KRISTEN SI DEWASA

Khotbah 17 Juli 2016

Invocatio      : Asum anak-anak denga aku, pengeranangku, perukurenku ras pengertinku bali ras     anak-anak. Tapi kenca aku dewasa kutadingken kerina biak anak-anak e. 

                      (I Korinti 13:11)

Ogen             : Pilipi 4: 10-20 (Tunggal)

Khotbah       : Jakup 1:2-4

KHOTBAH

Fakta lapangen ibas unit Pelayanen GBKP Alpha Omega ngatakensa maka. Anak-anak AO si iasuh ijah memang terlihat perkembangan secara fisik, semakin hari umur mereka semakin bertambah, bahkan rata-rata anak-anak i AO lit keahlian na masing-masing, tapi perkembangen secara mentalna, e sijadi permasalahan. Amin gia lit iidah kita kalak si enggo cukup umurna, tapi situhuna kepintaran mentalna hanya bali ras anak umur 8 tahun (2 SD). emaka labo kita heran adi reh kita berkunjung ku AO, lit si jumpai kalak sienggo metua umurna ntah fisikna tapi secara mental ia bali nge ras anak-anak denga. Tapi adi iajuk anak-anak AO untuk rende, muji Tuhan, kebaktian ningen e, kalak ah semangat kel kerina. Amin gia nggo metua, tapi nggit denga ia ngendeken lagu happy ye ye. Iperhadapken kami situasi kalak enda man banta si ikataken lebih beruntung, rusuren denga justru kita enda mekisat rende muji Dibata, adi la sedap laguna labo siikuti pe. Apai ka lagu anak-anak, labo kita merhat ngikutisa. Secara fisik payo memang kita lebih sempurna perkembangen fisik ras mentalta, tapi secara kiniteken apai kin menurut ndu iantara sidua enda silebih matang kinitekenna?

Rasul Paulus arah suratna man perpulungen i Filipi, mereken statement (ay.10). engkai maka e jadi keriahen man bana? Prinsip hidup kekristenan. Tentu harus mengarah kubas kai siilakoken Kristus, tentu harus ncidahken teladan/ ngusih perbahanen Kristus selama ia nggeluh i doni enda. Teladan “Mediate” sienggo ibahan Yesus ilanjutken perpulungen Filipi, enda sijadi keriahen Paulus e. Paulus labo ngerana soal pemere perpulungen filipi e man bana ngenca, tapi jauh lebih dalam daripada itu. Teladan Yesus ibas mereken serpang pulah man kalak si lit ibas kiniseran, enda pe iusih perpulungen Filipi (ay. 14). Si lebih luar biasa, maka kalak Filipi enda labo terjeng soal materi saja, tapi ibas nampati dahin-dahin pelayanen meritaken brita simeriah pe ia ikut muat bagin.

Persoalenna genduari, posisita ija kin e? Lit piga-piga tipe perpulungenta khususna kita GBKP lit si memang nggit ia ikut ibas pelayanen, meritaken injil, tapi kenca idahna kalak si lit ibs kiniseran ras simemerluken pertolongen, ia la nggit mereken kai pe. Uga pemberitaan injil sibangenda si la isertai alu perbahanen kasih banci berhasil? Tentu jatuhna kari nina kalak “Sisia kel ia rajin ku gereja tapi la kel teridah pergurejana ibas perbahanenna . ” ibas sudut pandang si deban lit ka perpulungen nta si memang aktif kel ibas tindaken-tindaken sosial, mereken sumbangen ku panti asuhen, ku korban bencana alam, kai-kai pe kegiaten gereja si memerluken dana, enggo ia leben ije masangkensa. Tapi sekali pe la pernah ia meritaken injil. “mari ku rumah bapa si anu kita ngapuli” mis kel ijababna “kena saja yah, rumahna pe kitik nge, labo kari siat adi kerina kita reh” kondisi rumah kalak  ka ibahanna jadi alasen la ia ikut ngapuli. Padahal biakna kin ndai mekisat. Adi bage ka keadaanta tentu kita jatuh kubas pertolongen jasmani saja, kalak si isampati kita hanya tertolong secara doni enda ngenca, amin gia meriah iakap kalak siisampati kita e, tapi ketika ia mate kuja perlawesna? La ku surga erkiteken la ia tek man Yesus, la ia erpengendes man Kristus, man manusia ia erpengarapen.

