LAKOKENLAH KAI SIITOTOKENNDU MAN DIBATA

BAHAN SERMON KHOTBAH MINGGU

Invocatio      : Janah adi ipindondu la idatndu, sabab erkiteken tujunndu la mehuli; kai siipindondu guna pesenangken dirindu saja ngenca. (Jakup 4:3)

Ogen             : Johanes 14: 23-29 (Tunggal)

Khotbah       : Mazmur 67: 1-8 (Responsoria)

Tema             : Lakokenlah Kai Si Itotokenndu Man Dibata

PEMAHAMEN TEKS

Ende-enden ibas Mazmur 67 enda eme pujin si iendeken bangsa Israel ibas rumah pertoton i Jerusalem sijadi pengataken bujur ras ngingetken uga Dibata enggo mbebasken bangsa Israel arah perbudaken Mesir nari. Ibas kitab mazmur enda teridah maka pemasmur mindo man Dibata gelah tetap mperdiateken bangsaNa, alu bage bangsa sideban banci ngidah uga Dibata ngasup mbebasken, dem keadilen ras tetap masu-masu bangsaNa. Mazmur enda pe enden pengataken bujur kerna kerina pasu-pasu si enggo ibereken Dibata man bangsa Israel sanga wari Raya sapo-sapo. Erkiteken ibas wari raya e, kerina ia ibas wilayah ijapa pe pulung guna ngataken bujur ras ertoto gelah pemere sienggo ialoken banci mereken hasil si mbelin man bangsa-bangsa si deban. Sada enden pengataken bujur simewarisi pemanggilen Abraham, ipasu-pasu guna jadi pasu-pasu man jelma i doni enda.

Ibas ende-enden enda lit pengarapen gelah bangsa-bangsa si deban reh man Dibata raas pastuh ibas pimpinen Dibata gelah lit kedamen i doni enda (ay. 4-6). Kedamen ras kesejahteraan banci irasaken arah hasil taneh si ipasu-pasu Dibata (Im. 26:4), alu bage bangsa si deban banci ngidah ise Dibata siisembah bangsa Israel e. sebab lalit Dibata sideban si banci mereken keadilen raas kedamen bagi siibereken Dibata siisembah Israel (ay. 7-8). Pengataken bujur pemasmur e pe sekaligus ngingetkensa maka Dibata nge siempuna kerina sinasa lit, emaka labo mesera man baNa guna tetap masu-masu bangsaNa. Ras pe pasu-pasu/pemere Dibata man bangsaNa e la tergantung situasi/ kondisi si lit, enda terbukti amin pe bangsa Israel rusur erbahan si la ngena ate dibata taspi Dibata tetap masu-masu bangsa e ras ncukupken kerina siiperlukenna.

Arah mazmur 67:1-8 enda banci sisimpulken maka pertoton  ras pengarapen pemasmur ibegi Dibata, enda terbukti arah tulisen pemasmur si ngataken bujur man Dibata kerna kerina sienggo ialokenna ras bangsana. Selaku bangsa Dibata pe si lalap ngaloken pasu-pasu Dibata maka harus ka kita ngasup jadi pasu-pasu man kalak si deban. pemasmur ngakuken maka kerina pasu-pasu e rehna arah Dibata nari, e nge sebabna maka kerina manusia harus muji Dibata. Arah kai? Arah perbahanen ras tindaken si sue ras pertoton bagepe pengarapen siisehken man Dibata. Alasen Dibata masu-masu kita labo gelaah kita jadi meganjang rukur tapi gelah Dibata e itandai i doni enda. Muji Dibata labo cukup guna jadi alasen gelah Ia masu-masu kita, erkiteken adi terjeng muji saja lenga tentu kita ngelakoken sada perbahanen si mehuli iadep-adepen Dibata (terjeng i biber saja).[1]

Ibas bahan ogenta Joh. 14: 23-29, tambah tangkas man banta kai si harus ilakoken kita. Kekelengen enda me hukum dasar kalak Kristen (kalak si erkiniteken). Emaka ibas kai pe siilakoken kalak si tek man Jesus harus erpalasken kekelengen. Kerehen Jesus ku doni enda enggo ncidahken kekelengen Dibata nandangi doni enda, janah ibas Jesus ndalani kegeluhenNa pe icidahkenNa uga ia engkelengi manusia. Erkiteken Jesus enggo leben engkelengi manusia maka manusia pe harus engkelengi temanna manusia ras lingkungenna. Kerina sienda banci silakoken adi kita tuhu-tuhu ngikutken kai si iajarken Jesus, sebab kerina pengajaren siikataken Jesus rehna arah Bapa si i Surga nari. Arah kita nggit ngoge kata Dibata, tutus megiken pengajaren kerna kata Dibata, maka kita pe ijadiken pelaku-pelaku firman. Kita singelakoken kata Dibata e, maka Dibata pe ringan ibas kita (ay. 23-24).

Ibas proses kita ngoge kata Dibata ras megiken pengajaren kerna kata Dibata e tentuna lit nge keterbatasenta guna ngangkaisa. terlebih secara alami kita enda kalak perdosa sicenderung erbahan dosa. Emaka iblis pe banci saja mperdiateken kita janah ibahanna pikirenta buntu, la erpengangka kerna kata Dibata, pusuhta itutupina. Emaka Jesus ngatakenca maka reh me pagi Kesah si Badia sibakal ngajari dingen nampati ibas memahami kerna maksud ras tujun kata Dibata (ay. 25-26). Jesus pe ngataken maka iberekenNa me kemalemen ate (ay. 27) man banta, kemalemen ate siibereken Dibata e labo bali ras si ibereken doni enda. Kemalemen ate siibereken Dibata eme kesiapenta guna ngaloken kai pe si reh ibas wari-wari sipepagi, kai pe e, keriahen, kesusahen, kecedan ate, rsd. Dosa si lit ibas kita banci saja erbahanca kita mbiar, ragu, lalit kepastin tapi kemalemen ate sirehNa ibas Dibata nari ngasup menghalau si e kerina. Emaka kalak si tek man Jesus tentuna la aru atena amin gia Jesus lawes ndahi Bapa (ay. 28-29). Amin gia ibas zaman genduari la si idah Jesus e, tapi labo e erbahanca kita la yakin, ragu-ragu. Labo e erbahanca kita nungkun-nungkun “Lit kin Dibata e?”. sebab Kesah si Badia si tadi ibas kita tetap ngajari kita kerna Dibata.

