Pujilah Tuhan, Mbelin KuasaNa

Khotbah Minggu 01 Februari 2015

(Septuagesima)

Introitus            : Janah erkiteken Kesah Si Badia tangkas maka Ia anak Dibata sierkuasa. Enda teridah arah kekekenNa ibas simate nari. (Roma 1:4)

Ogen                : Mazmur 111:1-10

Khotbah           : Markus 1:21-28

Adi ngerana kita kerna uga kin mbelinna kuasa Dibata e, mungkin labo terbelasken kita kerinana. Erkiteken banci saja kari kai la terbelasken kita e pe naksiken kuasa Dibata. tapi perbahan mungkin biasa-biasa saja, jadi iakap kita e la encidahken kuasa Dibata si mbelin e. Tupung Jesus i doni enda, selaku anak Dibata ia enggo encidahken perbahanen-perbahanen simejin. Kerina hal siilakokenNa dem alu kuasa, mpepalem kalak sakit, mere man 5000 kalak, mpeteneng badai i tengah lawit, sipentang banNa erpengidah, sipangpangen banci erdalan, janah pe labo terjeng mujizat sibage saja teridah kuasa Jesus e, tapi pe arah pengajarenNa.

Pustaka si badianta ncatat maka Jesus ngajar alu kuasa. Adi ibas teks enda Jesus ngajar i kapernamun, eme kuta kemulihen Petrus ras Andreas. Kapernaum enda bali ras kuta-kuta kalak Jahudi sideban, eme lit ingan beribadah kalak Jahudi siigelari “Sinagoge”. Ibas sinagoge enda me ingan ertoto kalak e ras pe ingan erljajar kerna Undang-undang torat. Ibas Sinagoge enda lit sada kebiasaan eme ngundang guru-guru tamu guna nehken pengajaren. Adi bagi kita mungkin e bali ras minggu ke-3 kita pertukaren mimbar se-Klasis. Kebiasaan sibage me siipake Jesus jadi sada kesempaten man bana guna erkhotbah i Sinagoge.

Ibas Jesus mereken pengajarenNa bermacam-macam respon kalak ije. Lit simemang takjub ibas megiken pengajarenNa tapi lit ka si la senang/kesal ngenen Jesus, erkiteken Jesus e ianggap saingen enda biasana kalangen guru-guru Jahudi. Janah hal siluar biasa memang, sanga Jesus mereken pengajaren labo terjeng guru agama Jahudi simerasa terusik, tapi pe Setan-setan merasa terganggu arah kehadiren Jesus. Adi selama enda guru Jahudi simereken pelajaren, setan ndai lenga ia mbiar, tenang saja ia. La ia merasa terancam, labo mungkin banci ikernepkenna aku ‘tena, adi siibas ia pe temanku ka nge, kai pe siibelasina terjeng ibelasi saja nge. Tapi adi Jesus si mereken pengajaren, mis kel setan ndai merasa terusik, terganggu, merasa terancam ia. Emaka sekalak si kerasuken setan ndai ngatakenca ibas ayat 24. Padahal Jesus ndai entah lenga bo lit sura-suraNa ngusir setan, tapi perban setan ndai sendiri si reh ndahi Jesus, tentu e nggo jadi tugasNa guna mpepalem kalak siirasuki roh jahat ntah pe setan.

Mungkin perlu ka sisiksiki sesekali ibas kita erminggu e, terkhusus man banta serayan Tuhan, uga kin kita ibas nehken pengajaren ku perpulungen enda. Ntah mungkin sanga kita nehken kata Dibata e, justru setan-setan, roh-roh jahat tenang-tenang saja ia. La ia merasa terganggu arah kehadirenta. Padahal arusna ngir-giren setan e adi iidahna kita pulung megiken kata Dibata bagi sitersurat ibas Yakobus 2:19, erkiteken kai? Ibas kalak sitek pe lit kuasa guna mpelawes setan-setan (Yohanes 1:12). Tapi si e ula kari kita salah kaprah, perban ibere kuasa mpelawes setan-setan nina maka lawes ka kam kari ku ingan siangker-angker ipelawesndu atendu setan-setan ije, itu konyol namanya. Setan ndai pe banci heran iakapna, labo kap aku ngkusik manusia, tenang-tenang nge aku bas inganku e atena engkai maka ipelawesna aku. Bagi kitalah misalna tenang-tenang kita irumahta, ence la siarap reh kalak mpelawes kita padahal e ndai rumahta, me tentu merawa kita. Tapi adi misalna ndai medem kita, ence ernipi kita siiakap kita la wajar, piah tersengget nge kita muat medak e. adi bage mis lah dahi Tuhan, ertoto ras ngataken maka nipi e ndai la erkuasa mbiar-mbiari aku, adi bage ninta tentu setan e pe mbiar nge, perlu berpikir dua kali ia guna nggodai kita, “e.. anak e labo tercuba e ‘tena”.

