  Rut 4: 13-22

Kitab Rut gambarken kitab kerna kesetian manusia. Penulis kitab enda la ieteh. Pada dasarnya kitab enda eme kisah kesetiaan Rut nandangi simetuana Naomi ibas kecedaan ate Naomi. Boas, singgantiken perbulangen Rut ndube meteh maka lit denga ade-kade sideban silebih ndeher hubungenna ras Rut, seh kedungenna ibas pasal 4 ijelasken uga proses akhirna Rut jadi ndehara Boas. Arah sejarah kisah kegeluhen Rut enda kita meteh maka Dibata tuhu-tuhu perdiateken kegeluhen si tek. Piga-piga bukti campur tangan Dibata ibas hubungen antar manusia bagepe bukti kiniteken Rut, eme :

1. Ibas kesetiaan Rut nandangi Naomi sisangana erceda ate (1:1-22)

Kenca Elimelekh, perbulangen Naomi mate, dua kalak permainna ndukung ia gelah mulih ku kuta. Tapi kedungenna Rut ngikutken si Naomi ku Betlehem, erkiteken la atena ngidah simetuana e merana ibas masa tuana.

2. Ibas perjumpaan Rut ras Boas (2: 1-23)

Perbahanen si mehuli ibas Boas nari nandangi Rut ngelebihi hal si lazim terjadi paksa e. Rut ras Simetuana pe radu ras ermeriah ukur ibas perbahanen Dibata si mehuli, erkelangken Boas.

3. Ibas Tindaken Boas nandangi Rut (3:1-8)

Sekali nari siidah kiniulin Dibata nandangi Rut, situhuna Boas labo kerabat sindeherna kal ras Elimelekh, tapi ia ngelakoken hal si mehuli nandangi Rut, bersedia jadi “Sanak Penebus”.

4. Ibas hubungen Perjabunna (4:1-22)

Boas erjabu ras Rut, ia mereken sekalak anak dilaki (kempu) man Naomi. Janah arah anak enda nari ka me reh pelopor garis keturunen raja-raja (Daud)

• Khotbah Matius 15:21-28

Ibas zaman Tuhan Yesus, guna lawes ku ‘luar negri’ labo hal si sulit erkiteken labo man urusen surat-surat izin. Ibas teks renungen enda Jesus sangana i luar negri ertina ia reh ku kota Tirus ras Sidon, eme diluar negeri kalak Jahudi. Idaerah e la mungkin ia itangkap suruh-suruhen Herodes Antipas, idaerah e Ia terpisah ras pemimpin-pemimpin agama Jahudi. Idaerah e me Jesus banci ngajar murid-muridNa alu teneng. Sanga Jesus erdalin i daerah e, reh me sekalak diberu kanaan, alu sorana si megang ia ngelebuh Jesus (gejek iakap murid-muridNa), tapi la ialoi Jesus. Kenca diberu kanaan e nuriken pemindonna man Jesus, labo ka minter ibereken Jesus siipindonna e. “Bangsa Israel desken biri-biri si enggo lalar kap, janah Aku isuruh Dibata man guna ia ngenca” (ay. 24). Amin bage gia pengaloi Jesus tapi diberu kanaan ndai tetap meseksek mindo penampat Jesus. “O Tuhan sampati min aku”, hal menarik ibas kalimat diberu e, erkiteken ibas pemindon na ia menyatu ras anakna, la ikatakenna “…sampati min anakku..”

Janah sekali nari kepeken Jesus seakan-akan nulak pemindon diberu kanaan e “La patut ibuat nakan anak-anak jenari ibereken man biang”, ibas paksa si e kalak Jahudi biasa nggambarken kalak kafir (non-Jahudi) alu “biang”. Tapi Jesus ijenda situhuna make istilah si halus. Engkai? Sebab biang siimaksudken Jesus eme “anak biang” (biang rumahan, tading ibas rumah, biasa kundul/medem iteruh meja dapur), labo “biang liar” (dalam artian kotor, darangen, mbau, rsd). Amin bage gia pengaloi Jesus man diberu kanaan e tapi tetap ia megenggeng, la ia surut, la menek ukurna, la ia tersinggung, semangat dingen arapenna kerna anakna belinen asangken ketersinggungen si lit ibas pusuhna. Bersih kal ukurna ibas ngarapken anakna malem. Perukuren sienda me erbahanca ia erjimpuh dingen make kata “rimah-rimah”. Diberu kanaan e tek, maka ‘rimah-rimah’ saja pe siidatkenna ngasup pepalem anakna. Kinigenggengen diberu kanaan e memang jadi penekanen utama ibas teks enda, seh maka kinigenggengenna e erbahanca Jesus nampati ia.

