KELENGILAH RUMAH PERTOTON

Bahan Sermon Perpulungen Jabu-Jabu 02-08 Agustus 2015

Ogen    : Masmur 84:1-5

Tema   : “Kelengilah Rumah Pertoton”

Tujun   : Gelah ngawan perpulungen ngangkai erti ras guna rumah pertoton

              Gelah ngawan perpulungen ngasup ngkelengi ras mpekena-kena Rumah Pertoton ras inventarisna

I.            Kata Perlebe

Salah sada output arah jelma sierkiniteken i doni enda eme erbahan ingan ersembah man Dibatana, subuk gedung, kuil-kuil, batar-batar, batang kayu,rsd. Ertina asa kalak si erkiniteken njemba ia guna erbahan ingan ersembah. Tentuna alu litna ingann ersembah enggo tentu ia tek ije ringan Dibatana. Janah kita selaku kalak Kristen tentu ka nge erbahan ingan ersembah siikataken kita alu gereja (Rumah pertoton, rumah Dibata, Chapel, dll). Janah tek kita maka Dibata pe ringan ibas gerejanta.

Tentuna guna mendukung ingan jadi ingan ersembah pasti lit ije ingan barang-barang sierkaiten ras penembahenta man Dibata. adi ibas gereja pasti lit mimbar, durung-durung, kursi, meja, alat penerangen, ras barang sidebanna simendukung kubas proses ibadah, janah kerina e siigelari kita alu inventaris gereja. Janah inventaris enda arus ka sijaga, sipekena-kena, silitken alu tujun ibadah. Janah sirawat/ jagai alu kiniteken. Sabab tek kita, kerina inventaris enda badia, sabab gereja Badia ingan Dibata ringan.

Sada fakta si menarik ibas kita kalak karo eme: “Adi nukur la kita beluh, tapi adi nggantiken barang siceda ngasup kita” ras “Menukah nukursa tapi mesera njagasa”. Fakta enda megati jadi penghambat man banta guna ngerawat inventaris gerejanta. Arah oratenta sekali enda, mari sinehen kuga nge sikapta ras spiritualitasta nandangi Rumah Pertoton.

II.            Isi/ Tafsiren

Masmur bindu 84 enda eme salah sada bagin masmur anak-anak Korah nari. Para ahli ngataken maka anak-anak Korah enda eme keturunen kalak siipake selaku pemusik ibas rumah pertoton ntah pe igelari pemusik kudus. Adi sitarik kubas jamanta genduari banci ikataken anak-anak Korah eme singer ras organista i Gereja. Selain pemusik, anak-anak Korah ertanggung jawab guna erban enden-enden pujin man Dibata. janah geluhna tep-tep wari buen ia ringan i Rumah Pertoton.

Pasal enda merupaken syair siiciptaken nggambarken ketedehen atena guna reh ku rumah pertoton. Banci siidah kemungkinenna pemasmur enda enggo ndekah lanai ku rumah pertoton, lit penafsir ngataken situasina eme ersikap guna erban perayan (ersikap ngalo-ngalo peziarah). Arah dampar sideban teridah maka pusuh ras uku rpemasmur enda, sikapen akapna ringan i rumah pertoton (ay.3) si ncidahken dirina selaku salah sada pelayan ibas rumah pertoton e (ay.4) ras secara spiritualna adi rinagn i rumah pertoton ngataken kerembakenna ras Dibata.

Ibas ayat 3 ungkapen simbages kel ertina “tendingku ras dagingku ersurak nandangi Dibata singgeluh” ngataken maka totalitas geluh subuk tendi ras kula biakna kin rembak ras Dibata selaku tinepana. Adi bage kin, kuga dage spiritualitasta nandangi rumah pertoton sedekah enda? Arus bagi pemasmur enda min kita si secara total kegeluhen siendesken man Dibata alu mediate nandangi gerejaNa.

