IDILO GUNA PEHULIKEN

Bahan Sermon Khotbah Minggu 26 Februari 2017

Invocatio     : “Erkiteken pasu-pasu Dibata nge maka kalak jadi bayak, erdahin erbintuas labo nambahi kebayaken” (Kuan-kuanen 10: 22)

Ogen           : II Petrus 1:16-21 (Anthiponal)

Khotbah      : Mazmur 2 : 1-12 (Tunggal)

Tema           : Idilo Guna Pehuliken

Kata Perlebe

Arah Pustaka Si Badia melala tokoh-tokoh pilihen Dibata siidiloNa guna ndalanken sura-suraaNa, sipaling terkenal eme Abraham, selain si e lit ka Musa, bage Daud ras sidebanna. Arah kisah tokoh-tokoh e pe banci si tarik sada kesimpulen eme ibas pendilo Dibata guna ndalanken sura-suraNa e labo menukah, melala tantangen siarus ialaken. Tapi ibas buena tantangan siarus ialaken e, Dibata labo lepas tan. Tapi ipengasupNa me kalak sienggo ipilihNa e guna ndalanken kai sienggo isuruhNa.

Pendalamen Teks

ü  Mazmur 2 : 1-12

Ay. 1-3 : ende-enden enda ibenaken alu penungkunen raja man bangsa-bangsa siatena erbahan pemberontaken. Mamang ate raja e ngenehen kesepakaten bangsana guna memberontak, erkiteken e perbahanen si sea-sea, ertina pasti gagal. Engkai? Erkiteken e perbahanen ngelawan Dibata, Dibata labo banci tertaluken. Ngelawan raja sienggo ilantik Dibata, berarti ngelawan Dibata.

Ay. 4-6 : erkiteken kesepakaten raja-raja doni e guna ngelawan “yang diurapi Tuhan” emaka pemazmur maba mata kinitekenta ku datas, ngenehen Sang Raja si erkuasa nandangi kerina isi doni enda. Raja e mperdiateken usaha pemberontaken raja-raja doni, janah tawa Ia. Raja e labo terjeng tawa ibas ingan si meganjang, tapi pe icidahkenNa ise Raja si erkuasa situhuna.

Labo manusia si ngelantik raja Israel tapi Dibata sendiri, raja e ilantik labo i sembarang ingan tapi i Sion “gunungKu yang kudus”. Bangsa Israel tek maka Sion eme ingan Dibata “Kota kediaman Allah”. Sion pe ikataken “kota Raja Besar”. Sion nari Dibata jadi Raja si ngerajai, “Dia yang dahsyat bagi raja-raja di Bumi”.

Ay. 7-9 : kenca mabai mata kinitekenta ku Datas, pemazmur ngogeken sada keputusen Dibata kenca upacara pelantiken raja e ilakoken. “kam kap anakKu; sendah Aku kap jadi Bapandu”. Erkiteken kata Dibata e maka banci sikataken lit penjanjin hubungen antara Dibata ras raja siilantik eme hubungen Bapa ras anak. Alu litna hubungen perjanjien e maka arah Dibata mereken janji ras kesetiaanNa, bage pe arah raja siilantik lit hak siibereken man bana bagepe kewajiben si ituntut ibas ia nari. “Ciken Besi”  si isuratken ibas ay. 9 melambangken kekuasaan sekalak raja. Erkiteken ibas pelantiken raja Israel paksa si e, ibereken tongkat man bana si jadi lambang kekuasaan i Israel.

Ay. 10-12 : kenca nuriken ise situhuna Raja i erkuasa e, pemazmur ngajuk kerina pemerentah doni enda gelah bijaksana ibas ngelakoken dahinna. Ertina eme mereken dirina guna ipersingeti bagepe iajari. Kai isi persinget e? isina eme gelah selaku pemerentah ia ngelakoken tugasna alu mbiar man Dibata.

Kebebasen siidarami labo idapeti alu pemberontaken ngelawan Dibata, tapi alu ndarami pelindungen arah Ia.

ü  II Petrus 1 : 16-21

Nuriken kerna kesaksin Simon Petrus selaku ajar-ajar Jesus raduken ras dua ajar-ajar sideban naksiken kuga Jesus ipermuliaken i datas deleng. Dibata ngerana maka Jesus e “Anak siikelengiNa”. Ibas sada paksa pe isungkun Jesus ajar-ajarNa “ise Aku enda?” Petrus ka nge jababsa “Kam me Mesias”. Anak Dibata si nggeluh. Kiniteken Petrus paguh man Jesus. Kesaksin e me mabai Petrus ngaloken pendilo tole guna meritaken/naksiken kerna Tuhan Jesus (Berita si Meriah). Berita si meriah e desken lampu i tengah kegelapen janah berita si Meriah e  mabai kalak si idiloNa guna mpehuliken situasi ras keadaan manusia si nggeluh.

Refleksi

Mazmur bindu 2 eme ende-enden ibas wari pelantiken Raja bagepe ibas wari ulang tahun raja. Inti kesaksin pemazmur enda eme kerna hubungen raja-raja doni ras kuasa Dibata bagepe ras si enggo iurapiNa. Kesepakaten guna mbebasken diri arah kekuasaan raja Israel secara langsung eme salah sada bentuk pemberontaken ngelawan Dibata erkiteken raja Israel enggo itetapken jadi anak Dibata. Raja e Dibata ngelantiksa ibas inganNa i Sion nari. Raja e ibereken kuasa gelah bangsa-bangsa i doni endaa jadi sikerajangenna.

Kekristenan sejak zaman rasul-rasul enggo ngenehen maka kai siitulisken pemazmur enda enggo igenepi alu sempurna ibas diri Jesus Kristus. Jesus, Nazareth nari ibereken kuasa janah Ia pe ikataken “Putra/ Anak yangMahatinggi”. Tindakan kekuasaan Yesus eicidahken alu ngutus ajar-ajarNa ku belang-belang doni guna njadiken bangsa-bangsa i doni enda jadi ajar-ajarNa.

