Pembincarken Kemuliaan Dibata

BAHAN SERMON KHOTBAH MINGGU 07 FEBRUARI 2016

Invocatio     : Tuhan nggeluh kap! Pujilah Penampatku! Beritakenlah keemuliaan Dibata si nelamatken Aku (Mzm. 18:47)

Ogen             : Keluaren 34: 29-35

Khotbah       : II Korinti 3:12-42

Adi ngerana kita kerna kemulian, kerina jelma sura-surana ipermuliaken. Kai kin situhuna e kemuliaan e? maka kerina jelma ersura-sura ipermuliaken jelma sideban. Ibas bahasa Ibrani ipake kata Kavod ras ibas bahasa Yunani ipake kata Doxa siertina nuduhken kerna kedaulatan, reputasi, kemegahan dan kehormatan. Adi iartiken langsung kubas kegeluhenta emekap sada kebanggan ras kinihagan siteridah ibas sekalak jelma. Tapi rusur ibas ndatken kemuliaan melala ipake cara-cara si salah si situhuna nuduhken kulit saja labo isina. Jadi uga kin situhuna kita ndatken kemuliaan situhu-tuhu si kulit ras isina tuhu-tuhu layak ipermuliaken.

Ibas bahan ogenta kel. 34:29-35 teridah maka Musa kenca ia ngaloken 10 pedah Dibata i datas deleng Sinai nari, nusur ia alu ayo si ersinalsal. La ia sadar maka ayona ersinalsal. Ope denga ia nangkih ku deleng Sinai, ayo Musa biasa saja bagi kalak Jahudi si deban. Kenca ia ersikap guna jumpa ras Dibata maka mulai ayona ersinalsal. Enda kerina terjadi erkiteken Musa enggo ngerana ras Dibata. Sinalsal kemuliaan Dibata teridah ibas Musa. Emaka sanga Musa mpeseh sura-sura Dibata man kalak Jahudi ras sanga Musa ngerana ras Dibata italangina penutup ayona, kelang-kelang si e, itutup Musa ayonna. Ertina kai? Si enda ngatakenca maka kemuliaan si ialoken Musa labo rehna ibas manusia nari. Tapi erkiteken kegeluhenna nuduhken kiniteken man Dibata, Dibata simereken kemuliaan man Musa janah sienda iidah kalak Jahudi. Musa la perlu nuduh-nuduhken kehebatenna gelah ipehaga kalak Israel. Tapi ibass ia ngikutken sura-sura Dibata, ia ipehaga Dibata. Tapi Musa itutupna ayona ibas wari si biasa erkiteken mbiar ia, kalak Jahudi ngidah ayona siersinalsal e erkurang sinalsalna. Arah si e banci teridah maka Musa pe bagi si la pang nuduhken Kemuliaan Dibata si lit ibas ayona man jelma sideban. Ibas pengertin sideban banci teridah maka adi ndauh ras Dibata. Kemuliaan si enggo ibereken Dibata banci bene.

Ibas suratna pe Paulus mengkritik kebiasaan kalak Jahudi ibas nembah Dibata. Ibadah kalak Jahudi ersembah man Tuhan ngikuti kebiasaan siilakoken Musa tapi la meteh kerna maknana. Si endaa teridah ibas kegeluhen kalak Jahudi siterjeng ngikuti undang-undang Dibata saja tapi la memaknai ibas kegeluhenna. Patuh terhadap undang-undang si ialoken Musa/Taurat, tapi terjeng sebatas kebiasaan. Undang-undang si ilakoken kalak Jahudi seri bagi penutup takal si erbahanca kemuliaan Dibata e la teridah.

Emaka sipemena itekanken Paulus emekap nalangi penutup pusuh peraten. Mereken ingan man Kesah Dibata erdahin ibas pusuh. Kesah Dibata e mpelimbarui kegeluhen kalak si ngerembakken diri man Dibata labo man undang-undang. Musa rembak ras Dibata italangi me penutup ayona. Manusia si ngerembakken dirina ras Dibata, italangi me penutup pusuh peratenna. Adi penutup pusuh peraten e nggo italangi, kemuliaan Dibata e banci teridah man sinterem. Ertina kiniteken man Dibata labo hanya sebatas formalitas ntah pe budaya simendarah daging. Tapi ibenaken ibas pusuh nari arah pendahin Kesah si Badia janah teridah ibas kerina perbahanen geluh.