Arah invocatio ibas minggu enda pe ipersingeti mulihi man banta kerna pertotonta. Ora et Labora et Ora, dahiken siitotoken kita janah totoken siidahiken kita. Ibas kita ertoto cataten man banta maka labo terjeng sura-suranta saja siisehken kita tapi ibas kita ertoto e pe harus ka lit gunana man kalak sideban, arah pemindonta ibas toto e harus ka termulia gelar Dibata. Emaka enda pe jadi perenungen si penting man banta. Bangsa Israel ibegiken Dibata pertotonna seh maka ia pe ndatken kemenangen, emaka gelah pertotonta pe tersehi pindokenlah si mehuli man Dibata. Reh tutusnalah kita ertoto tentuna alu pertoton si benar ras lakokenlah kai siitotoken kita e man Dibata.

Selamat Melayani ras mejuah-juah man banta kerina

Pdt. Julia Elprida Br. Ginting’s

(0853-6175-3339)

Melayani i GBKP Runggun Penen

Klasis Medan-Delitua

---

[1] www.gbkp-kjb.org/index.php?option=com_content&view=article&id=1042:khotbah-minggu-671-8-minggu-01-mei-2016-rotega&catid=85:khotbah-umum&ltemid=180

Meriahlah O Doni Ras Langit Kerina

Khotbah 17 April 2016

Invocatio    : Sabab kerina sinasa lit Dibata njadikenca, janah kerina e lit erkiteken IA dingen man gunana. Terpujilah Dibata seh raasa lalap. Amin (Roma 11:36)

Ogen          : Ketangkasen 7:9-17 (tunggal)

Khotbah     : I Kronika 16: 31- 36 (Responsoria)

Tema          : Meriahlah O Doni Ras Langit Kerina

Khotbah

Sope lenga kita seh ku tema ta wari minggu enda, mari lebe sigargari kai ertina ntah pe maknana kerna bahan khotbahta ibas wari enda. Kitab I Kronika 16:31-36 nuratken kerna ende-enden pujin siiendeken bangsa Israel kenca ia maba peti perpadanen ku Jerusalem. Kai kin peti perpadanen e? peti perpadanen ntah pe ibas cakap indonesia ikataken tabut perjanjian, tabut Allah, Tabut Kesaksian eme tabut siberbentuk persegi panjang, ibahan arah batang pohon Penaga, ukurenna 1,3 x 1 x 1m. tutup Tabut ntah pe ikataken tutup Pendamen ibahan arah emas nari, siujung-ujungna berbentuk sayap.

Peti perpadanen e eme peti siipake guna nimpan barang-barang pusaka sierbahan bangsa Israel banci nginget kerna perbahanen Dibata kempak ia kerina. Ibas peti e itamaken dua loh batu torat siertulisken 10 pedah Dibata, buli-buli manna (pangan sanga i padang pasir), tongkat harun, ras pe sarana-sarana siipake Dibata guna jumpa ntah pe ngerana man suruh-suruhenna musa (semak belukar). Erkiteken peti perpadanen e menurut keyakinen bangsa Israel melambangkan kehadiren Dibata ije.

Bahkan si luar biasana peti perpadanen e enggo menempuh perdalanen si cukup nggedang ibas perdalinen sejarah bangsa Israel. Mulai i Gilgal nari peti perpadanen e ibaba ku Betel, emaka ipiserken ka ku Silo ibas zaman hakim-hakim. Kenca si e irampas bangsa Filistin me peti e, tapi kepeken ise si ngerampas peti e justru maba cilaka man bana, seh maka bangsa Filistin kena pinakit seh 7 bulan erkiteken si e iulihken bangsa Filistin me peti e man Israel itamaken i Kiryat-Yearim. Ije me peti e dekahna 20 tahun la iperdiateken. Erkiteken ibas paksa si e eme paksa pemerentahen Saul, sanga masa Saul nge peti e la iperdiateken. Emaka kenca Daud jadi Raja peti perpadanen e ipisehkenna ku Jerusalem, erkiteken ije me bangsa Israel nembah man Tuhan.

Peti perpadanen e eme sada hal sicukup penting man bangsa Israel, emaka ibas kalak enda berhasil maba peti perpadanen ku Jerusalem meriah kel ukurna kerinana. Erkiteken peti enggo banci itamaken ku Rumah Pertoton. E nge turin-turinna maka bangsa Israel ngendesken ende-enden pujin man Dibata ibas bindu 16 enda.

Bagi bangsa Israel ngendesken ende-enden pengataken bujurna man Dibata, minggu enda pe ibaba kita gelah ngasup ngataken bujur man Tuhan kerna perbahanenna si mbisa ibas kegeluhenta. Bagi ibas pengogenta ketangkasen 7:9-17, ije ituriken kerna pengenehen Johanes. Ija lit enterem kalak si la terbeligai, ibas kerina bangsaa, suku, negara ras ibas kerina cakap pe lit ije. Kerina ia ngakuken maka keselamaten e rehna ibas Dibata nari si kundul ibas kinirajan Surga. Seh maka jelma e kerina nembah, ayona seh ku taneh. Adi ibas perdalinen geluh bangsa Israel jelas enggo tangkas man banta kerna kerina perbahanen tan Dibata kempak bangsaNa, nandangi kerina rasul-rasul ibas padan simbaru pe enggo jelas tertulis kerina maka Dibata e tetap mereken kemalemen ate ras kiniulin kempak ia kerina. Gundari uga man banta? Enggo nge sigejabken perbahanen Dibata si luar biasa e ibas geluhta? Seh maka kita ngasup ermeriah ukur iadep-adepen Dibatanta.

