TUTUS ERDAHIN BIAK ANAK DIBATA

Bahan Khotbah Minggu 05 Juli 2015

Invocatio      : “Aku ngenca meteh sura-surangKu nandangi kam, eme gelah kam senang labo gelah cilaka. Rancanganku eme mereken wari si pepagi bagi siiarapkenndu” (Jeremia 29:11)

Ogen             : Kejadin 3:17-20 (Tunggal)

Khotbah       : II Tesalonika 3:6-12 (Tunggal)

Kata Perlebe

Selama piga-piga minggu enda kita i bimbing alu tema-tema mingguta kerna erdahin ras pengataken bujur. Tuhan erdahin arah pendahinta eme salah sada tema perikop minggu sienggo pernah iulas kita. Janah ibas bahan perikop mingguta sekali enda itegasken ka man banta kerina gelah tutus erdahin sebab e kin biak anak Dibata. Dibata ta memang enggo ngatur ras nikapken kerina siiperluken kita manusia tinepaNa tapi labo berarti kita banci bersantai ras berleha-leha nimai pemere Dibata e. tapi tentu guna ndatken kai sienggo isikapken Dibata e perlu ka perjuangen arah kita. Dibata keleng ateNa kita manusia emakana ididikNa kita jadi pribadi silebih mandiri ibandingken kalak si deban. Dibata la senang adi manusia tinepaNa terlalu bermanja-manja erkiteken pasu-pasuNa.

Pendalamen Teks

1.      Arah bahan Invocatio, maka sieteh nge kerina siterjadi i doni enda situhuna enggo nge irencanaken Dibata. tapi la ka banci kita berpikiran secara ekstrim. Misalna erkiteken siidah kalak si musil, sirayung jabuna, kalak sinarkobaan, labo berarti enggo itetapken Dibata ia ndatken hal si bage. Tapi Dibata nikapken melala rancangen man banta, janah selaku manusia sihakikatna bebas, maka kai siipilih kita ibas kegeluhenta akibatna pe enggo itentuken Dibata. Adi sinehen keadaan doni enda genduari, ija keadaanna labo ertambah cerah tapi ergelapna nge. Adi bage keadaanna lit denga kin masa depan si cerah, simehulina?

Tapi arah kitab Jeremia enda sieteh nge maka ibas masa pembuangen bangsa Israel ku Babel pe kepeken tetap ipelihara Dibata kegeluhen kalak enda kerina. Nabi Jeremia ernubuat man bangsa Israel arah surat kirimenna man tua-tua iantara kalak buangen, man imam-imam, man nabi-nabi bagepe man kerina rakyat sienggo iangkut ku pembuangen oleh Nebukadnezar, arah Jerusalem nari ku Babel. Sienda kerina erkiteken dosa bangsa Israel emaka ibuang ia kerina seh dekahna 70 tahun. Bangsa Israel harus ndiriken rumah, bekebun, beranakcucu ras ertoto man Tuhan guna kesejahteraan kotana. Amin bage gia siarus ilalui bangsa Israel tapi Dibata senantiasa nikapken masa depan cerah man bangsa Israel, emaka harus ia bertahan.

Yeremia 29:11, ngajarken kita gelah        :

1. tek man Dibata sebab wari sipepagi Ia empuna

2. Imani ras cikep teguh padan Dibata simereken pengharapen

Bage pe arah I Korinti 15:58, ngajarken kita gelah bekerja keras, khususna ibas erdahin di ladang Tuhan.

2.      Ogenta Kej. 3:17-20 umumna muncul penungkunen singkat eme erdahin e kutuk ntah lang?, janah pe enggo melala ka nge pembahasen kerna si e. adi siperdiateken kai sitersurat ibas kitab kej. 3:17-20 eme Dibata mengutuk taneh, tapi labo mengutuk pendahin simengusahaken taneh e. kutuk man taneh e erbahanca erdahin ras lingkungen pendahin e jadi lebih sukar tapi labo merenggut nilai erdahin e. Dibata engo leben mereken perentah man manusia guna erdahin sope lenga manusia e ndabuh kubas dosa. Jadi perentah guna erdahin e enggo lit ibas orde penciptaan. Dibata sendiri erdahin. Umpamana erdahin eme kutuk, tentu Dibata la menjalani kutuk. Tapi siperdiatekenlah Kej. 1, tep-tep kali Dibata erdahin njadiken sesuatu maka meriah ukurna erkiteken mehuli kerina, berarti iadepen Dibata erdahin e me hal simehuli.

