Sabtu, 17 November 2018

ERSADA IBAS JABU

BAHAN SERMON KHOTBAH MINGGU 18 NOV 2018
Invocatio    : “Andiko ulina ras senangna adi kalak si ersenina ersada perarih” (Mzm. 133:1)
Ogen        : Lukas 2: 41-52
Khotbah    : Kejadin 49: 1-28
Tema        : “Ersada Ibas Jabu
  1. Kata Perlebe
Piga-piga bagian garis besar ibas bahan renungen minggu enda banci ibagi jadi dua bagin. Sipemena bersifat kata pengantar (1-2)ras sipeduaken isi pedah jakub man anak-anakna(3-28).  

  1. Eksposisi bahan Khotbah Kejadin 49:1-28
  1. Bagin sipemena : Pengantar
Ibas paksa si e, enggo ieteh Jakup maka ia enggo metua janah lanai dekahsa mate. Emaka ipepulungna kerina anak-anakna, ilebuhna guna pulung. Kenca si e iturikenna man anak-anakna kerna kai sibakal inanami anak-anakna e ibas wari si reh. Ipindokenna man anak-anakna gelah megiken alu tutus sebab enda memang pedahna siterakhir man anak-anakna. Ilebuh Jakup anakna sada persada, ergiliren ndahi ia ku kamarna guna megiken pemasu-masun, persinget ntah pe kutuk sibakal ipesehna. Kai siibelasken jakup enda eme Nubuaten kerna waktu si reh, kai siituriken Jakup enda pe sue ras piawai/karakter/sifat anakna masing-masing. Anak-anak Jakup pe meteh maka kai siipeseh bapana e Nubuat sipenting ras menentuken.
  1. Pedah jakup man anak-anakna
  1. Ruben : anakna sintua arah lea, arah kesulungenna saja tentuna enggo lit kelebihenna ibandingken seninana sideban, tapi hak kesulungenna ibereken man Jusuf, kehormatenna guna jadi sekalak imam pe iserahken man anak-anak Lewi, hakna guna jadi pemimpin suku-suku Israel iserahken man Juda. Alu bage lanai lit kesempaten Ruben guna jadi sekalak pemimpin/sekalak siberpengaruh erkiteken ketidakmantapen watakna. Dosa siilakokenna ras Bilha eme bukti kelemahen moral sibanci iertiken kehancuren, nafsu sila terkendali. Ibas bahasa ibrani igambarken bagi “Air terjun tak tertahankan yang jatuh ke dalam arus berbuih” (ay. 4). Amin pe lit sura-surana simehuli, maksudna simehuli tapi si e kerina labo banci ilakokenna seh tuntas.
  2. Simeon ras Lewi : Anak Lea sipeduaken ras sipeteluken. Dua siersenina enda meriah iakapna ngelakoken kekerasen. Jakup la banci ngelupaken perbahanen anakna sidua e nandangi kuta Sikhem. Arah si e icedahkenna watakna si kejam alu nyerang ras ngancurken kalak si tading i Sikhem arah strategi ras penipun. Pedah Jakup siperpudina man dua anakna e eme kutuk si tajam “Ateku ngkerapken ia ibelang-belang taneh Israel, ateku nirang-nirang ia itengah-tengah penduduk Israel”. Dua senina enda lalit hakna kerna taneh, tapi ia duana tersebar ibas wilayah seninana sideban. Ibas taneh Kanaan Kutuk enda tuhu-tuhu jadi, Simeon itelen Juda janah Lewi lalit tanehna tapi ia ikhususken guna ngelai ibas rumah pertoton ras jadi guru i Israel.
  3. Juda : Anakna Jakup sipeempatken arah Lea. Ia ndatken pujin pertama rah bapana nari. Juda me kalakna singelanjutken pengarapen Israel ibasa dirina jine. Amin gia lalit hak kesulungen ibas ia tapi tampil me ia jadi pemimpin sierkuasa sibakal ndatken pujin arah bangsana nari. Juda eme sinjemak tongkat kerajan singelambangken kekuasaan selaku sekalak pejuang, Raja ras Hakim. Bangsa-bangsa ijapa anri pe ndatken keriahen, keamanen ras pe terhormat adi Juda jadi pemimpin ras pelindungna. Negeri-negeri Juda pe dame, kelimpahen ras kemakmuren. Buah anggur ibas tanehna pe seh kel buena, lau anggurna melimpah. Mata Juda megara erkiteken anggur, labo ertina maka ia mabuk minem anggur tapi ilambangken me matana e “cemerlang dengan kemakmuran”. Ipenna mbentar erkiteken susu, nggambarken negeri Juda sindatken pasu-pasu.
  4. Sebulon : Anak Jakup sipeenemken arah Lea. Sebulon bakal itamaken ibas situasi ija kegiaten ras kemakmuren komersil banci idat. Nubuat Jakup enda banci jadi ngataken kerna wilayah si lit isepanjang pantai bakal jadi sekerajangen Sebulon. Ntah pe banci jadi ngataken kerna kemakmuren sibakal idatken kesusuren Sebulon erkiteken hubungenna sindeher ras kalak Fenesia yang memiliki akses tak terbatas ku jalur-jalur perdagangen.
  5. Isakar : Anak jakup sipelimaken arah Lea, igambarken bagi kalak si perkasa, bagi kelede singena atena ketenengen ras dame. Iibaratken me Sebulon bagi binatang sibiasa maba baban simberat, janah pe patuh ia maba baban e amin pe menyakitken tapi la ia mengeluh, gelah banci ia istirahat alu santai ras nyaman. Alu pedah sibage inubuatken Jakup me kesusuren Isakar tunduk man bangsa-bangsa i Kanaan sinyerang ras njajah ia. La ia ngelawan tapi sukarela ia tunduk jadi budak man bangsa sideban. Pangen iakapna ipermaluken ras iperbudak asangken ngelawan alu kinipangen.
  6. Dan : Anak Jakup sipemena arah Bilha, ia jadi pembela simegegeh arah bangsana. Ibelana kepentingen bangsana ras pe ilindungina, bage pe isampatina bangsana ibas perjuangen guna seh ku kemerdekaan. Kesusurenna kitik tapi isegani bangsa-bangsa sideban. Ikataken Jakup Dan bagi nipe “nãhãsh” eme labo nipe itengah dukut, tapi nipe si bisana pe seh kel berbahayana. Maksudna eme Dan bakal jadi musuh sipaling berbahaya nandangi lawanna.
  7. Gad : Anak Jakup sipemena arah Budak Lea sidiberu, Zilpa. Ieteh Jakup kerna semangat Gad ibas perang ras pe perpang. Arah pedahna inubuatken Jakup Gad merluken kerina kecerdiken, kinipangen ras kegigihenna ibas erperang sebab iganggu me ia rusur oleh suku-suku sideban ipadang gurun. Inubuatken Jakup maka Gad pasti menang ras ngasup mpelawes musuh-musuhna. Kenca tading i Kanaan Suku Gad ringan isisi Timur Lau Jordan.
  8. Aser : Anak Jakup sipeduaken arah Zilpa, erti gelarna eme keriahen, kesenangen. Idatkenna me pasu-pasu ibas tanehna, gandum ras anggur bagepe minak sampur ibas negerina. Idatkenna pe kemakmuren ras kebayaken. Panagn sientabeh isikapken idatas mejana janah Raja Tirus bagepe Sidon pe merhat manca.
  9. Naftali : Anak Jakup sipeduaken arah Bilha. Ngena atena kebebasen. Iibaratken me ia bagi belkih beru-beru sipulah. Kesusuren Naftali pagi menikmati lembah-lembah sidem alu batang-batang kayu bagepe kembah-lembah terbuka. Ipupusna me anak-anak simejile, salah sada kesusuren Naftali eme Barak
  10. Yusuf : Anak Jakup sipertama arah Rahel. Ia ngaloken pujin simeganjangna ibandingken seninana sideban. Selaku kalak si ervisi, nipi ras gegeh moral spiritual, ia me jadi teladan ibas kerina simehuli. Arah kai sienggo inanamina selaku anak, senina, budak ras pe pengelola icidahkenna karakterna sisetia la goyah man Dibata. erkiteken kemakmuren siidatkenna enterem kalak cian ras ngelakoken permusuhen ras ia. Pemanah-pemanah pe sibuk nerang ia lalap amin pe bage idatkenna kemenangen. Jusuf  ndatken pasu-pasu simelimpah idatas nari idatkenna udan ras embun, iteruh nari taneh mereken pangan ras peranin simelimpah man bana. Singkatna Jusuf bakal ipandang jadi sekalak si istimewa ibandingken seninana sideban.
  11. Benyamin :  anak Bungsu Rahel, igambarken bagi serigala simerawa ras berbahaya sibanci erbahan kecedan simbelin. Serigala erkusur manjar-anjar, kenca berngi masuk me ia itengah gerombolen biri-biri kenca bage ibabana lawes korbanna. Serigala e bali rawana paksa berngi ntah pe ciger wari. Tep-tep waktu siap ia ngelakoken perbahanen sila manusiawi. Ehud, Saul ras Yonatan eme kesusuren ibas suku Benyamin nari. Suku e jadi terkenal kerna keahlinna manah ras ketapel.

