Liturgi Nambari ose man orangtua

LITURGI KEBAKTIN ACARA MEREKEN KEHAMATEN RAS NEHKEN KEKELENGEN MAN ORANGTUA

(NAMBARI OSE)

I. Persikapen

     Rende PEE 85: 1-2

     1. Man bandu Raja Greja isehken kami bujur

         Kam kap sinjayamsa Geluh perpulungenNdu

         Pasu-pasuNdu Tuhan Kuse min bagi udan

         Maka serayanNdu idemi kuasaNdu

         Latih ia la mbiar ukurna tetap nggintar

         Kek’lengenNdu simper b’ritaNdu jadi mbincar

     2. Bahanlah min o, Tuhan erdolat serayanNdu

         Ngayu ras tersuan ngaloken pendiloNdu

         Ukur, pengarapenna man banNdu saja ngenca

         Tutus ras setia, kataNdu la tersia

         Lagu langkah mulia, e Kam si pesikapsa

         Tutus kel atena mbarken kata Dibata

II. Kebaktin

1. Votum      : Kebaktin ibas mereken kehamaten ras nehken kekelengen man orangtua enda ibenaken ibas gelar Dibata, Bapa si den kemulian, ibas gelar Yesus Kristus si jadi penebus ras ibas gelar Kesah si Badia sinemani ras nampati kegeluhen manusia.

     Salam       : Perkuah ate ras dame ibas Dibata Bapa ras ibas Tuhan Yesus Kristus nari, ibas kerembaken Kesah si Badia, ras kita (kam) kerina gelah. Amin.

     Perp         : Amin… Amin… Amin…

2. Introitus    : Mehamatlah man kalak si enggo metua, janah pehagalah Aku. Aku kap Tuhan (Im. 19:32)

3. Rende PEE 81 : 1,3

     1. Meriah ukur kami o Tuhan lias ateNdu si nggo tersuan

         Igejab kami kuasaNdu mbelin si erban kami krina terkelin

         Kam me kap si pegedangken umur man bandu kami ngataken bujur

         Kam me kap si pegedangken umur man bandu kami ngataken bujur

     3. ItampekenNdu umur si gedang rikut ka pe ras ukur si senang

         Bas dalin gelap ibreNdu terang Kam si erbanca kami pemenang

         Keleng ateNdu la kap nggo sirang KuasaNdu la kel kapen teralang

         Keleng ateNdu la kap nggo sirang KuasaNdu la kel kapen teralang

4. Berita kerna perbahanen Dibata Bapa, Anak ras Kesah si Badia

     Marilah sibegiken berita kerna perbahanen Dibata Bapa, Anak ras Kesah si Badia.

     Pengkh     : Adi kalak ersada ras Kristus, ia me tinepa simbaru, simale enggo lepas janah nehenlah si mbaru enggo reh. Kerina sienda Dibata erbahanca, maka arah Yesus Kristus, kita si gel-gel nari ermusuhen ras Ia, enggo ibahanNa jadi temanNa. Bage pe erkiteken Kesah si Badia me simereken kegeluhen man banta, emaka lagu langkahta pe arus rikutken peraten Kesah e. la banci meganjang ukurta, ntah sitokoh-tokohen, ntah pe sician-cianen. Terpujilah Bapa, Anak ras Kesah si Badia

     Perp         :Ha..leluya Ha.. leluya Dibata telu sada

5. Rende KEE 199 : 1,5

     1. Senang gundari geluhku ban Tuhan negu langkahku

         Kuja pa pe perdalanku tetap tanNa gelemenku

         Reff     : Tuhan nemani geluhku cikepNa tanku meteguh

                        Dibata pengndesenku ibas tanNa aku nggeluh

     5. Dimate tah nggeluh gia Kam Tuhan me netapkenca

         Lalit ngasup ngolangisa ‘di akapNdu nggo paksana

         Reff     : Tuhan…

6. Renungen/ Kata Dibata : II Samuel 19: 31-38

7. Pengakun kiniteken

8. Persembahen

     - nina Dibata kerna Persembahen : O, senina-seninangku, nginget perkuah ate Dibata si mbelin si isehkenNa man banta, kupindo man bandu, endeskenlah kulandu man Dibata saja selaku persembahen si nggeluh rikutken singena ateNa, sebab bage me arusna kam ersembah man Dibata sue ras biakNdu selaku makhluk si rukur. (Roma 12:1)

     Rende      : SEE 131 : 1-

     1. Pasu-pasu bas Tuhan nari gejabken kami teptep wari

         Bas paksa-paksa geluh kami Kam me kap tetap singkawali

         Pasu-pasu bas Tuhan nari jadi pergegeh tendi kami

         Guna ndalani wari-wari si rehna bas Kam Tuhan nari

         Reff     : Pasu-pasu dage o Tuhan persembahen kami anakNdu

                       Labo kapen enda metunggung

                       Persembahen si nggo pepulung

                       ajariNdu pe kami gelah min tetap ngasup mere manTuhan

     2. Buaten lit kami o Bapa gejabken kami Kam empuna

         Tanda ukur kami meriah endesken kami baNdu Bapa

         Persembahen enda o Bapa desken bunga ncole merimna

         Persembahen ateNdu ngena, bagelah akapNdu o Bapa

         Reff     : Pasu-pasu…

     3. Aloken min dage o Tuhan persembahen kami anakNdu

         Labo ban beluh kami Tuhan lako mere kuadepenNdu

         Pakeken min dage o Tuhan persembahen kami anakNdu

         Guna pebelangken kataNdu nandangi krina tinepaNdu

         Reff     : Pasu-pasu…

9. Ertoto Persembahen/ syafaat

10. Rende SEE 162 :1

     Yesus ulu kegeluhenku Kam me ngenca pengendesenku

     Lalap tedeh ate pusuhku kupehaga Kam bas geluhku

     O Tuhan pernehen pusuhku si ertedeh ate man baNdu

     Ku gelem pedah ras padanNdu kusembah kam ibas geluhku

11. Pertoton Tuhan/ Pemasu-masun

     Mulihlah alu dame ras mejuah-juah tetap tutus ras setialah ibas kinitekenndu janah alokenlah pasu-pasu idur Dibata nari : Tuhan masu-masu kuta ras jumata (ndu). Tuhan masu-masu kita (kam)maka kita (kam) ertuah, bayak, maka nterem pupusta (ndu), melala pageta (ndu), melala lembunta (ndu)ras biri-birita (ndu). Tuhan masu-masu sinuan-sinuanta (ndu)ras pangan siibahan ibas sinuan-sinuan e nari. Tuhan masu-masu pendahinta (ndu)ras ndemi lumbung-lumbungta (ndu)alu gandum. Ipasu-pasuna kita (kam) ibas negri si iberekenNa man banta (ndu) Amin (Ul. 28: 3-6,8)

Perp              : Amin… Amin… Amin…