Bangsa Israel banci mbentasi lawit teberau erkiteken Dibata mbelah lawit e jadi dua, kita gundari berhadapen ras teberau ta masing-masing, teberau perbeben terbentang luas iadep-adepenta. Kai si banci ibahan kita? Adi balik ku pudi igombangi kalak kita, adi iterusken banci kita gedap. Adi sekalak si bijak ngatakenca sanga lanai kita banci ngenehen ku pudi ntah ku depan nehenlah ku datas, idatas nari lit nge lalap penampat e reh. Maksudna kai? Tataplah kempak Tuhan, ia nge simereken man banta dalan pulah, ia nge simereken man banta kengasupen gelah banci kita tetap ermeriah ukur iadep-adepenNa.

Minggu enda pe igelari minggu Jubilate siertina “Ersuraklah”. Emaka rikutken minggu Jubilate enda ibabai me kita ngenehen perbahanen Dibata simbelin lako mulahi kita ibas perbeben simberat nari. Perban keleng atena man BangsaNa nge maka Dibata nampati Israel ibas peperangen. Bage ka pe kita manusia, keleng ate Dibata enggo iberekenNa man banta arah kerehen Yesus si jadi Juruselamatta. Eerkiteken si e bujur nge kita Ersurak, ermeriah ukur, ras ngataken bujur. Ersurak si labo terjeng sora si megang tapi ikut muat bagin ibas ersaksi kerna kematen ras kekeken Jesus man doni enda gelah doni enda pe kerina ermeriah muji-muji Dibatanta. Amin.

Selamat Melayani ras mejuah-juah man banta kerina

Pdt. Julia Elprida Br. Ginting’s

(0853-6175-3339)

Melayani i GBKP Runggun Penen

Klasis Medan-Delitua

Kehamaten, Kemuliaan ras Kuasa Man Bana Rasa Lalap

Khotbah Minggu 10 April 2016

Invocatio     : Sabab Ia kap Dibatanta, kita bangsa si ikelengiNa. Kita desken rarasen biri-biri si ipermakaniNa. Emaka wari enda dengkehkenlah soraNa. (Mzm. 95: 7)

Ogen           : Mazmur 30: 2-13 (Responsoria)

Khotbah      : Ketangkasen 5 : 11-14 (Tunggal)

Tema           : Kehamaten, Kemuliaan ras Kuasa Man Bana Rasa Lalap

Khotbah

Ibas kita ngerana kerna kitab ketangkasen, maka perlu nge sieteh leben maka sitertulis ibas kitab e eme kerna sada pengenehenen Johanes sanga ia iasingken ntah pe ibuang ku Pulau Patmos erkiteken ia mberitaken berita simeriah. Emakana kitab ketangkasen epe banci ka ikataken kitab nubuaten, adi kerna nubuaten berarti kerina sitertulis ibas kitab enda, lenga terjadi tapi pasti bakal terjadi, engkai? Erkiteken enggo memang kin bage itetapken Dibata. Sebab adi la lebe itetapken Dibata tentu labo mungkin enda jadi sada pengenehenen man Johanes.

Perpulungen kekelengen Tuhan, ibas bahan ogenta iajuk kita ngenehen kubas pengalaman Daud. Ibas kesaksin ende-enden mazmurna tuhu tangkas kel ikataken Daud maka Dibata enggo mulahi ia ibas kuburen nari, enggo erdalan Daud kempak doni kematen tapi ipegeluh Dibata mulihi ia (ay. 4). Entah termamang-mamang nge kita ngoge kalimat mazmur Daud enda. Tapi enda situhuna ngatakenca maka Daud enda pernah mengalami kejadin simberat kel ibas geluhna. Ia pernah mengalami masa-masa sulit, iuru-uru prajurit Saul guna munuh ia, ibas kesesaken si pernah ialamina, ibas keadaan erceda ate sipernah igejabkenna sanga mate anakna. Tapi luar biasa ibas keadaan situhu-tuhu hancur, ngasup denga ia muji Tuhan.

Kesaksin Daud ibas ay. 1 ipujina Dibata erkiteken la ipediat Dibata imbangna megombang man bana. Kita kerina genduari sipulung ijenda, lit imbangta darat ntah lang? cuba si siksiki banta, apakah lit imbangta e erkiteken kita mpertahanken sibenar ibas kata Dibata ntah mgkn erkiteken siibahanna la bagi sura-suranta. Adi kai si ialami Daud enda, enggo tangkas tuhu maka lit pe imbangna erkiteken ia ndalanken kai siitetapken Dibata. Emaka tentu saja Dibata pasti mbela Daud. Jadi labo berarti setiap lit imbangta darat, asal sipuji Tuhan enggo pasti naring kita menang, labo kel e jadi sada jaminen. Tapi si pasti adi kita lit ibas pihak sibenar iakap Dibata maka pasti kita ipemenangNa.

Ngataken bujur man Dibata enda enggo jadi sada hal siwajib idalanken kita selaku anak-anakNa. Tapi sirusur pengataken bujurta e lebihen kernaa berkaat-berkat ras kesenangen-kesenangen si lit ibas kita. Adi ibas masa-masa sulit, terjepit ras pe gagal, kinitana mesera nge siakap ngataken bujur. “Apa yang mau disyukuri? Tohh.. keadaan sedang sulit dan paceklik”.

Tapi ibas bahan renungenta sekalenda Daud ngajarken man banta, maka amin gia ibas keadaan simberat kel tetap harus ngasup kita ngataken bujur man Dibata, harus kita nehken puji-pujin man baNa. Ibas keadaan yang sulit sekalipun kita harus banci ndatken sada alasen guna tetap ngataken bujur man Dibata.

Minggu enda pe igelari minggu Misericordias Domini, siertina minggu simabai kita nggejabken lias ate Tuhan Dibata. Ija kita ikelini dingen ipulahi ibas ukumen nari. Kita enggo itebus, jenari iperembakken Dibata kempak DiriNa arah kematen Jesus Kristus i kayu persilang. Dosa ras kelepakenta lanai iingetNa jenari iatanken Dibata kita bengket kubas kemulianNa sirasa lalap.

