Ijenda Aku Suruhlah Aku

BAHAN SERMON PERPULUNGEN JABU-JABU

Nats  : Jesaya 6 : 1-8

Adi ngerana kita soal tema Pjj ta sekalenda, tentu enggo sangat familiar man banta, lanai asing kita megikensa kalimat e “ijenda aku suruhlah aku”. Saja memang ibas praktek keseharianta, sienda jarang denga sicidahken. La padah ndauhsa kel sibahan contohna, ibas kegiaten perpulungen jabu-jabu saja pa adi enggo seh paksana nuriken penggejapen, russuren nge perpulungenta e tungkuk kerina, sinik, mis macat. Jarang nge sijumpai ibas perpulungenta adi enggo isungkun “apai kita sinuriken penggejapenta?” langsung mis lit singatakenca “aku lebe”. Enggo langka nge gundari sijumpai jelma sib age. Nuriken penggejapen denga saja pe enggo kita mundur teratur rata-rata apai ka adi isuruh kita lawes meritaken brita simeriah ku belang-belang doni? Mungkin rukur kita lebe sekian ratus kali. Adi bage denga lah pengkebetta sedekah enda, enggo  nge ndia sicidahken “ijenda aku suruhlah aku?” ninta man Tuhan? Tentu lenga.

Berdasarken penelitien Litbang GBKP, pasrtisipasi perpulungenta ibas kegiaten gereja masih minim denga. Emaka GBKP ngarapken komitmen perpulungen guna meningkatken partissipasina ibas kerina pemdahin gereja ibas tahun 2016. Pengakun Jesaya “enda aku suruhlah aku”, eme sada komitmen nabi Jesaya guna ngelai Dibata ibas kegeluhenna. Tentuna semangat komitmen Jesaya enda senada ras harapen GBKP kerna ngawan ni perpulungen kerina guna ikut ka berkomitmen.

Pesan-pesan ras pernyataan-pernyataan Jesaya ibas kitab Jesaya enda ipengaruhi kerna situasi Politik si ialami kerajan Israel Utara bagepe Yehuda (Israel Selatan), erkiteken tekanen pemerintahen Raja Asyur. Selain erkiteken krisis Politik ibas kerajan Israel bagepe Yehuda, kepeken bangsa Yehuda sendiri pe sangana mengalami krisis Iman. Itengah-tengah tekanen bangsa si deban, kalak enda nungkun man Dibata “Apakah Allah berkuasa pula atas bangsa-bangsa dunia? Dimanakah kesetiaan Allah? Apakah dewa-dewa kafir lebih kuat dari pada Allah?”

Penungkunen-penungkunen teologis si serius e itanggapi Jesaya alu meritaken kerna Dibata e eme Dibata si Badia ras kerina isi doni enda dem alu kiniulinna, manusia pe labo ngasup ngertiken kerna rencana Dibata (6:3-5). Ibas sienda Jesaya ngataken maka eksistensi manusia ilebe-lebe eksistensi Dibata. Banci sinehen kerna proses pemilihen Jesaya rasp e pernyataan komitmenna siberkaiten kerna dua eksistensi enda eme, kebadiaan Dibata (eksistensi Allah) ras keberdosan bagepe  kinilangasupen manusia (eksistensi manusia). Jesaya alu meteruk ukur nuriken kerna dosana bagepe kinilangasupenna iadep-adepen Dibata (5), emaka Dibata si Badia ngalemi dosa Jesaya (7) ras pe mahanca Jesaya tetap paguh ibas melasken komitmenna guna isuruh Dibata (8).

Manusia ras doni enda hanya mendapatkan eksistensinya ibas ia pang mengosongken diri guna mpermuliaken Dibata. Sanga Dibata e siakuken jadi DIbata si Badia rasp e DIbata simereken kegeluhen man manusia bagepe man doni enda, maka ije me doni ras manusia e ndatken makna sisejati. Kegagalen manusia ibas ndalani kegeluhenna eme erkiteken penolakenna guna njadiken Dibata e jadi Tuhan. Kesombingen manusia iadepen Dibata passti mabai kehancuren manusia e sendiri. Sebaalikna adi manusia e pang ngendesken kerina pengarapen bagepe ngandalken kekuaten Dibata, pasti manusia e tetap paguh (6:5-8).