Aplikasi

Arah tema ‘Nande si Erkiniteken’, maka banci sitarik kesimpulen kerna ciri-ciri sekalak nande/diberu si erkiniteken, eme :

1. Sifat Rut : dem alu keleng ate (nandangi simetuana)

Dibatanta eme Dibata si tertib, emaka kalak si erkiniteken pe tentu nggeluh alu tertib (menaati aturen), bagi Rut ngikuti aturen/budaya si lit ibas bangsa Israel.

2. Ketubuhen sekalak anak itengah-tengah jabu eme sada keriahen. (band. ras masalah sosial kerna ketubuhen anak si la bagi ukur)

3. Megenggeng, la pergelut ( karakter diberu kanaan)

Semangat tetap guna njagai isi jabu, bagi semangat diberu kanaan e guna nelamatken anakna. (band. ras erbage pinakit sosial zaman gundari. Narkoba,la tutus sekolah, seks bebas, kegutulen zaman sianggap biasa)

4. Saber nimai penampat ibas kegeluhen, bagi diberu kanaan e. 

Written By, Pdt. Julia Elperida Br. Ginting's, S. Th

(0853-6175-3339)

Melayani di GBKP Runggun Penen

Selamat melayani ras mejuah-juah man banta kerina

Klasis Medan Delitua

DIBATA NGUKUMSA KALAK SIERLUA-LUA

Bahan PJJ GBKP 24-30 September 2017

Dibata Ngukumsa Kalak Si Erlua-lua

Efesus 5:1-5

1.      Surat Efesus e me sada kitab si itulisken man perpulungen Efesus si menyangkut pengarahan-pengarahan praktis kegeluhen kalak si tek, e me kuga siarusna kalak si enggo ngaloken Yesus Kristus, arus nggeluh ibas kekudusan (kebadian). Latarbelakang mayoritas anggota perpulungen i Efesus e me perbegu. Surat enda isuratken Paulus ibas penjara Roma nari. Paulus menekanken maka kalak Kristen arus ngusih Kristus. Kalak Kristen arus jadi “imitator of God” entah pe “peniru Tuhan”.

2.      Kalak Kristen arus ngusih kekelengen Dibata, “kehidupan yang mengasihi dan mengampuni”. Kita arus ngusih kepatuhen Yesus nandangi Bapa si ngutus Ia, bagepe ngusih kuga Kristus enggo engkelengi kita manusia (arah mpersembahken diriNa man gunanta).

3.      Paulus ngerana maka kegeluhenn kalak Kristen arus ndauh ibas “erlua-lua” nari. Kebiasaan kalak perbegu (Yunani-Romawi) ibas jaman si e erlua-lua labo ianggap sebagai dosa. Bahkan, ibas kuta Korinti lit rumah persembahan Baal ija enterem diberu melayani alu njadiken dirina “pelacur suci”. Maka ibas ayat 3 Paulus memperkenalkan buah kiniteken eme kualitas moralitas simbaru sebage kalak si enggo ijadiken anak-anak Dibata: nggeluh bersih, badia, erlagu mehuli, bagepe ibas kegeluhenna terpuji gelar Tuhan.

4.      Ibas ayat 5 ituriken Paulus kai si jadi akibat/ konsekuensi adi la nggeluh alu badia (erlua-lua, erlagu la mehuli, meranggap, cakap caram, cakap si lang-lang) la dat bagin ibas Kinirajan Kristus ras Dibata.

5.      Kita selaku gereja arus tetap ngingetken (pribadi ras komunal) maka ula sempat kegeluhennta bagi si la ngena ate Dibata. Cara nggeluh zaman genduari si erpengakap maka pergaulan bebas (seks bebas), judi, narkoba, rsd e merupaken hal biasa/ lumrah arus ilawan. Bagi Rasul Paulus, gereja pe arus mengambil peran. Peran gereja: mengingatkan, menerangi dan mengarami.

