Meriahlah O Doni Ras Langit Kerina

Khotbah 17 April 2016

Invocatio    : Sabab kerina sinasa lit Dibata njadikenca, janah kerina e lit erkiteken IA dingen man gunana. Terpujilah Dibata seh raasa lalap. Amin (Roma 11:36)

Ogen          : Ketangkasen 7:9-17 (tunggal)

Khotbah     : I Kronika 16: 31- 36 (Responsoria)

Tema          : Meriahlah O Doni Ras Langit Kerina

Khotbah

Sope lenga kita seh ku tema ta wari minggu enda, mari lebe sigargari kai ertina ntah pe maknana kerna bahan khotbahta ibas wari enda. Kitab I Kronika 16:31-36 nuratken kerna ende-enden pujin siiendeken bangsa Israel kenca ia maba peti perpadanen ku Jerusalem. Kai kin peti perpadanen e? peti perpadanen ntah pe ibas cakap indonesia ikataken tabut perjanjian, tabut Allah, Tabut Kesaksian eme tabut siberbentuk persegi panjang, ibahan arah batang pohon Penaga, ukurenna 1,3 x 1 x 1m. tutup Tabut ntah pe ikataken tutup Pendamen ibahan arah emas nari, siujung-ujungna berbentuk sayap.

Peti perpadanen e eme peti siipake guna nimpan barang-barang pusaka sierbahan bangsa Israel banci nginget kerna perbahanen Dibata kempak ia kerina. Ibas peti e itamaken dua loh batu torat siertulisken 10 pedah Dibata, buli-buli manna (pangan sanga i padang pasir), tongkat harun, ras pe sarana-sarana siipake Dibata guna jumpa ntah pe ngerana man suruh-suruhenna musa (semak belukar). Erkiteken peti perpadanen e menurut keyakinen bangsa Israel melambangkan kehadiren Dibata ije.

Bahkan si luar biasana peti perpadanen e enggo menempuh perdalanen si cukup nggedang ibas perdalinen sejarah bangsa Israel. Mulai i Gilgal nari peti perpadanen e ibaba ku Betel, emaka ipiserken ka ku Silo ibas zaman hakim-hakim. Kenca si e irampas bangsa Filistin me peti e, tapi kepeken ise si ngerampas peti e justru maba cilaka man bana, seh maka bangsa Filistin kena pinakit seh 7 bulan erkiteken si e iulihken bangsa Filistin me peti e man Israel itamaken i Kiryat-Yearim. Ije me peti e dekahna 20 tahun la iperdiateken. Erkiteken ibas paksa si e eme paksa pemerentahen Saul, sanga masa Saul nge peti e la iperdiateken. Emaka kenca Daud jadi Raja peti perpadanen e ipisehkenna ku Jerusalem, erkiteken ije me bangsa Israel nembah man Tuhan.

Peti perpadanen e eme sada hal sicukup penting man bangsa Israel, emaka ibas kalak enda berhasil maba peti perpadanen ku Jerusalem meriah kel ukurna kerinana. Erkiteken peti enggo banci itamaken ku Rumah Pertoton. E nge turin-turinna maka bangsa Israel ngendesken ende-enden pujin man Dibata ibas bindu 16 enda.

Bagi bangsa Israel ngendesken ende-enden pengataken bujurna man Dibata, minggu enda pe ibaba kita gelah ngasup ngataken bujur man Tuhan kerna perbahanenna si mbisa ibas kegeluhenta. Bagi ibas pengogenta ketangkasen 7:9-17, ije ituriken kerna pengenehen Johanes. Ija lit enterem kalak si la terbeligai, ibas kerina bangsaa, suku, negara ras ibas kerina cakap pe lit ije. Kerina ia ngakuken maka keselamaten e rehna ibas Dibata nari si kundul ibas kinirajan Surga. Seh maka jelma e kerina nembah, ayona seh ku taneh. Adi ibas perdalinen geluh bangsa Israel jelas enggo tangkas man banta kerna kerina perbahanen tan Dibata kempak bangsaNa, nandangi kerina rasul-rasul ibas padan simbaru pe enggo jelas tertulis kerina maka Dibata e tetap mereken kemalemen ate ras kiniulin kempak ia kerina. Gundari uga man banta? Enggo nge sigejabken perbahanen Dibata si luar biasa e ibas geluhta? Seh maka kita ngasup ermeriah ukur iadep-adepen Dibatanta.

Bangsa Israel banci mbentasi lawit teberau erkiteken Dibata mbelah lawit e jadi dua, kita gundari berhadapen ras teberau ta masing-masing, teberau perbeben terbentang luas iadep-adepenta. Kai si banci ibahan kita? Adi balik ku pudi igombangi kalak kita, adi iterusken banci kita gedap. Adi sekalak si bijak ngatakenca sanga lanai kita banci ngenehen ku pudi ntah ku depan nehenlah ku datas, idatas nari lit nge lalap penampat e reh. Maksudna kai? Tataplah kempak Tuhan, ia nge simereken man banta dalan pulah, ia nge simereken man banta kengasupen gelah banci kita tetap ermeriah ukur iadep-adepenNa.

Minggu enda pe igelari minggu Jubilate siertina “Ersuraklah”. Emaka rikutken minggu Jubilate enda ibabai me kita ngenehen perbahanen Dibata simbelin lako mulahi kita ibas perbeben simberat nari. Perban keleng atena man BangsaNa nge maka Dibata nampati Israel ibas peperangen. Bage ka pe kita manusia, keleng ate Dibata enggo iberekenNa man banta arah kerehen Yesus si jadi Juruselamatta. Eerkiteken si e bujur nge kita Ersurak, ermeriah ukur, ras ngataken bujur. Ersurak si labo terjeng sora si megang tapi ikut muat bagin ibas ersaksi kerna kematen ras kekeken Jesus man doni enda gelah doni enda pe kerina ermeriah muji-muji Dibatanta. Amin.

Selamat Melayani ras mejuah-juah man banta kerina

Pdt. Julia Elprida Br. Ginting’s

(0853-6175-3339)

Melayani i GBKP Runggun Penen

Klasis Medan-Delitua