Ertanggung Jawab Guna Kiniulin Teman (2)

Nats     : Filipi 4:14-20

Tema   : Ertanggung Jawab Guna Kiniulin Teman

…, lit sekelompok anak-anak sangana main2 i rel kereta api. Lit 2 jalur ije, sada jalur si aktif janah sada nari jalur si la aktif si lanai kin pernah nari ipake. i jalur si lanai aktif e sekalak anak ngenca je main2, sidebanna main2 ia i jalir si aktif. Enca bage dari kejauhan enggo siidah lit kereta api bakal mendekat. Adi kam kerina misalna jadi pengatur jalur lintas kereta api, ku jalur siapai nge bakal ipindahkenndu rel ndai?

1. bakal iipindahkenndu nge jalur ndai ku rel sila aktif alu ngorbanken sekalak anak ngenca, ntah

2. ngorbanken enteren anak-anak sipaksana main2 I jalur kereta aktif.

…, mbue kel jawaban manusia rusur memilih pilihen sipertama, engkai? Adi terpaksa kin me sekalka anak ngenca ikorbanken. Memang adi siperdiateken keputusen enda tempa2 payo (meminimalisir jatuhnya korban) adi memang ipandang arah sudut emosional, rasional ras moral memang wajar. Tapi alu sudut pandang kebenaren situhuna keputusen enda labo pas. Erkiteken kai? Sisekalak anak enda ndai benar nge sikapna, ietehna jalur kereta api e lanai aktif emakana aman nge e, maka je ia main2. Ngidah hal sie pantas entah lang kin siakap sisekalak anak enda ndai ikorbanken guna nelamatken teman2na sijustru ceroboh ras memang sengaja main2 bas ingan si la aman, banci membahayakan keselamatan.

Mungkin dilema sibagenda rupana banci rusur muncul ibas kegeluhenta. Pengorbanen2 si kin memang la pas adi ikorbanken, siakap payo. Padahal ibas sudut padang kebenaren lenga bo tentu.

…, sekalak petugas rel kereta api enda ndai pe, berpikir keras nge ia apai nge ulin, enterem anak2 harus mate ntah cukup sekalka anak saja. sebab selaku petugas rel kereta api ertanggung jawab kin ia kerna keselamaten penumpang kereta.

Mungkin kita pe ibas ngelakoken hal simehuli guna kiniulin temanta banci saja justru lit pihak2 si irugiken. Perban kai? Siakap ndai enggo pas kai siibahan kita.

…, lit sekalak gadis kecil si sangana ngandung ia ilebe-lebe pintu gereja, perbahan kepeken la ia iijinken masuk kubas. Erkiteken melket uisna, acak-acaken bali ras gembel. Reh sekalak pandita iajakna gadis kecil enda masuk, ndaramina ingan kundul sikosong denga. Meriah kel iakap gadis kecil enda ndai. Emaka mulai ibas wari e nari gadis kecil enda jadi teman baik pandita e. muat ia medem tersinget gadis kecil enda kerna teman2 na sikin memang lalit inganna guna mpermuliaken Tuhan yesus, reh nandena ngatakenca “beruntung kel kam nak ku, sebab isampati bapak pandita”nina. 2 tahun kenca peristiwa e, idilo Dibata gadis kecil enda, kenca dung acara penguburenna ibersihken me kamar tidur gadis kecil e, sangana bersih2 bage, idapeti nandena sada dompet si nggo using kel, janah lit duit ije 57 sen alu secarik kertas sibertuliskan “uang ini untuk membantu pembangunan gereja kecil agar gereja tersebut bias diperluas sehingga lebih banyak anak-anak bias menghadiri sekolah minggu”. Kepeken semenjak 2 tahun la ia banci masuk kubas gereja e, ipepulungina sen-na guna tujun simulia. Ibereken nandena e me sen enda man gereja janah pe ceritakenna man pandita ndai. kepeken sangana ertugas maba khtbah pandita e, iangkatkenna kerna kisah gadis kecil enda, tergugah kel pusuh kerina jemaat simegikenca janah pe bagi igerakken roh kudus jemaat e guna meniru perbahanen gadis kecil enda. Emaka seh me terpepulung dana guna pembangunan gereja kitik enda ndai, seh asa genduari gereja e tuhu2 galang kel enggo bangunenna. Gundari gereja e gelarna “Tenple Baptist church” alu kapasitas 3300 kalak, janah pe bas gereja e igantungken foto sekalak anak-anak, eme foto gadis kecil si memulai menjadi motivator pembangunen gereja e.

