KEBAKTIN IBAS JABU

Bahan Sermon Perpulungen Jabu-Jabu 20-27 September 2015

Ogen   : Mazmur 78:5-8

Tujun   :

1)      Gelah ngawan ni perpulungen meteh pentingna ngelakoken kebaktin ibas Jabu

2)      Gelah ngawan ni perpulungen ngasup tetap ngerembakken Jabuna ku Dibata.

I. Perlebe

Sicakapken tema : Kebaktin ibas jabu, tentu harapenta gelah jabu e jadi jabu si erkiniteken ras ndatken kebahagiaan ibas kegeluhenna. Arah dasar Pustaka si Badia kerna jabu/ keluarga sidatken penjelasen uga pentingna jabu. Kebaktin ibas jabu e seh kel pentingna ilakoken segelah seisi jabu tetap ersada ras nggeluh ersembah man Tuhan. Melala faktor sierbahanca jabu la berbahagia, tapi faktor si mendasar e me erkiteken jabu e la erkiniteken (tidak beriman).

Gerald R. Mc Dermott ibas bukuna “Mengenali 12 tanda kerohanian sejati”, menekanken pentingna kerina isi jabu gelah ndatken kebahagiaan ibas jabu e. kerina seisi jabu e ersembah ras mbiar man Dibata erbahanca lemah lembut pusuh peratenna, sierbahanca kai pe persoalen ibas jabu e ngasup ras-ras guna ngatasisa ras kegeluhen ibas jabu e la egois. Guna banci tercapai pusuh peraten si lemah lembut eme ikuasai Kesah si Badia tetap jabu e erkiteken ngelakoken kebaktin ibas Jabu/keluarga.

II. Isi/ Tafsiren

Mazmur 78 enda secara utuh ay. 1-72; ende-enden si Asaf, isina pengajaren sejarah kegeluhen umat Israel ras Dibata. ope nats enda ay. 4 isingetken, pentingna nuriken man anak-anak terus ku kesusuren berikutna pe gelah tetap muji gelar Tuhan si dem kuasa (Perbahanen-perbahanen Tuhan si mejin/ajaib) nampati kegeluhen umatNa.

Ay. 5-6; isingetken mulihi gelah ersundut-sundut, la erpeltep-peltep nuriken perbahanen Tuhan ngkelengi umatNa. Isi pemgajaren e me pedah ras perentah Dibata. ibas paksa Israel nggeluh ibas PL, pedah Dibata eme hukum Torat, adi genduari kerina isi Pustaka si Badia. Perentah Dibata eme kai si arus iikutken manusia kerna perentah Dibata ras larangen Tuhan si la banci ilanggar manusia. Ngajarkenca eme tanggungjawab kalak si dewasa (orangtua) man anak-anak. Wadah ngajarken e efektif kel ibas kebaktin keluarga.

Ay. 7-8; adi lalap ituriken ras iajarken pengajaren Dibata ras kuasa Dibata nampati umatNa maka kesusuren e (anak-anak, generasinta) jadina :

ü  Dibata penalemenna; la ernalem man dibata-dibata/ilah-ilah si debanna.

ü  La ilupakenna perbahanen Dibata; arah dasa e pe anak-anak tetap engkahami orangtua.

ü  Lalap patuh man perentah-perentahNa; labo kita aru ate ijapa pe anak-anakta sebab arah dasar patuh man perentah Dibata, labo lakokenna si la payo.

ü  La jadi umat pemberontak: la patuh man Tuhan, la tetap kinitekenna man Tuhan, la erkemalangen man Tuhan.

Kepeken arah tetap ituriken ras iajarken kata Dibata erbahanca kesusuren (anak-anak) e, maka idalankenna perentah-perentah Dibata ras mehuli perukuren ras perbahanenna ibas kegeluhenna.