Adi nggo bage jelasna ituriken pustaka sibadia uga mbelin kuasa Dibata e, tentu wajar nge selaku kita tinepaNa sipujilah ia. Ibas medak kita erpagi-pagi e, sitalangi labahta kataken man Tuhan maka ia Dibata simulia, siidah anak-anak itengah jabu minter kita ngerana bas pusuhta “tuhu kel erkuasa Dibata e, berekenNa bangku anak-anak si sehat”. Alu kalimat-kalimat sederhana bagenda pe nggo meriah kel iakap Dibatanta i surga megikenca. Bagi kai siisuratken pemazmur ndai, adi siperdiatekn ayat per ayat mulai kin ayat 1 seh 10, terjeng kalimat biasa-biasa saja nge e. tapi justru hal sibiasa e pe banci dengan terlupaken kita.

Adi bage perpulungen kekelengen Tuhan, adi enggo seh kata enda man banta maka marilah sibahan sada tekad ibas kita maka tep-tep kita melangkah ingetlah guna muji Dibata, janah pindo kuasa arah Ia gelah ngasup kita naluken setan-setan singusik kegeluhenta, bagi Jesus ndai tangkas ia anak Dibata perbahan lit kuasa ibas ia, maka ibas kuasa siibereken Dibata man banta e pe teridah tuhu-tuhu maka kita anak Dibata. Amin

Muliakenlah Tuhan Alu Kulandu

Minggu 18 Januari 2015

(Ephipanias III)

Invocatio       : O Senina-seninangku, nginget perkuah ate Dibata simbelin siisehkenNa man banta, kupindo man bandu: Endeskenlah kulandu man Dibata saja selaku persembahen singgeluh rikutken singena ateNa. Sabab bage me arusna kam ersembah man Dibata sue ras biakndu selaku makhluk sirukur (Roma 12:1)

Ogen             : I Samuel 3: 11-20 (Tunggal)

Khotbah        : I Korinti 6: 12-20 (Responsoria)

Kata Perlebe

Kenca ibangun ka mulihi kota Korintus oleh Yulius Kaisar. Kota e alu cepat berkembang jadi kota pelabuhen si ramai. Perbahan kota pelabuhen maka Korintus mbue nimpan bentuk-bentuk penyakit masyarakat. Salah sadana eme Pelacuren. Paulus ibas mbegi berita enda, aru atena. Emaka itulisken Paulus surat enda ku Korinti guna nanggapi kerna kondisi moral kalak i Kristen i Korintus. 

Isi

Paulus mpersingeti kerna kerina kalak Kristen eme Kristus empuna. Kula kerina manusia sienggo itebusna eme anggota kula ni Kristus. Alu bage, labo pantas adi kalak Kristen mereken kulana man percabulen. Bagi nina maka Kulanta e, eme rumah pertoton. Paulus pe mereken dalan keluar arah masalah e nari, eme ngikatken diri ku Dibata. arah teruh Nats renungen enda, Paulus nuriken kerna tujun nggeluh kalak sienggo itebus Dibata eme mpermuliaken gelar Tuhan.

Cara berpikir jemaat i Korintus enggo salah mengartiken kerna kebebasen, emaka ibas ayat 12-14 ituriken Paulus sebagai koreksi man jemaat guna mbenahi dirina. Ibukaken Paulus pola berpikir kalak enda, alu pemahamen-pemahamen siianggapna benar. “Bebas kap aku ngelakoken kai pe” payo memang selaku manusia hakikat-ta eme manusia bebas, tapi kebebasen e labo berarti banci kita ngelakoken kerina kai singena ateta. Kulanta/dirinta lanai kita empuna emaka labo banci ate-ateta saja ndalani kegeluhenta, kai pe siilakoken kita harus guna Tuhan sebab enggo jadi sikerajangenNa kap kita.

