Khotbah Pemasu-masun

Nats       : I Korinti 11:11-12

Khotbah

Awal mulana ijadiken Dibata doni enda ikataken Dibata “tuhu-tuhu mehuli”, tep-tep Dibata njadiken kai pe ibas wari penciptaan, kenca dung itepaNa mis ikatakenna “mehuli”. Kerna sada hal kel ngenca ikataken Dibata “la mehuli”, kenca ia njadiken Adam (manusia sipemena). Ikataken Dibata maka “La mehuli adi manusia e nggeluh sisada-sisada”. Kepeken relasi hubungen antara manusia ras Dibata eme relasi sipaling fundamental, seh maka ibas kerina hubungen relasita ras sideban harus erpalasken relasita ras Dibata. Emaka sanga ikataken Dibata “La mehuli” adi manusia e sisada, seh maka Dibata harus njadiken Hawa guna jadi teman intim si Adam. Kepeken arah sienda sieteh maka itengah-tengah relasi Dibata ras Adam Tuhan tetap ngidah lit sisi-sisi sideban ija hubungen e hanya banci iisi alu relasi antara sekalak dilaki ras diberu. Sedekat-dekatnya hubungen antara agi-kaka, hubungen ras teman karib, hubungen antara orangtua-anak, lalit sada pe hubungen e ngasup ngisi kekosongen relasi antara ndehara-perbulangen. Maka ibas si e ertina, adi sekalak dilaki ras diberu enggo ersada ukur guna menaken perjabun berarti ia duana nggo tanda tangan kontrak perjanjian seumur hidup. Emaka labo hal si menukah guna erbahan keputusen erjabu. Erjabu berarti erkomitmen segedang geluh guna setia, ras-ras ndalani geluh enda amin gia kai pe siterjadi. Ibas riah ukur-ceda ate, sehat-sakit, bayak-mesera, kerinana si e harus idalani ras-ras seh Dibata ka kari nirangkensa alu kematen. Sebab kontrakndu erjabu e Dibata erbahansa emaka Dibata Dibata ka lah netapkensa ndigan keri kontrak perjabunndu e.

Kai kin gunana manusia e erjabu? Kai kin tujun perjabun e? guna ndatken keturunen kin? (sungkun si erjabu). Melala jawaben kalak ibas si e, tapi pada umumna inti kerina jawabenna e eme guna ndatken kebahagiaan. Tapi kai kin ukuren kebahagiaan e? enterem kalak erpengakap maka berbahagia ertina memiliki, memiliki anak, memiliki rumah sendiri, memiliki pasangan hidup, memiliki cucu, memiliki harta-harta ini dan itu, rst… tapi apakah kenca manusia e memiliki sesuatu banci mis ia otomatis berbahagia? Apakah nggo terpastikenndu kenca lit perbulangen/ndeharandu nggo pasti kam bahagia? Lenga tentu lit ka nge kalak si lebih bahagia iakapna sanga masa ia singuda-nguda/anak perana denga, asangken kenca nggo jadi ndehara/perbulangen kalak. Berarti kepeken ukuren kebahagiaan e labo memiliki. Tuhan Yesus enggo netapken ukuren kebahagiaan ibas kitab matius 5: 6-9 (khotbah idas uruk). Kepeken menurut Tuhan Yesus kebahagiaan e labo berarti memiliki ini dan itu melainkan sebalikna. Kalak si mere, eme mereken dirina man Dibata guna ngelakoken singena ate Dibata, ras pe mereken dirina man kalak sideban guna maba kekelengen ras kedamen man kalak sideban, e nge kebahagiaan situhu-tuhu e. emaka nggo payo bagi siikataken Tuhan Yesus “adalah lebih berbahagia orang yang memberi daripada yang menerima”. Emaka kebahagiaan e situhuna ibarat kupu-kupu. Adi siayak, kupu-kupu e pasti kabang ras mis ia lawes. Tapi adi kita tenang dan berdiam diri, kupu-kupu e banci saja cinep ku kita. Bage ka pe kebahagiaan e. adi siayak-ayak kebahagiaan e banci ia kiam, tapi adi kita tenang ras membuka diri guna mperdiateken temanta ije nge maka kita merasa bahagia. Emaka kebahagiaan labo sesuatu sibanci iayak kita, tapi kebahagiaan eme sesuatu yang kita pancarkan nandangi kalak sideban.

Emaka rikut ras bahan renungen siiangkatken kami ijenda ibas I Korinti 11:11-12, maka ibas mengketi perjabunndu pe bahanlah ije relasi hubungen “saling”. Sebab nina Dibata pe ay, 11 “Dilaki perlu nge diberu janah diberu perlu nge dilaki”. Lit nggo ibahan Dibata keterikatan antara kam duana, emaka perlu ipeturahndu rasa saling memiliki, saling erpemere. Sepentingna eme mereken kekelengen nandangi temanndu geluh e. emaka perlu iingetndu ibas pusuh ndu maka kam erjabu enda labo guna ikelengi tapi gelah kam singkelengi. Kubuat ia jadi perbulangen/ndeharangku labo gelah aku ikelengi tapi gelah aku ngkelengi ia. Emaka ibas kam engkelengi e pe ikataken Dibata ibas ay. 12 “janah kerinana rehna ibas Dibata nari”. Berarti pakendulah kekelengen sirehna ibas Dibata nari guna kam ncidahken kekelengen nandangi teman geluhndu. Amin. 

Selamat Melayani ras mejuah-juah man banta kerina

Pdt. Julia Elprida Br. Ginting’s

(0853-6175-3339)

Melayani i GBKP Runggun Penen

Klasis Medan-Delitua

kETERKELINEN ERKITEKEN LIAS ATENA

Bahan sermon Perpulungen jabu-jabu

Ogen   : Efesus 2 : 4-9

Tema   : Keterkelinen Erkiteken Lias AteNa

Penaruh

Kerina sinasa lit Dibata kap njadikenca, keleng aate Dibata tinepaNa ras sura-sura Dibata segelah kerina sinasa lit muji dingen mpermuliaken Dibata saja. Manusia e tinepa si itepa Dibata sue ras tempasNa; dilaki ras diberu ijadikenNa (Kej. 1:27). Paulus tersinget maka “ope denga ijadiken Dibata doni enda, enggo ipilihNa kita jadi sikerajangNa arah persadanta ras Kristus gelah kita badia dingen la ersalah i lebe-lebeNa. Erkiteken keleng ateNa” (Efesus 1:4). Manusia la ngasup njagai kebadian sienggo ibereken Dibata, manusia ndabuh kubas dosa seh pe maka erkadiola Dibata njadiken manusia “asum idah Tuhan kuga jahatna manusia ndai i doni, janah kuga macikna perukurenna katawari pe, emaka erkadiola Ia njadiken manusia ras namakenca i doni enda. Perbahan erkadiola kal Ia emaka nina Tuhan, “Kusasapkenlah manusia si kujadiken e, bagepe kerina rubia-rubia ras perik-perik, sabab erkadiola Aku njadikenca kerina” (Kej. 6:5-7). Enda me dalanna maka paksa si e ipereh Tuhan banjir si mbelin ibas manusia janah keluarga Nuah ngenca iselamatken Dibata. Teridah tuhu maka ibas ate nembeh Dibata lit denga kepe lias ateNa nandangi kalak si erkemalangen man baNa.

