KHOTBAH NGOSEI ORANGTUA

Nats   : 2 Sam. 19:31-38

ibas wari si sendah ilaksanaken me acara adatta ibas budaya nta kalak karo eme mereken kehamaten ras nehken kekelengen man orangtua (nambari ose). Tantangna kel seh berita kerna acara enda, rukur aku agak ndekah sitik, acara kai ka kin e? la pernah ku begi, uga turi-turinna pe labo kuteh. Saja lit turah ibas pikirenku, iyah adi nggo bage sura-sura keluarga mejile nge, si mehuli ndai nge, emaka ku-ueken me guna maba kebaktin ibas acara nta enda. Piga-piga wari selanjutna, rukur ka aku, kai nge ndia si banci ku peseh, kata Dibata si apai nge kubereken kari. Darami pe buku, labo kudat buku-buku si membahas ngosei itinjau dari segi Alkitabiah,labo lit e, labo perbah ku the buku si e. emakana jurus terakhir kubuka me buku Ranan Adat karangen Pdt. Sada kata Ginting, M.Th. ibas buku e, jelas kel ituriken kerna adat ta kalak karo mulai kin ibas bertin nari seh ku adat simate-mate. Emaka kubuka me halaman kerna ngosei enda, kubaca-baca emaka nggo ku dat kai makna situhuna ibas ngosei e.

Kepeken ngosei ningen e, labo e saja adat ta kalak karo si menggambarkan mereken kehamaten ras nehken kekelengen man orangtua, memang enda salah sada eme nambari ose, lit ka ia mereken ciken, kampil, tuktuk ras nggalari utang adat man kalimbubu. Emaka situhuna enda sura-sura anak nge nandangi orangtua ntah pe banci ikataken, enda nge jadi bukti sijelas ia kekelengen anak e man orangtua, janah ibas si e pe ertoto nge anak ras kempu bage pe ente ras entah adi nggo lit guna orangtua e gelah reh malemna atena ngepkep kerina anak-anak bage pe kempu enter as entahna.

Emaka biasana ibas ngosei e ngerana me anak sidilaki, “ersura-sura kami nambari uisndu gelah sambar perukurenndu jenda nari ku pudi, sambar reh ulinalah”.  Erkiteken memang biasana manusia adi nggo metua, reh megek-gekna nge ia, reh serana man katanken, sebab beluhen nge ia iakapna asangken kalak si deban si lebih nguda. Tapi memang tradisi/adat ta enda labo kepeken kita saja si lit adat ta bagenda, secara umum nehken kehamaten ras kekelengen man orangtua, mungkin carana berbeda tapi intina tetap guna sie ndai.

Ibas Tradisi kalak Kristen Alkitabiah lit ka nge tradisi si bage, eme mpehaga kalak si lebih tua. Eme ikataken kelompok tua-tua. Erkiteken kebijaksanna kelompok tua-tua enda ndatken penghormaten bagi nina introitusta ndai ibas kit, eme lit peranenna khusus ibas kelompok nggeluh kalak Israelb Ul. 19:32, janah pe sendalanen ras si e lit ka nge tanggung jawab ntah pe kewajibenna eme guna nurunken tradisi man kelompok kehidupan si lebih muda.

Arah bahan teks renungenta sendah, jelas kel ituriken penulis maka kepeken kalak si nggo metua enda lit perubahen ibas fisik bagepe penggejapenna. Ay 34 nina “…” mulai lit perasan pesimis ibas ndalani kegeluhen, jadi rikutken si e kalak si enggo metua lanai nggit bermimpi terlalu tinggi sebab akapna labo lit gunana. Kemampuan fisikna pe nggo mulai menurun, mulai kin pemegina enggo berkurang, penglihaten matana lanai bagi sigel-gel. Emaka kerna si e ibas ay. 35 nina “lanai kai pe banci erbahanca aku senang” sebab memang kemampuan fisik tentu mendukung kepuasaan akan sesuatu hal yang dinikmati.

Kalak si enggo metua nina ka pe tole indera pencecap pe enggo lanai berfungsi seiring berjalanna waktu, lanai teh na nanam pangan ntah pe inemen si entabeh. Sora kalak rende pe lanai etehna mbedakenca. Emaka rikutken si e iakapna enggo mulai me ndeher ia ku ingan pengadi-ngadina. Emaka sope lenga ka ia ngadap ku Dibata turikenna pemindon terakhirna, bagi Barsilai enda ndai turikenna pemindonna man Daud. Emaka Daud pe, amin gia ia raja tapi harus ia hormat nandangi Barsilai si ndauh tuaen asangken ia, janah patut memang ikabulken Daud me pemindon Barsilai enda.

Hal si luar biasa janji Dibata man kalak si enggo metua jelas tersurat ibas Yes. 46:4,”Aku kap Dibatandu, emaka kuembah-embah kam seh kam metua janah ubanen. Aku si njadiken Kam emaka kutatang-tatang, kuangkip-angkip janah ku kelini kam”. Luar biasa janji Dibata man kalak si enggo metua khususna kam orangtua kami sibakal iosei ibas wari si sendah, janah lit sada perlu terus iingetndu ibas kitab Mzm. 71, ije lit tersurat kerna uga patutna carana kalak sienggo metua ertoto, ula lupakenndu si e janah Dibatalah si tetap masu-masu kita kerina. Amin.