KITA IMENANGKEN ARAH PERBEBENTA

Khotbah Minggu 08 Mei 2016

Invocatio         : “Dage ola kam mbiar, sabab Aku kap raas kam” (Jesaya 43:5a)

Ogen               : Johanes 17: 20-26 (Tunggal)

Khotbah          : Mazmur 97:1-12 (Responsoria)

Tema               : Kita Imenangken Arah Perbebenta

Khotbah

bagin mazmur si jadi bahan khotbah ibas minggu enda termasuk kubas jenis mazmur Raja. maksudna mazmur enda igolongken kubas mazmur Raja eme erkiteken mazmur enda ngajuk kerina umat Tuhan guna patuh man Dibata selaku Raja si erkuasa, Ia me raja si berotoritas i doni bagepe i Surga. bagin mazmur enda banci ibagi jadi 3 bagin, mari sibahas bagin-bagin endaa sada per sada.

1.        ay. 1-6, nuriken kerna pengajuk guna ersurak nandangi Dibata si erkuasa ras Mulia

Bangsa Israel jelas kel enggo melala pengalamena ibas ngidak perbahanen Dibata si luar biasa. mulai pembebasen kalak enda ibas taneh Mesir nari si seh kel buena tantangenna. kenca enggo bebas pe iuru-uru pasuken Firaun denga ka kepeken. seh ku ambang batas tepi laut merah ije pe tangkas kuasa Dibata man kalak e kerina. ibas perdalanen bangsa e pe ku taneh kanaan icukupi Dibata kel kerinana. berekenNa manna ras leto guna pangan kalak e, sanga bangsa e muas banci ibas daeraah si kerah kel pe ipedaratna lau. secara manusiawi adi kita berpikir seharusna bangsa Israael e lanai bo lit dalinna guna nadingken Dibata, erkiteken kai? ilebe-lebe mata kalak e sendiri jelas-jelas terjadi perbahanen Dibata simbisa e. sangana bangsa Isarel pe merebut kota Jerikho, tempa-tempa mustahil kel, labo mungkin. la suruh Dibata kalak enda erperang tapi cukup ikelilingi saja ras rende. labo masuk akal situhuna tembok siikelilingi kalak enda banci roboh dengan sendirinya. adi enggo bage kel luar biasana perbahanen Dibata ilebe-lebe kalak e, me wajar nge tentuna pengajuk pemazmur gelah ersurak min bangsa e erkiteken kuasa Dibata e tuhu-tuhu tangkas man banta ras man gunanta. tapi ibas perdalinen sejarah, si eteh nge enggo ras-ras maka sejarah perdalinen kiniteken bangsa Israel e la berjalan alu mulus. berulang kali bangsa e menghianati Dibata.

uga kita gundari simegiken kata Dibata enda? teraloken kita kin nge pengajuk pemazmr guna ersurak e ntah lang? adi ersurak tentu labo terjeng gelah enggo ersora saja, tapi ersurak e teridah memang tuhu-tuhu ibas ekspresi ayonta. labo mungkin ersurak kita guna ncidahken keriahen ukur tapi ayonta e bentukna enggo bagi rimo mungkur. ma ieteh kita nge uga rimo mungkur, ringutna la tanggung. ibarat baju ndai kin enggo pe isetrika lalap la licin-licin. pake pe rapika, kispray ntah kai gia sidebanna gelah banci licin uis e, tapi lalap la licin. lalah kita pe enggo bage keadaanta gundari e? “menam-menam kuje nge e pandita.” engkai maka bage? “iyah…. lanai bo terturiken kerina e pandita. kam lenga bo ietehndu e.”

adi siukuri mbages-mbages lit kin kalak si nggeluh e lalit perbebenna? “Kalak adon ah me labo kai pe ukurina, emaka ia labo lit perbebenna”. kalak sibage jawabenna me aneh nge e situhuna, morah ka atena pergeluh kalak adon. lalah ia pe nggo sakit e teku ka. jelma sibage nge situhna si perlu man tambaren, engkai? erkiteken ibandingkenna kegeluhenna ras kalak adon ipinggir dalin ah, e erbahanca ia la ngasup ersurak ibas geluhna. e nge situhuna salah inganta erbanding-banding e.

payo memang, maka mawen-mawen ibas kita ngalaken perbeben kegeluhenta enda, tempa-tempa dalan buntu si ijumpai kita. lanai si eteh kuja inganta bergerak, enggo kicat kel tempa-tempa siakap banta. kata Dibata ngatakenca situhuna la bage. labo mungkin dalan buntu ibereken Dibata man kalak si ikelengiNa, tapi siiberekenna pasti dalan pulah, pasti solusi. tapi rusur erkiteken kita pe enggo erbanding-banding ibas pikirenta sendiri, maka siiarapken kita solusi/dalan pulah si reh e bagi si lit ibas pikirenta min. padahal dalan Dibata la bali ras dalanta manusia.

ay. 6a ngataken banta sendah “Langit ermomo kerna kebenarenNa….”. adi langit pe si la banci ngerana bagi kita enda nggit ia ermomo kerna kebenaren Dibata. tentu kita tinepaNa si sempurna aturna lebihen siibahan kita asangken si e.