Penekanen

1.        Perkuah ate Dibata la ersibar

Ibas manusia enggo erdosa, lias ate ras perkuah ate Dibata isehkenNa man manusia. Tangkas tuhu itandai Dibata tinepaNa manusia maka labo lit gegeh raas kengasupen manusia lako ndatken keterkelinen. Keterkelinen e rehna eme erkiteken lias ate Dibata. Keterkelinen e eme pemere Dibata, si isehkenNa arah Yesus Kristus.

Ibas ayat 4 terjemahan bhsa indonesia ngatakenca “Tetapi Allah yang kaa dengan rahmat, oleh karena kasihNya yang besar, yang dilimpahkanNya kepada kita”. Ibas kata “Dilimpahkan” ije  teridah Sola gracia, hanya anugerah. Ibas ayat 4 enda, Paulus mbenakenca alu kata “Tapi” simenandaken perbedaaan pemberitaan antara kalimat sebelumna. Adi ibas ayat-ayat sebelumna Paulus mberitaken kerna dosa ras kebenen. Tapi ibas ay.4 endaa seolah-olah Paulus mencoret kerina pernyataanna ibas ayat sebelumna, sebalikna Paulus mberitaken kerna karya Penyelamatan Dibata.

2.       Kalak sienggo terkelin nggeluh ibas kiniersadan raas Kristus

Kiniersadan ras Kristus Jesus ertina ersada ibas kematen, kekeken janah ipekundulNa kita ras Ia ibas ingan simeganjangna. Kai pe labo ngasup erbahanca sienda kerina jadi seakatan kiniulinNa silanai lang-lang kel belinna, eme lias ateNa man banta ibas Kristus Jesus. Erkiteken lias ate Dibata nge maka kalak si tek enggo terkelin, erkiteken tek kita man Kristus. Labo bekas perbahanenta, tapi pemere Dibata kap e.

3.       Ola lit simujiken bana

Keterkelinen kalak si tek labo ulih perbahanen, tapi si e kerina erkiteken lias ate Dibata (Sola Gracia). Emaka ola sempat lit kalak mujiken bana, tapi tetaaplah Dibata si terpuji arah kerina dampar kegeluhen kalak si tek.

Ibas ayat 8-9,  situhuna enda peneguhen ibas ayat 4-6. Ija memang tuhu-tuhu maka karya penyelamatan manusia eme murni rencana Dibata, lalit peran manusia ije. Emaka ije ka nge teridah situhuna kuga nge kerna kedaulatan Dibata. Teologi calvin kerna kedaulatan Allah pada nuriken maka lit 7 point kedaulatan Dibata. Ibas poin sipeduaken eme “Allah yang berdaulat adalah Allah yang kekal dan tidak bergantung pada siapapun/apapun”. Termasuk ka pe ije kerna karya Penyelamaten Dibata man manusia. 

Pengkenaina

Selaku ngawan ni perpulungen harus payo pengangkanta kerna keterkelinen. Terkelin ibas bahasa indonesia banci saja iterjemahken alu kata “tertolong, terlindungi, terbantu”. Tapi situhuna adi ngerana kita kerna keterkelinen berbeda kel e ras kejuah-juahen. Kata kejuah-juahen ngerana kerna persoalen doni enda, tapi adi kata keterkelinen ngerana kerna kekekalen. Emaka terkelin banci ikataken selamat.

Ibas sejarah kegeluhen manusia mula-mulana nari enggo ibereen Dibata 10 pedahNa. Tapi kepeken ibas ilakokenna 10 pedah Dibata e lit kepeken sisi negatifna, bagi kalak Farisi si menombongken dirina erkiteken enggo ilakokenna 10 pedaah Dibata e. janah pe man kalak si la ngasup ngelakoken 10 pedah Dibata e ibahan ka persembahen guna pengalemi dosa. Siitentuken Dibata kerna korban pengalemi dosa enda eme hewan si la bercacat tapi kepeken ibas perdalanenna hewan si cacat pe enggo masuk ku rumah pertoton. Ketentuen si ibahan Dibata kerna Rumah Pertoton e arus belangen e Ruang maha kudus asangken serambi (teras), tapi pada kinatana enggo belangen serambi asangken Ruang maka kudus seh maka ije enggo jadi ingan erbinaga. Janah tep-tep kalak si erbinaga i serambi rumah pertoton e harus ka nggalar biaya sewa man imam-imam. Emaka kedungenna enggo terjadi persekongkolan si la mehuli antara imam ras perbinaga si ndayaken hewan-hewan korban. Seh maka hewan-hewan sibercacat ndai pe si la banci jadi korban persembahen isimpan imam-imam jenari iberekenna man si erbinaga mulihken gelah idayakenna mulihi.

Ibas perdalinen sejarah manusia erbage-bage situhuna ibahan Dibata cara gelah manusia e ndatken keterkelinen si rehNa ibas Dibata nari. Tapi adi usahata sendiri sipenalem maka labo banci kita ndaatken keterkelinen. Janah memang payo tuhu maka upaya Dibata guna mereken keterkelinen e situhuna labo terbatas ruang ras waktu.

Keterkelinen siidatken manusia eme soal keselamaten siibereken Dibata erkiteken lias ateNa saja. Ije nge teridah perbedaen kinitekenta ras kiniteken sideban. Adi ibas agama Hindu keselamaten e banci idatken arah perbahanen simehuli nandangi ndehara, anak, kempu ras kalak si deban. emaka menurut hindu keselamaten e idatken arah Bakti/upaya ritual. Ibas agama Buddha keselamaten e banci idatken arah 8 Dharma, eme : pengertian yang benar, pikiran yang benar, berucap yang benar, perbuatan yang benar, penghidupan yang benar, berusaha yang benar, berperhatian yang benar ras pe konsentrasi yang benar. Sementara ibas agama Muslim keselamaten e banci idatken arah ndalanken Rukun Islam (5) ras Rukun Iman (6). Tapi kita kalak Kristen ngatakenca maka Keselamaten e pelin-pelin pemere arah Dibata, labo lit usahata guna ndatken keselamaten e. tapi kerinana erkiteken lias ate Dibata ngenca maka kita terkelin.