Ibas Jesaya enda banci sibuat sada refleksi teologis kerna komitmen. Maka komitmen e situhuna labo sada hal ntah pe kalimat si ibelasken bage saja, tapi justru lit proses siberharga ibassa. Lit pengakun maka kita enda manusia si berdosa rasp e ngakuken keBadiaan Dibata, jadi sederhanana banci sikataken maka dibalik sebuah komitmen e pasti lit ka proses si man bentasen. Jadi guna meningkatken partisipasi perpulugenta, mari kita tuhu-tuhu berkomitmen bagi Jesaya, guna njadiken warga GBKP e jadi jemaat si missioner guna berpaartisipasi ibas pelayanen itengah-tengah gereja GBKp.

Pdt. Julia Elperida Br. Ginting

(0853-6175-3339)

GBKP Runggun Penen

Pembincarken Kemuliaan Dibata

BAHAN SERMON KHOTBAH MINGGU 07 FEBRUARI 2016

Invocatio     : Tuhan nggeluh kap! Pujilah Penampatku! Beritakenlah keemuliaan Dibata si nelamatken Aku (Mzm. 18:47)

Ogen             : Keluaren 34: 29-35

Khotbah       : II Korinti 3:12-42

Adi ngerana kita kerna kemulian, kerina jelma sura-surana ipermuliaken. Kai kin situhuna e kemuliaan e? maka kerina jelma ersura-sura ipermuliaken jelma sideban. Ibas bahasa Ibrani ipake kata Kavod ras ibas bahasa Yunani ipake kata Doxa siertina nuduhken kerna kedaulatan, reputasi, kemegahan dan kehormatan. Adi iartiken langsung kubas kegeluhenta emekap sada kebanggan ras kinihagan siteridah ibas sekalak jelma. Tapi rusur ibas ndatken kemuliaan melala ipake cara-cara si salah si situhuna nuduhken kulit saja labo isina. Jadi uga kin situhuna kita ndatken kemuliaan situhu-tuhu si kulit ras isina tuhu-tuhu layak ipermuliaken.

Ibas bahan ogenta kel. 34:29-35 teridah maka Musa kenca ia ngaloken 10 pedah Dibata i datas deleng Sinai nari, nusur ia alu ayo si ersinalsal. La ia sadar maka ayona ersinalsal. Ope denga ia nangkih ku deleng Sinai, ayo Musa biasa saja bagi kalak Jahudi si deban. Kenca ia ersikap guna jumpa ras Dibata maka mulai ayona ersinalsal. Enda kerina terjadi erkiteken Musa enggo ngerana ras Dibata. Sinalsal kemuliaan Dibata teridah ibas Musa. Emaka sanga Musa mpeseh sura-sura Dibata man kalak Jahudi ras sanga Musa ngerana ras Dibata italangina penutup ayona, kelang-kelang si e, itutup Musa ayonna. Ertina kai? Si enda ngatakenca maka kemuliaan si ialoken Musa labo rehna ibas manusia nari. Tapi erkiteken kegeluhenna nuduhken kiniteken man Dibata, Dibata simereken kemuliaan man Musa janah sienda iidah kalak Jahudi. Musa la perlu nuduh-nuduhken kehebatenna gelah ipehaga kalak Israel. Tapi ibass ia ngikutken sura-sura Dibata, ia ipehaga Dibata. Tapi Musa itutupna ayona ibas wari si biasa erkiteken mbiar ia, kalak Jahudi ngidah ayona siersinalsal e erkurang sinalsalna. Arah si e banci teridah maka Musa pe bagi si la pang nuduhken Kemuliaan Dibata si lit ibas ayona man jelma sideban. Ibas pengertin sideban banci teridah maka adi ndauh ras Dibata. Kemuliaan si enggo ibereken Dibata banci bene.

Ibas suratna pe Paulus mengkritik kebiasaan kalak Jahudi ibas nembah Dibata. Ibadah kalak Jahudi ersembah man Tuhan ngikuti kebiasaan siilakoken Musa tapi la meteh kerna maknana. Si endaa teridah ibas kegeluhen kalak Jahudi siterjeng ngikuti undang-undang Dibata saja tapi la memaknai ibas kegeluhenna. Patuh terhadap undang-undang si ialoken Musa/Taurat, tapi terjeng sebatas kebiasaan. Undang-undang si ilakoken kalak Jahudi seri bagi penutup takal si erbahanca kemuliaan Dibata e la teridah.

