PERBAHANEN DIBATA JADI ADAT KEGELUHEN

Khotbah 04 Oktober 2014

Invocatio      : “Tapi man banta sada ngenca Dibata, eme Bapanta. Ibas Ia nari me rehna sinasa lit, janah kempak Ia me perlawesta. Janah sada ngenca Tuhan, e me Jesus Kristus. Arah Ia me kerina sinasa lit ijadiken, dingen arah Ia kita nggeluh”. (I Korinti 8:6)

Ogen             : Mazmur 150:1-6 (Responsoria)

Khotbah       : Keluaren 12:21-28 (Tunggal)

Adi siukuri segedang-gedang geluhta pasti melala kel enggo perbahanen Dibata siterjadi man gunanta. Adi ipindo kita guna nuliskensa, banci saja lanai tertulisken kita pe. Sebab kai? Sebab memang seh kel buena perbahanen Dibata ibas kegeluhenta. Bangsa Israel sendiri pe ibas bahan khotbahta sekalenda nuriken kerna uga perbahanen Dibata siialami bangsa enda. Rencana Dibata simbelin guna mulahi bangsa enda ibas perbudaken Mesir nari. Sope lenga ipeseh Dibata tulah sipesepuluhken, leben ipersingetina bangsa Israel, gelah namaken dareh biri-biri ntah pe kambing ibas binangun pintun rumah. Gelah kai? Gelah sanga mentas kari malekat kematen, la ia masuk ku rumah bangsa Israel. Janah kejadin e nge jadi bena-benana lit hari raya Paskah itengah-tengah bangsa Israel. Paskah e asal katana eme “Pesakh” sierina melewati, enda mereken persinget man bangsa Israel uga malekat kematen e mentasi rumah kalak Iarael, la ia bengket kubas tapi adi rumah kalak Mesir, bengket ia kubas.

Memang adi ibas kita kalak Kristen, Paskah e enggo jadi sada perayaan man banta. Tapi adi man bangsa Israel e jadi adatna. Tentuna pengertin adat enggo sieteh ras-ras eme kerna suatu kebiasan yang diturunkan secara turun temurun. Emakana ibas ayat 26 ije jelas tercatat maka ketetapen enda enggo jadi adat man bangsa e. janah si luar biasa kerna pernyataan ibas ay. 27 “adat e ilakoken guna mpehaga Tuhan”. Hal enda nge sirusur mawen-mawen lanai iinget kita selaku kita kalak karo. Kita rusur ndabuh kubas pemahamen maka erbahan adat e guna mpehaga manusia labo guna mpehaga Dibata, kenca si e kita cebuni ibalik kata Dibata kerna “kai siilakoken ndu man seninangKu e, bage me perbahanenndu man BangKu”,

Temanta sekalenda ngatakensa “Perbahanen Dibata jadi Adat Kegeluhen”. Adi arah konteks khotbahta sekalenda siidah maka perbahanen Dibata e, eme membebasken. Enda ertina maka adat si ipake kita e pe harus sipakeken ka guna mbebasken kalak si deban si lit ibas perbudaken (musil, keterpuruken). Ula min sempat adatta selaku kalak karo justru membelenggu kalak sideban.

Ibas hal enda Gereja tentuna harus beluh jadi penengah kerna si e. soal bahasa/bicaranta enda mawen-mawen la sigejab maka e lanai sue ras kinitekentna, sebab banci saja enggo terbiasa kita megiken kerna si e. ibas mereken uis arin teneng, enggo biasa siakap adi singendesken uis arin teneng e ngerana “enda ibereken kami uis arin teneng man bandu gelah teneng tendi ndu”, padahal kalimat enda banci nge aturna siperjelas “bagi gelar uis e arin teneng, maka Dibatalah simpeteneng tendindu”. Banci aturna ije iselipken kita kerna pedah Dibata, tapi rusuren dengan enda ilupaken kita.

Perbahanen Dibata la pernah pekulah-kulah man manusia, tentu adi perbahanen Dibata e jadi adat kegeluhenta tentuna kita la banci pekulah-kulah. Ibas kerja erdemu bayu tempa-tempa zaman genduari enda enggo wajar siakap pekulah-kulah bage. Ibas kerja erdemu bayu e lit nge luah si man alonken, bagi amak, tilam lit ka lampu, rsd. Tapi rusuren sienda kerina terjeng simbol saja, kenca enggo dung kerja erdemu bayu e kari labo lit e ialoken. Sebab kai kita aturna simaba luah tapi luahta e kalak nukursa lanai kita. Jadi terjeng simbol saja, tentu enda pe banci ikataken pekulah-kulah kap kita ije.

Tapi tentuna rikutken bahan renungenta sekalenda maka, adat e harusna erpalasken perbahanen Dibata, dem alu kekelengen labo pekulah-kulah, membebasken labo membelenggu. Janah sipaling pentin kel, ibas kerina adatta selaku kalak karo harus mpehaga Tuhan Dibatanta. Amin