IJENDA AKU SURUHLAH AKU

Khotbah Minggu 31 Mei 2015

Invocatio      : “Kupilih kam ope denga kubereken man bandu kegeluhen. Ope denga kam tubuh enggo kuserapken kam jadi nabi man bangsa-bangsa” (Jeremia 1:5)

Ogen             : Ketangkasen 4:1-11 (Tunggal)

Khotbah       : Jesaya 6:1-8 (Tunggal)

Khotbah:

akap kami adi ngerana kita soal tema ta minggu enda, pasti enggo sangat familiar kel man banta, lanai asing kita megikensa kalimat e “Ijenda aku suruhlah aku”. Saja memang ibas praktek keseharianta, enda jarang denga sicidahken. La padah dauhsa kel sibahan contohna, ibas kita ngikuti perpulungen jabu-jabu pe, adi enggo seh paksanan nuriken penggejapen, ugapa pe sipulung e enggo tungkuk kerina, enggo sinik, mis macat. Jarang nge sijumpai ibas PJJ adi enggo ikataken protokol “Apai kita lebe sinuriken penggejapenna?” langsung mis lit singatakenca “iyak, aku lebe”. Enggo langka nge sijumpai jelma si bage. Enda nuriken penggejapen denga pe enggo mundur teratur kita apai ka guna mpeseh berita si meriah ku belang-belang doni? Mungkin rukur lebe kita sekian ratus kali. Adi bage dengalah pengkebetta sedekah enda, enggo nge ndia sicidahken “ijenda aku suruhlah aku” ninta man Tuhan? Tentu lang.

ibas invocati ta ndai jelas ikataken maka Jeremia enggo ipilih Tuhan, enggo ikhususken Dibata guna jadi nabiNa man bangsa-bangsa. Adi ibas pustaka sibadia lit 3 jenis pemanggilen, sipertama eme jeremia→ia ibas bertin nari enggo ipilih Dibata, sipeduaken Jesaya→enda me sijadi bahan khotbahta, Jesaya enda ia ipilih Dibata i rumah Pertoton, emaka sipeteluken eme Yehezkiel→ ia pilih Dibata ibas pendahinna. Arah sitelu tokoh enda rikut pe cara pemanggilen Dibata, kepeken ibas pelaksanaan pemanggilan e pe berbeda-beda ka ia. amin pe Jeremia enggo ipanggil Dibata mulai kin ia ibas bertin nari tapi labo berarti e ngatakensa maka Jeremia e lebihen asangken Jesaya ntah pe Yehezkiel si pemanggilenna la mulai ibas bertin nari. Bahkan Jeremia sendiri pernah ia ngalami putus asa seh maka sempat ikatakenna man Dibata, buatlah kesahku Tuhan nina. Kepeken la jadi jaminen mulai ndigan kin pemanggilen e seh man kalak si ipilih Tuhan, la e simenentuken kesuksesan pemanggilen Dibata e. tapi uga ibas kita nggejabken panggilen Dibata e, ngasup kita setia ndalanisa rikutken sura-sura Dibata.

Arah bahan ogenta kitab ketangkasen ndai, mungkin ntah bingung-bingung denga kita ntah kai gia maksudna, kai ndia hubungenna ras Jesaya. Pengenehenen siialami Johanes ibas kitab ketangkasen enda sungguh luar biasa, seh maka ilebuh Dibata si Johanes guna ngenehen uga situasi i surga. Janah memang makhluk-makhluk sinehen Johanes pe adi sibayangken tentuna menyeramkan nge situhuna. Bagi ay. 6 lit nina “ikelewet kursi kinirajan e lit empat makhluk, sidem matana arah lebe ras arah pudi.” Bicara kita ndai siisuruh Dibata ngidah keadaan si e ntah mungkin ngir-ngir nge perasaanta ije. La padah lebe i surga, bicara doni enda pe lit si jumpai manusia matana dem mulai kin arah lebe seh arah pudi. Pasti kiam nge kita, tembok si 4 meter pe sibiasana la terlompati kita, enda enggo terlompati perban biarna. Tapi Johanes ibas pemanggilenna e teridah memang tuhu-tuhu ije keyakinenna man Dibata, kinitekenna si setia man Dibata sierbahansa ia yakin maka kin memang kerina siicidahken Dibata man bana e labo guna pebiar-biar ia, tapi justru mpeteguhi kinitekenna.