Ibas ayat 4 banci siidah selaku sada kritiken man kalak si la ertedeh ate man Dibata. perik tuan rumahna ngertiken anak Dibata pe rumahna e rumah pertoton, janah kalimpenes tamakenna anakna deherken batar-batarna ngertiken arusna kin anak Dibata ringan i rumah pertoton. Kritik enda ngataken megati kita la mediate ras alu totalitas sitaruhken anakta ku Dibata, janah arusna pe lebihen kita asa perik tuan ras kalimpenes ndai.

Ibas ayat 5, mulihi itekanken pemasmur maka asa kalak siertedeh ate, ringan, ras nginget rumah pertoton ngaloken kesangapen. Banci lalap rende muji Tuhan, ncidahken keriahenna banci ermusik ras rende man Tuhan, janah geluhna reh geluhna (hidup semakin hidup) erkiniteken banci ia muji Dibata si lit ibas ia. kuga dage kita?

III.            Pengkenaina

Arah tafsiren idatas banci sibuat piga-piga hal sipenting, eme:

  a. Biakna kin anak Dibata ringan i rumahNa. Biakna kin kalak Kristen reh ndahi Dibata ku Gereja.

b. Gereja e badia, janah kerina isina pe badia. Bagi pemasmur, arusna kita njaga ras ngerawat gereja alu dem kiniteken, labo gelah menggo saja.

c. secara spiritualitas ta, kita pe arus total ersembah ras pe ngidah gereja eme ingan Dibata ringan.

Sada penungkunen refleksi, adi siperdiateken letak gerejanta engkai maka lit ibangun idas uruk, leben sidapeti gereja maka kuta, ntah pe itengah kuta? (selain ibangun itengah kota sienggo padat pendudukna siarus mencari lahan si kosong). Enda ngatakenca man banta maka lit pengangkan ras pengakapta naka adi kuta ngidah ringan itengah-tengahna ndeher gereja e ras kita, janah bagi ibas ayat 5, adi ringan kita ibas ntah pe ndeher ras gereja si dat me kesangapen erkiteken ije Dibata ringan. Pas bagi teologi Kiblat, idauh-dauh nari pe adi ersembah man Dibata arahkenna pengalana ku rumah pertoton.

“Reh kelengna ateta nandangi gereja, reh sangapna kita” ungkapen enda me teologi kalak Israel nandngi rumah pertoton, bage ka pe min kita, reh kelengna ateta gerejanta alu njaga ras ngerawat inventarisna reh sangapna kita. Sabab pengelakonta enda labo terjeng memperindah gereja secara estetika tapi alu erkiniteken min kita segelah reh sangapna geluhta

MANUSIA SI MBARU

Bahan Sermon Khotbah Minggu 09 Agustus 2015

Invocatio      : “Kam anak-anak Dibata. kam ikelengi dingen ipilih Dibata jadi sikerajangenNa. Emaka pakekenlah paken ate perkuah, mehuli, rukur meteruk, lemah lembut dingen saber” (Kolose 3:12)

Ogen             : II Samuel 12:1-12 (Tunggal)

Khotbah       : Kolose 3:5-11 (Responsoria)

Tema             : Manusia Si Mbaru

I.            Kata Perlebe

Lit pandangen umum singatakenca “nukahen mbangun asangken ngerawatsa. Nukahen mulaisa asangken neruskenca” engkai maka bage? Erkiteken memang guna nerusken hal simehuli ntah pe dahin sienggo mejile, mesera kel. Uga kerna spiritualitasta, lit kin bage serana guna njagasa? Tiap kalak Kristen pasti pernah bergumul ras dosa si lit ibas dirina. Sieteh nge maka la arusna kita erbahan erdosa tapi mekatep denga enda silakoken. Paulus arah tulisenna sekalenda ngingetken ras ngajari kita kerna uga kin Kalak Kristen si enggo ikataken manusia si mbaru.