Sipeeduaken itekanken Paulus kerna Kesah Dibata si erdahin. Paulus nuduhken maka kerina kalak si tek man Dibata ras jera ibas lagu langkahna si la mehuli pasti ngaloken kemuliaan Dibata erkelangken pendahin Kesah si Badia. Kesah si Badia e si mpengasup kita ndalanken sura-sura Dibata. Ija lit Kesah Dibata, ije lit kebebasen. Si ertina maka Kesah Dibata emekap gegeh guna ngelawan undang-undang si la payo, undang-undang si membatassi kiniteken manusia. Kesah Sibadia mbebasken kita arah belenggu undang-undang. Kiniteken man Dibata labo erkiteken undang-undang tapi erkiteken penggejapen kerna kekelengen Dibata. Janah ibas si e lanai kita biar-biaren nuduhken sura-sura Dibata ibas kegeluhen.

Sipeteluken, ibas kita ndalanken sura-sura Dibata e, kemuliaan Dibata teridah ibas kegeluhenta. Sura-sura Dibata si ialoken kita rehna ibas pusuh nari, labo erkiteken peraturen. Sura-sura Dibata si ialoken kita labo gelah kita ipermuliaken jelma si deban, tapi gelah Dibata ipermuliaken. Arah gegeh Kesah si Badia kita iobah erdekahna reh ngasupna kita ndalanken sura-suraNa, erdekahna kita ermuliana seh maka kita dungna segambar ras Dibata.

Arah bahan khotbah ras ogen ibas minggu enda erlajar kita maka selaku kalak si erkiniteken, kita harus pembincarken Kemuliaan Dibata. Mari si talangi pusuuh peratenta raas kerina penutup ibas pusuhta si erbanhanca Kesah Dibata la banci bengket kubas pusuhta. Bereken Kesah e erdahin ibas pusuhta, si mpelimbarui kegeluhenta ras si mpengasup kita ndalanken sura-sura Dibata. Ibas kita ndalanken sura-sura Dibata tuhu-tuhu enda silakoken alu la biar-biaren. Ula kita mbiar iacuhken kalak sideban, ula kita mbiar ianggap “sok suci” arah jelma si deban, ula kita mbiar nuriken si benar man jelma sideban. Kesah Dibata pasti nampati gegeh ras jadi penampat man banta. Labo kita ipediatna italuken doni enda adi Kesah Dibata sibahan jadi gegehta.

Ibas kita ngelakoken sura-sura Dibata alu pusuh situhu-tuhu ije me teridaah kemuliaan Dibata. Situduhkenlah kemulian Dibata enda tuhu-tuhu kemuliaan Dibata, ula guna kemuliaanta. Melala gundari enda singatakenca maka kerina si ialokenna guna mpermuliaken Dibata, tapi situhuna ia ndarami keuntungen ije, ndarami ketenaren, ndarami kinihagan guna dirina sendiri. Tapi adi tuhu-tuhu kemuliaan Dibata si ituduhken kita ibsa kegeluhenta, kit ape pasti ipermuliaken, labo arah manusia tapi langsung arah Dibata. Kemuliaan sirehna ibas Dibata nari nge siperlu sidarami ibas doni enda. Aminna pe kita la ipermuliaken doni enda arah kegeluhenta sindalanken sura-sura Dibata, pasti kita ipermuliaken Dibata. Kemuliaan ibas doni enda kentissik ngenca, tapi kemuliaan ibas Dibata nari seh rasa lalap. Kemuliaan siibereken doni enda kadang kala hanya guna mbeneken kita, bagi peribahasa “habis manis sepah dibuang”.

Emaka mulai gundari nari, lanai bo perlu silakoken erbage-bage si la mehuli guna ipehaga jelma sinterem. Siperlu silakoken emekap nggeluh alu tutus sue ras sura-sura Dibata. Ije me kita tuhu-tuhu ipermuliaken. Sada kata-kata bijak siperlu sirenungken eme kap “kemuliaan terbesar yang bias didapatkan seoraang manusia adalah ketika dia tidak mengharapkan kemuliaan itu sendiri tapi berusaha mempermuliakan orang lain”. Selamat mpermuliaken Dibata ibas kegeluhenta.

Pdt. Julia Elperida Br. Ginting

(0853-6175-3339)

GBKP Runggun Penen