LAKOKENLAH KAI SIITOTOKENNDU MAN DIBATA

BAHAN SERMON KHOTBAH MINGGU

Invocatio      : Janah adi ipindondu la idatndu, sabab erkiteken tujunndu la mehuli; kai siipindondu guna pesenangken dirindu saja ngenca. (Jakup 4:3)

Ogen             : Johanes 14: 23-29 (Tunggal)

Khotbah       : Mazmur 67: 1-8 (Responsoria)

Tema             : Lakokenlah Kai Si Itotokenndu Man Dibata

PEMAHAMEN TEKS

Ende-enden ibas Mazmur 67 enda eme pujin si iendeken bangsa Israel ibas rumah pertoton i Jerusalem sijadi pengataken bujur ras ngingetken uga Dibata enggo mbebasken bangsa Israel arah perbudaken Mesir nari. Ibas kitab mazmur enda teridah maka pemasmur mindo man Dibata gelah tetap mperdiateken bangsaNa, alu bage bangsa sideban banci ngidah uga Dibata ngasup mbebasken, dem keadilen ras tetap masu-masu bangsaNa. Mazmur enda pe enden pengataken bujur kerna kerina pasu-pasu si enggo ibereken Dibata man bangsa Israel sanga wari Raya sapo-sapo. Erkiteken ibas wari raya e, kerina ia ibas wilayah ijapa pe pulung guna ngataken bujur ras ertoto gelah pemere sienggo ialoken banci mereken hasil si mbelin man bangsa-bangsa si deban. Sada enden pengataken bujur simewarisi pemanggilen Abraham, ipasu-pasu guna jadi pasu-pasu man jelma i doni enda.

Ibas ende-enden enda lit pengarapen gelah bangsa-bangsa si deban reh man Dibata raas pastuh ibas pimpinen Dibata gelah lit kedamen i doni enda (ay. 4-6). Kedamen ras kesejahteraan banci irasaken arah hasil taneh si ipasu-pasu Dibata (Im. 26:4), alu bage bangsa si deban banci ngidah ise Dibata siisembah bangsa Israel e. sebab lalit Dibata sideban si banci mereken keadilen raas kedamen bagi siibereken Dibata siisembah Israel (ay. 7-8). Pengataken bujur pemasmur e pe sekaligus ngingetkensa maka Dibata nge siempuna kerina sinasa lit, emaka labo mesera man baNa guna tetap masu-masu bangsaNa. Ras pe pasu-pasu/pemere Dibata man bangsaNa e la tergantung situasi/ kondisi si lit, enda terbukti amin pe bangsa Israel rusur erbahan si la ngena ate dibata taspi Dibata tetap masu-masu bangsa e ras ncukupken kerina siiperlukenna.

Arah mazmur 67:1-8 enda banci sisimpulken maka pertoton  ras pengarapen pemasmur ibegi Dibata, enda terbukti arah tulisen pemasmur si ngataken bujur man Dibata kerna kerina sienggo ialokenna ras bangsana. Selaku bangsa Dibata pe si lalap ngaloken pasu-pasu Dibata maka harus ka kita ngasup jadi pasu-pasu man kalak si deban. pemasmur ngakuken maka kerina pasu-pasu e rehna arah Dibata nari, e nge sebabna maka kerina manusia harus muji Dibata. Arah kai? Arah perbahanen ras tindaken si sue ras pertoton bagepe pengarapen siisehken man Dibata. Alasen Dibata masu-masu kita labo gelaah kita jadi meganjang rukur tapi gelah Dibata e itandai i doni enda. Muji Dibata labo cukup guna jadi alasen gelah Ia masu-masu kita, erkiteken adi terjeng muji saja lenga tentu kita ngelakoken sada perbahanen si mehuli iadep-adepen Dibata (terjeng i biber saja).[1]

