DIBATA ERDAHIN ARAH PENDAHINTA

Bahan Sermon Khotbah Minggu 07 Juni 2015

Invocatio      : “Kalak malas la pernah seh sura-surana, tapi kalak si erdahin alu tutus ndatken untung si mbelin” (Kuan-kuanen 12:27)

Ogen             : Johanes 6:25-27 (Tunggal)

Khotbah       :Kuan-kuanen 6:6-11 (Anthiponal)

Tema             : “Tuhan Erdahin Arah Pendahinta”

Kata Perlebe

Erdahin ras terus erdahin, ndigan ngadina? Sada penungkunen si rusur ibegi kita. Lit kalak ngatakenca maka ia harus erdahin seh metua adi lang sea-sea me kegeluhenna, sebalikna lit ka singatakenca adi kita kita erdahin lalap seh metua, ndigan kita santaina?. Lit kalak si erdahin mulai pagi-pagi, ciger, keraben seh berngi, la ia ngadi-ngadi. Kenca enggo reh pinakit man bana emaka ia ngadi erdahin. Janah hal silebih ekstrim eme labo dalih kita erdahin terus seh mate si penting eme uang masuk. Adi bage berarti ndarami hasil kita lalap ndigan sinikmati ulihta encari e?

Payo tuhu kita harus erdahin guna bertahan nggeluh, menyambung hidup. Payo tuhu kita harus erdahin guna ndarami nafkah guna ncukupi keperlun keluarga, ndehara ras pe anak-anak. Pustaka si Badia pe ngatakenca alu tegas mka “adi sekalak si la erdahin, ula padah ia man”. Lalit kata “kisat” ibas kamus nggeluh kalak Kristen. Adi sioge pustaka nta maka sidapeti me maka Dibata milih kalak si sangana erdahin. Dibata la nggit make kalak perkisat, la pernah ngena ateNa man kalak si la nggit erdahin. Kita erdahin labo guna ncukupi keperlun geluhta saja tapi pe guna nggejabken uga Dibata pe erdahin ibas pendahinta, kai gia profesi nta.

Pendalamen teks

Ogen      : Jesus meteh maka kalak si enterem ndarami ia guna ndatken pangan ras inemen saja, sebab Jesus edenga kel erbahan tanda sengget mere man 5000 kalak alu 5 roti ras 2 nurung. Kejadin enda ngingetken kalak kalak si enterem e kerna kegeluhen leluhurna bangsa Israel sanga i padang gurun. Sanga bangsa kelihen, Dibata nereken manna seh besur. Eme latar belakangna engkai maka tanda sengget siibahan Jesus e jadi berita menarik. Enterem jelma ndarami ras njumpai Jesus eme kerna kebutuhen doni, kebutuhen jasmani.memang kebutuhen jasmani perlu tapi labo siutama, adi “nggeluh guna man” enda ertina maka manusia kegeluhenna berputar-putar sekitar man-nggeluh-erdahin-man. Erdahin guna man ras erdahin guna nggeluh, emaka la kita heran engkai maka manusia nukah kel bosan. Bosan man, bosan erdahin ras pe bosan nggeluh. Jesus erbahan tanda sengget e memang erbahansa kalak si enterem e besur, tapi Jesus la nggit adi kalak enda ngadi ibas rasa besurna saja. adi terjeng seh je saja maka kalak enda situhuna pasti melihe ka mulihi. Jesus erbahan tanda sengget e gelah kalak sienterem e tek man Dibata. ay. 27 “Ola carken pangan sibanci melengas...” maksud Jesus ijenda eme gelah kalak enda kerina erdahin guna ndatken kegeluhen sirasa lalap.

Mesera sitik guna ngangkaisa kerna Jesus merawa man enterem jelma si enggo berusaha ndarami ras njumpai Ia. sitik pe jelma sienterem e la ndatken simpati Tuhan Jesus. Enda sada koreksi simendasar ras keras ibahan Jesus guna keselamaten kalak sienterem e. kalak si enterem e ndarami Jesus la perban tek kerna kerina tanda sengget sienggo ibahanNa tapi guna beltekna. Jangan-jangan kita selaku kalak si tek pe sangana ndatken koreksi ibas Tuhan nari. Koreksi kerna motivasinta ibas erdahin. Lit kin kita erdahin kerna motivasi materialistis? Adi e sijadi motivasinta, maka perlu siperobahi e ku motivasi si benar. Pengajaren Jesus kerna pendahin situhu-tuhu eme “Tek man Bana” ertina kinitekenta man Dibata harus jadi dasar kerina kegeluhenta ras pe pendahinta. Kita erdahin labo guna ipertanggungjawabken man manusia. Tapi man Dibata. alu bage motivasinta erdahin eme gelah arah geluh ras pendahinta, gelar Dibata ipermuliaken.