III. Aplikasi

·         Dage erbahanca kerina isi jabu terutama anak-aak la celus ibas kiniteken arah hebatna tantangen ibas kegeluhen paksa jaman si genduari enda mutlak arus silakoken kebaktin ibas jabu. Lit lah kesadaren ibas kita orangtua ngaturken waktu secara ras-ras guna erbahan kebakyin ibas jabu. Arah kebaktin ibas jabu enda terbina/bertumbuh keniteken seisi jabu si ulihna kebahagiaan ibas jabu. Kebahagiaan labo itentuken erta si lit ibas jabu, tapi arah kiniteken ras kesadaren ibas jabunta.

·         Adi enggolah sigejabken penting kel kebaktin ibas jabu maka lit pe tantangen ras hambaten pasti tetap siupayaken. Kurang pemetehta kerna ngangkai kata Dibata banci isampati arah erbage-bage renungen harian. Adi enggo kari sidat manfaat arah kebaktin ibas jabu, lanai kita malas ngelakokenca, jadi saling mengingetken ras enggo jadi ketedehen ate min ngelakoken kebaktin ibas jabu e.

·         Kebaktin ibas jabu erbahanca seisi jabu rembak ras Dibata, la nggeluh sekularisme (medoni), tapi nggeluh mpermuliaken Tuhan ras nggejabken kemalemen ate ibas Tuhan.

 Cal. Pdt. Julia Elperida Br. Gintingsuka

Melayani di Runggun GBKP Penen

TUMPAK TUMPAK SERAYAN TUHAN

SERMON KHOTBAH MINGGU 20 SEPTEMBER 2015

Invocatio      : “Petelukaliken nungkun Jesus man Simon Petrus nina, “O Simon, anak Johanes, keleng kin atendu Aku?” getem kel pusuh Simon sebab telu kali enggo Jesus nungkun man bana. “Keleng kin atendu Aku?” emaka erjabab Simon Petrus, “O Tuhan, kai pe ietehNdu kap, ietehNdu pe maka keleng ateku Kam!” nina Jesus man bana, “Permakanilah biri-biringKu”. (Johanes 21:17)

Ogen             : Johanes 21:15-19 (Tunggal)

Khotbah       : II Raja-Raja 4:8-13 (Tunggal)

I. Perlebe

Tantangna ibas suku Israel, Dibata milih serayanNa eme arah suku Lewi, eme salah sada suku siipilih Tuhan arah 12 suku Israel. Isikapken Dibata Lewi jadi serayan sierdahin i rumah pertoton dingen ngelai i tengah-tengah bangsaNa. Hal sipenting eme Dibata milih serayanNa guna dahin simbelin, simehuli itengah-tengah kegeluhen kalak sierkiniteken ibas nehken sura-sura Dibata.

II. Isi

a.       Johanes 21:15-19

Bahan ogenta nuriken percakapen Jesus ras Simon Petrus ope denga Jesus nangkih ku Surga. Paksa si e nungkun Jesus man Simon Petrus “O Simon anak Johanes, keleng kin ateNdu Aku asangken kalak enda?” mesek-sek Jesus nungkunsa, seh 3 kali iulihiNa penungkunen e. emaka erjabab Petrus “Keleng Tuhan, ietehNdu kap maka keleng ateku Kam”. Enda encidahken pengakun Petrus maka la lit si terbuni iadepen Dibata, ieteh Jesus pe seh kubas pusug Petrus si mabgesna kal.

Perlu sieteh maka ibas nuriken keleng ate lit 4 istilah siipake ibas bahasa Yunani, simemiliki erti siberbeda. Sipertama eme “agave” sinuriken kerna kekelengen si la ngarapken balas ras si labo idalanken ibas tujun balas jasa. Enda me ungkapen siipake guna nuduhken kekelengen Dibata kempak manusia. Sipeduaken eme “Filia” ertina eme kekelengen sierpalasken rasa kemanusiaan. Sipeteluken eme “storge” enda iumpamaken kekelengn orangtua nandangi anak-anakna. Kekelengen sdem alu rasa tanggung jawab dingen la ngarapken balas. Sipeempatken eme “eros” enda me kekelengen antara diberu ras dilaki, lit ije pengharapen ibas pengertin ‘saling entah pe radu’ sikelengen.