Selamat Melayani ras mejuah-juah man banta kerina

Pdt. Julia Elprida Br. Ginting’s

(0853-6175-3339)

Melayani i GBKP Runggun Penen

Klasis Medan-Delitua

ITANDAI DINGEN IIKUTKEN BANGSA DONI ENDA KAM

Bahan Sermon Khotbah Minggu 29 Mei 2016

Invocatio       : Laweslah ku kerina bangsa manusia, bahanlah ia jadi ajar-ajarKu: Peridiken ia ibas gelar Bapa, gelar Anak ras gelar Kesah Si Badia, janah ajari ia ngikutken kerina sienggo Kupedahken man bandu (Matius 28: 19-20a)

Ogen             : Lukas 7 : 1-10

Khotbah        : I Raja-raja 8: 22-23 ; 41-43

Tema            : Itandai Dingen Iikutken Bangsa Doni Enda Kam

Perlebe

Guna nandai sekalak jelma memang labo menukah. Meteh gelarna ras alamat inganna tading lenga tentu jadi jaminen penandaanta kerna sekalak jelma. Sada guru simeteh kerna karakter ras prestari muridna pe lenga ka jadi jaminen maka guru e enggo pasti nandai muridna. Erkiteken banci saja la ietehna kerna latar belakang muridna e. orangtua pasti nandai anak-anakna erkiteken ia simupus dingen simpebelin anak e, tapi e pe lenga jaminen maka orangtua nandai anakna 100%, erkiteken banci saja anak e muniken kerna pergumulen ras beban perasaanna. Siakapna anakta bagenda padahal anakta enggo bagi si ah. Salah kira.

Adi nandai jelma saja pe bage kal susahna, apai ka nandai Dibata. Mungkin terjeng menerka-nerka saja. Labo banci kita nandai Dibata kecuali adi Dibata simpetandaken diriNa man banta. Itulah yang terjadi pada hari Natal. Dibata mpetandaken diriNa man manusia. Janah genduari jadi tugasta guna mpetandakan Dibata siitandai kita e man bangsa doni enda gelah iikutkenNa Dibata e.

Pemahaman Teks

“Jesus mpepalem sekalak suruh-suruhen perwira Roma”. Kapernaum terletak i pantai barat laut dano Genesaret. Sekalak perwira ibas kisah e banci ianggap selaku komandan tentara militer setempat, selaku tentara Romawi ntah pe selaku kepala pasukan sewaan Herodes Antipas. Kepala perwora enda sipasti labo ia kalak Jahudi, ras pe labo ka ibas golongen “Proselit” eme sekalak si labo Jahudi tapi enggo masuk kubas agama Jahudi. Tapi sipasti eme Perwira enda kalak si tutus/ saleh bagi Kornelius (bnd. Perb. 10:1-2).

Lukas ibas nulisken surat enda justru ncidahken sikap si luar biasa ibas Perwira e nari nandangi suruh-suruhenna; kemungkinen ia ngergai kerina suruh-suruhenna selaku temanna manusia (ay. 2). Alu perantaraan pemimpin-pemimpin Jahudi ipindona pertolongen man Jesus (ay. 3). Banci saja iakapna maka adi lit perantaraan pemimpin Jahudi e pasti Jesus nggit ku rumahna asangken adi ia sendiri si mindo man Jesus sementara ia labo kalak Jahudi. Hal si menarik ijenda eme, Perwira Roma eme musuh kalak jahudi erkiteken paksa si e bangsa Jahudi sangana ijajah Pemerentahen Romawi. Tapi justru pemimpin-pemimpin Jahudi e mujiken perwira Roma e “O, Tuhan tuhu-tuhu patut kel Perwira e isampatindu sabab keleng kal atena bangsanta janah ibahanna sada rumah pertoton man kami”.

Selanjutna ibas ayat 6 terjadi perubahen rencana ibas Perwira Roma e. awalna ipindokenna gelah Jesus reh ku rumahna tapi kemungkinen selang waktu perdalanen Jesus reh lit turah ibas ukurna maka ia labo kalak Jahudi. Emaka isuruhna teman-temanna guna ndahi Jesus ras ngatakensa maka situhuna ia labo layak ngaloken Jesus ibass rumahna. Arah sikap enda siidah kerendahen hati perwira Roma e. janah kepeken ia pe ngergai pendapat kalak Jahudi, seh maka la ia nggit menyakiti pusuh kalak Jahudi. Siimaksudken ijenda eme : gelah Jesus selaku kalak Jahudi la perlu menajisken diriNa alu reh ku rumah kalak si labo kalak Jahudi; janah e ka nge sebabna maka labo ia sendiri si reh ndahi Jesus guna mindo penampatna.

Kiniteken Perwira e banci ikataken kiniteken situhu-tuhu. Ipakena istilah militer eme adi perwira silebih tinggi pangkatna nuruh ia ngelakoken sada hal maka pasti langsung ilakokenna, bagepe sebalikna adi isuruhna tentara silebih rendah pangkatna asangken ia maka pasti langsung ilakoken tentera e kai siisuruh man bana. Bagepe kinitekenna man Jesus, tek ia maka kuasa Jesus lebih tinggi asangken pinakit sijadi nandangi suruh-suruhenna e, emaka alu kata sengkebabah saja pasti minter nge lawes pinakit e arah suruh-suruhenna nari. Kiniteken sibage arusna idapeti ibas kalangen Jahudi tapi kepeken Jesus ndatken hal siberbeda.

Penekanen ibas ayat 9, maka imomoken Jesus man Jelma sinterem e kuga kiniteken Perwira Roma e. situhuna ije Jesus berperan gelah kerina jelma sinterem paksa si e pe banci nandai ras ngikutken kai sienggo ibahan Perwira Roma e. tek nandangi kuasa Dibata arah Jesus Kristus.