Emaka sipemena itekanken Paulus emekap nalangi penutup pusuh peraten. Mereken ingan man Kesah Dibata erdahin ibas pusuh. Kesah Dibata e mpelimbarui kegeluhen kalak si ngerembakken diri man Dibata labo man undang-undang. Musa rembak ras Dibata italangi me penutup ayona. Manusia si ngerembakken dirina ras Dibata, italangi me penutup pusuh peratenna. Adi penutup pusuh peraten e nggo italangi, kemuliaan Dibata e banci teridah man sinterem. Ertina kiniteken man Dibata labo hanya sebatas formalitas ntah pe budaya simendarah daging. Tapi ibenaken ibas pusuh nari arah pendahin Kesah si Badia janah teridah ibas kerina perbahanen geluh.

Sipeeduaken itekanken Paulus kerna Kesah Dibata si erdahin. Paulus nuduhken maka kerina kalak si tek man Dibata ras jera ibas lagu langkahna si la mehuli pasti ngaloken kemuliaan Dibata erkelangken pendahin Kesah si Badia. Kesah si Badia e si mpengasup kita ndalanken sura-sura Dibata. Ija lit Kesah Dibata, ije lit kebebasen. Si ertina maka Kesah Dibata emekap gegeh guna ngelawan undang-undang si la payo, undang-undang si membatassi kiniteken manusia. Kesah Sibadia mbebasken kita arah belenggu undang-undang. Kiniteken man Dibata labo erkiteken undang-undang tapi erkiteken penggejapen kerna kekelengen Dibata. Janah ibas si e lanai kita biar-biaren nuduhken sura-sura Dibata ibas kegeluhen.

Sipeteluken, ibas kita ndalanken sura-sura Dibata e, kemuliaan Dibata teridah ibas kegeluhenta. Sura-sura Dibata si ialoken kita rehna ibas pusuh nari, labo erkiteken peraturen. Sura-sura Dibata si ialoken kita labo gelah kita ipermuliaken jelma si deban, tapi gelah Dibata ipermuliaken. Arah gegeh Kesah si Badia kita iobah erdekahna reh ngasupna kita ndalanken sura-suraNa, erdekahna kita ermuliana seh maka kita dungna segambar ras Dibata.

Arah bahan khotbah ras ogen ibas minggu enda erlajar kita maka selaku kalak si erkiniteken, kita harus pembincarken Kemuliaan Dibata. Mari si talangi pusuuh peratenta raas kerina penutup ibas pusuhta si erbanhanca Kesah Dibata la banci bengket kubas pusuhta. Bereken Kesah e erdahin ibas pusuhta, si mpelimbarui kegeluhenta ras si mpengasup kita ndalanken sura-sura Dibata. Ibas kita ndalanken sura-sura Dibata tuhu-tuhu enda silakoken alu la biar-biaren. Ula kita mbiar iacuhken kalak sideban, ula kita mbiar ianggap “sok suci” arah jelma si deban, ula kita mbiar nuriken si benar man jelma sideban. Kesah Dibata pasti nampati gegeh ras jadi penampat man banta. Labo kita ipediatna italuken doni enda adi Kesah Dibata sibahan jadi gegehta.

Ibas kita ngelakoken sura-sura Dibata alu pusuh situhu-tuhu ije me teridaah kemuliaan Dibata. Situduhkenlah kemulian Dibata enda tuhu-tuhu kemuliaan Dibata, ula guna kemuliaanta. Melala gundari enda singatakenca maka kerina si ialokenna guna mpermuliaken Dibata, tapi situhuna ia ndarami keuntungen ije, ndarami ketenaren, ndarami kinihagan guna dirina sendiri. Tapi adi tuhu-tuhu kemuliaan Dibata si ituduhken kita ibsa kegeluhenta, kit ape pasti ipermuliaken, labo arah manusia tapi langsung arah Dibata. Kemuliaan sirehna ibas Dibata nari nge siperlu sidarami ibas doni enda. Aminna pe kita la ipermuliaken doni enda arah kegeluhenta sindalanken sura-sura Dibata, pasti kita ipermuliaken Dibata. Kemuliaan ibas doni enda kentissik ngenca, tapi kemuliaan ibas Dibata nari seh rasa lalap. Kemuliaan siibereken doni enda kadang kala hanya guna mbeneken kita, bagi peribahasa “habis manis sepah dibuang”.