Jadi ibas percakapen antara Jesus ras Simon Petrus, adi terdauhen sigar-gari ibas bahasa aslina maka ungkapen kekelengen siipake Jesus ibas penungkunenna sipertama ras peduaken eme “Agave”, sementara Simon jababsa pake istilah “Filia ntah pe Phileo” emaka teridah la selaras dingen la sebanding erti kekelengen ibas percakapen e. seh maka petelukaliken Jesus nungkun make istilah “Phileo” maka ijabab Petrus ka make istilah “Phileo ntah Filia”, ije maka teridah keselarasen emaka ikataken Jesus “Permakanilah biri-biringKu”. Teridah Jelas ibas percakapen e maka Simon Petrus itandaina ise ia, maka labo ia ngasup engkelengi Jesus bagi keleng Agave. Alu jawaben Jesus ije sieteh maka sekalak serayan Tuhan singkelengi Jesus harus mpermakani biri-biriNa, enda me sijadi palas dahin siniampeken Tuhan man serayanNa.

b.      II Raja-raja 4:8-13

Sekalak diberu sibayak arih ras perbulangenna guna nikapken ingan tading man nabi Elisa ibas rumahna. Diberu e nehken kinihamaten nandangi Elisa ibas ia ngataken maka nabi eme kalak si Badia. Ibahanna sada kamar rikut ras ingan medem, meja, kursi bagepe lampu guna ipake Elisa. Kiniulin jabu e tuhu teridah ibas ia la ngarapken balas. Tupung nabi Elisa mereken sada tawaran si mbelin nandangi ia, guna tole mpejoreken ka geluhna, alu terang ikatakenna maka, “kerina keperlunku enggo cukup dat aku itengah-tengah bangsangku” (ay. 13). Alu pusuh si tulus me diberu e nampati dingen nikapken keperlun Elisa. Tapi adi sioge ayat-ayat berikutna, ituriken maka amin gia lalit kai pe siipindoken diberu e man Elisa guna balas jasa, tangkas kap man Elisa kerna ketedehen ate Diberu e, kinilakuhenna ibas jabuna. Emaka ikataken Elisa man diberu e maka ia dat anak Dilaki ibas tahun si reh (ay. 14-17).

Enda ngataken kekelengen alu la ngarapken balas, ieteh Dibata pe kai kekurangen, perbeben geluhna seh maka iberekenNa dingen erdahin pe Dibata bas geluhna guna encukupkensa. Enda me sada pengarapen ibas kalak si tutus erkiniteken dingen tuhu nggit mereken dirina guna mendukung dahin serayan Tuhan.

Arah bahan ogen ras Khotbah enda tangkas teridah hubungen kerna uga eratna hubungen antara serayan si iutus Tuhan ras perpulungenNa. Bahan ogen nuriken kerna uga tanggung jawab kalak sierleng ate man Tuhan eme alu nggit empermakani biri-biriNa. Erdahin i rumah pertoton dinge ngelai i tengah-tengah perpulunge Tuhan. Janah arah bahan khotbah teridah uga perbahanen si payo dingen nggit numpak-numpak serayan Tuhan arah sada contoh siibahan diberu ras perbulangen nandangi Elisa. Arah sienda banci siertiken maka dahin serayan Tuhan epe banci rehulina adi lit dukungen arah perpulungen nari. 