  1. Penutup
Ibas paksa si e Jakup mereken pedahna siperpudi man anak-anakna, tapi pedahna e ibas paksa si e pe merupaken nubuat kerna kesusuren anak-anakna. Pedahna e pe sekaligus berfungsi guna mpegegehi kiniteken anak-anakna siibas paksa si e sangana ngongsi ku Mesir. Jakup ibas mereken pedah-pedahna man anak-anakna tentuna pe sekaligus ia mereken pengajaren man anak-anakna e. Kerina biak-biak/karakter anak-anak Jakup enda situhuna mewakili karakter ibas jemaat-jemaat Tuhan zaman genduari. Ibas kegeluhen perjabun pe banci jadi karakter anak-anakna Jakup enda lit simelekat ibas anak-anakta. Mari metenget gelah jabuta tetap ersada, erlajarlah arah Maria ras Jusup si la minter meruntus ngadapi anakna bagepe arah jakup sinehken pedah ibas masa tuana dingen nehken pasu-pasu. Enda me sijadi perayakenta ibas minggu keluarga tahun enda, siiket kiniersadan jabuta ras jadi jabu sinaksiken kekelengen Dibata.

Sinikapken : Pdt. Julia Elprida Gintings, S. Th
(0863-6175-3339)
GBKP Runggun Penen
Selamat Melayani ras mejuah-juah man banta kerina

Tidak ada komentar:

Posting Komentar

ERSADA IBAS JABU

BAHAN SERMON KHOTBAH MINGGU 18 NOV 2018 Invocatio     : “Andiko ulina ras senangna adi kalak si ersenina ersada perarih” (Mzm. 133:1) O...