Emaka mulai gundari nari, lanai bo perlu silakoken erbage-bage si la mehuli guna ipehaga jelma sinterem. Siperlu silakoken emekap nggeluh alu tutus sue ras sura-sura Dibata. Ije me kita tuhu-tuhu ipermuliaken. Sada kata-kata bijak siperlu sirenungken eme kap “kemuliaan terbesar yang bias didapatkan seoraang manusia adalah ketika dia tidak mengharapkan kemuliaan itu sendiri tapi berusaha mempermuliakan orang lain”. Selamat mpermuliaken Dibata ibas kegeluhenta.

Pdt. Julia Elperida Br. Ginting

(0853-6175-3339)

GBKP Runggun Penen

Dibata Nggenepi PadanNa Malem Ateta

Bahan sermon Khotbah Minggu 24 Januari 2016

Invcatio           : Senina-senina, terus terang kukataken man bandu kerna nininta Raja Daud, ia engg mate dingen ikuburken. Kuburenna e siidah denga genduari. Sekalak nabi janah ietehna Padan Dibata man bana. Dibata erpadan ngangkat sekalak kesusuren Daud jadi Raja bali ras ia. (Perb. 2:29-30)

Ogen                : Nehemia 8:1-10 (tungal)

Lukas              : 4:14-21(tunggal)

Pendalamen Teks

Nehemia eme sekalak arah terpuk Yehuda nari. Ia mbelin i pembuangen bagepe erdahin i istana kerajan Persia selaku juru minumen Raja Artahsasta Longimanus ras permaisuri Damaspia. Nehemia ipake Dibata guna mbagun tembok Jerusalem siengg jadi reruntuhen. Sijadi teks ogenta enda eme keadaan kenca Jerusalem enggo ibangun mulihi. “kerina kalak Israel engg ringan ibas kuta pengulihenna” sienda eme dampak positif arah pembangunen tembok Jerusalem, eme keamanen mulai igejabken bansa Israel. Nehemia, Esra ras kalak Israel nggejabkensa maka kerina e kerna penampat Dibata (6:16). Dibata enggo mbebasken bangsaNa siselama enda jadi tahanen i negri asing.

Lukas 4: 14-21, “Lalit sekalak nabi pe si ipehaga ibas kutana”, bage nina Jesus (24) ngaloi ranan ras perbahanen kalak Nazaret sinulak Ia. Kalak Nazaret e situhuna lab nulak Jesus bagi siselama enda itandaina, tapi Ia nulak Jesus selaku Mesias. Enggo ndekah bangsa Israel ngarapken kerehen sekalak Mesias guna jadi pembebas si megegeh ras erkuasa. Pembebas simbebasken bangsa Jahudi arah jajahen Romawi nari. Pembebas e lab mungkin sekalak pemuda Nazaret si sederhana bagi Jesus. Kalak Nazaret lenga paham kerna erti Mesias situhuna. Peran ras karya Mesias hanya iidahna arah kacamata manusiawi. Erti simbages selaku pembebas ibas dosa nari la ipahamina. Kerehen Mesias ibas diri Jesus guna mbebasken manusia ibas belenggu dosa nari la ialoken. Justru atena mpelawes Jesus sedauh-dauhna arah kegeluhenna.

Pada dasarnya manusia menginginkan kebebasen. Manusia atena bebas sebebas-bebasna, la atena iatur ntah pe ibatasi, seh maka peraturen ntah pe hokum ianggap membelenggu ras pe layak untuk dilanggar. Tuhan Jesus, Sang pembebas, ncidahken karya PembebasenNa. Pembebasen e bermakna:

1.      Pembebasen arah belenggu dosa nari

Ibas Jesus kristus, Dibata enggo nebus manusia ibas dosa nari janah erbahan geluh kerina manusia lit iteruh perkuah ate Dibata. Kebebasen si ialoken manusia lit ibas pimpinen Dibata janah pe harus ipertanggungjawabken ilebe-lebe Dibata

2.      Pembebasen arah kungkungen tembok-tembok keakuan simpedauh manusia ras Dibata ras sapih-sapih ia

Ibas Jesus Kristus, Dibata mpersada manusia ras diriNa bagepe ras sapih-sapihna. Tuhan Jesus mereken perkuah atena sierbage-bage man kerina manusia gelah tep-tep manusia ertalenta ras pe ipakeken guna mpersadaken kerinana.

3.      Pembebasen simereken kesadaren man manusia kerna kerehen ras pe karya Dibata ibas geluhna.

Tuhan Jesus hidup bersama ras kalak Nazaret, tapi kalak Nazaret gagal ngidah kerehen Kristus ras pe la ngasup nggejabken kerna karya Dibata. Mungkin kita pe rusur la mampu nggejabken kerehen Kristus. Kesadaren kerna kerehen Kristus banci mpegegehi ras pe mpengasup kita guna ndalani kegeluhenta bagi si ngena ateNa.