Selaku serayan Tuhan, kita pe enggo ilantik Dibata. Janah bagi raja Israel ndatken hak ras kewajiben, kita pe lit ka nge kewajiben ras hak-ta. Allah berkenan kepada Jesus karena ketaatan-Nya. Uga kegeluhen kerohanian ta paksa enda? Enggo nge e erbahanca ngena ate Dibata man banta? Dibata ngena ateNa man kalak sienggo ipilihNa, adi kita tetap ndalanken sura-suraNa janah ngelakoken kerina siiperentahkenNa.

Ingetlah kerna sejarah raja-raja i Israel, labo kerina singena ate Dibata (I Raj. 16:7, 13, 19, 25, rsd) contohna Saul ibas masa pemerentahenna tantangna ipilih Tuhan ia tapi kedugenna lanai ngena ate Tuhan man bana.

Jemaat Kristen ibelang-belang doni enda pe enggo ndatken pendilo Dibata guna ndalanken sura-sura Dibata i doni enda. Tep-tep kalak si enggo iperidiken dingen ngakuken kinitekenna man Dibata ertina pe ia enggo siap guna ndalanken mandate siibereken Dibata man bana eme guna mpekena-kena doni enda.

Ingetlah tugasta ijenda guna mpehuliken sekelewetta, mabai kalak reh deherna man Dibata. Tugasta labo guna milih-milihi apai si banci ipehuli, apai si la banci ipehuliken, tapi tugasta eme pehuliken asa ngasupta, selebihna serahken guna sikerajangen Dibatanta.

Selamat Melayani man banta kerina

Written by : Pdt. Julia Elprida Br. Ginting Suka, S.Th

(0853-6175-3339)

Melayani di GBKP Runggun Penen

Klasis Medan-Delitua

“Malem kal ate kalak nggeluh ibas undang-undang Tuhan”

Bahan Khotbah Minggu 12 Februari 2017

Invocatio    : Malem ate kalak si Tuuhan Dibata penundalenna. Si ibahanna Dibata nu Jakup jadi                               penampatna (Mzm. 146:5)

Ogen          : I Korinti 3: 1-9 (Anthiponal)

Khotbah     : Mazmur 119: 1-8 (Tunggal)

Mungkin pernah lit ibegindu lit kalak singerana bagenda “peraturan itu dibuat untuk dilanggar”. Janah memang kalak singerana bage biasa biakna la nggit iatur ras pe la nggit ngikuti peraturen-peraturen si lit. kalak sibage adi ninta kalak karo eme kalak si rusur ‘Nongkangi’. Suruh ngikuti rapat la ia nggit, tapi kai keputusen ibas rapat e pe labo ka iikutina. Kalak sibage me ikataken pengganggu ibas persadan.

Memang labo ka kerina manusia la nggit iatur, sebab lit ka piga-piga tipe jelma si kin memang ietehna bana. Contohna lit ia si erbahan jadwal kegiatenna tep-tep wari, enda erkiteken banci saja ietehna bahwa adi la kin isusun jadwal e maka labo teratur kerina kegiatenna, janah pe banci saja lit ka dahin-dahin si la terdungina. Alu litna jadwal e nampati ia guna nginget dahinna ibas wari si pepagi.

Bage ka pe adi kita ngerana kerna undang-undang Tuhan. Undang-undang e ibahan guna keteraturenta ndalani kegeluhen e, alu kata sideban undang-undang e eme ‘Rambu-rambu’. Adi ikateken rambu-rambu tentu enggo iangkai kita, bagi rambu-rambu lalu lintas. Adi rambu lalu lintas lit ia lampu merah-kuning-hijau, janah lit ka ertina masing-masing. Adi lampu lalu lintas e la sipatuhi tentu lit akibatna. Adi si biasana ninta banci kecelakaan kita. Tapi adi kami ngukurisa lumayan adi kita si la patuh e kecelakaan, enda malah kalak si deban kena imbasna. Adi sanga lampu hijau tiba-tiba lit kalak menyebrang, tentu kendaraan si sangana melintas pasti sengget ia, janah pe banci saja banting setir ia ku kiri piah dungna pengendara e menabrak trotoar ntah pe nabrak pohon. Sementara si pejalan kaki, si menyebrang sembarangen ndai selamat saja ia. Enda ka si parahna, kinilapatuhenta justru merugiken kalak si deban. adi kita saja min ndai si rugi labo dalih tapi enda malah kalak si deban datken kerugin.

Pemazmur mereken gambaren sijelas man banta kerna kalak si geluhna ermalem ate. Kepeken kalak si ermalem ate e isuratken cirri-cirina ibas ayat 1-3, kalak sibage me si ndatken kemalemen ate si tuhu-tuhu. Mesera tuhu memang ngelakoken bagi si itulisken ayat 1-3, tapi ibas mesera siakap e, Dibata sendiri pasti nampati kita, ras pe pengasup kita ngelakokensa. Ia enggo mereken undang-undangNa arah kataNa gelah kita sindatken kata e lit gelementa ndalani kegeluhenta.

Bagi rusur silebuh Dibata e Bapanta, maka selaku Bapa pasti ateNa gelah anak-anakNa ngelakoken hal-hal si benar sienggo iajarkenNa. Kam gia perpulungen Tuhan, adi anakndu ngikutken katandu, ugapa pe pasti meriah ukurndu janah banci ka sibereken hadiah man bana erkiteken enggo ikutkenna katanta. Kune ka Bapanta si ni Surga, adi kita tuhu-tuhu ngikutken kataNa alu bulat ukur kin bagi nina pemazmur maka pasti kemalemen ate jadi si kerajangennta. Tapi si jahat e ibarat om ras tante, si ngerayu anak Bapa gelah anak e nggit ngikuti om ras tante. Erkiteken kai? Erkiteken si jahat la nggit lawes ku kebenen sekalak, lit atena pengikutna emakana irayu-rayuna kita anak Bapa e, gelah ngelakoken sijahat seh maka secara langsung kita pe jadi pengikutna. Upahna tentu la sidat kemalemen ate situhu-tuhu e.

Kemalemen ate e sidatken labo kenca kita ngikuti undang-undang Tuhan, tapi justru sanga kita ngikuti undang-undang Tuhan e, je me sidatken kemalemen ate e. 