Erdahin labo kutul tapi pasu-pasu. Dibata sendiri erdahin, ras ipilihNa ka kita pe guna jadi rekan KerjaNya i doni enda. Tentu sada kebahagiaan man banta erkiteken banci siresponi pilihen Dibata guna jadi temanNa erdain. Pengerana 3:22 nina, Erkiteken si e kugejabken maka la lit siterulin seakatan nggeluh ermeriah-meriah ngenanami ulihta latih, sebab eme sikerajangenna. Terjemahen bahasa indonesia lebih tegas ngatakenca “Aku melihat tidak ada yang lebih baik bagi manusia daripada bergenbira dalam pekerjaannya, sebab itu adalah bahagiannya”. Arah dua bahasa enda terjemahen bahasa indonesia lebih cenderung mengena kubas temata minggu enda, erkiteken ibas kita erdahin e nge terindah selaku biakta anak Dibata.

3.      II Tesalonika 3:6-12, Paulus mpersingeti kalak Kristen si kisat erdahin, ntah pe ngarapken perkuah ate kalak sideban saja. Paulus mpersingeti alu tegas, maka adi kalak si la erdahin, ula min ia man. Selaku sekalak perberita si meriah si berhak ndatken upah, Paulus la ngarapken si e saja. tapi ia rela erdahin, bekerja keras guna kegeluhenna, alu bage ia mereken teladan si nyata kerna semangat erdahin.

Ayat 6 “Sirangindulah kerina si perkisat” arah tulisen enda Paulus ngingetkenca maka labo berarti la banci kita erteman ras kalak si perkisat. Tapi lit siperlu man jaganta eme gelah ula min kita terkontaminasi sifat perkisatna. Rasa malas banci saja menyerang kita tapi kita banci nulaksa. Adi kompromi kita ras kemalasen e erbahanca dahinta tertunda, gagal ras pe kalak sideban lanai tek man banta. Ayat 7-9 “labo kami perkisat...” selaku Rasul singelai Perpulungen Tesalonika situhuna berhak me Paulus, Silwanus ras timotius guna datken upah. Tapi si e la inomorsadakenna. Erkiteken selaku Rasul kalak enda pe harus encidahken teladan (walk the talk), la terjeng ngerana tapi ndalankenca. Ayat 10-12 “Kalak si la nggit erdahin ola bere man...” alu erdahin tentu datken hasil guna banci ncukupi keperlun geluh termasuk guna pangan. Adi kalak si la erdahin tentu la ndatken kai pe, man kalak si bage Paulus ngatakenca ula min ia man. Persinget enda labo itujuken man kalak si lanai ngasup erdahin tapi man kalak si langgit erdahin.

Pengkenaina

Guna ngusahaken ras memelihara doni enda, sipertama ibereken Dibata man Adam eme dahinna labo ndeharana. Manusia ipake Dibata guna mengelola doni enda alu mehuli. Situhuna erdahin alu tutus labo guna ndatken hasil, duit, sebab adi bage tentu lalit nilaina kegiaten sosial. Erdahin banci meneguhkan harga siri sesorang. Kalak si lalit pendahinna, tentu labo pang ngangkat takalna alu tegak, mela nge iakapna janah pe sekaligus ka turun harga dirina. Adi bage berarti sifat mekisat tuhu-tuhu sangat memalukan.

Alu semangat tinggi, anak Dibata harus erdahin, ngelaksanaken tugas masing-masing alu ketutusen, berusaha ndahikenca alu sebaik-baiknya, labo sekedar gelah ndatken upah saja tapi alu kesadaren penuh maka memang e enggo jadi tugasta manusia, guna jadi wujud tanggung jawabta selaku tinepa Dibata. alih-alih menjadi beban atau tanggungan orang lain, biarlah melalui pekerjaan kita, justru banci kita nampati kalak si deban si membutuhken.

Alu erdahin maka siikuti me teladan Dibata, bagi siikataken tema nta “tutus erdahin biak anak Dibata”. Dibata erdahin njadiken langit ras doni, mereken nafas kehidupan, mereken semangat ras pe gegeh man banta. Tep-tep wari Dibata ngerancangken damai sejahtera bas kegeluhenta ras mereken pengharapen. Ibas erdahin pe lit waktuna ngadi, istirahat (Kej. 2:3) erdahin terus menerus, terlalu memaksaken diri justru erbahanca kita cenderung ngelakoken kesalahan tapi malas erdahin pe labo ka lit gunana. Erdahin alu sepenuh hati labo alu setengah hati. La munafik, la alu terpaksa, tapi alu meriah ukur alu bage konsentrasi, motivasi, kreativitas ibas erdahin pe lebih baik.mari gunaken O2H otak, otot, hati ibas kita erdahin. Seh maka si persembahkenlah pendahinta guna kemuliaan Dibata. 

Cl. Pdt. Julia Elperida Br. Ginting

GBKP Runggun Penen – HP: 085361753339