Perpulungen kekelengen Tuhan, kitab ketangkasen sijadi bahan khotbah sekalenda isuratken Johanes erkiteken ibas paksa si e, kalak Kristen sangana igasgasi kerna kinitekenna man Jesus Kristus selaku Tuhan. Emaka arah kitab enda, singogesa ndatken pengarapen ras gegeh gelah tetap megenggeng ibas kiniseran. Adi siperdiateken kari ibas ayat sada nari ntah bingung nge kita ngogesa sebab lit ka ije ikataken kitab siisegel, janah sada pe la metunggung guna mbuka segel e, jenari ngenehenca kubas kitab e. tapi perpulungen kekelengen Tuhan maksud siitulisken Johanes e eme sada kiasen. Kitab e eme pusuhta, janah segel e eme dosa singiket kita, simematerai kita seh maka la banci kita pulah ibas dosa e. emaka ibas ay. 5 “singa ibas suku Juda nari, kesusuren si ipebelin ibas Daud enggo menang. Ia metunggung mecahken materai si pitu e ras nalangisa.” Singa siimaksudken ibas kitab enda eme Jesus. Jesus e kesusuren ibas suku Juda nari, kesusuren Daud. Jesus enggo menang Ia naluken kuasa doni kematen, emaka Jesus ngenca ngasup ngelepasken kita ibas kerina belenggu-belenggu, iketen-iketen si lit i doni enda. Gelah si dat tuhu-tuhu kesenangen si rasa lalap e. emaka alu bage perpulungen kekelengen Tuhan erkiteken belinna kekelengen Dibata e man banta patut nge bagi tema ta sekalenda maka Kehamaten, Kemuliaan, ras Kuasa Man Dibata nta saja rasa lalap. Amin

Selamat Melayani ras mejuah-juah man banta kerina

Pdt. Julia Elprida Br. Ginting’s

(0853-6175-3339)

Melayani i GBKP Runggun Penen

Klasis Medan-Delitua

Si Muas dingen Melihe Dahilah Tuhan

Bahan Khotbah Minggu 28 Februari 2016

Invocatio  : Erjabab Jesus “Kalak singinem lau enda muas denga. Tapi kalak singinem lau si Kubereken man bana, lanai ia muas seh rasa lalap. Sabab lau si Kubereken e jadi sumbul erburak-burak ibas ia dingen mereken kegeluhen situhu-tuhu si la erkerin-kerin” (Joh. 4:13-14)

Ogen         : I Korinti 10:1-13

Khotbah    : Jesaya 55:1-9

Kata Perlebe

sisi aktif tep-tep manusia eme, adi muas ia pasti minem, janah adi melihe ia pasti man atena. Adi lit sen na pasti kai keperlunna itukurkenna alu sen e. mungkin pernah sada paksa sinehen berita ibas TV kerna pembagian sembako gratis, ntah pe mungkin kita sendiri pernah ikut muat bagin ibas aksi-aksi social sibage, mereken pangan man kalak si kekurangen ibas geluhna tanpa sipindo bayarenna ntah pe gratis. Tapi hal si pasti berulang man banta selaku manusia, piga nolih pe kita minem pasti lalap denga kita muas, piga nolih pe kita man pasti sinanami denga nge kari melihe. Uga gia tabehna pangan siipan kita sendah pasti pagi lit ka sijumpai pangan silebih ntabeh asangken si e.

pernah nge ndia sibayangken sada paksa kita necap sada pangan janah lalit sijumpai pangan si lebih ntabeh asangken si e seh genduari?

Pendalamen Teks

Perikop enda banci sibagi kubas 3 bagin : sipemena (ay. 1-2a) nuriken kerna kai-kai saja keperlun geluh manusia ibas geluhna. Sipeduaken (ay. 2a-5) nuriken uga Dibata ncukupi kerina keperlun manusia e. labo terjeng soal pangan saja, tapi pe kerna kebutuhen sosialna, jaminen kegeluhen ras pe popularitas ibereken Dibata. Sipeteluken (ay. 6-9) nuriken kerna uga seharusna responta selaku manusia sienggo icukupken Dibata kerina kegeluhenta.

³ Ay. 1- 2a

Manusia secara umum lit instingna guna memenuhi kebutuhen pokokna, eme: sandang, pangan ras papan. Uga nge gia jadina adi manusia e la tercukupi kebutuhen pokokna? Tentu banci saja e mengakibatkan manusia e jadi rendah diri. Hal enda banci sibandingken ras kalak sitading ipinggir-pinggir dalin, si medem ilebe-lebe toko kalak, ras sidebanna. Kalak sib age pasti la ia percaya diri guna bergabung ras kalak sideban silebih asangken ia. Tentu secara emosional lit kebiarenna eme, kemungkinen ia akan dikucilkan, diremehkan ntah pe ipermaluken kalak sideban, erkiteken kecibal geluhna la bage arusna. Emakana wajar saja adi kalak sibage geluhna rusuren ia ngarapken perkuah ate kalak sideban guna banci ncukupi keperlun geluhna e.

Uga nge ndia jadina adi kalak siserba kekurangen e ndatken pemere si simpar kel tanpa harus ia nggalar, tapi Cuma-Cuma (gratis). Rusur siidah ibas TV uga masyarakat miskin berbondong-bondong, rebuten, siasak-asaken seh maka lit ka si mate erkiteken terperjak kalak sinterem hanya untuk mendapatkan sada bungkus plastik sembako. Si secara logika adi sibandingken plastik sembako e ras geluhna tentu ergan denga nge geluhna. Tapi banci ia kehilangen geluhna justru guna bertahan geluh.

³ Ay. 2b-5

Kerina sinasana si lit ibas doni enda tentuna Tuhan empuna. Termasuk kita pe manusia, Tuhan Dibata ka nge si empuna kita. Ia si berotoritas ibas geluhta, Ia sinjayam geluhta janah Ia ka nge si njamini geluhta seh rasa lalap. Manusia mungkin terjeng berorientasi nandangi kebutuhen pokona saja, tapi Dibata situhuna enggo nikapken lebihen asa si e. ibas bahan renungenta enda, Dibata labo terjeng nikapken panganen pokok man manusia tapi pe kerna kebutuhen social manusia e sendiri enggo iaturken Dibata. Dibata sienggo mengikat janji ras bangsaNa guna jadiken Israel e bangsa si termasyur, enda me sada bentuk social sienggo isikapken Dibata man bangsaNa. Labo terjeng e saja tapi Dibata pe enggo mereken kehamaten ras kemuliaan man bangsaNa. Adi Dibata pe enggo mereken kehamaten ras kemuliaan man bangsaNa, kai nari nge si kurang? Amin gia bangsa si deban nindih Israel, amin gia bangsa sideban megombang man bana tapi adi Dibata enggo mereken kehamaten ras kemuliaan man bangsaNa, tentu lanai bo kita perlu pengakun manusia.

