Erlebuhlah Man Yesus

Khotbah Minggu 22 Februari 2015

Introitus          : Marilah kam silatih janah beraten, maka kubereken pengadi-ngadinndu (Matius 11:28)

Ogen               : Markus 1:9-15 (Tunggal)

Khotbah          : Mazmur 25:1-10 (Responsoria)

Sijadi bahan perenungenta minggu enda mulai arah introitus, ogen bage pe khotbah, teluna enda saling melengkapi. Introitusta ngatakenca “…”Jesus sendiri singataken kalimat enda. Kata-kata Jesus enda banci ikataken jadi sada undangen simanis siitujuken man kerina jelma si latih ras beraten erkiteken perbeben nggeluh, ntah pe erkiteken beban dosa sendiri. Alu cara reh ndahi Jesus, jadi hamba ras pe naati kerina perentahNa maka manusia banci ibebasken arah arah kerina beban si la teratasi kita, janah pe bereken Dibata ka inganta ngadi. Alu ngendesken kerina dirinta ku Dibata maka ibereken Dibata pe kesah si Badia guna nuntun kita, uga kita harus ndalani kegeluhenta i doni enda. Sebab sada pe kita e labo meteh kai si bakal terjadi man banta ibas wari si pepagi. Rencana siisikapken kita pe, siakap ngenca mehuli akap Dibata lenga tentu. Jesuslah simeteh kai sibakal terjadi man bana ibas Ia ndalani nggeluh i doni enda.

Ogenta ngajuk kita ngenehen sanga peristiwa Jesus iperidiken ras icubai Iblis. Ibas ayat sebelumna Markus 1:4, nina “Jeralah maka kam iperidiken, gelah dosa-dosandu ialemi Dibata”. pengakap ibas paksa si e, lit singatakenca maka kalak si erdosa nge maka iperidiken, gelah ibersihken nge ia ibas dosana nari. Tapi ibas peristiwa enda, Jesus labo erkiteken ia erdosa maka ia iperidiken, tapi justru arah peridin e ertina maka Jesus nggit mpeteruk bana ras nggit jadi korban penebusen dosa. Janah memang luar biasa kel kenca iperidiken ndai Jesus e rempet terbegi sora i surga nari, ay.11 “…” jadi arah si e berarti memang peridin e labo main-main. Arah peridin Jesus itegasken maka Ia eme anak Dibata. janah kenca dung Ia ngaloken pe kepeken ije me awalna reh Buena permasalahen man bana. Kenca dung Ia iperidiken maka Ia icubai Iblis.

Enda pe jadi sada perbandingen man banta, kepeken kenca kita ngaloken tanda keselamaten ibas Jesus nari, labo e ertina maka kegeluhenta enda pasti bakal senang-senang saja. tapi justru kenca kita ngaloken tanda e, justru e me jadi awal kerina kesusahen nggeluh enda bakal nderpa kita.

Bahan khotbahta ibas Mazmur ndai jelas iturikenna uga ia, pemazmur tuhu-tuhu memang erpengendes man Dibata. ibas ay.1 jelas ikatakenna “Man bandu Tuhan ertoto aku” ibas konteks enda pemazmur ertoto man Dibata labo erkiteken rutinitas saja, tapi memang gejabkenna lit kesalahenna emaka turikenna kerina kesalahenna e man Dibata. ay.2 lebih jelas ka nina “Man bandu aku ernalem o Tuhan”, berarti ijenda lit penyerahen secara total. Total e ertina menyeluruh, la setengah-setangah, la sepertelu, la seperempat, tapi kerina hal iendesken ku Dibata. ibas pemazmur erpengendes ku Dibata lit keyakinen na maka memang labo gel-gel wari e, labo terus nge kari arah teruh, labo lalap gelap wari e, pasti lit ka nge terangna. Bagi kalak si jaga malam, lit keyakinenna maka pasti terbit matawari, janah terang na e mahanca lalit kegelapen.

Adi silenga totalitas erpengendes man Dibata pasti nungkun-nungkun denga nge ia bas pusuhna “Lit kin Dibata e?” padahal ibas kita erpengendes, ibas kita ngelebuh ku Dibata e bagi siikataken tema labo banci bagi sigetep lacina, tetap lit prosesna. Pemazmur pe ertoto nge ia lebe, kenca bage memang tuhu-tuhu ia 100% erpengendes, janah pe ibas ia erpengendes lit keyakinenna man Dibata maka pasti lit serpang pulah emaka nimai jawaban Dibata e pe harus tetap optimis.

Situhuna persoalen manusia man kemelanken nge man Dibata, sebab persoalenta e rusuren kerna pangan, inemen, sen, erta-erta, juma ras pe kurang iperdiateken kita misalna. Amin bage pe, Dibata tetap nggit nampati kita. Kerina persoalenta sibage ndai rupana enggo leben ialami Jesus ibas Ia icubai iblis.

Jesus icubai labo ibas hal simudah, ia ituntut gelah tetap ibas kemanusiaanNa siutuh, la ncidahken kuasa si luar biasa alu erbahan tanda-tanda sengget, gelah kai? Gelah memang tuhu-tuhu terbukti maka Jesus e tuhu-tuhu manusia 100%. Hal kerna pangan, penting kel man manusia, Jesus enggo leben inanamina la man 40 wari, 40 berngi, hal kerna jabaten/kuasa simenggiurkan ras pe menggoda kita rusur, enggo ka leben ialami Jesus, tapi banci italukenNa sie kerina.

Emaka perbahan Jesus pe enggo leben inanamina uga kin kinigulutenta selaku manusia, maka Ia nge ngenca sibanci mereken serpang pulah, dalan kuluar man banta. Alu bage arah tema enda ipetangkas man banta sekali nari, kai pe permasalahenta, kai pe persoalenta, perbebenta, kinigulutenta, erlebuhlah man Jesus sebab Ia ngenca banci mulahi kita ibas kerina belenggu kiniseran singiket kegeluhenta. Amin