Nggeluh Bujur Maba Kemalemen Ate

Bahan Sermon PJJ 22-28 Februari 2015

Ogen                 : Matius 24:45-51

Tema                 : Nggeluh Bujur Maba Kemalemen Ate

Tujun                 : -  Gelah ngawan perpulungen meteh ulu kemalemen ate

      -    Gelah ngawan perpulungen nggeluh ibas kinibujuren

1. Latar Belakang Ogen

Penulis kitab Matius enda eme Lewi anak Alpius sipendahinna selaku pemungut cuke. Kenca ia enggo jumpa ras Kristus janah jadi muridNa, gelarna jadi Matias, ertina anugrah Allah. Selaku mantan pengalo cuke si segat ate kalak jahudi khususna, Matius terpanggil guna nuriken kerna Jesus man kalak Jahudi Kristen. Secara umum isi kitab enda nuriken kerna Jesus kalak nasaret, alu penekanen petandaken Jesus e Mesias siipadanken ibas padan sindekah. Enda teridah ibas bena injil alu namaken silsilah Jesus. Janah inti pemberitanna eme kerna “kinirajan Sorga”. Kinirajan sorga siituriken Matius enda nggembarken maka Jesus selaku Mesias eme jadi Raja ibas kinirajanNa. Ibas ogenta sekali enda nuriken perumpamaan kerna juak-juak situtus ras juak-juak si la tutus. Salah sada metode pengajaren Jesus eme erban perumpaman, tujun mpenukah pengangkan simegi kerna pengajarenNa. Anding-andingen siipake Jesus eme gambaren umum ibas kesemalen kalak simegikenca, cth: man perjuma make istilah benih, taneh rsd.

2. Tafsiren

Ibas ogenta enda teridah Jesus nuriken kerna kerajan sorga bagi tuan ras juak-juak. Tuan eme Jesus jine selaku Raja ibas kinirajanNa, ras juak-juak eme gambaren kita manusia enda sienggo nandai Jesus (Kristen). Juak-juak situtus (Berjaga) eme gambaren jelma sienggo nandai Dibata ras ngangkai pengajarenNa, teliti makeken kebenaren Dibata. ertina, kai sienggo iangkana idalankenna (bagi juak-juak si tutus ndahiken dahinna bagi arusna, eme kebujuren kalak tutus). Ijagaina kebenaren e (kata Dibata) turah ibas kegeluhen, labo sekedar tanggungjawab tapi lebihen asa si e, eme kata Dibata e enggo jadi geluhna.

Gambaren juak-juak si la tutus, eme kalak Kristen simeteh kerna kata Dibata tapi la idalankenna. Bagi ogenta, teridah maka ia sekalak juak-juak, ietehna nge pendahinna, tapi erkiteken la ije tuanna ia erate-ate, bage pe engkorbanken kalak sideban guna kepentingenna (ngelakoken perbahanen si la sue ras kata Dibata). la isedari makana ia juak-juak lit tanggung jawabna, tapi atena tupung la irumah tuanna, ia atena jadi tuanna. Enda gambaren manusia simerincuh kel mandangi kuasa, erta ras jabaten. Akapna e banci mereken kemalemen ate, tapi kenca reh tuanna janah ieteh tuanna perbahanenna ia kena ukum. Kerehen tuanna, eme umputen kerna bagin teks ope teks enda kerna “ise pe la meteh kerna warina ntah jamna”.

Antusenna man banta eme, metengetlah selaku kalak Kristen. Sabab lit kuan-kuan kalak karo natakenca: melala jelma merincuh gelah jadi pentar, tapi sitik ngenca simerincuh jadi jelma metenget; tapi pangen jadi kalak metenget asangken kalak pentar, sabab liten nge kalak pentar itikohi asangken kalak metenget.

Janah ulih kalak simegiken kata Dibata ras ndalankenca tentu ngaloken ulihna ibas tuanna nari, eme: ibereken kepercayaan guna ngurusi erta-erta tuanna (ngaloken hak istimewa). Atpi juak-juak si la tutus ndai ngaloken ukumen ibas tuanna nari eme ibunuh (lanai jadi juak-juak/ipecat). Jadi selaku juak-juak Jesus, ola sempat pagi ipecatna, seh maka lanai kita bengket ku bas kinirajanNa.

3. Persoalen si man Jabapen (Kinata Kegeluhen)

a.    Psikologis

Manusia modern cenderung la malem atena adi la ngikuti perkembangen si lit, terlebih ibas perkembangen IPTEK. Hasil IPTEK labo salah, tapi jelma simakesa cenderung salah, bahkan seh kecandun, contohna: enggo pangen ku gereja maba I-pad sejenisna asangken maba Pustaka Si-Badia ras buku ende-enden.

b.    Sosial, ekonomi, ras masyarakat

Adi sinen kubas jaman enda, melala jelma “Pengen enaknya saja”. bagi ungkapen kecil dimanja, besar kaya raya, mati masuk surge, rsd… pola hidup sibage bagi juak-juak si la tutus, melala enggo menjangkit ibas manusia. Enda teridah arah melalana usaha sihanya dengan modal uang, goyang kaki, tidur dan makan enak di rumah she waktuna aloken ulihna. Megati lupa kita maka Dibata masu-masu ulih latihta. Biasana jelma sibage rupana, mbiar jumpa kiniseran.

c.     Teologi

Lit turah kelapuasen perpulungen ibas gereja she maka jajan rohani atau lanai ku gereja pe, la malem atena ku gereja adi la bagi ukurna, rsd.

4. Aplikasi Tema (Njabab persoalen i datas) ras kesimpulen

“Nggeluh bujur ras maba kemalemen ate”, bujur adi sekalak juak-juak ndahiken dahinna bagi sienggo iaturken tuanna, janah bujur me kalak Kristen nggeluh ndalanken Kata Dibata. bujur nge adi juak-juak si la tutus (malas) ngaloken ukumen (ipecat), janah bujur nge kalak Kristen si la ndalanken kata Dibata ibas geluhna ipecat selaku warga kinirajan sorga. Si pasti ateta nggeluh bagi juak-juak si tutus (erjaga), ersikap katawari pe, malem ateta katawari pe, janah reh malemna ateta adi kita iangkat pagi jadi “Pegawai tetap” Kristus. Sebab nggeluh bujur me erta si mereken kemalemen ate situhu-tuhu. Riahen latih ibas Kristus, asangken meriah ibas ngikutken doni.