³ Ay. 6-9

Selayaknya kalak gelandangan siibereken pangan tentuna ia ngataken bujur man simereken pangan e. kita pe harus bage ka perbahanenta erkiteken Dibata sienggo ncukupi kerina keperlunta, labo terjeng keperlun pokok, tapi pe sosial ras kinihagan enggo iberekenNa man banta. Emaka man kai nari kin kita ndarami ingan sideban guna ngadu-ngadu? Pangenlah kita ndarami Tuhan, erlebuh man bana saja sabab ia me sinjayam kegeluhenta. Payo tuhu kita enggo nikapken hal-hal simehuli guna silakoken ibas geluhta tapi lenga tentu kai siisikapken kita e sue ras kai sienggo itentuken Dibata. Seh maka bagi siikataken Jesaya ibas ay. 8-9 nina “PerukurenKu la bali ras perukurenndu, dalanKu labo seri ras dalanndu. Bagi langit ndauh ganjangen asa doni, bage me pe ndauh ganjangen dalinKu asangken dalinndu, perukurenKu asangken perukurenndu”. Emak ula minter kita er-aru ate amin la gia seh bagi si nisuraken kita, sebab siisikapken Dibata e pasti lebih mehuli emaka marilah sidahi Ia.

Aplikasi

Kekurangen pangan ras kebutuhen sideban banci erbahan manusia salah langkah, ras pe nadingken Dibata guna ngayaki hal-hal si la kekal. Tapi Dibata mpetangkas man banta arah kataNa si tersurat ibas Yoh. 6 : 35 “Ngaloi Jesus,” Aku kap Roti si mereken kegeluhen. Ise sir eh ndahi Aku, lanai ia melihe, ise si tek man bangku lanai ia muas”. Kata Dibata enda ngajuk kita gelah ula terjeng orientasi pikirenta ibas doni enda saja, payo tuhu kita perlu pangan, paken ras ingan tading tapi si e kerina banci masap. Tapi kinitekenta banci erbahansa kita ngasup ngalaken kegeluhen si la bagi ukurta. Amin gia kurang perpanta, rumahta kitik, uista male tapi kinitekenta erbahansa kita tetap ngasup bertahan. Emaka marilah Dahi Ia kam kerina Muas dingen Melihe. Amin.

Selamat Melayani ras mejuah-juah man banta kerina

Pdt. Julia Elprida Br. Ginting’s

(0853-6175-3339)

Melayan i GBKP Runggun Penen

Klasis Medan-Delitua

Note :

Kritik ras saran ntah pe tambahen sidebanna banci itamaken ndu kubas blog enda.

Banci ka langsung menghubungi no. kontak sienggo itulisken.

Tuhan simasu-masu kita kerina.

                                                                                                                                                           

Ijenda Aku Suruhlah Aku

BAHAN SERMON PERPULUNGEN JABU-JABU

Nats  : Jesaya 6 : 1-8

Adi ngerana kita soal tema Pjj ta sekalenda, tentu enggo sangat familiar man banta, lanai asing kita megikensa kalimat e “ijenda aku suruhlah aku”. Saja memang ibas praktek keseharianta, sienda jarang denga sicidahken. La padah ndauhsa kel sibahan contohna, ibas kegiaten perpulungen jabu-jabu saja pa adi enggo seh paksana nuriken penggejapen, russuren nge perpulungenta e tungkuk kerina, sinik, mis macat. Jarang nge sijumpai ibas perpulungenta adi enggo isungkun “apai kita sinuriken penggejapenta?” langsung mis lit singatakenca “aku lebe”. Enggo langka nge gundari sijumpai jelma sib age. Nuriken penggejapen denga saja pe enggo kita mundur teratur rata-rata apai ka adi isuruh kita lawes meritaken brita simeriah ku belang-belang doni? Mungkin rukur kita lebe sekian ratus kali. Adi bage denga lah pengkebetta sedekah enda, enggo  nge ndia sicidahken “ijenda aku suruhlah aku?” ninta man Tuhan? Tentu lenga.

Berdasarken penelitien Litbang GBKP, pasrtisipasi perpulungenta ibas kegiaten gereja masih minim denga. Emaka GBKP ngarapken komitmen perpulungen guna meningkatken partissipasina ibas kerina pemdahin gereja ibas tahun 2016. Pengakun Jesaya “enda aku suruhlah aku”, eme sada komitmen nabi Jesaya guna ngelai Dibata ibas kegeluhenna. Tentuna semangat komitmen Jesaya enda senada ras harapen GBKP kerna ngawan ni perpulungen kerina guna ikut ka berkomitmen.

Pesan-pesan ras pernyataan-pernyataan Jesaya ibas kitab Jesaya enda ipengaruhi kerna situasi Politik si ialami kerajan Israel Utara bagepe Yehuda (Israel Selatan), erkiteken tekanen pemerintahen Raja Asyur. Selain erkiteken krisis Politik ibas kerajan Israel bagepe Yehuda, kepeken bangsa Yehuda sendiri pe sangana mengalami krisis Iman. Itengah-tengah tekanen bangsa si deban, kalak enda nungkun man Dibata “Apakah Allah berkuasa pula atas bangsa-bangsa dunia? Dimanakah kesetiaan Allah? Apakah dewa-dewa kafir lebih kuat dari pada Allah?”

Penungkunen-penungkunen teologis si serius e itanggapi Jesaya alu meritaken kerna Dibata e eme Dibata si Badia ras kerina isi doni enda dem alu kiniulinna, manusia pe labo ngasup ngertiken kerna rencana Dibata (6:3-5). Ibas sienda Jesaya ngataken maka eksistensi manusia ilebe-lebe eksistensi Dibata. Banci sinehen kerna proses pemilihen Jesaya rasp e pernyataan komitmenna siberkaiten kerna dua eksistensi enda eme, kebadiaan Dibata (eksistensi Allah) ras keberdosan bagepe  kinilangasupen manusia (eksistensi manusia). Jesaya alu meteruk ukur nuriken kerna dosana bagepe kinilangasupenna iadep-adepen Dibata (5), emaka Dibata si Badia ngalemi dosa Jesaya (7) ras pe mahanca Jesaya tetap paguh ibas melasken komitmenna guna isuruh Dibata (8).

