Bahan Khotbah Minggu 19 Maret 2017
Invocatio :
“Bagi belkih mejehe nandangi lau maler si malem, bage me tedehna ateku Kam o
Dibata” (Mzm. 42:2)
Ogen :
Keluaren 17:1-7 (Tunggal)
Khotbah :
Joh. 4:5-26 (Responsoria)
Tema :
“Jesus Me Ulu Lau Kegeluhen”
Khotbah
Adi ngerana kita soal
kegeluhen, situhuna melala aspek sibanci icakapken kita. Mulai dari tubuh seh
kari ku ujung kegeluhenta e. Banci kita ngerana kerna uga kin anak-anak, uga
masa-masa remaja, dewasa, pencarian jodoh, ndarami pendahin, uga kita
bersosialisasi ras kalak si deban. Banci gedang kal situriken kerna sienda.
Sada pepatah kegeluhen
ngajarken man banta “sada batang pohon banci mengahsilken jutaen batang korek
api, tapi sada batang korek api banci itutungna ka jutaen pohon.” Ertina maka
kepeken sada perbahanen si salah banci encedaken kerina perbahanenta si mehuli.
La padah ndauh siandingken, yakin aku ngatakenca maka serayan Tuhan ibas
runggunta enda pasti enggo ngelakoken dahin pelayanenna, soal enggo maksimal
ntah lang sienda labo aku erbahan ukurenna. Ibahan serayan Tuhan e enggo
ngelakoken tugasna enda tentu hal simehuli, sekali jadi banci saja sekalak
Pt/Dk sangana ia maba mobilna iserempet kalak, erkiteken e naik emosina, merawa
ia, isergangna kalak singerempet ia ndai. Tanpa isedarina maka kepeken lit
perpulungenna ngidah kejadin si e. Banci saja ibas perpulungen si ngidah e
turah ibas pikirenna “bagah kin sekalak serayan? Ikhotbahkenna rusur kerna
kekelengen, kekelengen e saber. Tapi kepeken singerana e pe la ia saber”. Gara-gara
kejadin e banci jadi kerina perbahanen si mehuli serayan ndai lanai iinget,
tapi justru hal negatif kerna ia si iinget kalak, ia kalak si la persabar,
murah merawa.
Adi korek api e lit
takalna, tapi lalit otakna emaka kenca igesekken mis ia gara. Sementara kita
manusia lit takalta janah lit ka pikirenta ibereken Dibata, emaka arusna kai pe
siilakoken kita banci min siukuri lebe. La murah kita terpancing, la murah kita
mis merawa, la murah kita mis gara. Bayangken min perik singgeluh denga
panganina ulat, tapi kenca mate perik e justru ulat mangani perik. Enda ngatakenca
man banta maka kegeluhen enda bagi roda si terus berputar. Labo lalap gelgel
geluhta enda. Emakana labo lit alasenta guna ngerendahken kalak sideban ibas
geluh enda.
Ibas zaman Tuhan Yesus,
labo lit terjalin hubungen si harmonis antara bangsa Jahudi ras bangsa Samaria.
Tapi Jesus ije justru menjalin hubungen komunikasi ras Diberu Samaria, labo
komunikasi simerendahken diberu e tapi justru Jesus (kalak Jahhudi) mindo
penampat man diberu e. Terbayangkenndu nge uga perasaan diberu samaria e. Kalak
jahudi nggit minta tolong man bana. Secara garis stratifikasi sosial tentu saja
diberu samaria e merasa terangkat martabatna. Kalak samaria siselama enda ia
nggeluh ikucilken, irendahken, ianggap kalak si hina, ianggap kalak perdosa,
tapi justru ia ipake Jesus guna maba berita ku sada kuta.
Melala tokoh-tokoh
terkenal i doni enda si selama geluhna ngenanami kiniseran, irendahken tapi justru
kalak sibage ipake Dibata alu luar biasa. Johann
Bach tokoh sisangat terkenal i dunia musik gerejawi, pada umur 9 tahun ia
enggo yatim piatu , padahal paksa sie sangana kal ia semangat belajar musik. Tapi
justru ia labo menyerah, bach berkemauan keras, ia ngoge buku alu mengandalken
sinar bulan simasuk ku jendela kamarna, la ia mekisat erdalan puluhen bahkan
ratusen kilometer guna megiken konser organ bas sada kuta. Janah sada hal
simenurutku erbahan bach enda jadi tokoh musik gerejawi, eme tep-tep ia muat
kertas kosong, leben ituliskenna J.J (Jesu Juva) siertina Yesus, Tolong saya. Kenca
enggo berhasil ia mengarang sada lagu, ibas akhir kertas e ituliskenna ka S.D.G
(Soli Deo Gloria) siertina kemulian bagi Allah. Sada nari komponis musik
gerejawi Beethoven, ia terserang
penyakit telinga. Terbayangkenndu nge sekalak penulis lagu terserang penyakit
telinga sierbahansa ia tuli. Uga banci ia memainken nada-nada lagu siibahanna,
uga banci ia megiken nada-nada siituliskenna e harmonis ntah lang. Tapi justru
seh ku ujung geluhna ia tetap berkarya, salah sada laguna lit ibas KEE no. 201.
Pernah nge sibayangken lagu sirusur iendaken kita e, justru karangen kalak
tuli? Pasti lang, tapi em ia luar
biasana Dibata e.
Sada hal siperlu
sicatat eme, Bach ras Beethoven banci ia sukses ibas kegeluhenna erkiteken ia
mereken dirina guna Tuhan.
Diberu samaria sijadi
bahan khotbahta enda pe situhuna diberu siluar biasa, la ia mela ngakuken
kelepakenna ilebe-lebe Jesus. Lang me banci saja kenca ikataken Jesus “To legi perbulangenndu ras kam ku jenda”
me banci saja aturna uekenna saja, adi e kin syaratna gelah datken lau
kegeluhen e. Banci saja suruhna ntah ise-ise je pura-pura jadi perbulangenna,
tapi la bage ibahanna. Ibas perjumpanna ras Jesus terjadi perubahan karakter
ibas ia. Diberu samaria e jujur man Jesus “lalit
perbulangenku”.
Perpulungen kekelengen Tuhan,
ija kita nggit erbahan pengakuan erkiteken dosa ras kelepakenta iadep-adepen
Dibata, ije ka me sidatken pemberitaan anugrah ras petunjuk hidup. Diberu
samaria e, kenca i-uekenna kerina siikataken Jesus kerna ia, ije me ia ndatken
pemberitaan anugrah, eme sitersurat ibas ay. 25 “kueteh maka Mesias.......”,
ibas ay. 26 ibereken Jesus petunjuk geluh man diberu samaria e, eme kerna Jesus
me anak manusia siikelini Dibata.
Jesus enggo encidahken
kekelengenna alu mpetandaken ise Ia situhuna man diberu samaria e. Tugasta selanjutna
genduari guna mpetandaken kekelengen Jesus e ku sekelewetta, labo terjeng man
kalak si sada suku, sada merga, sada agama saja. Tapi bagi Jesus menembus batas
kebudayaan ibas zamanNa, maka kita pe ula terbelenggu aturen doni enda guna
ncidahken kekelengen e. Alu bage me kita naksiken maka Jesus eme Ulu Lau Kegeluhen
situhu-tuhu si la erkeri-kerin. Amin.