Terang: bukan menghakimi, garam: mengubahkan.

Selamat Melayani man banta kerina

Written by : Pdt. Julia Elprida Br. Ginting Suka, S.Th

(0853-6175-3339)

Melayani di GBKP Runggun Penen

Klasis Medan-Delitua

SERAYAN MEGEGEH IBAS TOTO PERPULUNGEN

Bahan Sermon Khotbah Minggu 01 Oktober 2017

Invocatio :

Bage pe ertotolah kerna kami, gelah ibereken Dibata man kami kesempaten si mehuli guna meritaken kataNa, guna nuriken rahasia Kristus

(Kolose 4:3a)

Ogen : Mazmur 72: 1-7 (Responsoria)

Khotbah : Epesus 6: 18-24 (Tunggal)

Pengantar

Lit piga-piga istilah si rusur ipake ibas Padan sindekah kerna ertoto, eme : tepilah (Doa Permohonan), palal (berdoa), paga (bersekutu dengan Allah), zaag (Doa teriakan dan tangis), qara (Doa seruan).[1] Ertoto ibas padan sindekah eme hal sipaling penting ibas hubungen antara jemaat ras Dibata. Ibas padan simbaru piga-piga istilah sinjelaskensa kerna ertoto, eme: prosekumai (Doa pribadi), ganupeto (Doa meminta pertolongan), prokuneo (Doa penyembahan & Doa bersama dalam ibadah umum).[2] Ertoto ibas padan simbaru mulai ibangun erpalasken usihen sienggo ilakoken Jesus ibas ‘Pertoton Tuhan’.

Rikut ras Minggu Notoken Serayan Tuhan, sada penungkunen lebe nandangi ngawan ni perpulungen, pernah nge itotokenna serayanna? Banci saja erbage jawabta kerna penungkunen enda. Amin kai gia jababta, pernah ntah lang, nuate ibas kegeluhen pelayanen ibas doni sierbage tantangen siman alanken guna mpebelangken berita si meriah arusna sipebelin baginta guna muat bagin ibas notoken kerina serayan Dibata. Adi la kin itumpak-tumpak alu pertoton perpulungen, banci ngelabuh nge serayan e. enda me siituriken ibas pengalamen Rasul Paulus ibas meritaken berita si Meriah.

Pemahamen Teks

·         Mazmur 72: 1-7

Mazmur 72 enda berbeda ras mazmur sienggo leben itulisken ibas pasal-pasal sebelumna. Jenis toto enda masuk kubas jenis toto permohonen. Toto permohonen endaa ipenangkih guna sekalak Raja kesusuren Daud simemerentah ibas sejarah. Raja e iarapken banci menjamin keamanen bangsana arah serangen bangsa sideban nari, membina masyarakat yang adil dan makmur, khususna memperjuangken hak-hak orang lemah, iarapken ka gelah gelar Raja ras nama baik bangsana ihamati ibelang-belang doni. Kenca sekalak Raja kundul ibas Takhta Daud i Jerusalem tapi la memenuhi arapen enda, maka mazmur enda pe ipenangkih jadi toto permohonen gelah Raja e berobah sikap banci jadi Raja si bijaksana, memerentah guna kepentingen kalak enterem, njagai ras memajukan golongen kalak si miskin ras tertindas. [3]

Pemerintahan Rajawi merupaken tema siisajiken Mazmur enda, inti mazmur enda eme kerna kerajan siideal siituangken ibas 3 garis besar, eme : (1) sifat keutamaan dari pemerintahen Raja eme hukum ras keadilen. Hukum guna penataan ras praktik moral sedangkan keadilen eme prinsip dari watak dan moral e. (2) hubungen keadilen ras Dibata e erbahanca mengalir keserupaan dengan Allah ibas ia, siigambarken alu hubungenna ras Rayatna, keprihatinenna nandangi kalak musil bagepe perlawanenna ibas menentang para pemeras. (3) ibas padan sindekah buah keadilen eme kesuburen alamiah bagepe kesejahteraan baik secara pribadi ntah pe masyarakatna.

Penggenapen mazmur enda kerna kehadiren sekalak Raja bagi siitotoken ibas tentu la idapeti iantara manusia, bagin enda justru ndeheer ras nubuaten Mesianis si lit ibas Jes. 11: 1-5; 60-62. Ibas diri Mesias ngenca karakter ras kepemimpinen Raja sisempurna, bujur, adil ras kekal serta tidak terbatas banci sidapeti.