…, mungkin ibas kita nampati temanta, tempa2 kecil nge siakap kitik kel siakap penampat nta. Padahal alu tidak disangka-sangka banci saja penampat e eme penampat sigalangna man bana. Erkiteken kai? Memang pas kel waktuna.la mungkin siarap miaslna sibereken gulen man temanta, pas kel kepeken i dapurna lalit kai pe man pangan. Me tentu galang kel e fungsina man bana. Adi bas kita memang biasa saja.

Rasul Paulus pe ibas isampati jemaat Filipi ia, mungkin saja jemaat e biasa nge iakapna, hal kitik mungkin iberekenna. Tapi pas kel waktuna memang sangana ibutuhken rasul Paulus kel si e. sanga ipenjara pe Paulus, isampati jemaat filipi labo alu materi ibas paksa si e tapi alu mereken pergegeh, mereken semangat gelah ula erleja-leja Pauus ndalanken tugas mbritaken berita si Meriah. Pemere-pemere berupa materi pe lit ka kepeken ibereken perpulungen e man Paulus, seh maka ikataken Paulus gundari enggo cukup kerina keperlunku. Mungkin ibas ibaca jemaat filipi surat Paulus enda, meriah kel pasti iakap jemaat e sebab enggo berkecukupen suruh2en Tuhan siikelengina.

Kita pe ibas natal enda iajuk guna mpekena-kena temanta, labo terjeng silit idaerahta e tapi pe man s/t nta si lit ibas posko2 pengungsin. Uga ia nggelluh serba kekurangen menurut pandangenta tapi ibas ia banci justru meriah nge ukurna, sebab kai? Sisitik e pe banci cukup man bana kerina. Kerna hal si enda tentu perlu penampat ta kerina, uga kita memang nginget kerina teman2ta sisada kiniteken ijah, kerna materi mungkin la sempat kita merekensa kujah, tapi ibas natal enda melala sarana ta guna nampati kerina kekelengenta i posko e, arah natal moria se-GBKP, natal mamre aksi 10 runggun medan sekitar, kerina erbahan geraken guna nampati kekelengena si lit ibas posko2.

Kerna mbelin kitik labo inilai arah Buena pemerenta e, tapi inilai arah fungsina rasp e keikhlasenta guna mere. Emakana ... mari ibas natal enda lit min sada tekadta guna mpekena-kena s/t si kurang beruntung. Perban Dibata enggo leben erdahin guna kiniulinta maka kita rutang kerna kiniulin teman-temanta.  Dibata simasu-masu kita kerina. Amin.

Ertanggung Jawab Guna Kiniulin Teman (1)

Nats     : Matius 5:45-48

Tema   : Ertanggung jawab guna kiniulin teman

…, lit sada cerita tentang dua kalak dilaki siterdampar i sebuah pulau perbaha kapal kalak enda kepeken karam ideher pulau emda ndai. Kenca iperdiatekenna pulau e kepeken gersang kel, lalit kai pe turah ije. Emakana iakap kalak enda, lanai bo lit dalan sideban selain ertoto mindo perkuah ate Dibata. kepeken kalak enda pe lit ka nge iseng na, sebab nggo sepakat kalak e guna meteh toto isekin kari sibakal ibegiken Dibata. emaka ibagi me pulau ndai jadi dua arah utara ras selatan, masing2 me kalak enda ngiani inganna. Pertoton sipertama eme kerna pangan. Kenca bage pepagina dilaki sipertama ndatken sada peti terapung, peti e dem alu makanan kaleng, kepeken pangan e asalna arah kapal karam sideban si lit ideher pulau e ka, ibas ingan dilaki sipeduaken lalit terjadi kai pe.