Khotbah                      : kitab kuan-kuanen enda merupaken kitab pengajaren. Ibas kitab kuan-kuanen enda melala isina berkaiten ras pengajaren khususna pe pengajaren si berkaiten langsung ras kegeluhen manusia. Banci sikataken maka kitab kuan-kuanen enda merupaken pengajaren praktis ibas kegeluhen kerina manusia, anak-anak seh kalak dewasa. Emaka kitab kuan-kuanen enda seh pentingna guna ioge kita selaku kalak sierkiniteken. Kerina pengajaren ibas kitab enda merupaken “Firman Tuhan”. Pengajaren kerna penyataan Allah ras kesaksin kerna Dibata ras sura-suraNa. Bagepe pengajaren ibas kitab enda mabai kita kubas cara nggeluh si erkemalangen man Dibata.

Terkhusus kerna bahan khotbahta kuan-kuanen 6:6-11, enda sada pengajren kerna kegeluhen manusia ibas erdahin. Kritik siibereken penulis kitab enda eme ula kita jadi kalak perkisat, kalak si la nggit erdahin. Sada hal si cukup menarik ibas kitab kuan-kuanen 6:6-7 eme perkis. Sieteh maka perkis amin gia lalit pemimpinna, ibas ia erdahin pe lalit pengawasna tapi erdahin ia alu tutus. Enda teridah arah ia erdahin ibas ncukupken panganna ibas paksa perlego guna persediaan panganna ibas paksa perudan. Arah perkis enda, ngajari kita gelah ngasup nggkuasai diri (menjadi pemimpin diri sendiri), ketekunen (ketutusen), ras gelah ola jadi kalak perkisat. Kalak perkisat arus erlajar man perkis. Em bentuk kritik siibereken penulis man kalak si kisat ibas kai pe, si la nggit erdahin. Ibas kitab kuan-kuanen 6:11, alu tegas ngatakenca man banta maka biak kalak si perkisat enda mabai kalak ku kemusilen (...tupung ia tunduh rempet kemusilen nindih ia...).

Pengkenaina

Ibas kitab kuan-kuanen kerna kalak perkisat lit 2 ciri-ciri utamana:

1.      Nggit tertaren-taren ibas ngerjaken kai pe (Kuan. 6:9-10; bnd kuan. 20:4)

2.      La ndahiken seh dung kai si enggo idahikenna (kuan. 12:27, invocatio).

Ibas ogenta pe melala kalak si enterem ndarami Jesus erkiteken tanda sengget siibahan Jesus saja. ertina jelas maka kalak si enterem e ndahi Jesus labo perbahan ia tek. Sienda sierbahansa kita berorientasi kepada mujizat siibahan Jesus labo kerna penandaita Jesus e. adi kita berorientasi ku tanda sengget siibahanNa saja maka tep-tep lit kesusahen pemindonta man Dibata eme gelah pulah ibas kiniseran e, labo simaknai kai situhuna rencanan Dibata ibas kiniserna si terjadi e.

Adi bahan ogenta enda sikaitken kubas erdahin, melala kita gundari erdahin gelah pedas bayak, gelah melala erta-erta, rsd. Kedungenna alu segala macam cara si lapayo iakap Dibata pe sipake. Ibas I Tim 6:10,”Sabab merangap nandangi duit eme sumbul kerina kejahaten”. Tujunta erdahin pe labo guna empermuliaken Dibata arah pendahinta. Tapi hal siterutama eme uga kita banci nggejabken maka Dibata pe erdahin ibas kerina pendahinta sitentuna guna kiniulin kegeluhenta, janah kita pe harus erdahin guna mpermuliaken Dibatanta. Prinsip utama ibas kita erdahin pe tentuna eme “alu erkemalangen man Dibata”. kai pe profesinta ras kondisi nta tapi Dibata ngarap gelah kita ngutamaken Ia ras pe. Tedeh ate Dibata gelah kita ikut melobatkan Ia, nungkun man Bana, ibas kerina tindakenta terkhususna pe ibas kita ngelakoken pendahinta.

Dibata enggo merancang kita guna erdahin labo guna bermalas-malasan. Karir ntah kai pe pendahinta eme aktivitas ilahi siarus icerminken kita guna kemuliaanNa saja (Kol. 3:23). La perduli kita enda karyawan biasa, supervisor, manager, direktur ntah pe perjuma, tapi harus sipake kerina macam profesinta enda guna ngataken bujur man bana kerna profesinta e. la jungut-jungut, la iri hati, la rusur nyalahken kalak sideban kerna pendahinta. Dibata la tertarik kerna pangkat ras jabaten adi la kin ia ikut silibatken ibas pendahin e. tapi Dibata tertarik nandangi anak-anakNa si melibatken Ia ibas kerina pendahinna. Ingetlah kai pe profesi ras pendahinta, Dibata pe erdahin ibas si eguna njadiken kita takal labo ikur.