Ibas bahan ogenta Joh. 14: 23-29, tambah tangkas man banta kai si harus ilakoken kita. Kekelengen enda me hukum dasar kalak Kristen (kalak si erkiniteken). Emaka ibas kai pe siilakoken kalak si tek man Jesus harus erpalasken kekelengen. Kerehen Jesus ku doni enda enggo ncidahken kekelengen Dibata nandangi doni enda, janah ibas Jesus ndalani kegeluhenNa pe icidahkenNa uga ia engkelengi manusia. Erkiteken Jesus enggo leben engkelengi manusia maka manusia pe harus engkelengi temanna manusia ras lingkungenna. Kerina sienda banci silakoken adi kita tuhu-tuhu ngikutken kai si iajarken Jesus, sebab kerina pengajaren siikataken Jesus rehna arah Bapa si i Surga nari. Arah kita nggit ngoge kata Dibata, tutus megiken pengajaren kerna kata Dibata, maka kita pe ijadiken pelaku-pelaku firman. Kita singelakoken kata Dibata e, maka Dibata pe ringan ibas kita (ay. 23-24).

Ibas proses kita ngoge kata Dibata ras megiken pengajaren kerna kata Dibata e tentuna lit nge keterbatasenta guna ngangkaisa. terlebih secara alami kita enda kalak perdosa sicenderung erbahan dosa. Emaka iblis pe banci saja mperdiateken kita janah ibahanna pikirenta buntu, la erpengangka kerna kata Dibata, pusuhta itutupina. Emaka Jesus ngatakenca maka reh me pagi Kesah si Badia sibakal ngajari dingen nampati ibas memahami kerna maksud ras tujun kata Dibata (ay. 25-26). Jesus pe ngataken maka iberekenNa me kemalemen ate (ay. 27) man banta, kemalemen ate siibereken Dibata e labo bali ras si ibereken doni enda. Kemalemen ate siibereken Dibata eme kesiapenta guna ngaloken kai pe si reh ibas wari-wari sipepagi, kai pe e, keriahen, kesusahen, kecedan ate, rsd. Dosa si lit ibas kita banci saja erbahanca kita mbiar, ragu, lalit kepastin tapi kemalemen ate sirehNa ibas Dibata nari ngasup menghalau si e kerina. Emaka kalak si tek man Jesus tentuna la aru atena amin gia Jesus lawes ndahi Bapa (ay. 28-29). Amin gia ibas zaman genduari la si idah Jesus e, tapi labo e erbahanca kita la yakin, ragu-ragu. Labo e erbahanca kita nungkun-nungkun “Lit kin Dibata e?”. sebab Kesah si Badia si tadi ibas kita tetap ngajari kita kerna Dibata.

Arah invocatio ibas minggu enda pe ipersingeti mulihi man banta kerna pertotonta. Ora et Labora et Ora, dahiken siitotoken kita janah totoken siidahiken kita. Ibas kita ertoto cataten man banta maka labo terjeng sura-suranta saja siisehken kita tapi ibas kita ertoto e pe harus ka lit gunana man kalak sideban, arah pemindonta ibas toto e harus ka termulia gelar Dibata. Emaka enda pe jadi perenungen si penting man banta. Bangsa Israel ibegiken Dibata pertotonna seh maka ia pe ndatken kemenangen, emaka gelah pertotonta pe tersehi pindokenlah si mehuli man Dibata. Reh tutusnalah kita ertoto tentuna alu pertoton si benar ras lakokenlah kai siitotoken kita e man Dibata.

Selamat Melayani ras mejuah-juah man banta kerina

Pdt. Julia Elprida Br. Ginting’s

(0853-6175-3339)

Melayani i GBKP Runggun Penen

Klasis Medan-Delitua

---

[1] www.gbkp-kjb.org/index.php?option=com_content&view=article&id=1042:khotbah-minggu-671-8-minggu-01-mei-2016-rotega&catid=85:khotbah-umum&ltemid=180