Kenca sada minggu, melungen kel akap dilaki sipertama e, emaka ertoto ka ia mindo sekalak diberu gelah jadi ndeharana. Eh tuhu-tuhu pepagina lit ka kapal karam sideban, janah siselamat ibas kapal e nari kepeken sekalak diberu enca si memang terdampar ibas ingan dilaki sipertama e. ibas ingan dilaki sipeduaken lalit kai pe, melungen, gersang ras kosong.

Emaka dilaki sipertama e mulai ka ertoto kerna hal sideban, pakaian, rumah, pangan-pangan ras kerina pertotonna e ikabulken Tuhan. Tapi dilaki sipeduaken e tetap bage-bage saja kegeluhenna.

Emaka terakhir, dilaki sipertama enda mindo kapal gelah ia ras ndeharana banci mulih ku ingan asalna. Pepagina pe mis ka lit sada kapal terdampar ndeher ingan dilaki sipertama e. inangkihina me kapal ndai ras ndeharana e. kenca bage iputuskenna ka guna nadingken temanna, dilaki sipeduaken ndai, sebab maba sial iakapna la pernah begiken Dibata totona.

Muat berkat me kapal e ndai mis reh petir i langit nari ras begina sora nina “Engkai maka tadingkendu temanndu i pulau terpencil enda?” emaka jawabna “pasu-pasu sikualoken e sikerajangenku sisada sebab enggo kutotoken, rasp e kualoken jawaben ibas toto ku e nari adi ia kai pe totona la pernah terkabul”. Emaka kai nina sora ndai jababsa “salah besar kel kam, ia sada kel ngenca lit pemindonna ibas ertoto. Janah enggo kukabulken sisada pemindonna e”. emaka nungkun ka dilaki sipertama e “Kai kin pemindonna e? maka la banci ia kutadingken I jenda”, “Ertoto ia, gelah kai pe siipindokenndu e ikabulken..”

…, rusur kel kita ndalani kegeluhenta guna kiniulinta sisada saja. teraku-aku kita rusur. Keluargaku, anak-anakku, nandeku-bapaku, jumaku, pendahinku, kesehatenku, rezekiku, serba “aku” kerina. Sebab memang sebagin besar pikirenta enda enggo terformat kerna hal si e. la kin siakap tugasta guna mpekena-kena temannta. Padahal jumanta ndai sibalengen nge mungkin, saja pas ka ibas kita e berlebihen ndatken ulihna, si sebalengen ndai ras kita lang. labo pernah muncul bas benakta e, bahwa ulih ibas jumanta ndai situhuna lit nge sekarajangen temannta ndai. Misalna gia, wari enda ipupukina sinuanna juma, kepeken berngina nggo reh udan, jadi perban edenga kel tamaken pupuk ndai tentu me lenga bo terserap sinuan ndai kerina. Janah kepeken pas ka permalerna lau udan ndai kuarah jumanta, me nggo kujumanta ndai tading pupuk siibereken ndai, emaka mejile hasilna sinuanta juma. Me la pernah terpikirken kita hal si e, padahal banci saja kemungkinen e terjadi ibas kita.

…, ibas natalta enda sendah iajuk kita guna ertanggung jawab kerna kiniulin temanta, mpekena-kena kalak si lit isekelewetta. Uga carana? Mat. 45:5, Dibata mereken matawari ras udan seri man kerina manusia, berarti memang iajuk kita gelah “hidup bersama” ras kalak sideban ras pe nuduhken perhatinta, perduli kita man bana. Labo bagi kuan-kuanta siselama enda “Sada matawari pe teku lang”. berarti mulai wari enda nari kari, adi banci ulanai min lit ndarat cakapta sibage, sebab e ertina kita menentang Dibata.