Pdt. Julia Elperida Br. Ginting

(0853-6175-3339)

GBKP Runggun Penen

Selamat melayani man banta kerina

Note : adi lit tambahen kerna bahan enda banci ka kita saling berdiskusi ibas Blog-ta enda.

          Bujur.. 

KOMITMENKU REH KU PERPULUNGEN

BAHAN SERMON PJJ 05-11 FEBRUARI 2017

Nats : Heber 10: 22-25

Perlebe

Rusur pasti sibegi lit kalak ngatakenca, “kai kin gunana reh ku perpulungen e ah? Kalak si rusur ikut perpulungen ah pe lenga pantas jadi usihen kal. Pangen ka nge bagi aku enda, la pe aku ku gereja tapi mehuli perbahanenku”. Statement enda tentuna tak jarang mempengaruhi semangat jemaatta ibas ngikuti kegiaten-kegiaten si lit itengah-tengah gerejanta, seh makana pangen akapna ia rumah medem saja, asangken reh ku perpulungen tapi munduk-munduk. Ibas pembahasenta sekalenda perlu sidapeti kai kin ras engkai kin makana arus kita ikut kubas perpulungen, segelah alu bage sieteh palasna kita ngikuti kegiaten perrpulungen e.

Pendalamen Nats

Nasehat siitulisken ibas surat Ibrani enda ibereken man perpulungen Kristen Jahudi abad pertama. Erkiteken kinitekenna man Yesus Kristus maka perpulungen e ndatken kiniseran, seh maka ia kerina pe harus kehilangen erta-ertana. Tapi kepeken ibas Situasi sibage Dibata mereken tetap pedahNa arah surat enda man perpulungen segelah perpulungen e tetap enteguh jemak kinitekenna man Dibata. Ay. 23 ngatakenca maka perpulungen e harus gelem pengarapenna si enggo iakuina. Labo menukah gelah tetap erpengarapen man Dibata, tapi perlu iinget perpulungen e maka Dibata e bali kap nderbih, sendah seh rasa lalap (Ibr. 13:8). Kristus e setia kap dingen la pernah berubah kesetiaanna, emaka selaku pengikutna pe kita harus tetap erpengarapen man baNa.

Ibas kita gelah banci tetap gelem pengarapenta man Dibata, mawen-mawen terombang-ambingken doni enda denga ka kita. Emaka perlu kel kita kalak sideban guna jadi temanta si mpersingeti kita gelah tetap erpengarapen. “Sisampat-samapaten” lit makna kata saling e, si ertina kita labo terjeng jadi kalak Kristen secara pribadi-pribadi ntah pe individu-individu saja tapi pe perlu kita lit ibas sada perkumpulen (perpulungen) sibaci jadi wadahta sisampat-sampaten, bage pe ibas nehken keleng ate (ay. 24). Bagi nina Dibata ibas Pengerana 4:12 “Dua kalak erdalan banci ia ras-ras ngelawan adi lit si nerang ia, tapi adi sekalak ngenca melukah nalukenca. Tinali si ipiuh telu mesera ngeretapkenca”.

Si jadi kelanjutenna eme ibas ay. 25, kepeken tindaken sisampat-sampaten ibas nehken keleng ate e bagi siituriken ibas ay. 24 labo banci si peseh adi kita mpedauh dirinta ibas perpulungen nari. Enterem manusia si ngelakoken perbahanen mehuli nandangi sesama manusia tapi lit ka kin ibahanna perbahanen mehuli alu cara beribadah man Dibata? Sienda perlu jadi perhatin penting man banta. Ibas ay. 24-25 sidat erti simbaru kerna ibadah, eme; ibadah labo terjeng menjalin hubungen man Dibata tapi pe menjalin hubungen ka nandangi sesama manusia. Arah ay. 25 enda, banci saja kemungkinen perpulungen paksa si e enggo mulai nadingken kebiasaanna reh ku perpulungen. Ikatakenna dirina Kristen tapi itadingkenna sada rarasenna. Emakana penulis surat enda mpersingeti perpulungen gelah la iikutkenna perbahanen kalak sibage.

Aplikasi

Kalak si tek man Kritus pulung. Kepulungen jemaat Kristus e eme ciri khas jemaat i doni enda. Siperdiateken saja tep-tep wari minggu kalak Kristen nadingken rumahna masing-masing guna lawes ku sada ingan si khusus; eme gereja. Alu bage perpulungen encidahken man doni enda kerna kiniersadanna. Janah ibas perpulungen e Dibata labo ngenehen belin kitikna manusia si reh kerna kepentingen pribadina tapi inehenna sekumpulen kalak si nggit ersada ibas kiniteken.

Kai kin gunana kita reh ku perpulungen?

Reh kita ku perpulungen labo guna ndarami kepetingen pribadi ibas ingan perpulungen e. erkiteken sifat jemaat tentu berbeda-beda.

Reh kita kuperpulungen e labo guna mpesenang dirinta saja. Erkiteken perpulungen e labo bali ras perpulungen sepak bola ntah pe perpulungen sideban.

Reh kita ku perpulungen labo erkiteken tertarik kita kerna sifat si mehuli anggota-anggota sideban, si nggit bergaul bage pe mbacar; erkiteken perpulungen e labo balai pertemuan guna ersenang-senang.

Kita reh ku perpulungen labo guna memperalat anggota-anggota sideban. S

Adi bage berarti kita reh ku perpulungen e erkiteken e kin si sisuruh Yesus Kristus si nggo jadi Bapanta, meriah iakapNa ngidah-ngidah kita anak-anakNa pulung ibas waktu tertentu. Seh maka banci Dibata e pe reh ku tengah-tengahta. Matius 18: 20, Sebab di mana dua atau tiga orang berkumpul dalam namaKu, di situ Aku ada ditengah-tengah mereka.