Bahan khotbah I raja-raja 8:22-23 ; 41-43, nuriken uga Salomo naksiken maka Dibata Israel eme Dibata si mbisa, lalit Dibata sideban sicidahken kekelengen man bangsaNa bagi Dibata Israel. Pengakun Salomo enda ibelaskenna ilebe-lebe bangsa Israel. Ibas paksa si e kalak si meteruk tedis ilebe-lebe si erkuasa si kundul i kursi kehamaten. Salomo, raja Israel tedis ilebe-lebe batar-batar Dibata nuduhken maka ia mpeteruk dirina iadep=adepen Dibata simeganjangna. Ibas ayat 41-43 ibas pertotonna, raja Salomo mindo man Tuhan gelah kasa kai laka sireh ersembah ertoto man Dibata amin gia labo kalak Israel ibegiken Tuhanlah pertotonna. Arah erbage-bage tanda kuasaNa, bangsa sideban megi berita e jenari ikut pe nembah Dibata siisembah Israel. Alu bage reh teremna bangsa i doni enda sinandai Ia erkiteken bangsa sideban enggo megi, ngidah janah ngenanami keleng ate ras kuasa Dibata e nuriken pe man temanna sada bangsa kerna Dibata. Arah bahan khotbah enda sigejabken maka keleng ate ras kuasa Dibata ituduhken ras iberekenNa man kerina bangsa i doni enda.

Aplikasi

Minggu enda igelari pe minggu UEM, bena-benana UEM enda eme RMG, salah sada organisasi misionaris simbelin sireh i Jerman nari. UEM ngelakoken dahin mberitaken berita simeriah arah erbage-bage program. Program-program endaa sifatna holistik alu meritaken berita si meriah radu ras program-program si meningkatken kualitas kegeluhen masyarakat doni enda selaku tanda keleng ate Dibata nandangi kerina manusia.

Ibas kebaktin minggu UEM enda kita nginget mulihi uga raja Salomo pe ertoto guna kiniulin bangsa sideban janah uga Yesus megiken pemindon perwira Romawi. Tuhan Dibata keleng ateNa kerina. Lalit Dibata sideban bagi Ia ulina ras belinna. Kita sienggo nandai Ia isuruhNa guna meritaken kuasa keleng ateNa e man kerina manusia subuk ija pa pe kita ringan.

Selamat Melayani ras mejuah-juah man banta kerina

Pdt. Julia Elprida Br. Ginting’s

(0853-6175-3339)

Melayani i GBKP Runggun Penen

Klasis Medan-Delitua

KITA IMENANGKEN ARAH PERBEBENTA

Khotbah Minggu 08 Mei 2016

Invocatio         : “Dage ola kam mbiar, sabab Aku kap raas kam” (Jesaya 43:5a)

Ogen               : Johanes 17: 20-26 (Tunggal)

Khotbah          : Mazmur 97:1-12 (Responsoria)

Tema               : Kita Imenangken Arah Perbebenta

Khotbah

bagin mazmur si jadi bahan khotbah ibas minggu enda termasuk kubas jenis mazmur Raja. maksudna mazmur enda igolongken kubas mazmur Raja eme erkiteken mazmur enda ngajuk kerina umat Tuhan guna patuh man Dibata selaku Raja si erkuasa, Ia me raja si berotoritas i doni bagepe i Surga. bagin mazmur enda banci ibagi jadi 3 bagin, mari sibahas bagin-bagin endaa sada per sada.

1.        ay. 1-6, nuriken kerna pengajuk guna ersurak nandangi Dibata si erkuasa ras Mulia

Bangsa Israel jelas kel enggo melala pengalamena ibas ngidak perbahanen Dibata si luar biasa. mulai pembebasen kalak enda ibas taneh Mesir nari si seh kel buena tantangenna. kenca enggo bebas pe iuru-uru pasuken Firaun denga ka kepeken. seh ku ambang batas tepi laut merah ije pe tangkas kuasa Dibata man kalak e kerina. ibas perdalanen bangsa e pe ku taneh kanaan icukupi Dibata kel kerinana. berekenNa manna ras leto guna pangan kalak e, sanga bangsa e muas banci ibas daeraah si kerah kel pe ipedaratna lau. secara manusiawi adi kita berpikir seharusna bangsa Israael e lanai bo lit dalinna guna nadingken Dibata, erkiteken kai? ilebe-lebe mata kalak e sendiri jelas-jelas terjadi perbahanen Dibata simbisa e. sangana bangsa Isarel pe merebut kota Jerikho, tempa-tempa mustahil kel, labo mungkin. la suruh Dibata kalak enda erperang tapi cukup ikelilingi saja ras rende. labo masuk akal situhuna tembok siikelilingi kalak enda banci roboh dengan sendirinya. adi enggo bage kel luar biasana perbahanen Dibata ilebe-lebe kalak e, me wajar nge tentuna pengajuk pemazmur gelah ersurak min bangsa e erkiteken kuasa Dibata e tuhu-tuhu tangkas man banta ras man gunanta. tapi ibas perdalinen sejarah, si eteh nge enggo ras-ras maka sejarah perdalinen kiniteken bangsa Israel e la berjalan alu mulus. berulang kali bangsa e menghianati Dibata.

uga kita gundari simegiken kata Dibata enda? teraloken kita kin nge pengajuk pemazmr guna ersurak e ntah lang? adi ersurak tentu labo terjeng gelah enggo ersora saja, tapi ersurak e teridah memang tuhu-tuhu ibas ekspresi ayonta. labo mungkin ersurak kita guna ncidahken keriahen ukur tapi ayonta e bentukna enggo bagi rimo mungkur. ma ieteh kita nge uga rimo mungkur, ringutna la tanggung. ibarat baju ndai kin enggo pe isetrika lalap la licin-licin. pake pe rapika, kispray ntah kai gia sidebanna gelah banci licin uis e, tapi lalap la licin. lalah kita pe enggo bage keadaanta gundari e? “menam-menam kuje nge e pandita.” engkai maka bage? “iyah…. lanai bo terturiken kerina e pandita. kam lenga bo ietehndu e.”

adi siukuri mbages-mbages lit kin kalak si nggeluh e lalit perbebenna? “Kalak adon ah me labo kai pe ukurina, emaka ia labo lit perbebenna”. kalak sibage jawabenna me aneh nge e situhuna, morah ka atena pergeluh kalak adon. lalah ia pe nggo sakit e teku ka. jelma sibage nge situhna si perlu man tambaren, engkai? erkiteken ibandingkenna kegeluhenna ras kalak adon ipinggir dalin ah, e erbahanca ia la ngasup ersurak ibas geluhna. e nge situhuna salah inganta erbanding-banding e.

payo memang, maka mawen-mawen ibas kita ngalaken perbeben kegeluhenta enda, tempa-tempa dalan buntu si ijumpai kita. lanai si eteh kuja inganta bergerak, enggo kicat kel tempa-tempa siakap banta. kata Dibata ngatakenca situhuna la bage. labo mungkin dalan buntu ibereken Dibata man kalak si ikelengiNa, tapi siiberekenna pasti dalan pulah, pasti solusi. tapi rusur erkiteken kita pe enggo erbanding-banding ibas pikirenta sendiri, maka siiarapken kita solusi/dalan pulah si reh e bagi si lit ibas pikirenta min. padahal dalan Dibata la bali ras dalanta manusia.

ay. 6a ngataken banta sendah “Langit ermomo kerna kebenarenNa….”. adi langit pe si la banci ngerana bagi kita enda nggit ia ermomo kerna kebenaren Dibata. tentu kita tinepaNa si sempurna aturna lebihen siibahan kita asangken si e.