II.            Tafsiren/ Isi

a)      Tafsiren II Samuel 12:1-12

Ay. 1-8 nuriken man banta anding-andingen siigunaken nabi natan guna ngataken man Raja Daud maka kai sienggo ibahanna e sada kesalahen/ perbahanen si la ngena ate Dibata. entah kai siterjadi nandangi Daud seh maka la ia peka kerna Dosa sienggo ilakokenna. Keuniken nabi natan eme kap maka ia labo reh alu pernyataan-pernyataan ukumen Dibata, tapi reh ia alu sada kisah. Kisah si sederhana si pasti banci menggugah pusuh kalak si lit denga hati nuranina. Cerita rekayasa situriken Natan erbahan Daud tersentuh ras pe reh rawana. Ietehna maka kai siilakoken kalak bayak e jahat, ras arus ndatken ukumen mate.

Ay. 9-10, Nabi natan ngataken man Daud maka ia enggo erlua-lua, munuh, ras nipu, ersalah ia erkiteken la ngergaken kata Dibata bagepe menghina Dibata. hal enda ngatakensa maka Daud enggo memandang rendah ras pe meremehken Dibata alu tindaken siibahanna e. seh maka kai siituriken Nabi Natan sijadi efek samping perbahanen Daud e tuhu-tuhu memang terjadi kuketurunenna. (1) kematen anak hasil ia erlua-lua (2Sam. 12:14), (2) Absalom munuh Amnon (13:29), Absalom ngelawan bapana (18:9-17), ukumen mate adonia (1Raj. 2:24-25).

Ay. 11-12, nuriken maka ukumen Daud siinubuatken Nabi Natan labo terjeng akibat wajar erkiteken dosana. Sebalikna ukumen siialoken Daud eme hasil tindaken Allah secara langsung. Lit 3 hal siikataken Dibata erkiteken si e: Kubahan kesusahen man bandu, ilebe-lebe matandu kubuat ndeharandu, ras pe Kubahan enda gelah kerina Israel ngidahsa. Ukumen siberlaku i Israel man kalak sierlua-lua ras munuh eme ukumen mate. Tapi Dibata mengesampingken e, labo erkiteken Daud bertobat. Tapi gelah seumur geluhna Daud jadi contoh man Israel kerna ukumen Dibata si adil man pemimpin rohani sierbahan dosa.

b)      Tafsiren Kolose 3: 5-11

Perpulungen Kolose eme salah sada Perpulungen si la itangani Rasul Paulus secara langsung, la nandai Rasul Paulus secara langsung, la pernah idahi Paulus. Tapi perpulungen e lit erkiteken penampat sekalak sitergelar Eprafas eme rekan sekerja Paulus. Surat enda itulisken Paulus sanga ia ibas penjara i kota Roma. Kolose eme sada kota siterletak i pedalamen tepi Lau Likus deher Laodikia ras Hierapolis. Erkiteken jalur perdagangen Timur-Barat arus mbentasi kota enda, maka kota enda pe ipengaruhi melala pemahamen siberbeda. Arah penampat Eprafas maka Paulus meteh keadaan Perpulungen i Kolose. Emaka arah suratna enda itegasken Paulus ajaren kerna gambaren diri Kristus guna mpetenteng pikiren sesat si lit itengah-tengah perpulungen i Kolose.[1] Enterem kel kalak Kristen terpengaruh perbahen-perbahanen sibanci ncedai kinitekenna, bagi siituriken Paulus Kol. 3:5-7. Erkiteken memang kegeluhen kalak si non-Kristen dem alu dosa ras kejahaten, seh maka kalak Kristen pe la banci ngelakoken hal sideban selain ngutuk ras segat ate nandangi kalak enda.[2]

Kol. 3:5, Paulus lebih mbages mereken pengangkan kerna penembahen Berhala silabo terjeng erbahan patung saja. tapi lebih jelas ituriken Paulus maka mpediat keinginen daging sierbahanca kita lanai bergantung ras pe erkiniteken man Dibata pe termasuk nembah man berhala. Eme sebabna maka kerangapen pe ikataken penembahen berhala. Ibas sada waktu ngaku setia kita man Dibata ras kataNa tapi pada saat yang sama kita pe mereken kesetiaan sisetara ntah pe lebih mbelin man manusia, lembaga, tradisi ntah pe penguasa i doni enda. La banci kai pe iutamaken seakatan hubungenta sisetia man Dibata ras kataNa.