Adi siinget peristiwa penyaliban Yesus, kalak si isalibken iarah kemuhen Jesus kai nina “O Jesus, inget aku asum kam pagi reh jadi Raja”. Tahanen e la kel pernah ibegina Jesus ngajar, la pernah iikut-ikutna Jesus, bahkan la pernah iidahna uga perbahanen Jesus. Tapi pengeranana mereken penegasen maka ia tuhu-tuhu tek maan Jesus secara kiniteken. Tentu ibas bage pengakun kalak tahanen e, atena mindo isampati. Tapi Jesus labo penampat jasmani berekenna, kai nina Jesus “Sendah me kam ras Aku i Pardis”. Berarti arah sienda banci sitarik kesimpulen maka paguhna kiniteken Kalak Kristen la bergantung ras dekahna ia jadi kalak Kristen. Bagepe soal kedewasaan keristenan la bergantung ras uga rusurna kita kita ku Gereja, PJJ, rsd. Tapi poin sipemena si jadi catatenta eme Kedewasaan Kekristenenta bergantung ibas carata ncidahken biak-biak Kristus si lit ibas kita man kalak si lit i sekelewetta.

Ngerana soal tema sekalenda Kristen si Dewasa, Kitab Jakup nuratken man banta cara-cara gelaah banci dewasa kekristenenta. Ay. 2 ngatakensa “Sangap min iakapndu adi reh erbage-bage percuban”. Adi gelarna manusia sitading i doni enda, tentu la mungkin terpisah ibas kiniseran nari, erkiteken doni enda memang ingan mesera. Tapi justru lit piga-piga kalak Kristen si beraanggapen, maka adi aku jadi kalak Kristen si tutus pasti aku isampati Tuhan, pasti aku ipasu-pasu Tuhan ibas kai pe, kesehatenku, keuangenku, pendahinku, sekolah, rsd, seh maka geluhku i doni enda jadi mulus dan enak. Pemahamen sibagenda jelas bertentangen ras Pustaka si Badia ta. Kitab Matius mereken pengangkan man banta maka dalin kalak si ngikutken Kristus e bagi dalan si kitik/sempit, labo dalin yang luas dan lebar. Tapi justru iganbarken alu dalin si dem alu kesukaren. Seh maka lit kalak ngatakensa : Dibata lit anakNa si la pernah erbahan dosa (Jesus), tapi labo lit anak Dibata si la ngenanami kiniseran.  Adi bage kesimpulenna ngatakensa adi geluhndu genduari relatif lalit ibass kiniseran, maka banci jadi kam labo anak Dibata, atau banci saja kam anak Dibata si nggeluh berkompromi ras doni enda, sementara pustaka si Badia ngatakensa ‘Ula kam bali ras doni enda’. Tapi sebalikna adi geluhndu dem alu kiniseran, ula cepat mengambil kesimpulen maka sienda jadi erkiteken dosa ibas geluhndu, sebab banci saja kiniseran e reh erkiteken ate Dibata gelah kam reh dewasana ibas kiniteken.

Kitab Jakub ngatakensa “erbage-bage”, berarti labo sada ngenca persoalen e, seh maka payo nge nina lagu “Adi ukuri nggeluh i doni enda, latih rass mesera kel kepe, lenga dung sada nggo ka reh man ukuren, errtindih-tindih megati lanai terbaba”. Segala macam bentuk persoalen banci jaadi sekali reh man banta kerina, problem ekonomi, pendahin, kesehaten, jabu, study, perjodohen, pergaulen, bahkan pelayanen, rsd. Kerina sie banci jadi persoalen si la terduga. Persoalen si la terduga e nge si rusur erbahancaa kita ndabuh. Tapi adi megenggeng kita tentu kinitekenta pe pasti labo mbera-mbera, tapi pasti reh dewasana.

Tentu kita krina ateta jadi kalak Kristen si dewasa. Emaka mari erlajar arah wortel ras telur. Adi wortel ipanasken, ,ibelgang ia tentu reh medakdakna, adi tasaksa pe banci saja labo sada pe la kita merhat mansa. Sebab adi wortel pe adi biasana sitamaken ibas gulen, pasti mekeruk denga min ia ateta, gelah lit denga nanamna. Sementara adi telur, adi ibelgangndu ia justru reh piherna, adi kin ndai ia cair ntah kental kenca ibelgangndu, ntah igorengken justru reh piherna ia. Bage ka nge soal kedewasaan kinitekenta, adi reh sanga reh kiniseran e erbahansa kita menyerah, medate, medakdak piah dungna lanai lit gegeh ibas kita berarti kita bali ras wortel ndai, tapi adi sanga reh kiniseran e kita reh genggengna, reh sabarna, piah dungna reh piherna kinitekenta, reh paguhna berarti kita bagi telur. Ibas minggu enda si jadi PR man banta, minggu GBKP NJayo, enggo 75 tahun GBKP njayo uga nge nilai kiniteken perpulungenna, Kristen wortel kah kit anta Kristen Telur? Si jadi cataten man banta bagi nina Invocatiota, adi reh dewasana kita tentu sitadingken biak anak-anak si lit ibas kita.

Selamat Melayani Dibata simasu-masu kita kerina

Pdt. Julia Elprida Br. Ginting

Melayani i GBKP Runggun Penen

Klasis Medan Delitua

No. Hp 0853-6175-3339

Mejuah-Juah