Paulus nuratkenca maka kulanta e, eme ringring Kristus. Maka labo banci ibuat ringring e guna pendahin si la mehuli. Kalak siersada kula ia ras diberu erlua-lua berarti enggo sada kula ia rassa. Bage ka pe adi sipersada dirinta ras Tuhan, maka kita pe enggo jadi sada ras Dibata secara pertendin. Alu mbandingken dua hal si e, ma ulin nge kalak sierkiniteken ersada ras Kristus asangken ersada ras dosa? Ersada ras Kristus simemang enggo njamini keselamaten kulanta asangken ersada ras Dosa sierbanca kita bene. Dibata-nta tentu la senang adi ngidah anak-anakNa terus ngelakoken dosa ibas kulana (dosa seks). Banci sibandingken ras diberu sierlua-lua ibas Joh.4:16-18, kenca ia ilepasken Jesus tuhu-tuhu meriah ukurna. Enterem kel manusia sierdalan ia sisada la ipimpin Kesah Si Badia tapi hasilna la mehuli bahkan mengecewakan.emaka madin nge siperembakken dirinta ras Dibata, alu bage arus sipersilahang ngelakoken hal si la mehuli.

Keselamaten siidahiken Dibata man gunanta tentu berhubungen ras uga caranta nggeluh sehari-hari. Kita sinentukenca pilihenta, jadi ringring Kristus ntah hamba percabulan. Ayat 19-20 ngatakenca maka kulanta enda eme rumah pertoton lanai rumah daging sidem alu sura-sura daging, tapi rumah Kesah Dibata si Badia. Sura-sura daging harus imateken gelah tuhu-tuhu Kesah si Badia me sitading ibas kita. Adi Dibata sijadi pemerintah ras tuanta maka hasilna pasti luar biasa. Enda ertina ngasup kita engkuasai diri ras makeken kulanta guna patuh man Dibata ras ngelakoken kerina sura-sura Dibata. Alu bage sipermuliaken Tuhan alu kulanta ras kesah.

Ogenta mabai kita guna ngeteh kerna ukumen man kalak si la patuh man perentah Dibata, ukumen man kalak si ngelakoken sura-surana saja labo sura-sura Dibata. bagi pengukumen man anak-anak Eli, janah pengukumen e labo entisik ngenca tapi seh rasa lalap (I Sam. 3:13). Anak-anak Eli sijahat cakapna man Dibata, ncidahken maka ia la makeken kulana guna kemuliaan Dibata. Bali nge e ras Dosa erlua-lua, ngelakoken si la mehuli pasti ndatken ukumen ibas Dibata nari.

Pengkenaina

Selaku manusia sienggo itebus Dibata arus maka kita nggeluh Badia. Pakeken kulanya enda guna ngelakoken kerina kai simehuli iakap Dibata. alu bage kita nggeluh ibas perentah ras rancangan Dibata. ulanai siatanken daging/kulanta gelah tersehi sura-sura dagingta tapi pakelah e guna mpermuliaken gelar Tuhan. Sebab kita enda enggo ikhususken Dibata jadi sikerajangenNa, maka kai pe siilakoken kita lakokenlah alu erkemalangen man Dibata (2 Kor. 7:1)

Oleh : Vic. Julia ELprida br. Ginting, S.Th

Minggu 11 Januari 2015 "KEKEKENLAH TERANGNDU NGGO REH"

Minggu, 11 Januari 2015 (Ephipanias II)

Invicatio          : Ngerana ka Jesus man kalak si enterem e nina “Aku kap terang doni. Ise ngikutken aku, ialokenna me terang si mereken kegeluhen, janah lanai ia erdalan ibas gelap” (Johanes 8:12)

Ogen                : Markus 1:4-11 (Responsoria)

Khotbah          :Jesaya 60:1-6 (Tunggal)

Tema               :”Kekekenlah, TerangNdu Nggo Reh”