2.       ay. 7-9, nuriken man banta kerna kesia-sian nembah Dibata sideban.

Perbeben e banci dua gendangna sijadi hasil man banta. lalit sada pe kita manusia e ermeriah ukur ibas ngalaken perbeben. Jesus saja pe anak Dibata tangis nge ia sanga ertoto i taman getsemani erkiteken seh me paksana Ia harus ngenanami kiniseran. tapi labo e erbahanca ia nggit tunduk man kuasa Iblis. sanga Jesus erpuasa 40 wari 40 berngi ibas wari si terakhir reh me si Iblis tempa-tempa mereken penampat, tempa-tempa perduli kel man Jesus. tapi amin gia bage kel Rayuan Iblis e labo tergoda Jesus guna nembah man bana. cuba saja sibayangken 40 wari la man la minem, pasti enggo kerah kel kalah-kalah Jesus, banci jadi biberna e pe enggo pecah-pecah erkiteken setaktak lau pe lalit mbencahi biberna.

Jesus pe lit nge Ia ngalaken perbeben. erkiteken doni enda memang ingan perbeben. tapi justru lit pe perbeben e banci Jesus menang. emaka kita pe uga gia keadaan ta, ntah sangana bas mata kin iluhta erkiteken kearun ate? ntah kinitekenta kin gundari sangana iuji? ntah pe sangana kam gundari iperlakoken la adil? banci ka pe perbeben e erkiteken kesehaten si semakin drop. ntah pe erkiteken sura-sura si la tersehi. kata Dibata ngatakenca ula e erbahanca la si jemak paguh kinitekenta. adi ndarami dalan ngeluk kita labo lit gunana. sebab adi tunduk kita man kuasa-kuasa si deban, nembah kita man kuasa si deban, kesia-sian ngenca siidatken kita. emaka situhuna responta ibas ngalaken perbeben e menentuken hasil si bakal idapeti kita. apakah e jadi bahaya man banta atau justru e jadi kesempaten man banta guna mpepaguhi kinitekenta man Dibata.

3.       ay. 10-12, nuriken man banta kerna uga respon Israel nandangi kuasa ras kemuliaan Dibata.

bangsa Israel si jadi saksi kerna kuasa Dibata, merespon perbahanen Dibata e alu cara : erciga ate kempak kejahaten, sebab memang kondisi ingan tading bangsa Israel paksa e ikelilingi bangsa-bangsa si la nandai Dibata. jadi perbahanen bangsa-bangsa si deban e pe tentu si la ngena ate Dibata. erkiteken si e ngen maka pemazmur ngatakenca “Cigalah atendu kejahaten…” guna ngajuk bangsa Israel tetap berusaha setia man Dibata.

nggeluh i doni enda memang labo nukah, melala beban siharus ipersan kita ibas geluh enda. guna ndatken serpi seh kel serana gundari e, si sekolah pe labo ka menukah iakapna menghadapi ujian-ujian, kerina hal i doni enda membutuhkan usaha, perlu bertindak. adi ertoto kita man Dibata gelah mereken banta rezeki si simpar erkiteken kebutuhen geluhta memang melala, banci saja erkiteken lit anggota keluarga si sakit tentu butuh biaya si melala, kredit baju si lenga lunas, angsuren pinjamen ku CU si perlu ibayari, tapi adi la beluh kita mengatur keuangenta pasti uga gia buena rezeki ibereken Dibata lalap nge la bias. adi bage keadaanna tentu asa ndigan pe la kita banci menang ngalaken perbeben e.

kerna kinitekenta pe bage nge, ibas kiniersadanta ras Dibata, ibas kita njaga hubungenta ras Dibata e nge si banci mereken man banta kengasupen guna banci kita imenangken arah Perbebenta. bagi lit dua kalak pendaki, erdalin ia duana guna ndaki sada deleng. sekalak antara ia maba sada kapak. reh temanna nungkun man bana “man kade ndu kin kapak ena?” reh simaba kapak ngaloi “guna nektek kayu ateku, janah kayu e kupake guna ngganti grobak motorku si enggo ceda. maka perlu kel aku batang kayu simersik. janah jenis batang kayu sibage turah ipuncak deleng ngenca ija angin simeterna rembus.”  bagi batang kayu e min aturna kinitekenta, ermeganjangna ia turah, ermeterna angin nderpa ia, si la megegeh banci mbulak, tapi si megegeh erteguhna urat-uratna. bagepe kalak si erkiniteken, perbeben ras kiniseran e ula min erbahanca bene kinitekenta tapi justru ermegegehna. janah pe tetaplah sijaga hubungen pribadinta ras Dibata sebab Ia simereken gegeh situhu-tuhu man banta.