Adi kin memang siikelengi kita e, eme kalak sikeleng man kita ka, kai gunana? Kalak si la erkiniteken ah pe itehna nge guna ngkelengi temanna, berarti me lalit bedana kita ras kalak si la erkiniteken. Janah pe mawen2 lit ka kurang tepatna ibas kita notoken temanta. Misalna ipindokenna itotoken gelah lancer rezekina, tapi ia sendiri pe berkat kujuma nggo ciger, 2 jam enca juma ah nggo mulih, uga ningen Dibata pe banci mereken rezeki? Anak sekolah misalna tumpuk2na bukuna kenca bage tumpangken na tanna datas buku e, “Dalam nama Yesus kuurapi buku2 ku e janah kerina pelajarenna masuk ku bas pikirenku” ena me hal si konyol. Dibata nta ah pe labo banci ibujuk2 alu pertotonta, adi kita pe berpangku tangan ngenca ateta. Sipindoken pandita sidasyat kel siakap guna notoken kita gelah lalit min utang2ta tapi tetap kita la beluh mengatur keuangenta, adi bage me kurang denga nge lalap.

Emakana pe ibas kita notoken ntah nampati temanta lah gia, ula terjeng sisampati saja tapi turiken, pebetehkenlah tentang kebenaren man bana gelah ia pe beluh mengatur kegeluhenna. Kekristenan la ngajarken kita guna make mediator jadi alat guna mbujuk Dibata, tapi ibas kita ertoto ntah pe notoken temanta, turiken ka lah kebenaren bana, sebab alu meteh kebenaren pribadinta e ibentuk gelah banci terteki Dibata guna mengemban tugas.

…, ibas Natal tahun enda kerina kita iajuk pe gelah lebih mperdiateken s/t nta si lit ibas posko2 pengungsin si seh asa genduari lalit kepastinna. Ituntut kita guna ertanggung jawab mpekena2 temanta s/t nta e. (Turiken aksi2 natal) marilah ibas kita mpepulung penampat ta e ula kita ertak-tak kel ibas si e, sebab ibas kita mereken penampat asa ngasupta e ndai, ibas kit a pe labo pediat Dibata kekurangen. Asal nggit kita ertanggung jawab guna kiniulin temanta maka Dibata pe nggit ertanggung jawab guna kiniulinta. Emaka marilah arah natal enda banci kita nehken/ncidahken tanda keleng ateta makan s/t nta si bas posko2 bage pe kerina manusia si lit isekelewetta.

Tertib Acara Natal PJJ/ Sektor

TATA ACARA PERAYAAN NATAL  PERPULUNGEN JABU-JABU

RUNGGUN PENEN KLASIS MEDAN-DELITUA

 

                                                                                                               

TEMA             : Ertanggung jawab guna kiniulin teman

Sub tema    : Semangat Natal tahun 2014 endalah simereken man banta guna tetap erkeleng ate man teman nta si lit isekelewetta

LITURGI NATAL PERPULUNGEN JABU-JABU TAHUN 2014

RUNGGUN PENEN GBKP KLASIS MEDAN DELITUA

I.      Persikapen

ü Nentuken petugas sinagani lilin natal eme: mewakili BP Runggun, Pertua/Diaken, mewakili pengurus PJJ sektor, mewakili Moria, mamre, permata, Ka-kr ras pengkhotbah.

ü Nentuken petugas doa syafaat rasp e si man totonken

ü Kelengkapen kebaktin eme: ingan kolekte/amplop natal, meja (guna mimbar), Sinaruhken pengkhotbah ras MC/ Liturgis

ü Ngaturken Barisen Prosesi guna ersikap-sikap

a.    Kata Penaruh (Ibabai MC/Liturgis)

Mejuah-juah man banta kerina! Selamat wari natal! Situhuna natal e sada wari kap ngenca, paling ndekah sada minggu. Labo seh sebulan dekahna. Tapi tetaplah min Roh natal e terus erdahin ibas semangatta sepanjang tahun ibas kita ersada i tengah-tengah perpulungen Tuhan. Roh natal e simereken semangat man banta, bahwa lit kepe tanggung jawabta ibas nehken keleng ate sapih-sapih kita.  Guna

Sanga lagu-lagu natal nggo dung iendeken, permakan-permakan pe nggo mulih ku mbal-mbal Efrata, kalak majus i Timur pe nggo mulih ku kutana, bagepe bintang i langit Betlehen pe nggo lanai teridah, tapi justru ije me Roh natal mulai erdahin.

