Ngaturken Kiniliten Alu Mehuli

BAHAN KHOTBAH 23 JULI 2017

Invocatio : “Sipeduaken bali ras si ndai eme,”kelengilah temanndu manusia bagi kam ngkelengi dirindu” (Matius 22:39)

Ogen : Matius 14: 13-21 (Tunggal)

Khotbah : Kejadin 41: 47-49 ; 53-57 (Tunggal)

Tema : Ngaturken Kiniliten Alu Mehuli

KHOTBAH

Perpulungen si ni kelengi Tuhan, Kejadin ntah pe peristiwa si jadi bahan oratenta enda nuriken uga kepiawaian Jusuf selaku orang kedua i Mesir ngaturken pangan nandangi bangsa Mesir. Jelas ndai ituriken Pustaka Si Badianta maka lit pitu tahun dekahna riba-iba hasil juma, janah kenca si e lit ka 7 tahun dekahna masa kelihen si mesangat i belang-belang Mesir bahkan ngkenai krina ingan (ay. 57). Kepentaren Jusup enda teridah ibas ia mpepulung pangan sanga paksa riba-iba, ay. 34 nina “Pepulung seperlima ibas ulih peranin”. Adi matematikana, bicara ulih peranin e 100kg ertina seperlima dari 100kg arus isimpanken guna jadi stok pangan paksa kelihen. Adi arah 100kg ibuat seperlimana berarti me hanya 2 kg kel sisisihken. Akap kami sienda labo nguraki kal nandangi simada peranin e. tapi kepeken erkiteken buena juma i taneh Mesir, janah memang pendahin kalak Mesir e biasana Agraris, ntah pe bercocok tanam, adi lang ermakan biri-biri. Emaka ibas tep-tep juma ibuat Jusup seperlimana janah isimpanna ku Lumbung. Pustaka Si Badianta ngatakenca buena pangan siipepulung Jusup e enggo bali ras kersik buena emaka lanai isukati pe. Sibayangken saja uga kin buena kersik, isekin banci mbeligaisa sada per sada, bage me buena ulih peranin siipepulung Jusup e. emakana payo kepeken Hukum Menabung nina, “Sedikit demi sedikit lama-lama menjadi bukit”.

Pernah oge kami sada artikel kerna sekalak perbapan simehantu kal ngisap. Biasana ibas sada wari banci isapna e 3-4 bungkus buena. Emakana ibas artikel ah ndai ituriken maka perbapan e ibas November 2015 ertekad me ia ngadi ngisap. Ibas ia ngadi ngisap ndai isimpanna me sada wari Rp.20.000 (ianggap nukur isap). Bage me tiap wari ipepulungna, seh sada tahun setengah arah sen Rp. 20.000 ndai  terpepulung me akhirna Rp. 10,8 juta. Bage me carana maka kedungenna tertukurna sepeda motorna. Enda situhuna cerita inspiratif man banta segelah lebih beluh min kita mengelola keuangenta guna hal-hal si positif. Mungkin Rp. 20.000 mbuesa siakap. lit ka sada perbapan ia ras anak-anakna (lit 3) menabung 2000 per hari. Emakana kenca 3 tahun ikira kalak e me sen tabungenna siimpanna ibas kardus, kepeken epe amazing, hasilna seh Rp. 15.670.000,- arah sen e ka me ibabana ku dealer tukurna ka motorna mbaru, sada fenomena enda situhuna nukur kereta erga 15 juta lebih alu sen 2000-an. Maksud kami nuriken artikel sienda ndai kerina segelah sipake min prinsip pengaturen keuangen simehuli ibas kegeluhenta.

Bagi Jusup e ndai, ibas Masa riba-iba labo idayakenna kerina ulih peranin kalak Mesir tapi isimpanna ku Lumbung ibas tep-tep kuta. Seh makana amin gia reh pe paksa kelihen sipitu tahun, bangsa Mesir lit persediaan panganna segelah ula ia kelihen tapi tetap tercukupi kebutuhen panganna. Lang bicara la isimpan Jusup ndai seperlima ulih peranin ibas masa Riba-riba, idayakenna saja kerina tentu melala duit kalak Mesir. Tapi kenca reh paksa kelihen e, tentu duit si melala e pe lanai bo lit ergana. Emakana erkiteken kelihen e ndai seh kal mesangatna, negri-negri sekitar per eh ku Mesir guna nukur pangan. Ma tentu hal si menakjubkan enda, padahal seperlima kel ngenca isisihken tapi banci kedungenna mencukupi keperlun kerina bangsa Mesir bahkan Negri sideban pe banci ka nukur kuje.

Ulanai min kita bagi peribahasa, “Lebih besar Pasak dari pada Tiang”. Tapi mari siusih Prinsip kalak Tionghoa, kalak Tionghoa Misalna gajina 2 juta, guna keperlun geluhna misalna 500 ribu. Emaka tiba masa naik pendapatenna, kebutuhen geluhna tetap nge 500 ribu, selebihna ipake untuk ersenang-senang ras isi jabuna. Liburen ia, meriah akapna sada jabu, tentu keharmonisan pe tercipta ibas jabu e.

Megati memang ibas kita ngaturken keuangen ibas jabuta, jumpa kendala. Bagi Murid-murid Jesus ndai, “Kamlah mereken nakanna” nina Jesus. Kalak sipulung nterem si lit 5 ngkibul roti ras 2 ikan ngenca. Tapi Prinsip siiajarken Jesus pe banci jadi pembelajaren man banta eme ula kita terfokus man kurangna tapi terfokuslah kita uga carana cari lebih. Ma e nge siiterapken Jesus seh maka banci iba 12 Sumpit.

Adi beluhlah kita ngaturken keuangen/ kiniliten ibas jabuta alu mehuli, tercukupi kebutuhenta, anak-anakta pe tercukupi kebutuhenna, ambah si e tersisihken kita ka lebihna guna tabungenta. Tentu pe e, banci ka sipergunaken untuk nampati kalak simembutuhken. Invocatio ta nina “Kelengilah temanndu manusia…” engkelengi labo bias terjeng belas-belas saja, tapi harus rikut e raas perbahanen. Sicidahken man kalak sideban bahwa kita pe kepate guna nampati ia ibas keperlunna. Labo hanya kata saja rusur sibelasken “Keleng teku kam”. Tapi la lit aksi nyatana. Yakin aku bicara ikataken Perbapan e man ndeharana “Keleng kal ateku kam” tapi la pernah sekali pe lit ibereken ndu keperlun dapur ku rumah. Pasti labo tek ndeharandu e man bandu.

Perbahan si e, man banta kerina ngawan ni perpulungen Tuhan. Mari mulai genduari siaturken kerina kiniliten ibas jabuta masing-masing alu mehuli, seh maka arah kai si lit ibas kita e pe banci ka sipakeken guna nuduhken kekelengenta nandangi teman-temanta si deban. Dibata simasu-masu katana ibas pusuhta sekalak-sekalak, Amin.