Selamat Melayani man banta kerina

Written by : Pdt. Julia Elprida Br. Ginting Suka, S.Th

Melayani di GBKP Runggun Penen

Klasis Medan-Delitua

KUNDULILAH PADANTA

BAHAN SERMON KHOTBAH MINGGU 29 JANUARI 2017

Invocatio : Dage adi kam erpadan man Dibata, mnter sehken padanndu e. La ngena ateNa kerna kalak lenge. Emaka sehkenlah padanndu. (Pengerana 5:4)

Ogen : Matius 5: 1-12 (Tunggal)

Khotbah : Mazmur 15 : 1-5 (Tunggal)

Perlebe

Sada bukti keleng ate Tuhan man manusia eme Dibata nepati kerina si ipadankenNa man manusia, ibas Ia nehken keselamaten man manusia arah kerehenNa jadi manusia. Enda me kemalemen ate man banta. Si menjadi penungkunen man banta uga kita ibas nepaati janji/padanta? Lit sada istilah si rusur sibegi eme NATO (Not Action Talk Only), siberarti terjeng cakap ngenca sibanci ilakokenna. Tapi bas perbahanen ibas kinatana la ilakokenna. Atau alu kata sideban teori ngenca beluh, ibas praktekna kosong/nol. Bagepe ibas erjanji, enda me hal si rusur ilakoken kita, mesunah kel kita melasken janji, saja ibas nepati melala kel alasen-alasen klasis si ibahan kita, ibas kita membela diri perbaan la itepati.

Pendalamen Teks

Invocatio

Pengerana salah sada kitab Hikmat si luar biasa si tempa-tempa pesimis terhadap kehidupan erkiteken ngataken kerina eme kesia-siaan. Tapi ibas tampuk pergumulenna iturikenna maka erkemalangen man Dibata kepeken tampuk ras ulu kerina sinasana. Kata siipake ibas ayat enda situhuna labo sekedar janji ntah padan tapi bahasa aslina lebih ku nazar. Ngkai maka ula terburu-buru erban nazar erkite-kiteken ibas nazar e lit konsekuensina si mawen banci kari la tersehi kita, ras lebh asa si e maka nazar kepeken mengandung unsur ketidakpercayaan ije ntah pe keraguan akan kuasa Allah.

Ogen : Matius 5: 1-12

Bagin enda eme masuk ku bas bagin pengajaren Jesus i datas uruk. Secara khusus bagin enda situhuna berisi kata persinget ntah pe antisipasi kerna geluh pelayanen man murid-murid ku lebe si menuntut kesetiaan ras ketekunen sebagai pengikut Kristus, sebab ancaman ras tekanan sebagai pengikut Kristus enggo nimai. Kata ketuahen ijenda, itekanken Jesus seolah ibas nuansa negative (pihak lemah) dan sangat erat kaitenna ras kesetiaan jadi pengikut Kristus. Ketuahen…. Nggejab labo kai pe iadepen Dibata, erkiteken dosa, meteruk ukurna, muas melihe, perkuah ate dingen perkeleng, meciho pusuh peraten, erbahan perdamen, ngenanami kiniseran erkiteken nehken peraten Dibata, kam ajar-ajarKu igombang-gombangi, ipesega-sega. Enda tujunna sipertama kal maka ula erkaadiola murid-murid jadi pengikut Kristus dikune kai pe sijadi ibass wari si arah lebe,. Ras sipentingna sebagai pengikut Kristus ia harus ncidaahken sada cara nggeluh erkiniteken si berbeda ras kalak farisi ras guru-guru agama. 5:20 “Kukataken man bandu maka labo banci kam bengket kubas kinirajan surga adi la kin tutusen atendu erbahan ssingenaa ate Dibata asa gurur-guru agama ras kalak farisi.

Khotbah : Mazmur 15 : 1-5

Rumah pertoton ras deleng Sion sada unsur utama si la banci terpesirang arah ritual ibadah ras kiniteken bangsa Israel. E sada ingan si ipilih ras itetapken Dibata ingan bangsaNa ersembah man baNa. Ibas perkembangenna enda jadi symbol kehadiran Allah itengah-tengah umat anemp pe pada kenyataannya Dibata labo teriket bas ruang raas waktu. Pemasmur memiliki keyakinan bahwa ise kin si metunggung reh ku ingan Dingan ringan (ay. 1) :

Kalak si patuh man Dibata ibas kai-kai pe dingen lalap ngelakoken sibenar (ay. 2). Ertina kepatuhenna e la ipengaruhi situasi ras kondisi kegeluhenna. atau dengan kata lain komitmen kinitekenna man Dibata tidak dikendaliken oleh keadaanna.

Pengeranana sikap (benar dingen jujur, la ibelaskenna cakap la tuhu, cikurak; ay. 3) terteki cakapna ras tergelem rananna.

Pergaulenna mejile (ay. 4) mehamat man kalak si erkemalangen man Dibata, dingen pe ikundulina padanna anem pe rugi.

La meduit (ay. 5) pepinjamken la erbunga, la ngaloken sogok gelah nalahken si la ersalah.

Arah perenungen pemazmur enda teridah maka kalak si metunggung rembak ras Dibata :

Komitmenna erDibata la itentuken keadaan

Integritas kinitekenna teridah arah kinata geluhna (la percekurak, la perbual, mehamat man kalak si erkemalangen man Dibata, la meduit)

Aplikasi

Menjadi sempurna memang sada hal si labo mesunah terlebih ibas ngelakoken nilai-nilai moral ras etika sue ras bahan khotbah. Tapi pesan-pesan moral raas etika enda arus lit ibas geluhta selaku kalak si tek man Tuhan. Enggo waktuna sicidahken kerna kualitas kalak Kristen si berintegritas. Bas si e perlu kita tekad/komitmen. Selaku penghuni kerajaan surga, kita arus merepresentasikan milai-nilai si lit e alu mehuli. Adi lang, ula kita ernipi banci bengket ku rumah pertoton Tuhan. Sebab enda me tuntuten Dibata, bagi si-ituriken Daud.

Arah bahan khotbahta enda ngajuk kita uga kin kita nggeluhken geluhtaa selaku kalak Kristen, sebab ibas kedungenna kari kita bakal mempertanggungjawabkan kerinaa perbahanenta ilebe-lebeNa, bagi si tertulis ibas 2Kor. 5: 10. Ibas bahan ogenta ndai, ketuahen situhu-tuhu adi kita ngelakoken singena ate Tuhan gelah sialoken upah eme ingan  sienggo isikapken Tuhan ibas kinirajan Sorga

Padan ntah janji e merupaken ikatan hubungan, hubungen e megegeh di pekepar sierpadan e ngkunduli padanna. Ijenda me ibutuhken kesetiaan raas ketekunen gelah ula ceda perpadanen e ntah pe salah sada la ngkunduli padanna. Keteguhen perpadanen e lit adi kesetiaan la ikendaaliken oleh keadaan.