III. Pengkenaina

·         Serayan Tuhan eme kalak sierdahin bas ndahiken dahin Tuhan, guna kemuliaan Tuhan dingen nehken sura-sura Tuhan (dalam erti serayan TUhan labo erdahin guna kepentingen diri sendiri, guna kemuliaan ras kehagaan dirina, terlebih labo guna nehken sura-surana secara pribadi). Ibas sienda serayan Tuhan harus mampu jadi contoh teladan i tengah-tengah perpulungen bagepe masyarakat. Berusaha membekali diri guna mendukung pelayanenna, mbue erlajar dingen melatih disiplin jasmani ras Rohani, beluh nempatken kata dingen badia ibas perukuren, pengerana ras perbahanen. Ibas sienda tentu saja labo lit manusia singasup ndalankensa secara sempurna, tapi asa gegeh ras ukurta lit aka sidahikenlah dahinta selaku serayan Tuhan e alu pusuh si bersih.

·         Hubungen antara sesama serayan Tuhan harus tetap terjaga, saling mendukung ras saling menguatkan. Sebab enda me sijadi pergegeh ibas kita radu ras ndahiken dahinta. Serayan Tuhan sienggo mbue pengalamenna banci mpegegehi, ngarak-ngarak dingen mpetetap ukur serayan Tuhan simbaru dingen lenga mbue pengalamenna. Bas dampar sideban hubungen serayan Tuhan ras perpulungen pe harus nge tetp terjaga keharmonisenna. Sebab adi lit perselisihen anatar serayan Tuhan ras perpulungen e banci mabai maka perdalanen pelayanen e pincang janah banci la erdalan secara maksimal.

·         Serayan Tuhan harus megermet nandangi kai kebutuhen perpulungen dingen radu ras ibas nanggulangi dingen pehulikensa. Bagepe sebalikna perpulungen pe erdiate nandangi kebutuhen serayan Tuhan janah nggit pe ia mereken dirina ras gegehna asa ngasupna ibas ndukungsa.

·         Hal sipenting kel eme saling mendoakan antara serayan Tuhan ras pepulungen. Berusaha ngenehen hal postif antara sada ras sidebanna. umpama lit hal-hal si la bagi ukur terjadi antara serayan Tuhan ras perpulungen e, eme dalanna maka harus lit komunikasi si mehuli, gelah dat solusi guna pehulisa. Alu bage maka teridah uga serayan Tuhan ras perpulungen tetap ersada arih ibas kiniteken man Tuhan, si teridah buahna arah kegeluhenna si tep-tep wari.

·         Tema : Tumpak-tumpak serayan Tuhan, enda ngingetken man perpulungen maka penampat dukungen siisehken e labo ngenehen bue kitikna, tapi asa gegeh ras ukur lit radu ras numpak-numpaksa maka paguh, mehuli dingen jadi pasu-pasu me e man serayan Tuhan e bagepe man kerina perpulungen. 

Cal. Pdt. Julia elperida Br. Gintingsuka

Melayani di GBKP Runggun Penen

NGGELUH ERDAME

KHOTBAH MINGGU 13 SEPTEMBER 2015

Invocatio         : Tapi nina Esau, “Bas aku pe enggo bias agingku, la padah iberekenndu bangku” (Kejadin 33:9)

Ogen               : Kolose 1:18-22 (Responsoria)

Khotbah          : Kejadin 33:1-15 (Tunggal)

Khotbah

Dame pasti jadi sada impian kerina manusia. Ise kin jelma i doni enda si la nggit nggeluh alu dame. Tapi memang cara kerina manusia ndatken kedamen e pasti berbeda-beda. Lit jelma siberanggapen maka adi kerina isi jabuna patuh man bana, bage nge maka dame. Kalak si deban lit ka beranggapen, maka adi lalit utangna, e nge iakapna dame e. janah lit ka tipe jelma, adi lalit musuhna, lalit imbangna, lalit si rate segat man bana, ije nge nggeluh alu dame e.