·         Epesus 6: 18-24

Bahan khotbah Minggu enda nuriken kerna aturen ibas kegeluhen persadan ibas perpulungen ni Tuhan. Janah ibas kegeluhen ka;ak si tek bagepe ibas ndahiken pelayanen e perlu kali a dukungen kerina perpulungen. Rasul Paulus ngajuk perpulungen gelah ertoto : (1) tutus ertoto , kegeluhen siertoto jadi sada biak siperlu ipebelin ibas kalak sierkiniteken. Sabab pertoton jadi sada hubungen simehuli antara manusia ras Dibata ibas erbage cabal geluhna. (2) Ertoto guna serayan, dahin meritaken berita si meriah siidahiken Rasul Paulus tentuna enteram kalak ngelawanca, seh maka dahin meritaken berita si meriah e maba ia kubas penjara. Ibas kecibal sibage rupana Rasul Paulus perlu dukungen gelah tetap ia pang ngerana dingen mpetangkas rahasia berita si meriah e, bagi arusna ia ngerana. “gelah ibereken Dibata kata-kata sipayo  adi aku ngerana…” guna tugas si e Paulus memerlukan keberanian khususna ibas pemeriksan pengadilan selaku tawanan gelah kesaksin siiturikenna e la terlemahken. Surat Paulus nandangi perpulungen i Efesus nuratken gelar Tikikus. Ia me simaba berita kerna keadaan Paulus man gereja-gereja i Asia, ipujiken Paulus ia selaku serayan si tutus. Alu maba berita kerna kecibal Paulus i Roma, bakal melegakan pusuh perpulungen e.

Aplikasi

Geluh enda arus sikeleng-kelengen, saling menopang, sisampat-sampaten sada ras sidebanna. Salah sada bentuk sibanci silakoken kita eme saling mendoakan. Memang sangat sederhana, tapi tuhu mbelin kal ertina man banta. Paulus ibas bahan renungenta enda mindo dukungen doa man perpulungen i Efesus, labo guna kepentingenna secara pribadi, tapi guna pemberitaan berita si Meriah. Erkiteken pemberitaan firman Tuhan nge maka Paulus ipenjaraken. Emaka butuh kali ia dukungen doa arah perpulungen gelah tetap ibereken Dibata man bana kata-kata si payo ibas erberita.

Dahin serayan Tuhan labo mesukah, selain tugas guna nehken berita si meriah, geluhna pe arus jadi usihen man perpulungen, man kalak sideban. Sabab lit ka kegeluhen serayan e sijadi batu antuken man perpulungen sierbahanca terhambat dahin meritaken berita si Meriah.

Serayan Tuhan melala ndatken tantangen ibas ndahiken dahin pelayanen, megati ibas dalani dahin e uga pe tama salah. Adi gel-gel serayan Tuhan ndatken tantangen iayak-ayak, ibenteri alu batu seh mate, ipenjaraken ras sidebanna. Genduari tantangen serayan Tuhan e pe lebih kompleks, megati pe ibas paksa sigenduari ndatken tantangen baik dari dalam bagepe luar dirina. Dari luar banci saja serayan iancam pihak-pihak tertentu si la senang nandangi perkembangen kekristenen. Bagepe ibas paksa sienda melala kalak sirusur encekuraki serayanna piah latih iakap serayan e rukur ras sidebanna. Bagepe dari dalam diri serayan e, banci ka serayan e ndabuh kubas situasi sombong rohani. Tentu hal enda erbahanca la seh pelayanen alu mehuli. Alu bage :

Þ     Selaku serayan arus tetap ngandalken Dibata arah pertotonna, lit tetap hubungen simehuli ras Dibata guna ndahiken dahinna. Serayan Tuhan la banci pulah ibas hubungen ras simada dahin.

Þ     Selaku perpulungen ula lupa ertoto guna dirina gelah ia pe banci makeken kesempaten simehuli ibas geluhna guna ersaksi kerna kuasa Dibata, terdauhen notoken serayan ibas pelayanen siarus ilakokenna. Biasakenlah notoken serayan Tuhan, seminggu sekali lah gia. Gelah ibereken Tuhan kesehaten, kepentaren, ketutusen guna melayani, ersada arih kerina serayan Tuhan, ibereken Tuhan rejeki, ras keluargana sepengodak-sepengole melayani Tuhan itengah-tengah perpulungen.