Nulih kita kempak perpaadanen sipernah si ban selaku kalak Kristen: tupung kita naruhken anakta iperidiken erpaadan kita iadepen Dibata gelah si didik ras sijaga anakta e erkemalangen man Dibata, sanga kita ngawan kita erpadan iadepen Tuhan janah kita ngakuken kiniteken setia dingen ndukung gerejanta GBKP, sanga kita ilantik ntah itangkuhken erpadan kita setia ras ngelakoken tugasta alul ertaanggung jawab, sanga kita ipasu-pasu erpadan kita iadepen Dibata gelah setia. Seh ija ngenda ita enggi ngkunduli padaanta?

Tema-nta mpersingeti kita ibas melasken padanta man Dibata. Bagi si lit ibas liturgi GBKP “adi tuhu bage atendu nindulah tuhu bage ateku” janah ninta ngaloi “tuhu bage ateku”. Enda sirusurna ilanggar kita, sebab ibass kinatana siilakoken kita, baik ibass serayan bagepe perpulungen sijadi eme “tuhu bage ate-ateku”. Adi man Dibata pe kita ingkar, apai ka man manusia. Bagi ibas invocation-nta, adi kita erpadan man Dibata, sehkenlah sebab Dibata la ngenaa ateNa kalak lenge. Emaka marilah sipelajari guna menepati padanta terlebih ibas ndahiken dahin Tuhan ibas geluhta (belajar untuk melakukan), Amin. 

Selamat melayani man banta kerina

Pdt. Julia Elperida Br. Ginting's

(0853-6175-3339)

GBKP RUNGGUN PENEN

Klasis medan-delitua

IKUTKENLAH AKU

BAHAN SERMON KHOTBAH MINGGU 22 JANUARI 2017

Invocatio         : Mekuahlah ateNdu man bangku suruh-suruhkenNdu, maka alu bage banci aku nggeluh ngikutken ajarNdu (Mzm. 119:17)

Ogen               : Mzm. 27: 1, 4-9 (Responsoria)

Khotbah          : Matius 4: 18-25 (Tunggal)

Penaruh

Kekristenan labo sada agama ntah pe sada model pengajaren saja, tapi Kekristenan e lebih kubas sebuah gaya hidup (Life Style) siberorientasi man sada pribadi sigelarna Jesus Kristus. Adi sikataken maka geluhta berorientasi ku Yesus janah kit ape pengikut Yesus maka kita wajib nggeluh bali ras cara Yesus nggeluh. Enterem kalak singatakenca ia eme pengikut Yesus (Kristen) tapi kinatana life stylena bertolak belakang ras lifestyle Yesus. Emaka adi si kataken dirinta pengikut Yesus, maka kita harus tuhu-tuhu ngikuti Jejak-jejak Yesus.

Pendalaman

Ibas bahan khotbahta minggu enda lit dua kelompok kalak singikutken Yesus. Kelompok sipemena eme kalak si idilo Yesus secara pribadi. Iidahna otoritas Yesus seh maka responna ku Yesus pe positif, respon si dem alu totalitas. Simon ras Andereas minter itadingkenna jalana jenari ikutkenna Jesus. Yakobus ras Yohanes pe minter itadingkenna perahuna bagepe bapana, jenari ngikutken Yesus. Secara simbolis “nadingken jala/perahu” ertina eme nadingken dahin sindekah gelah banci ngelai Jesus penuh waktu ras pe “nadingken bapa” ertina memprioritasken Dibata lebih asangken keluarga. Simenarik ije eme lit kata “minter”, ertina ibas si e eme lalit penundaan dingen eme titik balik kehidupenna, janah pe banci sikataken eme dampak perjumpaanna ras Jesus.

Kelompok sipeduaken eme kalak si enterem ngikutken Yesus guna megiken pengajarenNa. Kalak e rehna ibas daerah siberbedaa-beda. Kalak si enterem e ngikutken Yesus mungkin erkiteken ngidah tanda sengget ntah pe mengalami kuasa Yesus.

Lit sada kebiasaan ibas anak-anak Jahudi zaman perjanjin baru. Mulai kin kitik denga biasana anak-anak Jahudi rusur ngikuti sekolah-sekolah siibahan rabi setempat (guru) seh anak-anak e umurnaa 13 tahun. Anak-anak siterbaik ras cemerlang nge si ikataken orang-orang yang terpilih. Siterpilih e selanjutna ngilkutken rabi setempat e lawes kujapa pe ia ngajar. Seh kari si terpilih e enggo banci jadi rabi ibas inganna ka. Tapi man anak-anak si la terpilih, biasana ia erbahan usaha-usaha perdagangen, erdahin jadi tukang kayu, peternak, nelayan ras sidebanna.

Adi sihubungken kebiasaan anak-anak Jahudi zaman si e ras kai siidahiken Simon Petrus, Andereas, Yakobus rass Yohanes berarti kalak enda labo kalak siterpilih, labo kalak si ianggap cemerlang ibas pengajaren rabi setempatna erkiteken dahin kalak enda eme nerusken dahin keluargana selaku penjala nurung. Tapi hal si menarikna eme Jesus labo ndarami kalak si terpilih, idaramiNa kalak si itolak rabi setempat. Jesus labo milih kalak si ianggap doni enda sebagai yang terbaik, tapi justru Ia nawarken undangen ngikutken ia alu kata-kata sisederhana “Mari, ikutken Aku” man penjala nurung si la ipandang istimewa. Lebih asa si e ikataken Jesus maka iajariNa me kalak enda gelah banci ndilo kalak sideban jadi ajar-ajar Jesus (penjala manusia). Ajuken enda jelas merupaken sada kehormaten. Kalak si empat enda labo ngikutken rabi setempatna tapi justru ia jadi pengikut Rabi siterbaik, Raja idatas segala raja.