Kol. 3:6, konsep rawa Dibata siitulisken Paulus labo guna menghilangkan sifat keleng ateNa man manusia tapi justru negasken maka tanpa keadilen maka keleng ate pe kehilangen maknana. Ay.7-8, Paulus ngajarken gelah kita berkata “TIDAK” man dosa. Dosa e banci bertumbuh, berkembang biak ras pe nguasai kita. Dosa pe banci ngancurken keefektifenta ibas ngelai Dibata. seh maka arus kita mematikan dosa-dosa siberusaha merasuki kita.

Ay. 9-12, Paulus pe ngingetken kerna manusia ijadiken rikutken tempas Dibata jine. Mungkin gundari tempas Dibata si lit ibas kitajadi sedikit kusam, tapi tempas Dibata e tetap lit ibas kita la banci bene.  Adi perubahen-perubahen lahiriah siibahan kita labo banci memperbaiki kekurangen si lit ibas kita. Paken, kosmetik, ras pe operasi fisik banci erbahan kita bagi kalak sideban, tapi la bagi karya siirancangken Dibata man gunanta. Kita merluken diri situhu-tuhu enggo ipelimbarui, dirinta sienggo ipelimbarui rikutken tempas ras idandani alu apaken keleng ate, meteruk ukur, kemalemen ate, dingen saber.

III.            Pengkenaina

alu tema “Manusia si mbaru” enda ngingetken kta gelah ibas geluhta si tep-tep wari tetap kita ipelimbarui alu kebenaren kata Dibata. guna jadi manusia si mbaru memang labo hal si menukah, melala tantangenta janah pe labo banci terjadi ibas waktu singkat. Arah kata Dibata sekalenda lit 3 hal sibanci ipelajri kita guna jadi manusia si mbaru:

1.      Langkah awal perubahen. Ay 5-8

1. Bunuhlah. Kebenaren Dibata jelas ngataken man banta maka awal perubahen eme bunuhlah. Kai siarus ibunuh? Siibunuh kita tentu perkara doni si jahat.
2. Ambekkenlah. Adi ateta jadi manusia si mbaru, maka arus siambekken kerina si jahat si la sejalan ras kebenaren Dibata.

2.      Memasuki pembaharuan nggeluh. Ay 9-11

a.       Ulanai perguak

b.      Ipelimbarui

c.       Lanai erndobahen iadepen Dibata

3.      Senjata manusia si mbaru ay. 12

Kenca kita jadi manusia si mbaru labo berarti secara otomatis kita enggo sempurna. Tapi kita harus terus nggt erlajar. Erlajar gelah meteh sifat-sifat Kristus. Kalak si enggo jadi manusia si mbaru maka ia ngasup ngaloken kerinana siialamina ibas geluhna alu dem pengataken bujur, erkiteken ietehna maka Dibata e mehuli, ras pe Dibata e labo ngerancangken hal-hal si jahat man anak-anakNa. .

Kesimpulen     : ula ngadi guna erbahan pembaharuan nggeluh. Tapi erlajarlah segedang nggeluh guna reh deherna ras Dibata. masa lalu eme pembelajaren, masa kini nuan, janah masa si reh eme ija masa ija kita rani.

---

[1] Dunnet, Walter M, Pengantar perjanjian baru, hal. 66

[2] Wahono, Wismoady S, Disini kutemukan, hal. 442