Refleksi

Tahun Rahmat (terj. Bhsa indnesia Luk. 4:19) tak lain ras tak bukan eme tahun berkah. Kalak Kristen tek maka kenca kerehen Tuhan Jesus ku doni enda 2000 tahun lebih sienggo lewat maka doni enda bakal menikmati tahun Rahmat, eme masa-masa penuh berkah. Tapi enggo kin kinitekenta sesuai ras kinnata kegeluhenta? Ula lebe kita ngerana kerna kinatan si lit i seluruh doni enda, i Negara kita saja, Indonesia, belakangan ngalami kejadin-kejadin si mengharuken erkiteken bencana siterjadi hampir i seluruh negri. Emaka la ateta mamang adi sejak 2009, Negara nta enda ikataken Negara seribu bencana.

Bencana hidrometeorologi khusuna banjir, tanah longsor ras kekeringen enggo jadi trend bencana ibas Negara Indonesia. Kerna banjir saja mulai kin tahun 1979-2009 enggo tercatat 2509 kali bencana banjir siterjadi ibas 32 propinsi i Indonesia. Ibas sada sisi memang banjir terjadi tapi anehna erbage-bage berita pe ngatakenca maka sumber-sumber lau i Indonesia pe enggo urak. Gubernur Jawa Timur ngatakenca maka sumber lau lit Buena 117 mata lau gundari enggo tading 53 sumber mata lau, bahkan adi musim Kemarau maka sumber mata lau e tading telu mata lau saja. Bageme keadan negaranta Indonesia paksa enda bagi siiberitaken media massa. Ebiet G. Ade ibas laguna tahun 1979 sierjudul “Berita kepada kawan” nuriken lirikna “… atau alam mulai enggan bersahabat dengan kita, coba kita tanyakan pada rumput yang bergoyang…”. Maka hal penting sipatut iperdiateken kita eme tuhu kin alam enda enggo enggan bersahabat ras kita? Ntah sebalikna?

Injil Luk. 14:14-21 ngataken man banta maka kenca kerehen karya Penyelamaten Tuhan Jesus ku doni enda, arusna berita simehuli (kabar baik) bage pe tahun berkah enggo reh ras pe jadi kinatan ibs kegeluhenta. Tuhan Jesus sendiri enggo maba kiniulin rasp e pasu-pasu man banta kerina manusia emaka lanai perlu kita nggeluh ibas kiniseran, subuk ibas tawanen perbeben ras pe kemiskinen, tertindas bencana ntah pe malapetaka, ntah pe ibutaken keserakahan eksploitatif.

Emaka adi lit denga kalak si tertawan ibas kungkungen kiniseran, maka e ertina labo kerna padan Dibata meleset tapi erkiteken lit campur tan manusia si ncedaisa. Enggo waktuna kerina manusia, khususna kalak Kristen si erkiniteken, jadi sadar maka, nggeluh jadi pengikut Kristus si mehuli eme alu dalan la menghalangi terwujudna kesejahteraan i doni.

Bangsa Israel ngerayaken karya pembebasen Dibata man bana ibas wari raya pondok daun. Bangsa Israel mind man Ezra gelah ibacakenna torat Musa, ibas mbegiken Torat e ibacaken tangis me bangsa Israel. Erkiteken nggeken Torat Musa e jadi sada ketedehenna sebab ibas negri pembuangen lanai iingetna guna ndalanken Torat e. alu ibangun mulihi tembk Jerusalem, bangsa Israel pe erpengarapengen guna mbangun kegeluhenna mulihi si enggo porak-poranda erkiteken ngelupaken hokum Torat. Kalak Israel pe sadar ia kerna pentingna Torat guna jadi pedoman geluhna.

