Ernalemlah Kempak Dibata Saja

Khotbah MInggu 08 Februari 2015

Introitus           : “Tuhan Kap baginku emaka man baNa ngenca aku erpengarapen” (Perngandungen 3:24)

Ogen                : I Korinti 9:16-23 (Tunggal)

Khotbah           : Jesaya 40:21-23 (Anthiponal)

Bahan Khotbah minggu enda banci ikataken cukup menarik. Labo soal temana tapi justru ayat pustaka sibadia sienggo ioge kita ndai. nabi Jesaya nulisken kitab enda sanga bangsa Israel ibas keadaan keragu-raguan. Bangsa Israel paksa si e mulai pesimis nandangi keadaanna ibas ingan pembuangen. Itambah ka olok-oloken bangsa babel singatakenca “Ija Dibatandu?” tempa-tempa Dibata e tidak mau tau, laIa perduli. Dibata e tempa-tempa jadi penonton ngenca iakap bangsa Israel la bertindak kai pe. Perbahan ke-pesimis-en bangsa Israel enda, nabi jesaya arah kitab enda mulai mengkonfrontasi bangsa Israel, iperhadapkan mulihi Israel nandangi kerina perbahanen Dibata si mejin i Doni enda. Ay. 21-23 bahan khotbahta enda jelas nuliskenca maka Jesaya atena membuka kembali pikiren bangsa Israel e, gelah iinget bangsa e ka min mulihi uga krina penampat Dibata sipernah ialamina.

Jelas situhuna bangsa Israel alu penampat Dibata ipelepas arah perbudaken Mesir nari. Tapi Israel si ibas konteks kitab Jesaya enda lanai bo seri jelmana ras Israel si memang langsung ngenanami penjayam Tuhan sana masa pelepasenna i Mesir nari. © bagi kita sajalah misalna gundari e, ma labo kel bali uga kita mbayangken penampat Dibata sanga pahlawanta mbarenda mperjuangken kemerdekanta? Kemungkinen terjeng sieteh saja, maka pahlawanta mbarenda erperang ia ngelawan belanda, jepang make bamboo runcing labo pake senjata api. Terjeng bage saja nge pemeteh ta. Emaka memang la kita heran perayaan hari kemerdekaan mbarenda jauh berbeda adi ibandingken kita genduari, enggo biasa saja siakap. Padahal mbarenda tangtangna kel kita merdeka, e ianggap hal si luar biasa kel man bangsa Indonesia© bage ka nge bangsa Israel ibas konteks Jesaya, lanai banci ibayangkenna kel uga perbahanen Dibata siluar biasa, sipernah ibahan Dibata man bangsa e. emaka Jesaya kembali nurikenca man bangsa e ibas ay. 21”La kin ietehndu,….”

Kitab ulangen 6:7, jelas ngajarken man nini-nini bangsa Israel, “ajarkenlah e man anakndu. Persingetilah rusur, subuk sanga kam i rumah, ntah sanga kam ibas perdalanen, subuk sanga kam ngadi-ngadi ntah pe sanga kam erdahin”. Dibata sejak awal enggo ngataken ajarken man kesusurenndu niNa. Tapi kai siterjadi itengah-tengah bangsa Israel pengajaren e la rusur iajarkenna man anak-anakna, apaika seh ku keturunen ke telu ras empat bage pe seterusna, tentu enggo semakin terkikis pengangkan kerna uga kin kemahakuasaan Dibata e. hal si enda nge siikritik Jesaya ibas ayat 21.

Ibas keadaan bangsa Israel si mulai was-was nandangi pembesar-pembesar babel, Jesaya ngatakenca ibas ay.23 “Kuasa raja-raja…”kai siikataken nabi Jesaya enda labo terjeng guna mpegegehi mulihi kiniteken bangsa Israel man Dibata, tapi enda pe sekaligus ngatakenca maka Dibata e erdahin nge pasti, adi sinehen hubungenna ku amos 2:3, maka ije me teridah alu jelas Dibata e erdahin “Kubunuh sierkuasa i Moap rikut ras kerina pemimpin-pemimpin negri e.” alu kata sideban maksud Jesaya eme gelah ersabar min bangsa Israel, lit nge kari waktuna cidahken Dibata kemahakuasaanNa mulihi. Emaka sembari nimai si e terjadi, ernalemlah kempak Dibata saja nina tema nta sendah.

…. Adi bangsa Israel ndai iperentahken guna ngajarken kerina perbahanen Dibata siluar biasa e man anak-anak ras kerina kesusurenna. Maka Paulus ibas ogenta memandang hal silebih luas eme maka Injil e, berita simeriah e arus iberitaken la cukup man keluarganta saja ntah pe kesusurenta saja, tapi pe man kerina jelma si lit isekelewetta. Rasul Paulus ibas hal enda makeken dirina jadi teladan ibas prinsip penyangkalan diri guna kepentingen kalak si deban. Secara pemikiren manusia yang idealis, labo mungkin lit kalak sibage biakna. Tapi rasul Paulus enggo ngasup buktikenca maka alu ernalem man Dibata, erpengendes saja bana, mengandalkan Yesus ngenca ibas kai-kai saja pe justru hal si la mungkin banci saja terjadi.

Memang labo nukah guna mpeseh berita si meriah man kalak si deban apai ka, ia si jelas-jelas berbeda ras kita. Tapi rasul Paulus banci erbahan tempa-tempa perbedaan e lalit alu penyangkalen dirina, gelah kai? Gelah banci idatna kalak e. hal si luar biasa, la alu meganjang rukur Paulus atena ndatken kerina kalak e, tapi ay. 22b nina “Aku enggo jadi bali ras kerina kalak rikutken paksana gelah banci deba-deba ia kuselamatken alu kerina dalan sipayo.” Deba-deba saja lah gia enggo meriah ukurku nina rasul Paulus, bicara 20 kin ndai ntah 2 kalak ah lah gia si nggit ngikut. Sibage nge ianggap rasul Paulus upahna,

Jadi pola pikir sibage rupana labo mungkin banci sidatken adi kin lalit penalementa man Dibata saja. harus lit sajana, sebab adi terjeng ernalem man Dibata? banci saja memang tapi itambahi ka alu dibata-dibata sideban ntah pe ilah-ilah. Tapi adi sikataken ernalem man Dibata saja, berarti lanai lit penambahen. Gegehta sendiri pe lalit ije, tapi pelin-pelin campur tan Dibata ngenca sibanci erbahan kita memiliki hati seorang hamba. Bahanlah Dibata e jadi bagin kegeluhenta, berarti la terpisahken ibas kita nari, tetap erpengarapen man Bana janah pe ernalem kempak Dibata saja. guna ngaminken kata Dibata enda mari siendeken KEE 202”…………” Dibata simasu-masu kataNa, amin.