Dibata sindilo Johanes e bali nge ras Dibata sindilo Jesaya ibas padan sindekah. Janah puji-pujinna pe bali “Badia, badia, badia! Tuhan simada kuasa Badia kap! Doni enda dem alu kemulianNa”. Ibas kitab Jesaya 6 :1-8 enda, sihubungken ka ku proses tata ibadahta, enda situhuna susunen ibadahta paksa enda. Ay. 3 enda nggambarken puji-pujin man Dibata, siikataken kita Votum ras salam. Ay. 5, pengakuen Jesaya kerna dirina jine eme pengakun dosa ibas liturginta. Ay. 7, ibersihken Malekat si Jesaya, eme Pengalemi Dosa man banta manusia. Janah ay. 8 pengungkunen Dibata man Johanes eme perpadanen ras Tekad ibas tata liturginta. Jadi memang labo asal-asalen isusun tata ibadahta enda tapi kerina e su e ras pustaka si badianta.

Respon Jesaya nandangi penungkunen Dibata e sungguh luar biasa “Aku, suruhlah aku” nina minter. Dibata nungkunsa “Ise ndia ku suruh?” labo ikataken Dibata “Nggit kam Kusuruh Jesaya?” tapi alu kinitekenna Jesaya menangkap maksud Dibata. “Aku enggo ilebe-lebeNdu Tuhan, aku saja suruh lanai padah daramiNdu sideban” bage me kira-kira ibas pemikiren Jesaya.

Pendilo Dibata e, labo man deba-deba jelma saja, tapi pendilo e situhuna enggo itujuken man kerina manusia. Emaka tugas ta gundari eme uga ndalanken pendilo Dibata e ibas kerina dampar kegeluhenta, ibas buena tantangen, perbeben ras persoalen si nderpa kita tapi uga kita banci tetap fokus guna ndalanken pendilo Dibata e.

Jemaat GBKP ibas sada penelitian lit 3 ciri-cirina kerna responna ibas ngikuti pendilo Dibata e. (1) Pathos→ jemaat si man endik-endiken lalap, tapi bage pe la ia nggit ndalankenca, la nampati tapi mandangi, protes sijagona tapi la ia banci mereken contoh guna mpehulisa janah ia pe labo ka terikut-ikut janah 70% bage me jemaatta, (2) Simpathos→ jemaat si man ingetenken, PJJ ningen harus isingetken, adi isingetken PJJ banci ia reh tapi adi la singetken labo ia reh, nuriken penggejapen pe bage, suruh lebe, sebutken gelarna emaka nggit ia nuriken penggejapenna janah enda 20% buena. (3) Empathos→ enda tipe jemaat sinungkun ia, lanai man suruhen, tapi enggo ia sendiri nungkun ku gereja kai sibanci kusampati. Janah enda 10% ngenca.

Adi ibas 3 kelompok enda. Arah siapai nge kita e? kitalah njawabsa ibas pusuhta masing-masing. Tapi situhuna adi sitandailah ise kita ras ise Dibata pasti pendalanken kita pendilo Dibata e pe reh payona ibas kegeluhenta. Dibata simasu-masu katana Amin.

LA ERNDOBAHEN IADEPEN DIBATA

Khotbah Minggu 10 Mei 2015

Invocatio          : Tutuslah ibas ertoto, janah sanga kam ertoto ersikaplah dingen katakenlah bujur man Dibata (Kolose 4:2)

Ogen                : Masmur 22:25-31 (Anthiponal)

Khotbah           : Perb. 10:44-48

Tema               : “La Erndobahen Iadepen Dibata”

Khotbah

Surat perbahanen rasul-rasul enda itujuken penulis man sekalak sitergelar Teofilus. Buktina kerna sienda banci sinehen ibas pasal 1:1, nina penulis ije “Teofilus si ihamati”. Surat-surat resmi jaman genduari pe biasa nge make kalimat e. Man si nihamati kami runggun gereja .... memang adi ibas zaman genduari enda kern surat menyurat hanya terjeng soal kelembagaan saja, anak perana singuda-nguda zaman genduari pe lanai bo pake surat-surat ia. zaman gundari enggo canggih jarak antar benua pe kita tinggal tekan nomor (tit tit tit tutt...tuttt...) “halo sayang” mis kita banci langsung ngerana. tapi amin pe ibas zaman rasul-rasul arah nulis surat enca banci mpeseh berita labo e erbahanca surut keiinginen rasul ibas mberitaken berita simeriah. Seh maka kerina hal-hal simenyangkut kesaksin kalak sierkiniteken ituliskenna kerina gelah teman-temanna rekan sekerja Dibata pe ikut meteh kerna enggo ertambah-tambah jumlah kalak sierkiniteken. Ibas ertambah-tambahna jumlah kalak sierkiniteken e kepeken ije ka pe teridah maka situhuna Dibata e labo erdahin ibas kalak Jahudi saja tapi pe ibas kalak si labo Jahudi.