Mbelin kal ulih pertoton e, apai ka pertoton perpulungen ibas ndukung dahin pebelangken berita siMeriah. Emaka sada tekad ras arus ilakoken perpulungen ibas geluhna eme notoken serayan serayan Tuhan ras dahin berita si meriah e. perpulungen arus nggejab seh kal belinna ras gegehna ulih pertoton e, pertoton perpulungen e jadi kekuaten ka pe nandangi serayan Tuhan.

Pdt. Julia Elperida Br. Ginting

(0853-6175-3339)

GBKP Runggun Penen

Selamat melayani man banta kerina

---

[1] Jadidiah Tham, Mekanika Doa; Bagaimana anda berkomunikasi dengan Dia, hal. 58

[2] George A. Butsick, The Interpretation’s Dictionary of the Bible, hal. 85-861

[3] Marie-caire, Barth –frommel, B.A. Pareira, Kitab Mazmur ‘pembimbing dan tafsirannya’, hal. 688

MEDIATE NANDANGI RUMAH PERTOTON

Bahan Sermon Khotbah Minggu 03 September 2017

Invocatio    : Tapi gelah ola tondel ukur kalak e erkiteken kita, to lawes ku dano ngkawil. Apai nurung sipemena itangkapndu, uak babahna. Ibas babahna idatndu kari duit pirak cukup guna nggalari yurenKu ras yurenndu, buat duit e jenari galari yurenta. (Mat. 17:27)

Ogen          : Keluaren 25: 1-9

Khotbah     : I Kronika 9: 28-34

Perlebe

Rumah Pertoton eme kap sada ingan si penting kal man banta selaku kalak sierkiniteken erkiteken ibas rumah Pertoton e me kita banci bersekutu ras teman-temanta sada kiniteken muji dingen mpermuliaken Tuhan. Sada kebanggan man banta warga gereja GBKP erkiteken melala genduari iusahaken pembangunen Rumah Pertoton. Tapi sijadi permasalahenna eme, enggo nge kita Mediate nandangi Rumah Pertoton e?ntah kin labo lit siakap lebihna Rumah Pertoton e asangken bangunen-bangunen sideban? Melala si idah realitana maka labo pedah menyangkut masalah mpekena-kena rumah Pertoton, tapi melala denga ngawan ni perpulungen la metedeh nandangi Rumah e. ibas lalitna ketedehen ate e, tentu labo kita banci Mediate nandangi Rumah Pertoton e.

Pembagesi Teks

Kehadiren rumah Pertoton i tengah-tengah peribadahen kalak Israel imulai ibas zaman pemerentahen raja Salomo, ija Dibata ersura-sura gelah bangsa Israel banci memiliki pusat ibadah i Kanaan eme kap sada bangunen si permanen nggantiken Kemah Suci. Emaka banci ikataken rumah Pertoton eme kap inagn si penting kal man kalak Jahudi erkiteken rumah pertoton eme lambing kehadiren Jahwe janah ije me ingan peti perpadanen Dibata. Rumah Pertoton eme kap pusat ibadah, kurban bage pe lambing kesetiaan Dibata nandangi bangsaNa. Kehancuren fisik rumah Pertoton berarti kehancuren spiritual bangsa Israel. Ibas bahan Ogen sipemena Dibata mereken perentah man bangsaNa erkelangken Musa maka ia kerina arus mereken persembahen alu ukur Meriah guna majekken sada kemah sibadia ras perlengkapenna. Kemah e bakal jadi ingan Dibata ringan. Ingan e pe jadi ingan bangsa Israel pulung guna megiken perentah Dibata. Enda me sada bentuk tanggung jawab kalak Israel nandangi ingan ersembah man Dibata. Kemah si Badia e la banci sembarangen iperlakuken. Emaka suku Lewi kedungenna ikhususken Dibata guna ngelai ibas Kemah si Badia e. kenca kalak Israel masuk kubas taneh perjanjin ije me kemah si Badia e igantiken rumah Pertoton. Ibas ingan e pe tetap kalak Lewi si erdahin ibassa.