Bahan perikopta sekalenda mulai kin arah invocati, ogen seh kubas khotbah enggo melala situhuna mereken referensi man banta, kai kin maknana nggeluh erdame e. bahan ogenta kitab kolose nuriken man banta kerna hubungen gereja (kalak sierkiniteken) ras Dibata. hubungen manusia ras Dibata sienggo ceda erkiteken dosa e nge sierbahansa la erdame antara Dibata ras manusia. Tapi kepeken Kristus sendiri, anak Dibata si tonggal e enggo jadi perdamen hubungenta manusia sierdosa ras Dibata. emaka Kristus me jadi takal kula Gereja. Kristus me ulu kegeluhen kulana e. adi ikataken kula tentu labo sada ngenca organ-organ tubuh ibas kula e, tapi pasti melala ras pe berbeda fungsi ras karakteristikna. Tapi adi Kristus si jadi takal kula e, maka keperbedaan fungsi ras karakteristik organ-organ tubuh e justru saling melengkapi ras pe saling membutuhken sada ras sidebanna. e me nggeluh erdame selaku kula ni Kristus.

Negaranta Indonesia mereken contoh si jelas kerna nggeluh erdame e, labo ibas perbahanen tapi arah sada semboyan negaranta. Bhineka tunggal ika,  siertina berbeda-beda tetapi satu juga. Kalimat semboyan e situhuna enggo ndekah lit, mulai kin zaman kerajaan Majapahit. Bhineka Tunggal Ika e labo bahasa indonesia tapi bahasa jawa kuno sitertulis ibas kitab kakawin. Kitab kakawin enda eme kitab sastra bagi Mazmur ntah pe Pengerana ibas Pustaka si Badianta. Janah kalimat enda itulisken sekalak sasrawan sitergelar Mpu Tantular. Semboyan e ituliskenna erkiteken paksa si e kerajaan Majapahit eme kerajaan sigalangna kel ibas zamanna, daerah kekuasaanna seh ku Malaysia ras Singapur. Emakana erkiteken penduduk kerajaan Majapahit enda bermacam-macam, janah pe banci ka ia bersatu padu demi kesejahteraan kerajaan Majapahit emaka semboyan Mpu Tantular e jadi terkenal. Negaranta Indonesia pe bage, ermacam-macam etnik budaya ras suku bage pe bahasa tapi searusna min kerina rakyat indonesia e banci bersatu padu guna kemajun negara Indonesia Raya tercinta enda.

Adi sihubungken ka enda kubahan khotbahta ibas Kejadin 33:1-15 enda, ije teridah uga usaha Jakub guna erdame ras abangna eme Esau. Ibahan Jakub cara uga gelah mekuah min ate Esau ngenehen ia, ulanai min rate segat Esau e man bana. Tapi amin gia ermacam-macam cara ibahanna tetap nge ia kebiaren. Adi sioge kari ayat-ayat sebelumna bindu 32:6-7, “Mbegi si e mbiar dingen gentar si Jakub”. Berarti me nggo jelas situhuna bukti nyata an banta, maka adi lit kesalahenta pasti labo banci lit kedamen e ibas kegeluhenta. Jakub sendiri enggo ialamina kerna si e. amin gia melala enggo ertana, anak-anakna bage pe ndeharana ikut kerina ras ia tapi lit dengan lalap kebiaren menghantui ia. padahal Esau ndai pe reh ndahi ia erkiteken rate tedeh nge ia nandangi agina, amin gia lit 400 kalak dilaki siikut ras ia, labo berarti atena engkernepken si Jakub justru nampati Jakub nge atena.

