MERDANG IBAS GELAR TUHAN

Bahan Khotbah 28 Juni 2015 (Minggu Merdang)

Invocatio      : Bahan maka kalak si merdang dingenna tangis, banci rani alu ersurak (Mzm. 126:5)

Ogen            : Ulangen 33:13-17

Khotbah       : II Korinti 9:6-15

Kata Perlebe

Ope denga reh agama Kristen ku Taneh Karo, masyarakat karo mempercayai animisme ras dinamisme. Mbue kel ritual-ritual siilakoken guna ndatken keselamaten, bage ka guna mempertahanken ras melestariken geluhna. Ritual-ritual eme: upacara mindo udan, upacara erpangir, ras pe upacara merdang. Merdang eme salah sada kegiaten utama siilakoken ope denga nuan. Mulana kalak karo ibas ngelakoken kegiaten merdang enda maka ilakoken lebe sada upacara man beraspati taneh (dewa penguasa taneh) gelahna page siisuan tumbuh subur ras melimpah ka pe hasilna. Bibit page siisuan iumpamaken bagi sekalak anak diberu sibiasa igelari beru dayang. Gelahna beru dayang betah tading ibas juma, maka ibahan me inganna tading eme perbenihen (tempat persemaian). Perbahan serana ras erpengharapen kel kalak karo gelahna hasil peranin e banci mehuli ras melimpah maka ritual siilakoken harus tutus (biasana mereken persembahen sirih).

Pembagesi teks

Ibas mazmur 126 ilatarbelakangi kerna kalak Israel, ija ibas ayat pemena bangsa Israel ngataken bujur man Tuhan ibas ia enggo ngaloken pembebasen ibas taneh pembuangen nari. Tapi seh ayat 4-6 bangsa Israel kecewa kerna situasi sinyata terjadi, emaka erpengarapen kel bangsa Israel gelah Dibata simasu-masu kegeluhenna bage pe hasil sinuan-sinuanna. Perbahan enggo ibayangken, ija ibas sanga nuan-nuan, mulai kin kari merdang-rani mbue kel hal si terjadi terlebih kerna kebiaren gagal panen. Makana bangsa Israel mindo man Tuhan gelahna ipasu-pasu Tuhan kerina sinuan-sinuanna.

Ulangen 33:143-17, bagin enda secara khusus kata-kata terakhir Musa ope kematenna. Ibas bagin enda berisi “berkat” ntah pasu-pasu ija ia melihat nasib setiap suku. Menarik siperdiateken maka berkat enda irancang dalam rangka pujin yang mengangunggkan pemerintahen ras kemenangen Dibata Israel, bagepe kemakmuren man taneh. Ibas bagin enda (1-29) kerina suku ibelasken rikutken khusussenna masing-masing, kecuali Simeon (bd. Kej 49). Menarik kel siperdiateken maka kerina suku e ndatken pasu-pasu rikutken kecibalna masing-masing bagepe kekhususenna ibas tugas ras mata pencaharian (Lewi sebagai imam simabai umat e erpenandan man Dibata, Yusuf jadi Petani, Ishakar ras zebulon sebagai perbinaga). Lalit suku enda si la ipasu-pasu Dibata ertina maka karya ras pendahin kalak enda kerina iperdiateken ras ipasu-pasu Dibata.

Senada ras keadaan situasi bangsa Israel idatas maka Paulus ngatakenca kerna hukum tabur-tuai man perpulungen Korinti. Ija ibas sedekah enda perpulungen Korinti nggo mbue nampati ibas ndahiken dahin Tuhan, tapi Paulus ngingetkenca maka arah ras tujun penampat e labo terjeng mpenahangi baban kalak sideban (perp. I Jerusalem) tapi pe kai siibahanna e sada bagin pengataken bujurna man Dibata 9:12. Paulus nantang kalak enda maka bukti nandai Diabta eme kap keterlibatenna rikutken pusuhna ibas muat bagin ibas dahin keleng ate e (13). Penampat e jadi sada sarana pebelangken berita si Meriah jadi sada bagin saluren gelah kalak erpenandan man Dibata (14-15).

Pengkenaina

Adi kita mere persembahen gelah Dibata banci ngelakoken sesuatu guna kita, misalna gelah kita sembuh, gelah kita bayak, gelah kita sukses, bukankah hal sibage enggo bagi menyuap Dibata? kata memberi banci jadi merosot alu kata membayar. Tiap bulan kita ngeluansi iuren rekening listrik misalna , e labo ikataken memberi taspi keharusen ntah pe kewajiban. Persembahenta man Tuhan banci jadi merosot ertina adi ipandang sebagai suatu keharusan, kewajiban ras peraturen. Dibata engkelengi bagepe masu-masu kalak simere alu ukur meriah (Dibata sincukupken kerina keperluenta). Mere eme wujud pelayanen kasih, labo saja mencukupi keperlun kalak sideban tapi e sebagai bentuk pengataken bujurta man Tuhan. Alu mere maka kalak sdeban pe terpasu-pasu bage pe alu mere secara sukacita maka e sebage bentuk kesaksinta man kalak sideban.

Merdang kepeken labo terjeng nuan ijuma ntah pe erdahin i sabah. Tapi pe kepeken lit nuan ibas arti sideban “nuan kiniulin ntah pe merdang keleng ate”. Enda me siiumpamaken Paulus man perpulungen Korinti. Nuan keleng ate, mpenahangi baban kalak e ulihna ibas Dibata nari. Bukti kita erDibata tentuna kita megegeh erdahin, erbintuas ibas erusaha tapi ibas sisi sideban ngiit ka kita muat bagin ibas dahin keleng ate.

Merdang ibas gelar Tuhan. Kai pe dahinta, usahanta benakenlah e ibas gelar Tuhan. Adi ibenaken ibas gelar Tuhan tentu ulihna pe kari ibas gelar Tuhan ka nge.

Cl. Pdt. Julia Elperida Br. Gintings, S.Th

GBKP Rgn Penen