Termulia gelar Tuhan arah kata Dibata enda. Amin

Selamat Melayani ras mejuah-juah man banta kerina

Pdt. Julia Elprida Br. Ginting’s

(0853-6175-3339)

Melayani i GBKP Runggun Penen

Klasis Medan-Delitua

LAKOKENLAH KAI SIITOTOKENNDU MAN DIBATA

BAHAN SERMON KHOTBAH MINGGU

Invocatio      : Janah adi ipindondu la idatndu, sabab erkiteken tujunndu la mehuli; kai siipindondu guna pesenangken dirindu saja ngenca. (Jakup 4:3)

Ogen             : Johanes 14: 23-29 (Tunggal)

Khotbah       : Mazmur 67: 1-8 (Responsoria)

Tema             : Lakokenlah Kai Si Itotokenndu Man Dibata

PEMAHAMEN TEKS

Ende-enden ibas Mazmur 67 enda eme pujin si iendeken bangsa Israel ibas rumah pertoton i Jerusalem sijadi pengataken bujur ras ngingetken uga Dibata enggo mbebasken bangsa Israel arah perbudaken Mesir nari. Ibas kitab mazmur enda teridah maka pemasmur mindo man Dibata gelah tetap mperdiateken bangsaNa, alu bage bangsa sideban banci ngidah uga Dibata ngasup mbebasken, dem keadilen ras tetap masu-masu bangsaNa. Mazmur enda pe enden pengataken bujur kerna kerina pasu-pasu si enggo ibereken Dibata man bangsa Israel sanga wari Raya sapo-sapo. Erkiteken ibas wari raya e, kerina ia ibas wilayah ijapa pe pulung guna ngataken bujur ras ertoto gelah pemere sienggo ialoken banci mereken hasil si mbelin man bangsa-bangsa si deban. Sada enden pengataken bujur simewarisi pemanggilen Abraham, ipasu-pasu guna jadi pasu-pasu man jelma i doni enda.

Ibas ende-enden enda lit pengarapen gelah bangsa-bangsa si deban reh man Dibata raas pastuh ibas pimpinen Dibata gelah lit kedamen i doni enda (ay. 4-6). Kedamen ras kesejahteraan banci irasaken arah hasil taneh si ipasu-pasu Dibata (Im. 26:4), alu bage bangsa si deban banci ngidah ise Dibata siisembah bangsa Israel e. sebab lalit Dibata sideban si banci mereken keadilen raas kedamen bagi siibereken Dibata siisembah Israel (ay. 7-8). Pengataken bujur pemasmur e pe sekaligus ngingetkensa maka Dibata nge siempuna kerina sinasa lit, emaka labo mesera man baNa guna tetap masu-masu bangsaNa. Ras pe pasu-pasu/pemere Dibata man bangsaNa e la tergantung situasi/ kondisi si lit, enda terbukti amin pe bangsa Israel rusur erbahan si la ngena ate dibata taspi Dibata tetap masu-masu bangsa e ras ncukupken kerina siiperlukenna.

Arah mazmur 67:1-8 enda banci sisimpulken maka pertoton  ras pengarapen pemasmur ibegi Dibata, enda terbukti arah tulisen pemasmur si ngataken bujur man Dibata kerna kerina sienggo ialokenna ras bangsana. Selaku bangsa Dibata pe si lalap ngaloken pasu-pasu Dibata maka harus ka kita ngasup jadi pasu-pasu man kalak si deban. pemasmur ngakuken maka kerina pasu-pasu e rehna arah Dibata nari, e nge sebabna maka kerina manusia harus muji Dibata. Arah kai? Arah perbahanen ras tindaken si sue ras pertoton bagepe pengarapen siisehken man Dibata. Alasen Dibata masu-masu kita labo gelaah kita jadi meganjang rukur tapi gelah Dibata e itandai i doni enda. Muji Dibata labo cukup guna jadi alasen gelah Ia masu-masu kita, erkiteken adi terjeng muji saja lenga tentu kita ngelakoken sada perbahanen si mehuli iadep-adepen Dibata (terjeng i biber saja).[1]

Ibas bahan ogenta Joh. 14: 23-29, tambah tangkas man banta kai si harus ilakoken kita. Kekelengen enda me hukum dasar kalak Kristen (kalak si erkiniteken). Emaka ibas kai pe siilakoken kalak si tek man Jesus harus erpalasken kekelengen. Kerehen Jesus ku doni enda enggo ncidahken kekelengen Dibata nandangi doni enda, janah ibas Jesus ndalani kegeluhenNa pe icidahkenNa uga ia engkelengi manusia. Erkiteken Jesus enggo leben engkelengi manusia maka manusia pe harus engkelengi temanna manusia ras lingkungenna. Kerina sienda banci silakoken adi kita tuhu-tuhu ngikutken kai si iajarken Jesus, sebab kerina pengajaren siikataken Jesus rehna arah Bapa si i Surga nari. Arah kita nggit ngoge kata Dibata, tutus megiken pengajaren kerna kata Dibata, maka kita pe ijadiken pelaku-pelaku firman. Kita singelakoken kata Dibata e, maka Dibata pe ringan ibas kita (ay. 23-24).

Ibas proses kita ngoge kata Dibata ras megiken pengajaren kerna kata Dibata e tentuna lit nge keterbatasenta guna ngangkaisa. terlebih secara alami kita enda kalak perdosa sicenderung erbahan dosa. Emaka iblis pe banci saja mperdiateken kita janah ibahanna pikirenta buntu, la erpengangka kerna kata Dibata, pusuhta itutupina. Emaka Jesus ngatakenca maka reh me pagi Kesah si Badia sibakal ngajari dingen nampati ibas memahami kerna maksud ras tujun kata Dibata (ay. 25-26). Jesus pe ngataken maka iberekenNa me kemalemen ate (ay. 27) man banta, kemalemen ate siibereken Dibata e labo bali ras si ibereken doni enda. Kemalemen ate siibereken Dibata eme kesiapenta guna ngaloken kai pe si reh ibas wari-wari sipepagi, kai pe e, keriahen, kesusahen, kecedan ate, rsd. Dosa si lit ibas kita banci saja erbahanca kita mbiar, ragu, lalit kepastin tapi kemalemen ate sirehNa ibas Dibata nari ngasup menghalau si e kerina. Emaka kalak si tek man Jesus tentuna la aru atena amin gia Jesus lawes ndahi Bapa (ay. 28-29). Amin gia ibas zaman genduari la si idah Jesus e, tapi labo e erbahanca kita la yakin, ragu-ragu. Labo e erbahanca kita nungkun-nungkun “Lit kin Dibata e?”. sebab Kesah si Badia si tadi ibas kita tetap ngajari kita kerna Dibata.

Arah invocatio ibas minggu enda pe ipersingeti mulihi man banta kerna pertotonta. Ora et Labora et Ora, dahiken siitotoken kita janah totoken siidahiken kita. Ibas kita ertoto cataten man banta maka labo terjeng sura-suranta saja siisehken kita tapi ibas kita ertoto e pe harus ka lit gunana man kalak sideban, arah pemindonta ibas toto e harus ka termulia gelar Dibata. Emaka enda pe jadi perenungen si penting man banta. Bangsa Israel ibegiken Dibata pertotonna seh maka ia pe ndatken kemenangen, emaka gelah pertotonta pe tersehi pindokenlah si mehuli man Dibata. Reh tutusnalah kita ertoto tentuna alu pertoton si benar ras lakokenlah kai siitotoken kita e man Dibata.