Bagin Jesaya sijadi bahan renungenta enda eme bagin ibas trito Jesaya ntah pe jesaya sipeteluken. Trito Jesaya eme tulisen2 Jesaya siisina kerna pemulihan Jerusalem, pemulihan Israel. Emaka nina Jesaya “Kekekenlah”, enda ngataken kerna keadaan bangsa Israel silanai berpengharapan. Ibas keadaan bangsa Israel si lit i pembuangen, siakap memang wajar saja adi lanai ia erpengharapen. Tapi situhuna adi iinget bangsa Israel kerna kai siipadanken Dibata man bana, pasti keadaan sibage rupana labo banci erbahansa ia kote. “Terangndu nggo reh” enda situhuna labo ngatakensa maka selama enda terang e lalit ibabo bangsa Israel, terang e situhuna ras bangsa Israel nge lalap tapi kalak enda la nggejabken kerna kehadiren terang e. padahal ibas Jesaya 9:1, Jelas ikataken Dibata arah Jesaya “Negeri e labo lalap ibas kepiceten”.bahkan sangana bangsa Israel i padang gurun jelas ikataken Tuhan Dibata “Erpagi-pagi, iidahndu me terang sinalsal Tuhan”. Adi terjemahan bahasa Indonesia lebih jelas ikatakenna “Dan besok pagi kamu akan melihat kemuliaan Tuhan”. Enda mbuktikenca maka Dibata labo pernah nadingken bangsaNa, ibas keadaan sikugapana pe, kepiceten sikugapana pe, ibas kelsehen simberat pe, labo pernah tadingken Dibata bangsa e. tapi tetap ia nemani bangsa e labo pediatna bangsa e erdalan sisada. Emaka kerna nginget hal si e kerina, Jesaya ngatakenca “Kekekenlah”. Ulanai kote, ulanai la erpengharapen sebab situhuna terang Dibata enggo lit i babondu.

Arah ogenta iarahken kita nge-nen kubas peristiwa sanga Jesus iperidiken Johanes peridin. Jesus eme terang ndai, maka memang sanga Ia iperidiken rempet nusur kesah si Badia bagi nderapeti kubaboNa. Jesus me terang, ia kel ngenca banci erbahan kita lanai cidadap erdalan bas doni enda. Bagi mate lampu lah gia misalna ndarami lampu cadangenta pe sope lenga sidat pasti cidadap kel kita ku suki-suki rumahta e pe sidarami. Apai ka idarat pe nggo gelap, pasti labo lit cahaya sitik kel lah gia masuk ku rumahta. Lalit dalan sideban selain cidadap nari nge ndarami lampu ndai. e adi mate lampu, tapi adi geluhta, kegeluhenta sigelap e kuja kita ndarami lampu gelah ula kita cidadap ndai. pustaka Sibadia ngatakenca “Jesus kel ngenca Terang e”. adi ras Dibata lah tetap kita, bangsa-bangsa sideban pe reh ndahi kita (ay.3”…………….”)Jesaya 44:5 ngatakenca “Tupung sie, bangsa sideban ngatakenca nina ‘aku sikerajangen Tuhan’….ikatakenna maka ia pe bangsa Dibata”. arah ngidah cara nggeluh bangsa Israel bangsa-bangsa sideban banci ngakuken kerna kehadiren Tuhan. Kita gundari uga? Enggo kin arah kehadirenta banci nyaman kel temanta ndai rembak ras kita. Atau mungkin lit dengan rusur siban tembok-tembok, gep-gep diantara kita. Sekelompok ia merasa kel dirina siterhina kel, ia simusilna kel, labo ia atan adi ras kalak sideban. Lit ka sekelompok ia perbahan kai siidahikenna tempa-tempa ia bagi dewa, kai pe banci iaturina sesuai sura-surana. Bagi lagu siiciptaken Iwan Fals “Manusia setengah dewa”. Situhuna kelompok siapai pe e labo lit si benar. Kelompok simerasa dirina kelas bawah ndai pe labo payo. Rendah hati itu baik tapi labo rendah diri. Kita tinepa Dibata, enggo tamakenNa derajatta sitertinggi kel tapi sirendahken banta, ertina secara tidak langsung kita pe la ngergai kai sienggo ibereken Dibata man banta. Aturna ndai kalak simusil ntah pe bayak banci ipejumpaken ibas keleng ate Kristus. Seh maka ngasup kita ngatakenca “Aku bukan apa-apa tanpa saudaraku”, uga banci temanta sibas paksa kelsehen ndai alu ngidah ayonta banci turah semangat simbaru ibas ia. Termotivasi ia kembali guna bangkit arah kelsehenna. Lanai ia erugapana ndia, tapi tetap ukurna, lanai ia erbera-bera, lanai ia kote ndalani geluhna.

Me enda nge sijadi tema GBKP ibas tahun enda “Tahun Peningkaten Sosial, ekonomi ras budaya jemaat”. Uga kita ngaplikasiken tema GBKP e ibas geluhta. Alu ngidah kita banci temanta e ersemangatna ia, la ia erbera-bera ibas kinitekenna. Alu ngidah perbahanenta banci teman nta ndai ersemangatna ia erdahin, tambah uang masukna, tersehi peningkaten ekonomina, la gia berekenna man banta sen-na ndai, gelah cendol lah gia tukurna paksa tiga, me bage? Segelah bage lah gia pola pemikirenta tentu kai si lit ibas kita e labo sianggap sikerajangenta saja, tapi e pe sekerajangen senina-ku. Ibereken Dibata man bangku gelah aku jadi pasu-pasu man kalak sideban. Emakana ibas kita ndalani kegeluhenta enda, mari tetap kita saling menopang, saling mendukung rasp e saling melengkapi sada ras sidebanna, bage me maka jelas tuhu-tuhu teridah maka terang Dibata ndai nggo reh bas kegeluhenta.