2.       ay. 7-9, nuriken man banta kerna kesia-sian nembah Dibata sideban.

Perbeben e banci dua gendangna sijadi hasil man banta. lalit sada pe kita manusia e ermeriah ukur ibas ngalaken perbeben. Jesus saja pe anak Dibata tangis nge ia sanga ertoto i taman getsemani erkiteken seh me paksana Ia harus ngenanami kiniseran. tapi labo e erbahanca ia nggit tunduk man kuasa Iblis. sanga Jesus erpuasa 40 wari 40 berngi ibas wari si terakhir reh me si Iblis tempa-tempa mereken penampat, tempa-tempa perduli kel man Jesus. tapi amin gia bage kel Rayuan Iblis e labo tergoda Jesus guna nembah man bana. cuba saja sibayangken 40 wari la man la minem, pasti enggo kerah kel kalah-kalah Jesus, banci jadi biberna e pe enggo pecah-pecah erkiteken setaktak lau pe lalit mbencahi biberna.

Jesus pe lit nge Ia ngalaken perbeben. erkiteken doni enda memang ingan perbeben. tapi justru lit pe perbeben e banci Jesus menang. emaka kita pe uga gia keadaan ta, ntah sangana bas mata kin iluhta erkiteken kearun ate? ntah kinitekenta kin gundari sangana iuji? ntah pe sangana kam gundari iperlakoken la adil? banci ka pe perbeben e erkiteken kesehaten si semakin drop. ntah pe erkiteken sura-sura si la tersehi. kata Dibata ngatakenca ula e erbahanca la si jemak paguh kinitekenta. adi ndarami dalan ngeluk kita labo lit gunana. sebab adi tunduk kita man kuasa-kuasa si deban, nembah kita man kuasa si deban, kesia-sian ngenca siidatken kita. emaka situhuna responta ibas ngalaken perbeben e menentuken hasil si bakal idapeti kita. apakah e jadi bahaya man banta atau justru e jadi kesempaten man banta guna mpepaguhi kinitekenta man Dibata.

3.       ay. 10-12, nuriken man banta kerna uga respon Israel nandangi kuasa ras kemuliaan Dibata.

bangsa Israel si jadi saksi kerna kuasa Dibata, merespon perbahanen Dibata e alu cara : erciga ate kempak kejahaten, sebab memang kondisi ingan tading bangsa Israel paksa e ikelilingi bangsa-bangsa si la nandai Dibata. jadi perbahanen bangsa-bangsa si deban e pe tentu si la ngena ate Dibata. erkiteken si e ngen maka pemazmur ngatakenca “Cigalah atendu kejahaten…” guna ngajuk bangsa Israel tetap berusaha setia man Dibata.

nggeluh i doni enda memang labo nukah, melala beban siharus ipersan kita ibas geluh enda. guna ndatken serpi seh kel serana gundari e, si sekolah pe labo ka menukah iakapna menghadapi ujian-ujian, kerina hal i doni enda membutuhkan usaha, perlu bertindak. adi ertoto kita man Dibata gelah mereken banta rezeki si simpar erkiteken kebutuhen geluhta memang melala, banci saja erkiteken lit anggota keluarga si sakit tentu butuh biaya si melala, kredit baju si lenga lunas, angsuren pinjamen ku CU si perlu ibayari, tapi adi la beluh kita mengatur keuangenta pasti uga gia buena rezeki ibereken Dibata lalap nge la bias. adi bage keadaanna tentu asa ndigan pe la kita banci menang ngalaken perbeben e.

kerna kinitekenta pe bage nge, ibas kiniersadanta ras Dibata, ibas kita njaga hubungenta ras Dibata e nge si banci mereken man banta kengasupen guna banci kita imenangken arah Perbebenta. bagi lit dua kalak pendaki, erdalin ia duana guna ndaki sada deleng. sekalak antara ia maba sada kapak. reh temanna nungkun man bana “man kade ndu kin kapak ena?” reh simaba kapak ngaloi “guna nektek kayu ateku, janah kayu e kupake guna ngganti grobak motorku si enggo ceda. maka perlu kel aku batang kayu simersik. janah jenis batang kayu sibage turah ipuncak deleng ngenca ija angin simeterna rembus.”  bagi batang kayu e min aturna kinitekenta, ermeganjangna ia turah, ermeterna angin nderpa ia, si la megegeh banci mbulak, tapi si megegeh erteguhna urat-uratna. bagepe kalak si erkiniteken, perbeben ras kiniseran e ula min erbahanca bene kinitekenta tapi justru ermegegehna. janah pe tetaplah sijaga hubungen pribadinta ras Dibata sebab Ia simereken gegeh situhu-tuhu man banta.

Termulia gelar Tuhan arah kata Dibata enda. Amin

Selamat Melayani ras mejuah-juah man banta kerina

Pdt. Julia Elprida Br. Ginting’s

(0853-6175-3339)

Melayani i GBKP Runggun Penen

Klasis Medan-Delitua