Selamat Melayani ras mejuah-juah man banta kerina

Pdt. Julia Elprida Br. Ginting’s

(0853-6175-3339)

Melayani i GBKP Runggun Penen

Klasis Medan-Delitua

---

[1] www.gbkp-kjb.org/index.php?option=com_content&view=article&id=1042:khotbah-minggu-671-8-minggu-01-mei-2016-rotega&catid=85:khotbah-umum&ltemid=180

Meriahlah O Doni Ras Langit Kerina

Khotbah 17 April 2016

Invocatio    : Sabab kerina sinasa lit Dibata njadikenca, janah kerina e lit erkiteken IA dingen man gunana. Terpujilah Dibata seh raasa lalap. Amin (Roma 11:36)

Ogen          : Ketangkasen 7:9-17 (tunggal)

Khotbah     : I Kronika 16: 31- 36 (Responsoria)

Tema          : Meriahlah O Doni Ras Langit Kerina

Khotbah

Sope lenga kita seh ku tema ta wari minggu enda, mari lebe sigargari kai ertina ntah pe maknana kerna bahan khotbahta ibas wari enda. Kitab I Kronika 16:31-36 nuratken kerna ende-enden pujin siiendeken bangsa Israel kenca ia maba peti perpadanen ku Jerusalem. Kai kin peti perpadanen e? peti perpadanen ntah pe ibas cakap indonesia ikataken tabut perjanjian, tabut Allah, Tabut Kesaksian eme tabut siberbentuk persegi panjang, ibahan arah batang pohon Penaga, ukurenna 1,3 x 1 x 1m. tutup Tabut ntah pe ikataken tutup Pendamen ibahan arah emas nari, siujung-ujungna berbentuk sayap.

Peti perpadanen e eme peti siipake guna nimpan barang-barang pusaka sierbahan bangsa Israel banci nginget kerna perbahanen Dibata kempak ia kerina. Ibas peti e itamaken dua loh batu torat siertulisken 10 pedah Dibata, buli-buli manna (pangan sanga i padang pasir), tongkat harun, ras pe sarana-sarana siipake Dibata guna jumpa ntah pe ngerana man suruh-suruhenna musa (semak belukar). Erkiteken peti perpadanen e menurut keyakinen bangsa Israel melambangkan kehadiren Dibata ije.

Bahkan si luar biasana peti perpadanen e enggo menempuh perdalanen si cukup nggedang ibas perdalinen sejarah bangsa Israel. Mulai i Gilgal nari peti perpadanen e ibaba ku Betel, emaka ipiserken ka ku Silo ibas zaman hakim-hakim. Kenca si e irampas bangsa Filistin me peti e, tapi kepeken ise si ngerampas peti e justru maba cilaka man bana, seh maka bangsa Filistin kena pinakit seh 7 bulan erkiteken si e iulihken bangsa Filistin me peti e man Israel itamaken i Kiryat-Yearim. Ije me peti e dekahna 20 tahun la iperdiateken. Erkiteken ibas paksa si e eme paksa pemerentahen Saul, sanga masa Saul nge peti e la iperdiateken. Emaka kenca Daud jadi Raja peti perpadanen e ipisehkenna ku Jerusalem, erkiteken ije me bangsa Israel nembah man Tuhan.

Peti perpadanen e eme sada hal sicukup penting man bangsa Israel, emaka ibas kalak enda berhasil maba peti perpadanen ku Jerusalem meriah kel ukurna kerinana. Erkiteken peti enggo banci itamaken ku Rumah Pertoton. E nge turin-turinna maka bangsa Israel ngendesken ende-enden pujin man Dibata ibas bindu 16 enda.

Bagi bangsa Israel ngendesken ende-enden pengataken bujurna man Dibata, minggu enda pe ibaba kita gelah ngasup ngataken bujur man Tuhan kerna perbahanenna si mbisa ibas kegeluhenta. Bagi ibas pengogenta ketangkasen 7:9-17, ije ituriken kerna pengenehen Johanes. Ija lit enterem kalak si la terbeligai, ibas kerina bangsaa, suku, negara ras ibas kerina cakap pe lit ije. Kerina ia ngakuken maka keselamaten e rehna ibas Dibata nari si kundul ibas kinirajan Surga. Seh maka jelma e kerina nembah, ayona seh ku taneh. Adi ibas perdalinen geluh bangsa Israel jelas enggo tangkas man banta kerna kerina perbahanen tan Dibata kempak bangsaNa, nandangi kerina rasul-rasul ibas padan simbaru pe enggo jelas tertulis kerina maka Dibata e tetap mereken kemalemen ate ras kiniulin kempak ia kerina. Gundari uga man banta? Enggo nge sigejabken perbahanen Dibata si luar biasa e ibas geluhta? Seh maka kita ngasup ermeriah ukur iadep-adepen Dibatanta.

Bangsa Israel banci mbentasi lawit teberau erkiteken Dibata mbelah lawit e jadi dua, kita gundari berhadapen ras teberau ta masing-masing, teberau perbeben terbentang luas iadep-adepenta. Kai si banci ibahan kita? Adi balik ku pudi igombangi kalak kita, adi iterusken banci kita gedap. Adi sekalak si bijak ngatakenca sanga lanai kita banci ngenehen ku pudi ntah ku depan nehenlah ku datas, idatas nari lit nge lalap penampat e reh. Maksudna kai? Tataplah kempak Tuhan, ia nge simereken man banta dalan pulah, ia nge simereken man banta kengasupen gelah banci kita tetap ermeriah ukur iadep-adepenNa.

Minggu enda pe igelari minggu Jubilate siertina “Ersuraklah”. Emaka rikutken minggu Jubilate enda ibabai me kita ngenehen perbahanen Dibata simbelin lako mulahi kita ibas perbeben simberat nari. Perban keleng atena man BangsaNa nge maka Dibata nampati Israel ibas peperangen. Bage ka pe kita manusia, keleng ate Dibata enggo iberekenNa man banta arah kerehen Yesus si jadi Juruselamatta. Eerkiteken si e bujur nge kita Ersurak, ermeriah ukur, ras ngataken bujur. Ersurak si labo terjeng sora si megang tapi ikut muat bagin ibas ersaksi kerna kematen ras kekeken Jesus man doni enda gelah doni enda pe kerina ermeriah muji-muji Dibatanta. Amin.