Selamat Melayani man banta kerina

Cl. Pdt. Julia Elperida br. Ginting

0853-6175-3339

Melayani i Runggun Penen

LITURGI PENGUBUREN GBKP

LITURGI PENGUBUREN GBKP Rg. PENEN

Ielai: Cl. Pdt. Julia Elprida br. Ginting’s

1.1      Rende : KEE 190:1, 5

Ola kel lupaken aku, o Yesus Tuhan

Amin mbue kal dosangku, masap krina ban

Reff : Yesus, Yesus sampat akulah,

bas Kam saja aku pulah, Kep-kep akulah

            Ibas kegeluhen doni, Tuhan si tetap

            Amin kai pe gia jadi, Kam temanku kap

            Reff : …

    2 Liturgi : Ketuahen kalak si mate, si mate ibas kiniteken man Tuhan mulai genduari nari, pekesahken me ia ibas latihna nari sebab perbahanen-perbahanenna ngarak-ngaraksa (Ket. 14:13). O senina-senina, ate kami maka ietehndu min kuga si tuhuna kerna kalak si enggo mate, gelah ola ceda atendu bagi kalak si la erpengarapen. Tek kita maka Jesus enggo mate janah enggo nggeluh mulihi. Bage pe tek kita maka kalak si enggo mate si tek man Jesus ibaba Dibata pagi ku Jesus gelah ersada ras Ia. Pengajaren Tuhan si ituriken kami man bandu e me: Kita si nggeluh denga asum reh pagi Tuhan mulihken labo pagi silebei kalak si enggo mate. Lit pagi sora erlebuh, sora malekat si mbelin ras sora terompet Dibata janah nusur me Tuhan i Surga nari. Kalak si enggo mate si tek man Kristus me pagin si pemenana ipegeluh mulihi. Kenca bage maka kita si nggeluh denga paksa si e ipepulungNa ras kalak ndai i datas embun guna njumpai Tuhan i awang-awang. Kenca bage tetap kita ras Tuhan. E maka si apul-apulenlah kam alu kata enda. (1 Tes. 4:13-18)

3 3. Ertoto

44. Renungen : Kejadin 25:7-11

55. Pengakun Kiniteken

66. Rende (Berkat ku kuburen) : KEE 207

(1)   I uruk Golgota, ku idah silangNdu. Dosangku simajekkenca, silangNdu e Tuhan. Reff : Reh aku Tuhan ngadap man baNdu

Yesus dudurken tanNdu, alokenlah aku.

(2)   Ku begi soraNdu, erlebuh man bangku. Lah aku pe ku golgota

Ngendesken geluhku. Reff : …

(3)   Di latih kin gia geluh ban dosa e, ernalem man baNdu ngenca je malem ate e. Reff: …

(4)   Petetap me gelah kinitekenku min, ku ikut Kam teguh gelah geluhku sampat min. Reff: …

(5)   Salahku ku gejap bas kegeluhenku. Penalemenku e tetap perkuah ateNdu. Reff: …

(6)   Kam Yesus melias perkuah simbelin. DalinNdu kuikutken ge lah aku terkelin. Reff: 

(7)   O Yesus mulia badia darehNdu. Nggo mambur kap I Golgota nebusi dosangku. Reff: …

77. Liturgi : NinaTuhan Yesus, Aku kap simereken kegeluhen ras mpekeke kalak si mate. Ise si tek man bangku nggeluh me amin gia enggo mate. Sikuban genduari e la iangkandu, tapi pagi jadi tangkas kap man bandu. Nina Jesus man ajar-ajarNa kerina, "Ola aru atendu. Ernalemlah kam man Dibata janah ernalem pe kam man bangKu. I bas rumah BapangKu mbas ingan; janah lawes me Aku nikapken ingan man bandu. Tuhu kap enda; adi lang labo Kukataken bage man bandu. Kenca Aku lawes nikapken ingan man bandu, reh denga pagi Aku ngalo-ngalo kam, gelah i ja Aku i je kam pe.” (Yoh. 14:1-3) Enggo isikapken Dibata man kalak si mate sada kuta (Heber 11:16). Perban enggo idilo Tuhan kekelengenta si: ………… Emaka sikuburken ia ibas pengarapen kerna kinikeken ras kegeluhen si rasa lalap, erkiteken Tuhanta Yesus si enggo nalihken kematen jadi kegeluhen. Ibas gelar Bapa e, ibas gelar Anak e, ras ibas gelar Kesah Sibadi e. Amin.

88. Rende : PEE 17:1, 5

Tuhanta Yesus e i surge. Nikapken ingan banta kin. Begiken kata Tuhan banta. Janahna teklah kita min.  

Reff : KataNa kap pengapul e man kalak sitek bana e. 2 x

O Yesus Kam me teman kami. Tegulah kami kerina min.

Rajailah gegeh ukur kami. Babailah seh ku surga kin.

