KUPAKEKEN SI LIT BAS AKU

KHOTBAH MINGGU 26 JULI 2015

Invocatio      : “Ngaloi tuan e,’Mehuli kel perbahanenndu e. Kam juak-juak si tutus dingen bujur; tutus atendu ibas si kitik, perbahan si e kupercayaken man bandu siterbelinen. Mari bengketlah kam ku bas, ersenang-senang ras aku” (Matius 25:21)

Ogen             : Matius 25:14-30 (Tunggal)

Khotbah       : I Tesalonika 1:1-10 (Tunggal)

Khobah

Kondisi perpulungen i Tesalonika lit ibas keadaan si kurang mehuli, eme : (1) Berita Kerehen Tuhan Yesus sipeduakaliken erbahanca kalak enda ngadi erdahin (2) jadi perbebenna kerna kalak sienggo mate sope kerehenNa (3) Kegeluhen moral kalak enda ceda mulihi (4) Lit fitnah maka Paulus ndarami keuntngen pribadi arah pemberitaan e.

Ngidah piga-piga kondisi enda me maka isuratken Paulus suratna enda. Paulus atena ersura lako mpehuli kegeluhen kalak Kristen si ije, emaka unik kel carana sipertama eme ipujikenna lebe kegeluhen kiniteken perpulungen. Ikataken Paulus maka situhuna ibas diri setiap kalak lit kap simehuli. Erkiteken kegeluhen kinitekenna e maka reh ibas ia perbahanen simenggambarken kekelengen. Seh maka perpulungen Tesalonika enda jadi usihen nandangi perpulungen sideban, eme Makedoni ras Akhaya. Nggit ia nadingken sembah-sembahenna sindekah ntah pe berhala-berhalana jenari ersembah ia man Dibata, seh maka kedungenna Kalak Krsten i Tesalonika e ngelai Dibata janah nimai kerehen Tuhan Jesus.

Arah teks sijadi bahan ogenta ndai maka kepeken kinirajan surga e bagi sekalak tuan siatena lawes kuingan sindauh emakana ipercayakenna erta-ertana man juak-juakna. Lit iberekenna 5 talenta, bage pe 3 talenta ras siterakhir 1 talenta. Juak-juak sipertama ras sipeduaken mis ibahanna usahana seh maka idatna ka untungna berlipat ganda. Tapi sungguh disayangkan maka juak-juak sipeteluken singloken 1 talenta justru ibunikenna iteruh taneh. Emaka singkat cerita kenca mulih tuanna ndai idatna me masing-masing ulihna ibas kai siilakokenna. Juak-juak sipertama ras sipeduaken datken kepercayaan silebihibas tuanna nari tapi juak-juak sipeteluken justru talenta sisada ndai silit ibas ia ibuat ka mulihi janah ia pe iukum.

Adi siperdiateken teks enda maka situhuna juak-juak sipeteluken e ndai la itandaina ise ia. arah bahasana saja pe la bagi bahasa sekalak juak-juak. Ia mempermasalahken sikap tuanna simpepulung ras mperani kai si la isuanna. Tapi adi siimaksudken ije eme masalah ketidakadilen, aturna juak-juak sipeduaken pe merasa tidak adil. Tapi justru itandaina ise ia, adi kin sekalak juak-juak tentu harus tunduk man tuanna. Tapi juak-juak sipeteluken enda ngidah tuanna arah sisi negatif, pendahin siilakokenna pe negatif seh maka responna pe negatif. Emaka wajar adi siidatna pe hal sinegatif.

Tapi hal simenarik arah tuanna e ndai eme (ay. 27) maka kepeken siisesalken tuanna e labo pada hasil sidapet tapi tindakenna. Adikin memang la ia beluh ngelolasa me banci iberekenna man kalak sibeluh ngkelolasa gelah idatna ka hasilna berlipat ganda. Tapi perlu sigaris bawahi ijenda amin gia lit kata-kata mbugaken duit tapi labo e jadi tekanen ibas konteks bahan ogenta enda. Labo duit siarus ibungaken kita tapi talenta si lit ibas kita e harus silipat gandaken. 5, 3, ntah pe 1 gia talenta si lit ibas kita tapi pasti lit. Dibata labo mungkin mereken kita kegeluhen tapi la iberekenna modalta guna nggeluh. Pasti Dibata mereken modal man banta amin sada sajalah gia. Tapi adi ngasup kita, pentar kita makeken si lit ibas kita pasti upahna man banta eme “mari ersenang-senanglah ras Aku” nina TUhan. Amin.