Berita e me siipeseh man bana ibas nats khotbahta minggu enda. Berita e la man kalak Jahudi saja tapi man kalak si labo Jahudi pe. Seh maka kita pe kalak karo banci mbegiken berita keselamaten e, janah Dibata pe lit erdahin ibas kita, ibas kerina paksa kegeluhenta. Bage nge luar biasana Dibatanta, la ia milih-milih tapi ipeserina kita kerina. Mungkin iakap manusia kita jadi pandangan, lit lalap sikurangna ibas kita iakap kalak isekelewetta, tapi Dibata ngatakenca engkau berharga di mataKu.

Ilustrasi

Lit sekalak perbapan idahina kalak pentar (orang bijak), isungkunina guru e erkiteken termamang-mamang ia ngidah penampilen kalak pentar e, tahun 2015 tentuna sangat bergaya aturna penampilenta tapi kalak pentar e ndai biasa saja peruisna, sangat sederhana ala kadarnya. Emaka cirem-cirem sitik guru ndai, jenari ilepaskenna sada cincin arah jarina nari, kenca bage nina man sekalak perbapan e ndai “kerina pertanyaan ndu pasti kujawab tapi babandu lebe cincin ku e ku tiga, jenari dayakenlah alu erga sada juta”nina. Iidah perbapan ndai cincin e, lanai mengkilap pe cincin e atena ibas ukurna, seh kel kumuhna pe cincin na deh. Emaka seh ia tiga tawarkenna me cincin e man perdaya bakso, perbinaga gadung, seh ku perbinaga bumbu-bumbu dapur. Kerina kalak siitawarken cincin e ndai lalit si seh sada juta masang erga. Lit 100.000 lit ka 125.000. emaka balik me perbapan e ndahi kalak pentar ndai. “Uga kin kam e, cincin ndu e pe enggo seh kel mejinna, ise pe labo lit nukursa seh sada juta. 300.000 lah gia lako nggo hebat e” nina perbapan e jungut-jungut. Emaka cirem-cirem ka guru ndai enca bage nina ka ngerana “to, lawesken gundari ku tukang emas, ula bukandu erga. Begikenndu saja kai nina tukang emas e kari”. Emaka lawes ka me perbapan e ndai, kenca ilakokenna bagi siikataken kalak pentar ndai sengget me ia mbegiken keterangen tukang emas e. sebab kai? “kepeken berbeda kel pandangen tukang emas e seh maka langsung ipasangna erga seh empat juta lima ratus ribu.” Kenca ikatakenna kai siterjadi man kalak pentar ndai, nina kalak pentar e ngaloi ia “ena me ia jawapenna ibas kerina pertanyaan ndu ndai. labo banci kita menilai kalak sideban erkiteken uis siipakena. Tapi situhuna emas ras permata lit nge ibas diri tep-tep manusia, janah si e kerina la banci sinehen arah penampilen luarnya saja, omongan manis, tutur kata yang lembut ras sidebanna. Tapi harus sitandai sekalak jelma e sedalam-dalamnya”.

Bagelah penandai Jesus kerna kita kerina tinepaNa, la erndobahen ise pe iadepenNa. Sebab Dibata e ngidah kita seh kubas pusuh perukurenta. Bagi bahan khotbahta minggu enda pe kalak si la Jahudi pe banci ia ngaloken kesah si Badia, janah hal simenarik memang nina rasul Petrus “ula min lebe kalak enda mulih seh piga-piga wari” minggu turah penungkunen ibas kita. Engkai maka kalak si labo Jahudi e, la ia banci mis mulih seh piga-piga wari? Rikutken minggunta enda eme minggu Rogate siertina ertoto. Emaka memang tujunna gelah ibas piga-piga wari kalak si la Jahudi e mempersiapkan dirina ibas pertotonna sope lenga ia iperidiken. Alu bage jelas enggo buktina man banta, maka ise pe kita, amin pe iakap kalak sideban kita la atan tapi iadep-adepen Dibata tetap kita atan guna erlebuh man Bana, tetap kita atan ertoto man Bana. Seh maka banci siaminken bagi nina bahan ogenta ndai mazmur 22: 32 “Man silenga tubuh pe denggo ituriken maka Tuhan ngkelini bangsaNa”. Kita enda bangsa Dibata, siipilih Dibata sendiri jadi anak-anakna, emaka kai pe si ni perluken kita totokenlah man Bana pasti idengkehkenNa sebab ise pe kita labo erndobahen kita iadepen Dibata. Amin

GAIRAH CINTA YANG TERARAH

Nats     : Ende-Enden Salomo 7:10-13

Tema   : Gairah Cinta yang terarah

Khotbah

Lit sada buku tulisen Norman L Geisler siberjudul Etika Kristen, ibas bab 17 ibahasna kerna Perjabun ras Perceraian. Ibas buku e ikatakenna maka perjabun eme unit masyarakat yang paling hakiki ras paling berpengaruh i doni enda. Berarti banci labo ibas pengajaren Kristen saja maka perjabun e hal yang serius tapi secara global, doni enda pe ngakukenca maka perjabun e labo main-main. Tapi perjabun e ikaten seumur hidup. Adi ikataken seumur hidup, segedang geluh berarti lit hal-hal simemang harus ijaga ibas ikaten perjabun e, sebab labo mungkin Dibata netapken ikaten seumur adi lalit rencana guna njagai hal si seh kel pentingna man manusia. Kai e? tentuna kerna kebadian.