Minggu enda pe igelari minggu Perdamen, tentu arah minggu Perdamen enda lit sura-sura moderamenta gelah GBKP banci jadi pelopor perdamen ku sekelewetna. Lanai kita ertaktak soal nggeluh erdame. Adi ibarat belanja barang diskon kita ku matahari lit arah teruh tulisenna “Syarat dan ketentuan berlaku”, kita pe mawen-mawen bage denga, lit syarat-syaratna maka nggit kita erdame man kalak si lit isekelewetta. Tapi minggu enda iajuk kita gelah nggit bagi Jakub si jadi pelopor Perdamen ku Esau, kita pe jadi pelopor perdamen ibas kegeluhenta, man keluarganta, kade-kadenta, bage pe ibas negaranta enda. Tentuna rikut pe gegeh totonta man Kristus nge siiandalken kita, sebab Kristus ka si enggo mperdameken hubungennta ras Dibata.

Selamat jadi Pelopor Perdamen, Dibata simasu-masu kita kerina. Amin 

Cal. Pdt. Julia Elperida Br. Gintingsuka

Melayani di GBKP Runggun Penen

MAMRE SIERKINITEKEN

BAHAN SERMON KHOTBAH MINGGU 23 AGUSTUS 2015

Invocatio      : Tek Abraham man Tuhan, janah erkiteken kinitekenna e ialoken Tuhan ia selaku kalak benar (Kejadin 15:6)

Ogen             :Epesus 4:17-24 (Tunggal)

Khotbah       : Kejadin 15: 1-6 (Tunggal)

Kata Perlebe

Tuhu memang payo adi Abraham ijadiken sosok panuten/teladan nandangi kalak si erkiniteken man Dibata. adi siperdiateken uga Abraham tuhu-tuhu tek nandangi padan Dibata siipesehNa man bana. Amin gia mawen-mawen nggit kang ia nungkun ibas pusuhna kerna padan Dibata e sibakal njadiken ia jadi bangsa simbelin.

Pemahamen Teks

Secara garis keseluruhen ibas kitab padan sindekah ntah pe simbaru maka bangsa Dibata e harus berbeda ras kerina jelma/bangsa silit i doni enda. Rasul Paulus mereken gambaren man kalak Krisen silit i kota Efesus maka kalak si la tek man Dibata bali e ras domba si la ietehna kuja perdalinna, tapi kalak sitek man Dibata tentu Jesus jadi permakanna. Ay. 17 “Kukataken man bandu”, Rasul Paulus atena menegasken man Perpulungen si Efesus gelah ulanai ia kerina nggeluh bagi sigel-gel (bagi kalak si la erkiniteken). Ibas kota Efesus teremen ngen kalak si labo Jahudi ntah pe kalak si lanai Jahudi. Tapi ilebe-lebe Dibata lanai lit kalak si Jahudi ntah pe si la Jahudi, lanai lit perbedaan ilebe-lebe Dibata seakatan kinitekenna.

Tokoh siterkenal kel adi ngerana kita soal erkiniteken tentu, Bapa kalak si erkiniteken eme Abraham. Ibas teks khotbahta sekalenda Dibata meteh kerna kai siiukuri Abraham, emaka Dibata ngingetkensa man bana mulihken kerna padanNa, maka Dibata e la pernah lupa nandangi padan sienggo isehkenna man Abraham. Kata-kata “ola kam mbiar” jelas njelaskenca maka Abraham sangana mbiar. Mbiar erkiteken kai?

1.      Mbiar ia man Raja Kedorlaomer ras pe teman-temanna. Abraham edenga kel pang bersikap ras menang. Tapi kenca ia menang reh ka kebiaren man bana. Tapi nina Dibata “ola mbiar” enda ngatakenca maka Dibata nge simgampang-ngampangi Abraham. Arah sienda pe ngatakenca man banta maka sifat keberanian sekalak jelma e rehna arah Dibata nari, enda erkiteken pendahin Dibata. emaka ise pe ula min ia megombang erkiteken keberanian e labo reh arah dirinta sendiri tapi arah Dibata nari.