Manusia ras doni enda hanya mendapatkan eksistensinya ibas ia pang mengosongken diri guna mpermuliaken Dibata. Sanga Dibata e siakuken jadi DIbata si Badia rasp e DIbata simereken kegeluhen man manusia bagepe man doni enda, maka ije me doni ras manusia e ndatken makna sisejati. Kegagalen manusia ibas ndalani kegeluhenna eme erkiteken penolakenna guna njadiken Dibata e jadi Tuhan. Kesombingen manusia iadepen Dibata passti mabai kehancuren manusia e sendiri. Sebaalikna adi manusia e pang ngendesken kerina pengarapen bagepe ngandalken kekuaten Dibata, pasti manusia e tetap paguh (6:5-8).

Ibas Jesaya enda banci sibuat sada refleksi teologis kerna komitmen. Maka komitmen e situhuna labo sada hal ntah pe kalimat si ibelasken bage saja, tapi justru lit proses siberharga ibassa. Lit pengakun maka kita enda manusia si berdosa rasp e ngakuken keBadiaan Dibata, jadi sederhanana banci sikataken maka dibalik sebuah komitmen e pasti lit ka proses si man bentasen. Jadi guna meningkatken partisipasi perpulugenta, mari kita tuhu-tuhu berkomitmen bagi Jesaya, guna njadiken warga GBKP e jadi jemaat si missioner guna berpaartisipasi ibas pelayanen itengah-tengah gereja GBKp.

Pdt. Julia Elperida Br. Ginting

(0853-6175-3339)

GBKP Runggun Penen

Pembincarken Kemuliaan Dibata

BAHAN SERMON KHOTBAH MINGGU 07 FEBRUARI 2016

Invocatio     : Tuhan nggeluh kap! Pujilah Penampatku! Beritakenlah keemuliaan Dibata si nelamatken Aku (Mzm. 18:47)

Ogen             : Keluaren 34: 29-35

Khotbah       : II Korinti 3:12-42

Adi ngerana kita kerna kemulian, kerina jelma sura-surana ipermuliaken. Kai kin situhuna e kemuliaan e? maka kerina jelma ersura-sura ipermuliaken jelma sideban. Ibas bahasa Ibrani ipake kata Kavod ras ibas bahasa Yunani ipake kata Doxa siertina nuduhken kerna kedaulatan, reputasi, kemegahan dan kehormatan. Adi iartiken langsung kubas kegeluhenta emekap sada kebanggan ras kinihagan siteridah ibas sekalak jelma. Tapi rusur ibas ndatken kemuliaan melala ipake cara-cara si salah si situhuna nuduhken kulit saja labo isina. Jadi uga kin situhuna kita ndatken kemuliaan situhu-tuhu si kulit ras isina tuhu-tuhu layak ipermuliaken.

Ibas bahan ogenta kel. 34:29-35 teridah maka Musa kenca ia ngaloken 10 pedah Dibata i datas deleng Sinai nari, nusur ia alu ayo si ersinalsal. La ia sadar maka ayona ersinalsal. Ope denga ia nangkih ku deleng Sinai, ayo Musa biasa saja bagi kalak Jahudi si deban. Kenca ia ersikap guna jumpa ras Dibata maka mulai ayona ersinalsal. Enda kerina terjadi erkiteken Musa enggo ngerana ras Dibata. Sinalsal kemuliaan Dibata teridah ibas Musa. Emaka sanga Musa mpeseh sura-sura Dibata man kalak Jahudi ras sanga Musa ngerana ras Dibata italangina penutup ayona, kelang-kelang si e, itutup Musa ayonna. Ertina kai? Si enda ngatakenca maka kemuliaan si ialoken Musa labo rehna ibas manusia nari. Tapi erkiteken kegeluhenna nuduhken kiniteken man Dibata, Dibata simereken kemuliaan man Musa janah sienda iidah kalak Jahudi. Musa la perlu nuduh-nuduhken kehebatenna gelah ipehaga kalak Israel. Tapi ibass ia ngikutken sura-sura Dibata, ia ipehaga Dibata. Tapi Musa itutupna ayona ibas wari si biasa erkiteken mbiar ia, kalak Jahudi ngidah ayona siersinalsal e erkurang sinalsalna. Arah si e banci teridah maka Musa pe bagi si la pang nuduhken Kemuliaan Dibata si lit ibas ayona man jelma sideban. Ibas pengertin sideban banci teridah maka adi ndauh ras Dibata. Kemuliaan si enggo ibereken Dibata banci bene.

Ibas suratna pe Paulus mengkritik kebiasaan kalak Jahudi ibas nembah Dibata. Ibadah kalak Jahudi ersembah man Tuhan ngikuti kebiasaan siilakoken Musa tapi la meteh kerna maknana. Si endaa teridah ibas kegeluhen kalak Jahudi siterjeng ngikuti undang-undang Dibata saja tapi la memaknai ibas kegeluhenna. Patuh terhadap undang-undang si ialoken Musa/Taurat, tapi terjeng sebatas kebiasaan. Undang-undang si ilakoken kalak Jahudi seri bagi penutup takal si erbahanca kemuliaan Dibata e la teridah.

Emaka sipemena itekanken Paulus emekap nalangi penutup pusuh peraten. Mereken ingan man Kesah Dibata erdahin ibas pusuh. Kesah Dibata e mpelimbarui kegeluhen kalak si ngerembakken diri man Dibata labo man undang-undang. Musa rembak ras Dibata italangi me penutup ayona. Manusia si ngerembakken dirina ras Dibata, italangi me penutup pusuh peratenna. Adi penutup pusuh peraten e nggo italangi, kemuliaan Dibata e banci teridah man sinterem. Ertina kiniteken man Dibata labo hanya sebatas formalitas ntah pe budaya simendarah daging. Tapi ibenaken ibas pusuh nari arah pendahin Kesah si Badia janah teridah ibas kerina perbahanen geluh.