Perjabun e, eme antara sekalak dilaki ras sekalak diberu (Kej. 2:24) “dilaki e lawes nadingken nande bapana emaka ersada ia ras ndeharana”. Perjabun secara Alkitabiah ras pe perjabun Kristen, perjabun si iakui GBKP eme ersadana sekalak dilaki ras sekalak diberu, la lebih. La banci dilaki ras dilaki, labo ka banci diberu ras diberu. Adi sempat terjadi si e, gelarna labo perjabun Alkitabiah. Labo terjeng ibas si e saja tapi ersadana sekalak dilaki ras diberu epe enggo termasuk ersadana ia secara biologis. Emaka terpenuhi kita me perentah Dibata ibas Kej 1:28 “Beranak-cuculah dan bertambah banyaklah”. Tapi ibas persatuan secara biologis e pe Dibata mereken pertenget man kalak si la erkemalangen man Dibata. ibas Heber 13:4 nina “Kerinalah kam ngergaken perjabun. Kegeluhen perbulangen ras ndehara ibas perjabun la banci melket. Dibata pagi ngukumsa kalak si erlagu la mehuli bage pe sierlua-lua”. Tapi ersada sekalak dilaki ras sekalak diberu ibas iketen perjabun simelibatkan Dibata erbahanca persadan secara biologis pe imurniken Dibata.

Alu kata sideban ka banci sikataken maka situhuna perjabun e labo saja menyangkut hal-hak secara biologis tapi perjabun e pe mpengasup manusia guna jagai kebadiaan geluhna. Arah bahan renungenta enda ibas ayat 10 nina “....”kata sura-surana, e menunjukkan rasa ingin memiliki, ncidahken maka e kin situhuna impienna. Janah impian e, sura-sura e labo ibas sada pihak saja tapi siimpiken ndai pe gejabkenna maka ia pe empuna impalna, kekasihnya adi ibas bahasa indonesia. “Impalku kap siempuna aku” enda labo ngatakenca kerna kesiapan untuk dimiliki tapi enda encidahken hubungen eksklusivisme siterjadi eme kerna kecocoken ras kedekaten. Alu kecocoken siterbangun ijenda maka enggo pas iakapna maka pemuda e nge siempuna aku.

Adi kusungkun kam gundari kekelengen kami “Enggo kin pernah igejabkenndu entah pe iakuken ndu maka enda ndia teman geluhku si pasna man bangku” janah erkiteken litna kecococken antara kam duana seh maka lit kebulaten ukur guna membina mahligai rumah tangga. Jadi motivasi ibas erjabu e memang enggo teng-teng kari ia, lanai isalah artikan. Motivasi si salah selama enda biasana adi diberu gelah enggo lit kari sincariken nakanna, adi dilaki gelah enggo lit si nuci uisna. Guna kepuasen pribadi saja. tapi ibas renungen persikapen enda alu tema Gairah cinta yang terarah maka bagi raja Salomo ras ndeharana endalah kam kari duana saling melemparkan pujian. Seh maka erberngi i juma pe terasa bagi erberngi i hotel berbintang. Berarti enda me situhuna ipicu kekuatan gairah cinta yang sangat dalam ndai.

Adi Raja Salomo ibas ay. 12 enggo isikapkenna jaminan hidup man ndeharana “...”. enda nurikenca maka keleng ate e labo terjeng cakap saja. adi bage man bandu calon penganten sidilaki ma enggo nge sikap jaminan hidup man calon ndehara ndu e ibahan ndu? Lenga gia erbuah, lenga gia banci rani gelah enggo isuanlah gia lebe. Me bage?

Bagenda nge bahan renungenta ibas berngi persikapen pemasu-masun enda, eme guna mpersingeti maka kekelengen ndu e tepat lah ban sasarenna, terarah ia. man ise? Tentuna man teman geluh si enggo ipilihndu. Gelah alu bage ibas mbengketi perjabun ndu e pe pagi tuhu-tuhu bagi lit kayu simerim itamakenndu deher pintu ndu, merim kel ibahanna seh maka kalak si enterem pe senang ia tiap ngidah kam duana. Amin.