Roh natal singgerakken kita guna maba terang, mereken cirem s idem kedamen,mpeteneng tendi, mpepalem pusuh si luka, maba dame, mpeteguhi kiniersadanta itengah-tengah perpulungen ras ngendeken ende-enden simeriah, Selamat natal!!!

b.    L   : Guna menyambut barisan Prosesi mari rende kita arah PEE 82:1-3

1.      Meriahkal ukurta reh kap penampat, pesikaplah dalinNa ibas ukurta

Biak-biak keg/lapen tadingken krina, aloken kesangapen keleng ateNa

Reff : Sialo-alo Ia ralep=aleplah min kita

          Pesikaplah inganNa ‘bas ukurta

2.      Di lit simeluk-eluk sipesikaplah, ukur singgeduk-nggeduk jadi pinterlah

Pesai-pesai dalanNa Raja mulia, babailah kalak krina nembah man Bana

Reff : Sialo-alo Ia…

3.      Dibata kap Bapanta sinuruh Ia, nusur ku doni enda jadi manusia

Robahlah dingen jera kita kerina, dosanta iangkutNa terkelin kita

Reff : Sialo-alo Ia…

II.   Kebaktin

1.    Votum+Salam+Introitus (P : Pengkhotbah , J : Jemaat)

P     : Kebaktin Natal Perpulungen Jabu-Jabu enda ibenaken ibas gelar Dibata Bapa sierkeleng ate nandangi doni enda, ibas gelar Jesus Kristus situbuh ibas wari enda, ras ibas gelar kesah si Badia sitetap mereken gegeh man banta guna tetap ersada ibas keleng ate e.

       Perkuah ate ras dame ibas Dibata Bapa, ras ibas Jesus Kristus nari, ibas kerembaken Kesah si Badia ras kita krina gelah. Gloria

J      : Glo…ria… Glo…ria… Glo…o…o...ria

P     : Tapi ngaloi Jesus “Malemen tuhu-tuhu ate kalak simegiken kata Dibata dingen ndalankenca” (Luk. 11:28)

2.    Rende KEE 114: 1-2

1)   Sendah jumpa kita wari raya e peringeten tubuh Tuhan Yesus e

Nusur ndahi kita manusia e keriahen kap e

Reff : Ermulia me Tuhanta e sipuji me gelarna

          Perdamen ib’re Dibata Tuhan Yesus kap e

2)   Mari kita ku kuta betlehem e muji nembah man Tuhanta Yesus e

E tinenges Tuhan siperkuah e Dibata Bapa e

Reff :Ermulia…

3)   Sembah kami man Bandu situbuh e Kam simaba dame ku pertibi e

Bengket min kutendi ukur kami e DameNdu o, Yesus

Reff : Ermulia…

3.    Liturgi I kerna Nubuat Kelahiren Juruslamat (anak-anak)

· Jesaya 7:14

· Jeremia 23:5

· Mikha 5:1

· Zakaria 9:9

4.    Berita Natal (L : Liturgis/MC           J : Jemaat)

L   : Sanga kerina doni ngerayaken ketubuhen ni Kristus. Tupung doni ngerayaken kerehen Kristus, Aneh kel, kerina rupa ncidahken kelembuten, kerina tan sisalamen. Tempa-tempa lalit ije kebencian, lalit segat ate.

J   : Tuhan!! Ate kami nulih kutoto kami. Mbuka lepak, khianat ras dosa kami. Adi kin si e kerina pernah tading ibas pusuh kami.

L   : Tuhan!! Ate kami ndeher, rembak ras Yesus. Gelah ipelimbaruiNa pusuh sikerah. isambungkenNa mulihi, tinali sipernah peltep.