2.      Mbiar lalit keturunenna. Dibata pertama kel janjiken keturunen man Abraham ibas bindu 12, sanga umurna 75 tahun. Ibas kejadin 16:6 Abraham enggo berumur 86 tahun, emaka kemungkinen ibas bindu 15 enda, umur Abraham 85 tahun, entah pe sekitar 10 tahun kenca ibereken Dibata padanNa man bana. Lit dua hal sierbahansa ia ragu nandangi padan Dibata e, eme : (1) padan Dibata e tempa-tempa bertentangen ras fakta, erkiteken sara enggo reh tuana. (2) waktu sindekah sienggo 10 tahun tuhu-tuhu ujian simberat man kinitekenna.

Tapi ibas ay. 4-5, Dibata jelas ngatakensa labo Elieser tapi justru anak Abraham siipupusna sendiri. Bagi buena bintang-bintang, maka bage ka kari teremna sinursur Abraham e. respon Abraham lit ibas ay. 6, eme tek ia nandangi kai siikataken Dibata man bana, seh maka iperhitungken ia selaku kalak sibenar iadep-adepen Dibata.

Aplikasi

Arah bahan Khotbahta sekalenda lit piga-piga hal sibanci sipelajari:

ü  Dibata tuhu-tuhu meteh kai siterjadi man banta janah pe Dibata inganta guna ngampeken kerina sijadi kekhawatirenta. Dibata siap megken kita.

ü  Kinitekenta pasti teruji sanga kita mbandingkenca ras kai sijadi logika berpikir manusia. Adi siperhadapken gundari kita kubas kinita nggeluh tentu melala kel penungkunen-penungkunen kerna keleng ate Dibata, tapi justru kerina kiniseranta e, eme salah sada dalin guna kita ndatken keleng ate Dibata e. siperlu iinget kita eme, ula kita bagi bangsa Israel si lalap meraguken Dibata, tapi justru kita harus bagi Abraham si tek nandangi padan Dibata e

ü  Padan Dibata e pasti. Dibata labo pernah ingkar janji. Kerina bukti keleng ate Dibata e la banci sidapeti bagi membalikkan telapak tangan, tapi teklah maka Dibata tuhu-tuhu setia ibas nehken padanna man manusia. Bagi padan Dibata man Abraham, maka ia pasti jadi bangsa simbelin tentuna harus ngelewati proses yang panjang. Bage ka nge kita harus ngelewati proses si nggedang ka guna datken padan Dibata e man banta.

Bahan Sermon Perpulungen Jabu-Jabu 16-22 Agustus 2015

Nats     : Ulangen 6:10-15

Tema   : Ergakenlah Kemerdekaan

Pengantar

Kai sienggo iban kita ibas mengapresiasi kemerdekaan? Labo lit kalak nggit ijajah, tapi mbue ka kalak sibingung uga arusna ngergaken kemerdekaan. Mbue kalak erpengakap maka kemerdekaan berarti bebas erban kai pe tanpa mempertimbangken hal-hal si deban. Enda me sijadi ibas Indonesia kenca jaman reformasi. Kata saling pengertin ras toleransi reh dekahna reh benena. Menyuaraken Aspirasi labo salah, e hal setiap jelma. Tapi kemerdekaan tanpa rambu-rambu sijelas tentu berbahaya bahkan banci menghancurkan kemerdekaan atas nama kepentingen pribadi ntah golongen, tanpa aturen banci menimbulken masalah. Bayangken saja adi setiap kalak menganggap dirina sibenar janah kalak si la sepaham ras ia banci ihancurken, kai si jadi? Patut sisedari maka ibas ngergai kemerdekaan sisadari bahwa kerina silit enda ititipken Dibata man banta guna ijaga ras ipertanggungjawabken. Lit tugas siarus ilakoken. Bagi siisuratken Musa ibas Ulangen, man kalak Israel. Kai bentuk ras tanggung jawab siarus ibahan ibas ngergaken kemerdekaan e? enda me sijadi bahan oratenta sendah.

