JADILAH USIHEN BAGI KRISTUS

Bahan Sermon Khotbah Minggu 06 Agustus 2017

Invocatio    : “Geluhku jadi usihen man nterem kalak, sabab Kam kap pengawalku si megegeh” (Mzm. 71:7)

Ogen          : 2 Kronika 15: 9-15 (Tunggal)

Khotbah     : Roma 15: 1-8 (Responsoria)

Tema          : Jadilah Usihen Bagi Kristus

1.      Adi sioge Roma 15:1-13, Paulus ngajuk kalak sierkiniteken gelah mpermuliaken Tuhan. Ibas ayat 9, lit alasennta mpermuliaken Tuhan, erkiteken perkuah ateNa.

2.      Lit istilah simegegeh ras si la megegeh. Ibas ngaloken Kristus, kita masuk kubas proses pertumbuhen kiniteken siberbeda-beda, seh maka lit si nggo megegeh, lit si lenga megegeh. Ibas ay. 6 kita ituntut alu ersada sora banci muji Dibata. Kita harus sada sora amin gia labo seri (erbage-bage). Ay. 1, si megegeh arus nampati kalak si merampek kinitekenna. Masalahna: ngasup ngaloken, carana? Lit ibas ay. 2 arus mperdiateken temanta manusia janah ngukuri kai simereken kiniulin man bana gelah alu bage erteguhna kinitekenna. Labo menukah guna mperdiateken kebutuhen kalak si deban, labo terjeng kebutuhenna tapi rusaha erbahansa meriah ukur kalak si deban. sisampat-sampaten ibas persadan, tapi persadan siibutuhken ijenda labo terjeng bagi sapu lidi, siipersada alu nali. Ntah pe kita manusia siipersadaken ibas sada organisasi. Tapi kita perlu persadan bagi anyaman, bagi amak siibayu, seh maka meteguh ia erkiteken erkawiten sada ras sideban, berbeda ras sapu lidi.

3.      Roma 15: 6-7, Tuhan ngaloken kita, Tuhan la mbedaken kita alu ngenehen warna kulit, Tuhan la mbedaken kita erdosa ntah lang, kerina kita ialokenna. Kita kerina seri iadep-adepen Dibata. Rasul Paulus ibas ay. 6 erpengarapen gelah kerina kita ersada sora. Dibata la nggit kita ersada ibas hal siateta ngena saja misalna : golongen tertentu, ajaren gereja tertentu, rsd. Kita banci berbeda-beda tapi kita harus ersada sora ibas nembah Dibata.

4.      Sikap kita ibas saling menerima, merangkul, ras saling mperdiateken merupaken implikasi arah kinitekenta. Merupaken bukti bahwa kita tuhu-tuhu nandai Dibatanta. Tentu sikap enda berbeda ras hal duniawi. Kelompok kalak si mengkonsumsi narkoba kadang-kadang teridah lebih kompak ibandingken persadan kalak sierkiniteken.

5.      Ay. 7 merupaken sada aplikasi gelah kita banci ngaloken sada ras sidebanna, tentuna tetap guna kemuliaan Dibata. Alu sikeleng-kelengen, ngasup ngaloken kalak sideban, kita mpetandaken Kristus man kalak sideban. Saling menerima adalah sikap yang harus dimiliki orang Kristen, karena itu merupakan perintah dari Tuhan, erkiteken kita ialoken Dibata, kita la berhak menolak kalak sideban.

6.      Ibas kita jadi teladan nandangi kalak sideban, tentuna arus lit keleng ate ibas kita. Memang tanpa keleng ate pe banci saja kita ncidahken perbahanen si mehuli, sikap si terpuji tapi tanpa keleng ate sirehna ibas Dibata nari si e kerina sia-sia. Kekelengen sirehna ibas Dibata nari nge si arus jadi landasen ibas jadi usihen man kalak si deban. 

Selamat  Melayani ras Mejuah-juah man banta kerina

Pdt. Julia Elprida Br. Ginting, S. Th (0853-6175-3339)

Melayani di GBKP Runggun Penen

catatan :

adi lit tambahen ntah pe masukenndu

guna kiniulin Blog enda, banci i masukkenndu ibas

kolom Komentar