Sipeeduaken itekanken Paulus kerna Kesah Dibata si erdahin. Paulus nuduhken maka kerina kalak si tek man Dibata ras jera ibas lagu langkahna si la mehuli pasti ngaloken kemuliaan Dibata erkelangken pendahin Kesah si Badia. Kesah si Badia e si mpengasup kita ndalanken sura-sura Dibata. Ija lit Kesah Dibata, ije lit kebebasen. Si ertina maka Kesah Dibata emekap gegeh guna ngelawan undang-undang si la payo, undang-undang si membatassi kiniteken manusia. Kesah Sibadia mbebasken kita arah belenggu undang-undang. Kiniteken man Dibata labo erkiteken undang-undang tapi erkiteken penggejapen kerna kekelengen Dibata. Janah ibas si e lanai kita biar-biaren nuduhken sura-sura Dibata ibas kegeluhen.

Sipeteluken, ibas kita ndalanken sura-sura Dibata e, kemuliaan Dibata teridah ibas kegeluhenta. Sura-sura Dibata si ialoken kita rehna ibas pusuh nari, labo erkiteken peraturen. Sura-sura Dibata si ialoken kita labo gelah kita ipermuliaken jelma si deban, tapi gelah Dibata ipermuliaken. Arah gegeh Kesah si Badia kita iobah erdekahna reh ngasupna kita ndalanken sura-suraNa, erdekahna kita ermuliana seh maka kita dungna segambar ras Dibata.

Arah bahan khotbah ras ogen ibas minggu enda erlajar kita maka selaku kalak si erkiniteken, kita harus pembincarken Kemuliaan Dibata. Mari si talangi pusuuh peratenta raas kerina penutup ibas pusuhta si erbanhanca Kesah Dibata la banci bengket kubas pusuhta. Bereken Kesah e erdahin ibas pusuhta, si mpelimbarui kegeluhenta ras si mpengasup kita ndalanken sura-sura Dibata. Ibas kita ndalanken sura-sura Dibata tuhu-tuhu enda silakoken alu la biar-biaren. Ula kita mbiar iacuhken kalak sideban, ula kita mbiar ianggap “sok suci” arah jelma si deban, ula kita mbiar nuriken si benar man jelma sideban. Kesah Dibata pasti nampati gegeh ras jadi penampat man banta. Labo kita ipediatna italuken doni enda adi Kesah Dibata sibahan jadi gegehta.

Ibas kita ngelakoken sura-sura Dibata alu pusuh situhu-tuhu ije me teridaah kemuliaan Dibata. Situduhkenlah kemulian Dibata enda tuhu-tuhu kemuliaan Dibata, ula guna kemuliaanta. Melala gundari enda singatakenca maka kerina si ialokenna guna mpermuliaken Dibata, tapi situhuna ia ndarami keuntungen ije, ndarami ketenaren, ndarami kinihagan guna dirina sendiri. Tapi adi tuhu-tuhu kemuliaan Dibata si ituduhken kita ibsa kegeluhenta, kit ape pasti ipermuliaken, labo arah manusia tapi langsung arah Dibata. Kemuliaan sirehna ibas Dibata nari nge siperlu sidarami ibas doni enda. Aminna pe kita la ipermuliaken doni enda arah kegeluhenta sindalanken sura-sura Dibata, pasti kita ipermuliaken Dibata. Kemuliaan ibas doni enda kentissik ngenca, tapi kemuliaan ibas Dibata nari seh rasa lalap. Kemuliaan siibereken doni enda kadang kala hanya guna mbeneken kita, bagi peribahasa “habis manis sepah dibuang”.

Emaka mulai gundari nari, lanai bo perlu silakoken erbage-bage si la mehuli guna ipehaga jelma sinterem. Siperlu silakoken emekap nggeluh alu tutus sue ras sura-sura Dibata. Ije me kita tuhu-tuhu ipermuliaken. Sada kata-kata bijak siperlu sirenungken eme kap “kemuliaan terbesar yang bias didapatkan seoraang manusia adalah ketika dia tidak mengharapkan kemuliaan itu sendiri tapi berusaha mempermuliakan orang lain”. Selamat mpermuliaken Dibata ibas kegeluhenta.

Pdt. Julia Elperida Br. Ginting

(0853-6175-3339)

GBKP Runggun Penen

Dibata Nggenepi PadanNa Malem Ateta

Bahan sermon Khotbah Minggu 24 Januari 2016

Invcatio           : Senina-senina, terus terang kukataken man bandu kerna nininta Raja Daud, ia engg mate dingen ikuburken. Kuburenna e siidah denga genduari. Sekalak nabi janah ietehna Padan Dibata man bana. Dibata erpadan ngangkat sekalak kesusuren Daud jadi Raja bali ras ia. (Perb. 2:29-30)

Ogen                : Nehemia 8:1-10 (tungal)

Lukas              : 4:14-21(tunggal)

Pendalamen Teks

Nehemia eme sekalak arah terpuk Yehuda nari. Ia mbelin i pembuangen bagepe erdahin i istana kerajan Persia selaku juru minumen Raja Artahsasta Longimanus ras permaisuri Damaspia. Nehemia ipake Dibata guna mbagun tembok Jerusalem siengg jadi reruntuhen. Sijadi teks ogenta enda eme keadaan kenca Jerusalem enggo ibangun mulihi. “kerina kalak Israel engg ringan ibas kuta pengulihenna” sienda eme dampak positif arah pembangunen tembok Jerusalem, eme keamanen mulai igejabken bansa Israel. Nehemia, Esra ras kalak Israel nggejabkensa maka kerina e kerna penampat Dibata (6:16). Dibata enggo mbebasken bangsaNa siselama enda jadi tahanen i negri asing.