J   : Gelah ieteh kami kai kin erti ketubuhenNdu e. man kalak siterlupaken erkiteken umur si nggo metua. Man kalak sibergehen ertarumken langit simeganjang si tading i posko-posko pengungsin si she ngasa sendah lalit kepastinna. Man kalak si la ngasup nderkuh erkiteken lumben. Man kalak si la ernande la erbapa. Gelah ieteh kami, kai erti kerehenNdu e.

L   : Gelah ngadi kami ngayaki mengga ate si la kunjung tersehi, sura-sura si serakah, dendam ras segat ate sierbahanca geluh kami la erbuah.

J   : Tupung doni ngerayaken ketubuhen Kristus, sanga doni ngerayaken Kristus reh, kerina dosa ate kami ibukaken kami, ibas lipaten jemari kami ertoto, Tuhan!! Alemilah kami.

L   : Mari dage ngadap ku Dibata gelah siakuken dosa-dosanta (Paksa Teneng)

5.    Rende PEE 76:1,3

1)   Ku’ndesken krina gluhku anem melket aku, Tuhan penalemenku tetap me ukurku

Kusimbak praten doni ‘lah metunggung aku, gegeh kuasaNdu ndemi

‘lah malem ateku

3) TemaniNdu kap aku bas dalin geluhku, cikepNdu tetap tan ku k’leng ateNdu tuhu

     Alu kuasa KesahNdu pengasupNdu aku, emaka la ku lupa

peblinken gelarNdu

6.    Berita Pengalemi Dosa

L   : Ibas kinilangasupenta ndalanken sura-sura Dibata, ibas kegagalenta nehken simehuli mari sibegiken kata Dibata kerna pengalemi dosa :Kam enggo erkubang-kubang ibahan dosa, tapi kuperidi kam maka bersih bagi salju. Aminna kia erkiteken dosandu kam enggo mbiring bagi tengguang, mulihi kam jadi bentar bagi kapas (Jesaya 1:18)

7.    Liturgi II kerna Kelahiran Juruslamat (Moria, Mamre)

·  Matius 1:23

· Lukas 1:33

· Lukas 1:34-35

· Lukas 2:6-7

8.    Nagani lilin Natal

L   : lilin Natal enda nuriken man banta kerna Yesus si enggo reh ibas waari enda sebagai terang doni, si kin kari nerangi pusuh ras kegeluhenta. Alu bage pe lilin natal enda kari jadi tanda manbanta bahwa kerina kita pe si enggo ngaloken ketubuhen Kristus ertanggung jawab guna maba ras nehken terang e ku sekelewetta.

    Man bandu kerina siertugas guna nagani lilin natal mari reh kam ku lebe enda.

    Sanga isagani lilin Natal enda mari ras kita rende...

9.    Rende KEE 135 : 1-3

1) Berngi e nggo kepe Yesus reh ku doni e nusurlah ngangkut dosanta me kin

     Jadi kap musillah sangap pagin asa si tek Tuhan e asa si tek Tuhan e

2) Anak e bujur pe si ngena me aku e kiniulinndu tadingken kam kap

     Bengket ku donilah t’rang si gelap aku daramenNdu e aku ndaramenNdu e

3) Berngi e ngo kepe Tuhan reh ku doni e padan Dibata teridah tetap

     kinikelengenNa banta me kap Tuhan sipuji gelah Tuhan sipuji gelah

10.  Renungen Natal

a.    Ertoto sope khotbah

b.    Khotbah

c.    Ertoto kenca khotbah

11.              Pengakun Kiniteken

12.              VG/Koor

13.              Persembahen Pengataken Bujur

L   : Kata Dibata sijadi palas man banta ibas nehken persembahen pengataken bujurta ibuat ibas 2 Kor. 8:7, nina: Kam sampur kap

J   : Ibas kiniteken, ibas pegerana, ibas pemeteh, ibas ketutusen, ibas kai-kai pe.