Reff : …

99. Ertoto

110. Ngamburken Taneh

111. Rende : KEE 98: 1,2,3

Ise kin gia temanta sitetap seh lalap e. Temanta situhu-tuhu eme Tuhan Yesus e. Nterem gia kade-kade teman labo kurang pe. Kerina denggo i tadingken di nggo mate kita e.

Kaka agi bapa nande si erkeleng ate e. teman pe ras kade-kade tadingkenna kita nge. Taruhkenna gia kita seh kubas kuburen e. lawes ia me kerina tadingkenna bangke e.  

Tuhan Yesus labo lupa ku teman-temanna e. ras tendinta pe ingetNa seh ku pintu kubur pe. Sitadingken gia krina ibas kegeluhen e. jumpa kita ibas surga kesenangen lalap pe.  

112. Renungen Singkat: Perngandungen 3:28-29; 32-33

113. Rende : KEE 181:1,2

Segedang-gedang geluhku itemani penebus labo kai pe lit sikurang adi tanNa negu trus. Dame surga lit bas aku iusekenNa bangku kegeluhen jadi senang kai pe lalit sikurang. Kegeluhen jadi senang kai pe lalit sikurang.

Segedang-gedang geluhku kubentasi krina e di simberat reh man bangku Ia penahangisa. Labo pediatNa ndabuh minter kal iangkatNa lalap ijagaiNa aku iban keleng ateNa. lalap ijagaiNa aku iban keleng ateNa.

114. Ngamburken bunga (sukut, sembuyak, kalimbubu, anak beru, runggun gereja rsd)

115. Ertoto + Pertoton Tuhan

TUHAN SIMASU-MASU KITA KERINA

Dibata i tengah-tengahta

BAHAN SERMON KHOTBAH MINGGU PENEN 13 DESEMBER 2015

Invocatio      : Bagi nina Dibata, “Nggeluh me Aku ras ia janah ringan Aku i tengah-tengahna. Aku me jadi Dibatana janah ia jadi bangsangKu” [II Kor. 6:16b]

Ogen               : Lukas 3:7-18 [Tunggal]

Khotbah          : Jesaya 12:2-6 [Responsoria]

Tema               : Dibata i tengah-tengahta

Kata Perlebe

Erbage-bage persoalen si ni hadapi kalak Kristen mekatep rusur erbahanca kita nungkun “ija kin Dibata e?” tekanen nggeluh, perjuangen ibas ngalaken perbeben ras pe ibas nimai jawaben Tuhan banci saja erbahansa kinitekenta lanai megegeh tapi Kata Dibata meyakinken kita maka lit Dibata e itengah-tengahta.

Pendalamen Teks

Ibas bagin kitab Jesaya enda sidapeti me ende-enden pengataken bujur arah bangsa Israel siberupa ende-enden Mazmur. ende-enden enda enggambarken penderitan bangsa Israel siisampati Dibata janah pe ibebasken Dibata. penderitaan bangsa israel enda iumpamaken bagi sekalak si muas itengah padang gurun, kerah ras las. Bangsa e tuhu-tuhu menderita erkiteken dosa-dosana sendiri. Ibas keadaan si muas, kerah ras tandus, Dibata sumber keselamaten reh mereken mata lau keselamaten. Kerina jelma bebas muat lau arah mata lau keselamaten e.

ü  Jesaya 12 : 2

Adi labo erkiteken Dibata, labo mungkin Israel bangkit mulihi. Tapi erkiteken lit padan Dibata man Daud, maka Israel bangkit mulihi alu luar biasa sue ras kata Dibata. Dibata jadi keselamatenna bagepe Israel tek ras la mbiar erkiteken Dibata lit itengah-tengahna. Ibas pembebasen siibereken Dibata e lanai lit man kebiarenken, erkiteken Kristus merentah alu mutlak. Luar biasa tuhu-tuhu sebab Israel jadi seh kel hebatna, megegeh ras pe dem alu kuasa, Emaka erkiteken nubuat enda bangsa Israel muji-muji Dibata sebab Dibata kap jaminen keselamaten Israel.