Lukas 4: 14-21, “Lalit sekalak nabi pe si ipehaga ibas kutana”, bage nina Jesus (24) ngaloi ranan ras perbahanen kalak Nazaret sinulak Ia. Kalak Nazaret e situhuna lab nulak Jesus bagi siselama enda itandaina, tapi Ia nulak Jesus selaku Mesias. Enggo ndekah bangsa Israel ngarapken kerehen sekalak Mesias guna jadi pembebas si megegeh ras erkuasa. Pembebas simbebasken bangsa Jahudi arah jajahen Romawi nari. Pembebas e lab mungkin sekalak pemuda Nazaret si sederhana bagi Jesus. Kalak Nazaret lenga paham kerna erti Mesias situhuna. Peran ras karya Mesias hanya iidahna arah kacamata manusiawi. Erti simbages selaku pembebas ibas dosa nari la ipahamina. Kerehen Mesias ibas diri Jesus guna mbebasken manusia ibas belenggu dosa nari la ialoken. Justru atena mpelawes Jesus sedauh-dauhna arah kegeluhenna.

Pada dasarnya manusia menginginkan kebebasen. Manusia atena bebas sebebas-bebasna, la atena iatur ntah pe ibatasi, seh maka peraturen ntah pe hokum ianggap membelenggu ras pe layak untuk dilanggar. Tuhan Jesus, Sang pembebas, ncidahken karya PembebasenNa. Pembebasen e bermakna:

1.      Pembebasen arah belenggu dosa nari

Ibas Jesus kristus, Dibata enggo nebus manusia ibas dosa nari janah erbahan geluh kerina manusia lit iteruh perkuah ate Dibata. Kebebasen si ialoken manusia lit ibas pimpinen Dibata janah pe harus ipertanggungjawabken ilebe-lebe Dibata

2.      Pembebasen arah kungkungen tembok-tembok keakuan simpedauh manusia ras Dibata ras sapih-sapih ia

Ibas Jesus Kristus, Dibata mpersada manusia ras diriNa bagepe ras sapih-sapihna. Tuhan Jesus mereken perkuah atena sierbage-bage man kerina manusia gelah tep-tep manusia ertalenta ras pe ipakeken guna mpersadaken kerinana.

3.      Pembebasen simereken kesadaren man manusia kerna kerehen ras pe karya Dibata ibas geluhna.

Tuhan Jesus hidup bersama ras kalak Nazaret, tapi kalak Nazaret gagal ngidah kerehen Kristus ras pe la ngasup nggejabken kerna karya Dibata. Mungkin kita pe rusur la mampu nggejabken kerehen Kristus. Kesadaren kerna kerehen Kristus banci mpegegehi ras pe mpengasup kita guna ndalani kegeluhenta bagi si ngena ateNa.

Refleksi

Tahun Rahmat (terj. Bhsa indnesia Luk. 4:19) tak lain ras tak bukan eme tahun berkah. Kalak Kristen tek maka kenca kerehen Tuhan Jesus ku doni enda 2000 tahun lebih sienggo lewat maka doni enda bakal menikmati tahun Rahmat, eme masa-masa penuh berkah. Tapi enggo kin kinitekenta sesuai ras kinnata kegeluhenta? Ula lebe kita ngerana kerna kinatan si lit i seluruh doni enda, i Negara kita saja, Indonesia, belakangan ngalami kejadin-kejadin si mengharuken erkiteken bencana siterjadi hampir i seluruh negri. Emaka la ateta mamang adi sejak 2009, Negara nta enda ikataken Negara seribu bencana.

Bencana hidrometeorologi khusuna banjir, tanah longsor ras kekeringen enggo jadi trend bencana ibas Negara Indonesia. Kerna banjir saja mulai kin tahun 1979-2009 enggo tercatat 2509 kali bencana banjir siterjadi ibas 32 propinsi i Indonesia. Ibas sada sisi memang banjir terjadi tapi anehna erbage-bage berita pe ngatakenca maka sumber-sumber lau i Indonesia pe enggo urak. Gubernur Jawa Timur ngatakenca maka sumber lau lit Buena 117 mata lau gundari enggo tading 53 sumber mata lau, bahkan adi musim Kemarau maka sumber mata lau e tading telu mata lau saja. Bageme keadan negaranta Indonesia paksa enda bagi siiberitaken media massa. Ebiet G. Ade ibas laguna tahun 1979 sierjudul “Berita kepada kawan” nuriken lirikna “… atau alam mulai enggan bersahabat dengan kita, coba kita tanyakan pada rumput yang bergoyang…”. Maka hal penting sipatut iperdiateken kita eme tuhu kin alam enda enggo enggan bersahabat ras kita? Ntah sebalikna?

Injil Luk. 14:14-21 ngataken man banta maka kenca kerehen karya Penyelamaten Tuhan Jesus ku doni enda, arusna berita simehuli (kabar baik) bage pe tahun berkah enggo reh ras pe jadi kinatan ibs kegeluhenta. Tuhan Jesus sendiri enggo maba kiniulin rasp e pasu-pasu man banta kerina manusia emaka lanai perlu kita nggeluh ibas kiniseran, subuk ibas tawanen perbeben ras pe kemiskinen, tertindas bencana ntah pe malapetaka, ntah pe ibutaken keserakahan eksploitatif.

Emaka adi lit denga kalak si tertawan ibas kungkungen kiniseran, maka e ertina labo kerna padan Dibata meleset tapi erkiteken lit campur tan manusia si ncedaisa. Enggo waktuna kerina manusia, khususna kalak Kristen si erkiniteken, jadi sadar maka, nggeluh jadi pengikut Kristus si mehuli eme alu dalan la menghalangi terwujudna kesejahteraan i doni.

Bangsa Israel ngerayaken karya pembebasen Dibata man bana ibas wari raya pondok daun. Bangsa Israel mind man Ezra gelah ibacakenna torat Musa, ibas mbegiken Torat e ibacaken tangis me bangsa Israel. Erkiteken nggeken Torat Musa e jadi sada ketedehenna sebab ibas negri pembuangen lanai iingetna guna ndalanken Torat e. alu ibangun mulihi tembk Jerusalem, bangsa Israel pe erpengarapengen guna mbangun kegeluhenna mulihi si enggo porak-poranda erkiteken ngelupaken hokum Torat. Kalak Israel pe sadar ia kerna pentingna Torat guna jadi pedoman geluhna.

Selamat Melayani man banta kerina

Cl. Pdt. Julia Elperida br. Ginting

0853-6175-3339

Melayani i Runggun Penen