Kerna Teks ras Aplikasi

Bagi semalna kitab Ulangen berisiken kumpulen pidato ntah pe pedah Musa man kalak Israel gelah ersikap-sikap memasuki taneh Kanaan. Secara khusus ubas teks enda Musa ningetken alu tegas kerna hal siarus ipahami kalak Israel ibas ngiani taneh Kanaan. Teksta banci ibagi kubas 3 bagin eme:

·         Dibata simerancang ras mpesikap taneh Kanaan/ nggeluh ibas perpadanen (ay. 10-12)

Dibata ngenca simerancang ras mpesikap taneh Kanaan man kalak Israel. Ayat enda mpertegas bahwa ingan e pasti jadi man kalak Israel. Rumah, juma, peken anggur kalak Kanaan pasti man kalak Israel. Kai sijadi enda labo merupaken gegeh ntah usahana sendiri tapi pemere Dibata. adi ilupaken bangsa Israel kerna hal enda maka kai sienggo ialokenna e bene kerina. Sitetap perlu isadari bangsa Israel eme kap bahwa kerina e ibenaken ibas hubungen perjanjin, tapi ketaaten manusia simempertahanlen hubungen perjanjin e. adi taneh kemerdekaan e siumpamaken kemerdekaan, tentu kemerdekaan e Dibata simerancang ras mpesikapsa man banta. Janah e ibahan Dibata erkiteken lit hubungen perpadanen kita ras Dibata selaku kalak sitek man baNa. Tentu kesimpulen idatas pe berlaku man banta.

·         Kai siarus ibas gelah mejuah-juah ngianisa, nggeluh ije/ ranbu-rambu si man dalanen. (ay. 13-14)

Sehubungen ras si e Musa ngingetken 4 hal siarus iperdiatken ras arus ilakoken eme:(1)Mbiar man Dibata, (2) Ia sajalah ngenca sembah, (3) Erpadanlah ibas gelarna saja, (4) Ola nembah man dibata-dibata sideban.

Ke-4 hal siisingetken Musa enda menekanken kualitas hubungen sikuat antara kalak Israel ras Dibata. Musa la mempersoalken bentuk-bentuk kesuliten, tantangen, ancamen ntah gangguan sibakal terjadi adi enggo seh i taneh kanaan, tapi Musa menegasken maka kerina bentuk kesuliten ndai banci iatasi ibas kesadaren kerna hubungen simehuli ras Dibata. pemahamen enda turah sebagai bentuk kesadaren maka Dibata ngenca simada kegeluhen bage pe si nasa lit. sementara kuasa-kuasa simuncul mengatasnamaken Dibata ianggap sebage penyesat ntah penjajah. Ibas menyadari litna hubungen e, emaka tugas ras tanggung jawab siturah pasti tetap mengutamaken kepentingen bersama labo pribadi ntah kelompok. Alu bage tugas ras tanggungjawab ibas ngergaken kemerdekaan merupaken hal si la banci itawar-tawar nari. Ngergaken kemerdekaan berarti nggeluh erkemalangen man Tuhan sekaligus mpesikap geluhta bage pe lingkungen ras teman silit isekelewetta guna tetap mpermuliaken Dibata.

·         Ukumen sibakal reh dai la ngergaken pemere Dibata (ay. 15)

Musa ngingetken maka Dibata e percimberu tuhu-tuhu. Biak enda labo menunjukken sikap negative, tapi sebalikna menegasken maka Dibata ngergai sikap ras tindaken kalak situtus dingen patuh man baNa. Terkhusus man kalak Israel sienggo ngaloken taneh Kanaan adi kin la ipakeken ali mehuli maka pernembeh Tuhan pasti reh. Keadaan enda ncidahken bahwa tugas ras tanggungjawab e memiliki konsekuensi si berhubungen. Adi ilakoken pasti sikap jadina tapi adi la ilakoken pasti siap ibahanNa. 

Cal. Pdt. Julia Elperida Br. Gintingsuka

Melayani di GBKP Runggun Penen