Refleksi

Mari ras-ras sirenungken, Jesus kepeken mereken kehormaten man banta kerina, aku ras kam. Labo erkiteken kita sipaling hebat, si terbaik, terpintar ntah pe cemerlang, tapi erkiteken Dibata perlu orang-orang biasa bagi kita enda gelah ngusih Ia ras ncidahken kekelengen ibas gelarNa man sekelewetta. Kai si inehen Dibata labo si inehen doni enda, tapi pusuh. Bagi si pernah ikataken Dibata man Samuel ibas milih Raja man Israel “ola nehen ku gedangna ras kuga jilene rupana. La ia Kupilih, sabab pertimbangenKu la bali ras pertimbangen manusia. Adi manusia inehenna siteridah arah darat, tapi Aku Kupernehen pusuhna” (I Sam. 16:7). Pusuh si tulus, patuh ras engkelengi Dibata, pusuh sitergerak ibas ngidah kiniseran kalak sideban. Paulus pe negasken ibas suratna nina “ipilihNa pe kalak si la meherga, si hina, dingen si la terpake iakap doni enda, guna engkernepken kai si ianggap doni enda penting” (I Kor. 1:28). Enda labo berarti maka kita siibereken kepentaren ras keahlian bagepe bakap-bakat khusus la pernah ipilih Dibata, tapi ibas sienda Dibata nekankenca maka isepe, termasuk kalak si la terpake man doni enda bage pe terbuang, bali ergana iadep-adepen Dibata ras pe berkesempaten guna ndatken kehormaten ibas Dibata nari jadi pengikutNa.

Wari enda Tuhan ndilo kita alu cara si bali sanga Ia ndilo Simon, Andereas, Yakobus ras Yohanes, sue ras profesinta masing-masing. Misalken , man kalak si profesina ibas dunia kesehaten, nina Dibata “mari, ikutkenlah Aku, kubahan kam gelah banci mpepalem pinakit pusuh kalak si deban”. bagepe man insinyur “mari ikutken Aku, kubahan kam jadi pembangun kerina jelma sienggo sempat hancur erkiteken masa laluna”, janah man banta si profesinta selaku perjuma, nina Dibata “mari, ikutken Aku, kubahan kam gelah banci nuanken pengajarenKu ras pengajarenKu ibas pusuh enterem jelma”. Ibas pendilo Dibata sibage, sada undangen kehormaten man banta, siikutilah respon Simon, Andereas, Yakobus ras Yohanes. Ula tunda, ula ragu, ula tulak tapi minterlah patuh ras ikutken Ia. Ije me Dibata ncidahken kuasaNa ibas merubah kita, kalak si biasa guna jadi luar biasa.

Penungkun man banta gundari, Piga kalak si merespon pendilo Jesus? Manusia rusur memikirken untung-rugi ibas ngikutken Yesus janah si rusur iidah manusia eme kerugian ibas ngikutken Yesus erkiteken pemikiren manusia make logikana si terbatas. Enterem manusia la banci ngidah kemuliaan Sorga dibalik kiniseran; manusia la memahami kiniseran i doni enda kentisik ngenca. Emaka labo kita heran adi mayoritas manusia menolak, erbera-bera ibas merespon pendilo Yesus. Ikutkenlah Yesus wari enda, ulanai si tunda-tunda, emaka ibentukNa geluhta.

Pdt. Julia Elprida Br. Ginting’s, S. Th

(0853-6175-3339)

GBKP Runggun Penen Klasis Medan-Delitua

Selamat Melayani

Note : Adi lit tambahen kerna bahan enda, banci ka kita saling berdiskusi ibas kolom komentar. Bagepe adi lit kritik ntah pe saran guna mpehuli blog-ta enda banci ka imasukkenndu. Bujur. 

KITA IPILIH DIBATA JADI TERANG MAN BANGSA-BABGSA

Khotbah Minggu 15 Januari 2017

Invocatio : Surat enda ibas aku nari, Paulus si enggo ipilih Dibata jadi Rasul Kristus Jesus. Aku isuruhNa pembarken kegeluhen si ipadanken guna ialoken ibas persadanta ras Kristus Jesus (II Tim. 1:1)

Ogen : I Korinti 1:1-9 (Tunggal)

Khotbah : Jesaya 49: 1-7 (Responsoria)

Tema : Kita Ipilih Jadi Terang Man Bangsa-bangsa.

Khotbah

Setuju nge kita maka kalak Kristen sienggo nandai Dibata harus berbeda ras kalak sideban si lenga nandai Dibata? Kinatana genduari enterem enggo kalak si  ikataken Kristen, enggo nandai Dibata tapi labo ia nggeluh ibas ajaren Dibata e. Pengajaren kitab Jesaya sekali enda mindo hal lebih man banta. Adi siperdiateken ibas ay. 5 maka kepeken Jesaya ipilih Dibata guna maba bangsaNa mulih, tapi ternyata la bias adi e saja ngenca. Ibas ay. 6 ikataken maka bangsa e pe harus maba keselamaten man kerina bangsa i doni enda. Ibas ndahiken dahin e labo kepeken gampang-gampang saja, tapi jelas ikataken Jesaya ibas ay. 4 “enggo latih kuakap…” mawen ibas kita serayan e pe sigejabken ka bagi siikataken Jesaya. Tempa la siakap lit gunana kai sienggo idahiken kita. Ateta guna mpehuli ngawanta tapi kepeken ngawan e la nggit ipehuli. Siiyahken kebaktin, PJJ, PA-PA ras kegiaten sidebanna, banci ka nge lalap la ralo ibas kita ngajuk ia. Tempa-tempa enggo perlun kita rusur man bana, asangken ia nandangi gereja. Ma e nge si ihadapi kita tengah-tengah ngawanta? Tapi selaku serayan, ibas hal enda Dibata menuntut lebih man banta, asangken si deban.

Adi minggu enda kita ngerana soal terang, ugapa pe enggo semal nge siakap pembahasen e. enggo rusur nge sibegi maka kalak Kristen si tek man Kritus e harus maba terang. janah erkiteken rusurna sibegi kerna si e tempa-tempa anggap sepele kita, padahal ibas kinatana kurang denga nge sipraktekken kerna terang e.