Kerina pendahin siidahiken kalak Lewi ibas rumah Pertoton e tercatat aku jelas ibas bahan Khotbah sekalenda eme, siertanggung jawab kerna alat-alat si ipake sanga kebaktin, siertugas nurusi perkakas si Badia sideban (ngurus tepung, anggur, minak, kumenen ras rempah-rempah), imam-iman ertugas guna ngaduk rempah-rempah e. lit ka si ertanggung jawab nikapken roti guna persembahen, terpuk sideban ertugas guna nikapken roti ibas rumah Pertoton tiap wari sabat. Lit piga-piga kalak Lewi siertanggung jawab guna Musik. Ibas kerina pembagin Tugas ibas rumah pertoton e teridah maka Dibata ngena ateNa keteraturen. Kerina kalak sienggo ikhususken guna erdahin ibas rumah Pertoton tentu ia pe enggo ipebadiaken guna ndahiken dahin e, gelahna peribadahen ibas rumah Pertoton e pe banci kerina erdalan alu mehuli ras termulia gelar Dibata.

Ibas Invocati pe ituriken maka Jesus pe muat bagin ibas mpekena-kena rumah Pertoton alu nggalari yurenna. Erkiteken litna aturen maka kalak Jahudi arus nggalari yuren guna mpekena-kena rumah Pertoton. Labo terjeng ia saja si arus nggalar yuren guna mpekena-kena rumah Pertoton tapi isuruhNa ka pe ajar-ajarNa guna nggalar kewajiben yurenna.

Aplikasi

Meherga dingen Badia kal rumah Pertoton e seh makana bangsa Israel la akapna rugi lako mereken emas bagepe pirak ras barang-barang meherga sidebanna jadi perlengkapen rumah Pertoton. Uga genduari kita? Enggo nge ndia kita nggit mereken simeherga si lit ibas kita guna rumah Pertoton. Kecenderungen Gereja jaman genduari ibas mbangun gedung ntah pe ngelitken perkakas rumah Pertoton buen enggo ngarapken kalak si deban. searusna ibas kita ateta mbangun rumah pertoton bagepe ngelitken perkakasna, siusahaken lebe dana dari dalam (ibas perpulungen nari), ula nari kita terlalu mengandalken proposal ntah pe struk, geraken-geraken, ras sidebanna si sumberna labo arah bas nari. Tapi ulin nge situhuna adi kita selaku perpulungen si lit ibas rumah pertoton e lebe mpekeri gegeh guna ngelitkensa, emaka tambah-tambah si e maka sibahan aksi-aksi bagi struk, proposal ntah pe erbahan bajar nandangi gereja si deban. bangsa Israel ibas kitab Keluaren enggo jadi contoh maka ia nggie mereken simeherga ibas ia guna majekken kemah si Badia ras rumah Pertoton.

Selaku kalak si erkiniteken si enggo ngangkai uga pengertin rumah Pertoton e, harus kita ngasup ertanggung jawab dingen mpekena-kena rumah Pertoton simerupaken lambing kehadiren Dibata. Harus maka sijaga kebersihen dingen kebadianna erkiteken rumah Pertoton eme kap rumah Dibata. Amin gia zaman genduari enggo lit piga-piga gereja si lit Kosterna tapi amiin bage gia labo tugas Koster saja guna njaga kebersihen gereja e tapi tugas kerina perpulungen guna njagaisa. Adi rumah Pertoton pe ibas keadaan si bersih, la berantakan tapi teratur, tentuna proses ibadah si lit ibas pe banci erdalan alu mehuli.

Mediate nandangi rumah Pertoton, labo terjeng ibas majekken ntah pe njaga kebersihenna saja.. tapi sienda mencakup kerina hal sibersangkuten ras rumah Pertoton. Kerina hal siibutuhken guna kelancaren ibadah pe perlu si dukung.. misalna : ngelitken Song Leader. Tentu ibas si e kita nggit makeken talentanta ibas gereja, ngaturken tata Ruang pe ibutuhken ide kreatifitas perpulungen, emaka iperluken ide-ide perpulungen guna mereken masuken guna erbahan tata ruang si nyaman guna kebaktin, rsd.

Pdt. Julia Elprida Br. Gintings, S. Th

GBKP Runggun Penen

Selamat Melayani ras Mejuah-Juah