Kita pe bangkit ndalani kegeluhenta, teman-teman isekelewetta pe ersemangatna ia ngidah kita. Alu bage semakin bangkit nge kinitekenta man Tuhan. Janah ibas ayat 5-6 nina “……………”. Terpuji gelar Tuhan, ipengasupna kita guna ndalanken kata Dibata enda. Amin

Khotbah Untuk Orang Meninggal

Khotbah kematian 08 Januari 2015

Nats       : Filipi 1:21

Kematen biasana bagi momok siakap man banta, enterem kel manusia I doni enda la nggit ngerana kerna kematen. Penungkunen sederhana engkai maka manusia menganggap kematen e hal si menakutkan, hal mengerikan? Biasa kerna lenga kita nggit mulahi kerina si lit I doni enda.  Banci e anak-anakta, ndehara/perbulangen, ntah pe hal-hal sidebanna. Engkai kin maka harus mbiar nadingken si e kerina? Tentu perbahan selama kita nggeluh I doni end ape ije nge terbelenggu pusuhta. Ku je rusur pemikirenta, kai si icariken kita e guna si e kerina.

Ø  Tapi nina Rasul Paulus man banta sendah arah suratna ku Filipi, Filipi 1:21 nina “Sabab kai kin ertina nggeluh! Man bangku nggeluh eme Kristus janah mate reh untungna”.

Rasul Paulus, ibas nulisken surat enda atena gelah kalak Kriste I belang-belang doni enda ulanai mbiar mate. Kegeluhenta I doni enda tuhu-tuhu kentisik kel ngenca. Siijanjiken Tuhan seh umurta 70 Tahun, enda entisik ngenca adi ibandingken ras dekahna pagi kita ngaloken kegeluhen sirasa lalap.

Kesadaren sibagenda rupana harus lit ibas pemikiren kalak Kristen, gelah kai? Gelah ula kita bene. Sada pe kita enda labo banci menghindar arah kematen, tapi ibas masana pagi pasti seh ka me waktu nta guna mbentasi kematen e. mungkin sendah kekelengenta enda si enggo leben ngadap ku Dibata, tapi ise metehsa mungkin piga-piga bulan nari, gilirenta menghadapi kematen ta sendiri.

Ibas hal si e, Tuhan Jesus sendiri enggo mpersingeti kita, gelah sipepulung min erta nta I sorga, alu bage lanai bo kita mbiar ngadapi kematen. Erta doni, kesenangen doni banci denga masap, tapi adi sipepulung erta nta I sorga, erta e labo banci bene tapi pasti tetap lit, seh kita pe kubas surge e. bage ikataken Tuhan Jesus “Sebab ija ertandu, ije pe ukurndu” (Matius 6:21).

Ø  Emaka gundari kekelengen Tuhan sierceda ate, ibas enggo leben ngadap kekelengenta enda man bapanta I sorga, memang merasa kehilangan kita, aru siakap, tapi ibas kerina perbahanenna nggeluh I doni enda, hal si mehuli endalah si usih, ntah pe mungkin lit si la mehuli, ulanai siinget-inget, tapi alemilah ia, janah totokenlah. Gelah ibas enggo dungna tugasna I doni enda, tetap iperhitungken Dibata kerina simehuli siilakokenna.

Ø  Ibas kita merasa kehilangan, mungkin ibas wari si pepagi banci saja tempa-tempa siakap lenga lawes kekelengenta enda, mungkin keluarga pe tersinget denga kerna kebiasan-kebiasan rutinna, tapi si enda kerina ula erbahansa tambah aru ate ndu. Tapi setiap iingetndu kekelengenta enda, ertotolah kam man DIbata gelah ipegegehiNa kam kerina keluarga ngaloken kelawesen kekelengenta enda.

Mambur pe iluhta sendah, tapi tetaplah inget ngataken bujur man Dibata. sebab enda me hal si mehulina si memang harus ibentasi kita selaku manusia tinepaNa. Arah kematen ngenca kita banci jumpa ras Dibata, ersada ras Ia I surge rumah Bapa.

Amin.