Ibas sekitarta enda macam-macam nge sumber terang e, banci jadi Lilin, Lampu listrik, Obor/cubung bagepe matawari. Adi ngidah kerna sie termasuk kriteria terang si apai nge kita. Tentu terang si paling belin e pasti matawari, sada pe kita enda adi ikataken enggo ngasup maba terang bagi matawari pasti bangga kel kita. Hanya saja perpulungen kekelengen Tuhan, labo ka pas kel adi ateta jadi terang matawari e lalap. Mari cuba sirenungken adi ibas rumahta, si berukuren standard ersinalsal je terang bagi Matawari kai akibatna? Tentuna si tading ibas rumah e pasti ngisah kel akapna sebab terlalu melas kel terang e untuk ukuran rumah standard. Adi sanga ciger idarat rumah, terang ka wari, labo mungkin sisagani lilin, kataken kalak kari kita enggo man pekenan, erkiteken kai? Lit terang Matawari si lebih ersinalsal asangken Lilin ndai.

Kai ertina enda perpulungen Tuhan? Kepeken ibas kinata kegeluhenta enda terbeluh ka nge kita nempatken dirinta ibas sada situasi gelah jadi terang. Tentuna terang e ikataken kita terang adi ia reh ibas kegelapen. Bagekalah praktekna man banta manusia, ibas situasi ntah perbahanen si salah min kita ncidahken kebenaren, gelah memang tuhu-tuhu teridah kebenaren e. hanya saja lit ka manusia e kebenarenna ngenca iakapna enggo benar, la iperhadapkenna nandangi kebenaren si tuhu-tuhu ndai. Piah dungna kebenarenna e iibaratken kita bagi terang obor. Uga kin obor e? payo tuhu terang ibahanna tapi kedungenna mbiring ka nge igungta ibahanna. Erkiteken labo ia sumber utama terang e. emaka mari ibas bahan renungenta enda, cuba sisiksiki, terang siapai nge siicidahken kita rusur ibas kegeluhenta?

Surat Paulus man perpulungen Korinti mpertegas man banta maka maba terang e pe berarti kita maba kemalemen ate man kalak si deban, ernanam min tuhu-tuhu e man sekelewetta. Sekali jadi lit sekalak dilaki, ia selaku mantan serayan. Ibas akhir masa jabatenna ikatakenna “Enggo salang kel kuakap” engkai? “uelah, gundari lanai bo perlu aku lampas kel ku gereja, lanai bo perlu aku rusur kel PJJ, lanai bo perlu rutin kel aku er-PA”. enggo iakapna tugasna adi lanai ia jadi sekalak serayan, lupa ia maka lit ka nge kewajiben selaku ngawan ibas gereja. Adi bage terang si lit ibas ia ndai bagi terang obor denga, kenca nggo dung tugasna nerangi itadingkenna mbiring bekasna man banta. Tapi lain ka ras sekalak ngawan perpulungen si memang setia ibas kinitekenna, tep-tep kebaktin minggu irekamna khotbah siibegina mulai dari awal seh pendungina, kenca dung sie iberekenna man temanna sada perpulungen si enggo jompo/lansia, lanai ngasup ku Gereja, iberekenna man perpulungen si sakit. Gelah temanna si la lawes ku gereja pe tetap banci megiken pengajaren ibas kata Dibata. Bage nge maka ernanam terangta ndai man kalak si deban, terangta ndai terakap kel iakap temanta.

Bagi lilin gia ngenca terangta e tapi adi ibas sada ruangen si memang gelap kel tenuna sangat berguna terang e. hanya saja adi siperdiateken adi sisagani sada lilin ibas ruangen si gelap tentu isamping lilin e lit ka nge bayangen lilin e sendiri, gelap warnana. Kai ertina si e perpulungen Tuhan? Kepeken adi siukur-ukuri ija lit ersinalsal terang, ibas si e lit ka nge kegelapen si lalap mengikuti. Tapi amin gia bagepe tetap kita harus berkomitmen ngataken si terang e benar dingen si gelap e salah.

Kita enda enggo ipilih Dibata jadi terang man sekelewetta man bangsa-bangsa nina tema-nta, emaka marilah selaku tinepa Dibata si segambar ras ia berlakulah kita bagi arusna biakta manusia gambaren Dibata. Ula kita bagi ciptaenna sideban, Dibata ciptakenna bebek guna meramaikan doni enda, tapi rusur kel kita membebek la turi-turin, Dibata itepana Beo alu sorana si khas tapi kita manusia rusur kel kita membeo la jelas. Adi bage denga pengkebetta labo mungkin banci sehat kinitekenta. Tubuh jasmani-nta enda gelah sehat ia tentu cukup asupen nutrisina, vitamin, sayuren, buah-buahen ras sidebanna. Emaka ibas kiniteken e pe gelah ngasup kita ncidahken terangta man sekelewetta mari si pan ka buah sibervitamin ku kinitekenta, buah kai e ? buah Salak. Sebab buah Salak e ertina eme Selalu BAik DaLam BertindAK.

Dibata simasu-masu kataNa, Amin.

9Pdt. Julia Elperida Br. Ginting
(0853-6175-3339)
GBKP Runggun Penen
Selamat melayani man banta kerina

Note : adi lit tambahen kerna bahan enda banci ka kita saling berdiskusi ibas Blog-ta enda.
Bujur..