ü  Jesaya 12 : 3

Lau e biasana enggambarken keriahen ras kepuasen si rehna ibas Dibata nari. Kerina bangsa Israel pagi mut lau alu keriahen arah sumur keselamaten sienggo pasti eme Tuhan Jesus, juru selamat doni. Kerina ia banci mbuat lau e, bebas, senang ras pe Cuma-Cuma. Lau ibas bangsa Israel rusur ipergunaken ibas upacara keagamaan guna menahirken jelma si enggo terlepas arahpinakit tertentu, lau e pe ipake guna mbersihken diri kenca njemak mait. Ibas padan simbaru Jesus ngataken Dirina eme lau kegeluhen, mata lau si la banci kerah

ü  Jesaya 12 : 4

Ibas wari pembebasen simereken keselamaten man Israel, Gelar Dibata ilebuh dingen ipuji.erkiteken Dibata enggo encidahken perbahanenNa itengah-tengah bangsaNa, musuh-musuh Israel italukenNa [Bil. 24:18 “italukenna musuhna i Edom ibuatna tanehna jadi sikerajangenna, ibas si e Israel tetap menang”] Ibas kitab Jesaya melala kesaksin kerna surak-surak ibas wari siitimai e bagi sitersurat ibas Jesaya 25:9 “Tupung e ikataken kalak me ‘enda me Dibatanta! Enggo kita ernalem man Bana, janah enggo ipulahiNa kita. Ia kap Tuhan! Enggo kita ernalem man Bana janah genduari malem ateta, meriah siakap erkiteken ikelinina”. Wari si reh e, eme wari kemenangen man kalak si tetap setia dingen tek man Dibata.

ü  Jesaya 12 : 5

Seisi doni pasti nandai gelar Tuhan Jesus juruslamat doni. Ibas jaman sigundari memang lenga siisi doni enda, tapi ibas kerehen Tuhan Jesus sipedua kaliken ije enggo tangkas kerina doni enda nandai gelar Jesus. Berita simeriah harus iberitaken kubelang-belang doni seh maka kerina manusia megikensa. Eme berita kerna uga Dibata enggo mulahi manusia ibas perbudaken dosa nari, perbahanenNa simbelin e siarus iberitaken kita ku kerina jelma [ersaksi], seh maka doni enda pe rende muji gelar Dibata.

ü  Jesaya 12 : 6

Bangsa Dibata bebas ersurak-surak ngelebuh gelar Dibata. pengulangen perentah guna ersurah ras rende eme ngatakenca maka keriahen si bakal idapeti bangsa Israel e tuhu-tuhu lalit tandingenna, seh maka iajukna kerina Doni guna muji gelar Dibata. Ibas kerehen Jesus itengah-tengah doni enda ka nge pagi tangkas man banta pemerentahen Dibata alu tongkat besina, kerina manusia si la tek nandangi Dibata pasti binasa, tapi kalak si ernalem ras mengandalkan Tuhan saja ikelininna.

Pengkenaina

Kai kin makna kehadiren Dibata itengah-tengahta? Dibata mereken penghiburen, Dibata mereken keselamaten. Tentuna ibas kehadiren Dibata itengah-tengahta perlu lit respon sirehna arah kita nari. Kitab Jesaya si jadi bahan renungenta ngajuk kita guna :

1. tetap ngataken bujur man Dibata, tindaken enda ngajarken man banta guna tetap nginget uga belinna perbahanen Dibata ibas geluhta seh maka kita pe la erngadi-ngadi guna ngataken bujur man Bana.

2. rende muji Dibata [bermazmur], ngajuk kita guna tetap mpenangkih kidung pujinta man Dibata.

3. Ersurak, enda salah sada contoh aktif guna bertindak, erbahan sesuatu sijadi tanda maka kita tuhu-tuhu nggejabken Dibata lit itengah-tengahta. Bagi bahan ogenta ibas Luk. 3:7-18, Johanes Peridiken alu tegas ngatakenca maka kita harus ngasilken buah pertobaten, pertobaten e labo terjeng pengakun i biber saja tapi siutama eme tindaken nyata, bagi nina “Ise lit dua bajuna arus iberekenna sada man kalak si lalit bajuna, bage pe ise si lit nakanna arus ibagikenna”.

Ula min kari kita bagi kalak si munafik, tempa-tempa ngataken bujur, bermazmur ras ersurak tapi la itadingkenna biak-biak si gelap. Emaka selaku kalak Kristen banci kita ikataken Kristen sejati labo ibas kita ngataken bujur, bermazmur ntah pe ersurak saja, tapi uga kita ncidahken tindaken nyata si encidahken kualitasta selaku Kristen sejati, alu bage pe kita enggo ersaksi man kalak si deban maka Dibata lit itengah-tengahta.

Cl. Pdt. Julia Elprida Br. Ginting’s

GBKP Runggun Penen

Selamat Melayani