L   : Bagepe ibas keleng atendu nandangi kami

J   : Emaka sampur ka lah kam ibas dahin keleng ate enda.

14.              Rende KEE 136: 1-3 “Kam krina si tek”

1) Kam krina si tek mari surak janah puji pedas min kerina ku betlehe

Nehenlah anak tubuh man tuahta (mari kita nembah) 3x man raja

2) O Raja mulia sinjujurken krina la mela kam tunduh ibas ampun

Kam me Dibata mula-mula nari (mari kita nembah)3x man Raja

3) Kam krina malekat pujilah man Tuhan ersurak-surak man Banalah

Puji Dibata i surge i doni (mari kita nembah)3x

15.               Doa Syafaat + Doa persembahen

·  Kerna Persembahen

· Kerna kerina anggota Pjj gelah ergiah-giah ibas ngikuti kegiaten

· Kerna kesehaten, pendahin/rezeki ras anak sekolah

· Notoken Pt/Dk bagepe emeritus gelah erngasupna ngelai perpulungen

· Notoken s/t ibas posko-posko pengungsin perban erupsi deleng Sinabun

· Si torah ibas perpulungen

16.              V.G/Koor

17.              Tekad natal

L   : Kitiksa si ban erti natal enda adi kita hanya ermeriah perban lagu-lagu merdu natal, kerna anak kitik ibas pelangkah

J   : si penting eme kap uga kita maba dame Kristus ibas pusuhta jenari teridah ibas lagu langkahta

L   : njulmitsa erti natal man banta adi kita hanya ermeriah perban cerita kerna malekat, biri-biri bagepe permakan i Efrata

J   : adi kin kita la erngadi-ngadi nggeluh ibas egonta masing-masing, la sempat kita ngukurken kiniulin kalak si deban.

L   : erkiteken Ia enggo reh ndahi kita, ibas ingan si melungenna kel, tubuh i tengah berngi si mesuni, i ingan si medungona kel, i kandang kambing ras biri-biri.

J   : Uga kita banci jadi teman man kalak si terlupaken, sitading nima-nimai penampat ras perhatin kalak sideban nari, si kin la sempat pe kalak ngukurken ia.

J   : ibas kesetian sipaling tulus, itadingkenna kemulianNa si Badia, idahina doni s idem bencana

J   : Nggit aku maba dame kekelengenNdu, ibas kata ras perbahanenku Tuhan, maka arah kegeluhenku pe teridah sinalsal terangNdu.

L+J  : Amin

18.               Rende KEE 178 “Pujilah min”

Pujilah min… pujilah min… Dibatanta Dibatanta si ni da..tas

Dame ni surge nusur ku doni ngena ate man manusia

Pujilah min Dibatanta pujilah min Dibatanta

Dame ni surge nusur ku doni dame ni surge nusur ku doni

Ngena ate ngena ate man manusia ngena ate man manusia

Man manusia

Pujilah min pujilah min Dibatanta Dibatanta si ni datas

Dame ni surge nusur ku doni ngena ate man manusia

A…min A..min Amin

19.               Pertoton Tuhan

20.              Pemasu-masun

P   : Mulihlah alu dame ras mejuah-juah, peteguhilah kiniersadanndu itengah-tengah perpulungen Tuhan, sikeleng-kelengenlah kam sebab keleng ate mpersadaken kerina alu serta, janah alokenlah pasu-pasu idur Dibata nari: “Ipasu-pasu janah ikawali Dibata kita siang ayo Dibata ersinalsal ibabonta, janah melias atena ngenehen kita, itatap Dibata ku kita janah malem ateta ibahanNa”Amin..

J   : Amin… Amin.. Amin..

III.  Varia Natal

Ø  Kata Sambuten mewakili BP Runggun

Ø  Kata Sambuten mewakili Pengurus PJJ

Ø  Kata Sambuten mewakili Mamre

Ø  Kata Sambuten mewakili Moria

Ø  Kata Sambuten mewakili Permata

Ø  Kata Sambuten mewakili Ka-kr