NANDAI DIBATA MUAT BAGIN IBAS DAHINNA (BERTEOLOGIA : BELAJAR UNTUK MELAKUKAN)

BAHAN SERMON PEKAN PENATALAYANEN

BERNGI SI – I

Invocatio : Alu meseksek ipindokenna man kami gelah ibereken kesempaten man bana guna ikut muat bagin ibas nampati kalak Kristen si i Judea (II Korinti 8:4)

Ogen : Ul. 29:10-15

Khotbah : Mat. 28: 20 ; 2 Kor. 8:1-15

Tema : Nandai Dibata muat bagin ibas dahinNa (berteologia: belajar untuk melakukan)

Kata Penaruh

Berteologi situhuna labo pernah terlepas ibas percakapan public erkiteken teologi e berhubungen kel ras kegeluhen enda. Sanga kita ndatken permasalahen, pada akhirna teologi ibutuhken guna mereken jawaben. Teologi eme kunci guna ndatken jalan keluar ibas erbage-bage kemelut si terjadi i doni enda. Ibas konteks kehhidupen bergereja, pelayanen si idukung pemahamen teologi harus ndatken soroten tajam. Siakui memang maka pemahamen teologi-ta pemena kel reh ibas Kekristenen Barat nari, tapi uga kin penerapenna ibas gereja Lokalta, tentu iperluken pemahamen lebih mendalam kerna si e. Ula min sempat teologinta e bagi monza, import arah barat nari. Padahal inegrina sendiri lanai ipake, tapi i negrita keberadaenna isyukuri. Lit jelma si mensyukuri kain monza, hargana murah ras terjangkau masyarakat ekonomi lemah, mulai kin pakaian dalam seh ku pakaian Jas. Tapi lit ka si la nggit make pakaian monza enda, erkiteken mela ikataken la bermartabat, lalit erga diri.

Pemahamen Teks

Invocatio : 2 Kor. 8:4.

Perpulungen i Makedoni paksa e pe situhuna sangana ngenanami percuban, perbeben, tapi ibas keadaan sibage rupana pe tetap perpulungen e nggit mereken penampatna guna dahin pelayanen kalak Kristen i Judea. Paksa si e Kalak Kriten i Judea lalit ibas ia sumber dana sicukup guna ngelanjutken pelayanenna i Judea, seh maka kalak Kristen i daerah sideban ipindoken guna ndukung ia kerina.

Ogen : Ul. 29:10-15

Nats enda eme Bagin Pidato terakhir Musa i Deleng Moab. Ibas Bagin enda isingetken Musa man kerina bangsa Israel, amin kai gia jabatenna baik selaku tuan ntah pe budak, baik selaku pemimpin ntah pe pegawai, baik selaku dilaki ntah pe diberu. Kerina ia ngaloken tanggungjawab ibas perpadanen si enggo ibahan Dibata. Perpadanen e eme bangsa e jadi bangsa Dibata janah Dibata ngenca jadi Dibata ibas bangsa e. tentu ibas tanggungjawab siibereken man bangsa Israel guna njaga perpadanenna man Dibata harus ngikutken ketetapen Dibata ibas Torat/ 10 pedah Dibata sienggo ibereken man bangsa e. Perpadanen e enggo ipeseh pemena i Deleng Sinai nandangi angkaten pertama bangsa Israel tapi angkaten e erbahan pemberontaken man Dibata emaka perpadanen e iperbaharui man angkaten simbaru i Deleng Moab, guna jadi persiapenna ibas memasuki Taneh Kanaan. Adi bangsa e patuh nandangi kerina kata perpadanen e maka Dibata pasti masu-masu kegeluhenna tapi man ise si la patuh nandangi perpadanen e ndatken kutuk/ukumen ibas Dibata nari. Sada ngenca carana bangsa Israel banci tetap ringan i Kanaan eme patuh ibas perpadanenna man Dibata.

Mat. 28: 20 ; 2 Kor. 8:1-15

Nats sipemena eme mandat siibereken Jesus man kerina ajar-ajarNa gelah ajar-ajar nerusken pengajaren sibenar sienggo isuanken Jesus sanga Ia i doni enda denga. Alu bage berita kebenaren e banci seh man kerina manusia, janah pe labo terjeng man ajar-ajar saja tapi man kerina kalak sienggo megiken pengajaren e pe arusna ertugas ka mpeseh kerna pengajaren e man sidebanna. Ibas nerusken pengajaren Dibata tentu lit melala tantangen ras hambaten emaka ipadanken Jesus maka Ia tetap ras kita seh ku kedungen zaman.

Nats sipeduaken eme persinget siibereken Paulus man Perpulugen i Korintus gelah nggit nampati dahin pelayanen i Judea. Kalak Korintus memang tipe jelmana susah untuk berbagi. Ibas 1 Korinti 11: 22, salah sada keadaan ija perpulungen Korinti si maba melala pangan merudu kel ia mangani panganna, seh maka lit ka perpulungen sideban enggo lumben bage pe lit ka si mabuk erkiteken besurna. Emaka ibas suratna enda Paulus memperhadapken Perpulungen i Korinti ras Perpulugen i Makedoni, sangat berbanding terbalik kel keadaan 2 perpulungen enda. Teladan Jesus cukup mereken asas: si kaya wajib menolong si miskin. Jesus e bayak, ndatken bagin kemuliaan BapaNa, jadi musil (manusia), nadingken Surga, guna mate i kayu persilang. Ipersingeti Paulus ka mulihi peristiwa i padang gurun nandangi bangsa Israel, eme kerna penimbunen pangan. Penimbunen e la menguntungken, tapi kesederhanaan terbukti mencukupi.

Aplikasi

Tangkas tuhu perkuah ate Tuhan man anak-anakNa. Kita me gundari anak-anakNa e si idilona guna muat bagin ibas dahinNa. Padan Dibata siisehkenNa man bangsa Israel gundari enggo seh man banta. Tentu adi ateta tetap lit iteruh pasu-pasu Dibata harus sijemak perpadanenta ras Ia selaku bangsaNa/anakNa. Bagi perpulungen i makedoni si mindo alu meseksek gelah ibere kesempaten man bana guna ikut muat bagin ibas nampati pelayanen i Judea, bageka lah searusna erburak-burak semangatta ngelakoken dahin Dibata e. arus ibas kiniriahen ukur labo ibas jungut-jungut. Dahin Dibata siiampeken man banta e labo sitik, emaka labo banci sindahiken dahin e sekalak saja. Tapi kerina kalak si tek ras nandai Dibata arus muat bagin ibas ndahiken dahin e.

Pdt. Julia Elperida Br. Ginting

(0853-6175-3339)

GBKP Runggun Penen

Selamat melayani man banta kerina

Note : adi lit tambahen kerna bahan enda banci ka kita saling berdiskusi ibas Blog-ta enda.

Bujur..