Selamat Melayani ras mejuah-juah man banta kerina

Pdt. Julia Elprida Br. Ginting’s

(0853-6175-3339)

Melayani i GBKP Runggun Penen

Klasis Medan-Delitua

Kehamaten, Kemuliaan ras Kuasa Man Bana Rasa Lalap

Khotbah Minggu 10 April 2016

Invocatio     : Sabab Ia kap Dibatanta, kita bangsa si ikelengiNa. Kita desken rarasen biri-biri si ipermakaniNa. Emaka wari enda dengkehkenlah soraNa. (Mzm. 95: 7)

Ogen           : Mazmur 30: 2-13 (Responsoria)

Khotbah      : Ketangkasen 5 : 11-14 (Tunggal)

Tema           : Kehamaten, Kemuliaan ras Kuasa Man Bana Rasa Lalap

Khotbah

Ibas kita ngerana kerna kitab ketangkasen, maka perlu nge sieteh leben maka sitertulis ibas kitab e eme kerna sada pengenehenen Johanes sanga ia iasingken ntah pe ibuang ku Pulau Patmos erkiteken ia mberitaken berita simeriah. Emakana kitab ketangkasen epe banci ka ikataken kitab nubuaten, adi kerna nubuaten berarti kerina sitertulis ibas kitab enda, lenga terjadi tapi pasti bakal terjadi, engkai? Erkiteken enggo memang kin bage itetapken Dibata. Sebab adi la lebe itetapken Dibata tentu labo mungkin enda jadi sada pengenehenen man Johanes.

Perpulungen kekelengen Tuhan, ibas bahan ogenta iajuk kita ngenehen kubas pengalaman Daud. Ibas kesaksin ende-enden mazmurna tuhu tangkas kel ikataken Daud maka Dibata enggo mulahi ia ibas kuburen nari, enggo erdalan Daud kempak doni kematen tapi ipegeluh Dibata mulihi ia (ay. 4). Entah termamang-mamang nge kita ngoge kalimat mazmur Daud enda. Tapi enda situhuna ngatakenca maka Daud enda pernah mengalami kejadin simberat kel ibas geluhna. Ia pernah mengalami masa-masa sulit, iuru-uru prajurit Saul guna munuh ia, ibas kesesaken si pernah ialamina, ibas keadaan erceda ate sipernah igejabkenna sanga mate anakna. Tapi luar biasa ibas keadaan situhu-tuhu hancur, ngasup denga ia muji Tuhan.

Kesaksin Daud ibas ay. 1 ipujina Dibata erkiteken la ipediat Dibata imbangna megombang man bana. Kita kerina genduari sipulung ijenda, lit imbangta darat ntah lang? cuba si siksiki banta, apakah lit imbangta e erkiteken kita mpertahanken sibenar ibas kata Dibata ntah mgkn erkiteken siibahanna la bagi sura-suranta. Adi kai si ialami Daud enda, enggo tangkas tuhu maka lit pe imbangna erkiteken ia ndalanken kai siitetapken Dibata. Emaka tentu saja Dibata pasti mbela Daud. Jadi labo berarti setiap lit imbangta darat, asal sipuji Tuhan enggo pasti naring kita menang, labo kel e jadi sada jaminen. Tapi si pasti adi kita lit ibas pihak sibenar iakap Dibata maka pasti kita ipemenangNa.

Ngataken bujur man Dibata enda enggo jadi sada hal siwajib idalanken kita selaku anak-anakNa. Tapi sirusur pengataken bujurta e lebihen kernaa berkaat-berkat ras kesenangen-kesenangen si lit ibas kita. Adi ibas masa-masa sulit, terjepit ras pe gagal, kinitana mesera nge siakap ngataken bujur. “Apa yang mau disyukuri? Tohh.. keadaan sedang sulit dan paceklik”.

Tapi ibas bahan renungenta sekalenda Daud ngajarken man banta, maka amin gia ibas keadaan simberat kel tetap harus ngasup kita ngataken bujur man Dibata, harus kita nehken puji-pujin man baNa. Ibas keadaan yang sulit sekalipun kita harus banci ndatken sada alasen guna tetap ngataken bujur man Dibata.

Minggu enda pe igelari minggu Misericordias Domini, siertina minggu simabai kita nggejabken lias ate Tuhan Dibata. Ija kita ikelini dingen ipulahi ibas ukumen nari. Kita enggo itebus, jenari iperembakken Dibata kempak DiriNa arah kematen Jesus Kristus i kayu persilang. Dosa ras kelepakenta lanai iingetNa jenari iatanken Dibata kita bengket kubas kemulianNa sirasa lalap.

Perpulungen kekelengen Tuhan, kitab ketangkasen sijadi bahan khotbah sekalenda isuratken Johanes erkiteken ibas paksa si e, kalak Kristen sangana igasgasi kerna kinitekenna man Jesus Kristus selaku Tuhan. Emaka arah kitab enda, singogesa ndatken pengarapen ras gegeh gelah tetap megenggeng ibas kiniseran. Adi siperdiateken kari ibas ayat sada nari ntah bingung nge kita ngogesa sebab lit ka ije ikataken kitab siisegel, janah sada pe la metunggung guna mbuka segel e, jenari ngenehenca kubas kitab e. tapi perpulungen kekelengen Tuhan maksud siitulisken Johanes e eme sada kiasen. Kitab e eme pusuhta, janah segel e eme dosa singiket kita, simematerai kita seh maka la banci kita pulah ibas dosa e. emaka ibas ay. 5 “singa ibas suku Juda nari, kesusuren si ipebelin ibas Daud enggo menang. Ia metunggung mecahken materai si pitu e ras nalangisa.” Singa siimaksudken ibas kitab enda eme Jesus. Jesus e kesusuren ibas suku Juda nari, kesusuren Daud. Jesus enggo menang Ia naluken kuasa doni kematen, emaka Jesus ngenca ngasup ngelepasken kita ibas kerina belenggu-belenggu, iketen-iketen si lit i doni enda. Gelah si dat tuhu-tuhu kesenangen si rasa lalap e. emaka alu bage perpulungen kekelengen Tuhan erkiteken belinna kekelengen Dibata e man banta patut nge bagi tema ta sekalenda maka Kehamaten, Kemuliaan, ras Kuasa Man Dibata nta saja rasa lalap. Amin

Selamat Melayani ras mejuah-juah man banta kerina

Pdt. Julia Elprida Br. Ginting’s

(0853-6175-3339)

Melayani i GBKP Runggun Penen

Klasis Medan-Delitua