Terang e Ersinalsal Ibas Kegelapen

Khotbah Minggu 15 Januari 2015

Introitus          : Terang e ersinalsal ibas gelap janah la tertaluken gelap e terang ndai (Johanes 1:5)

Ogen               : II Raja-raja 2:1-12

Khotbah          : II Korinti 4:3-6

Paulus ibas nulisken surat enda ku kota Korinti tentu enggo sieteh uga konteksna, Kota korinti eme kota pusat perdagangen. Memang selaku pusat perdagangen, biasana enterem ije rehen kalak pendatang si mungkin saja memiliki kiniteken siberbeda. Emaka memang wajar saja siakap adi mbue ibas kota korinti e pinakit-pinakit sosial. Emaka memang surat enda ibereken man kalak Kristen i Korinti gelah ula ngelakoken perbahanen si la mehuli bagi kalak pendatang ku kota e. emaka perbahan konteks sibage ibas Paulus meritaken berita simeriah terjadi pro dan kontra. Lit si memang banci menerima berita si meriah e tapi lit ka nge si menolak, la nggit tek maka Jesus eme Juruslamat. Emaka tegas memang ikataken Rasul Paulus arah suratna ibas ay. 3 “Janah adi kin Berita si mehuli si iberitaken kami e tertutup man kalak si perlawesna kempak kebenen nge ngenca” jadi arah ayat enda Paulus atena ngatakenca maka situhuna kalak si la selamat nge, si la nggit ngaloken berita si kukataken e. jadi situhuna injil labo tertutup tapi justru pusuh manusia nge sitertutup nandangi berita si meriah siikataken Paulus.

Ibas nulisken surat enda pe Paulus berangkat arah pengalamen imanna nari. Mulai kin tantangna ia ngaloken Jesus, jadi Rasul Jesus justru perbeben la ngadi-ngadi reh man Paulus. Sanga ngelai perpulungen Korinti pe la ia terlepas ibas perbeben nari. Paulus enda ibas ia ngelai perpulungen banci siibaratken ia bagi sebuah “Bola”. Uga kin bola e? adi bola sihempasken kuteruh pasti naik ka ia, makin siempet mbenterkenca ku teruh justru lebih tinggi ka bola ndai kudatas. Bagi bola e nge karakter pelayanen Paulus, janah e pe banci sikataken “Karakter Pelayanen Kristiani” ijapape ras kai pe peranta tapi justru semakin ibanting kita alu Buena perbeben tapi la kita kempes tapi justru lebih sicidahken ka terang ta ndai ku kalak si deban si lit i sekelewetta.

Menarik memang siikataken Paulus ibas ay. 4 “…” kalak si la nggit ngaloken berita simeriah e, eme perbahan enggo puas iakapna dibata-dibata zaman enda. Apai ka bagi zaman ta genduari enda, enggo serba canggih enggo serba nukah kerina. Janah pe enggo menukah ka iakap kalak guna nggadeiken kinitekenna. Piga-piga wari sienggo lewat lit kami ngikuti Lokakarya katekismus reformed. Ibas lokakarya e lit sekalak peserta sinuriken kerna lit sekalak jemaatna si nadingken kinitekenna gelah banci naik jabatenna. Janah nina “tenang saja pandita, enggo kari aku pensiun balik ka nge aku jadi Kristen. Tapi adi gundari ula lebe” bage nina. Padahal adi situhuna siukurken, puji Tuhan adi seh denga umurna kari ku pensiun, sebab labo kita metehsa umur manusia e. banci saja sope lenga pensiun kari, enggo leben ka kita ngadap ku Dibata, ise metehsa? Bage-bage nge rusur kegeluhenta i doni enda,enggo puas siakap adi kai siidapeti kalak sideban banci jadi sikerajangenta. Padahal kai nina tema nta wari si sendah, labo tertaluken gelap ndai terang e. tapi justru perbahan dasar kinitekenta, Dibata siempuna terang e la sipakeken jadi palas kegeluhenta, piah kedungenna terang ta pe enggo milep-ilep bagi lampu minak kurang minakna.terangna enggo redup lanai banci nerangi ibas kegelapen, milep-ilep enca kedungenna nimpet me lampu e.

Bicara sibayangken saja adi sada bohlam (bola lampu) sicat ia alu warna mbiring. Kenca bage maka sipasang emaka sipegeluh lampu e, uga nge jadina? Banci denga kin lampu e terangna bagi sope lenga ia icat alu warna mbiring ndai? tentu lang. adi ibarat lampu ndai berarti banci gelap e naluken terang, padahal pustaka siBadia ngatakenca la banci terang e italuken gelap.

Dibata eme terang situhu-tuhu, janah terang e enggo iberitaken man banta gelah kita pe ngaloken terang e, saja memang sijadi permasalahen, tep-tep kita ndalani kegeluhenta la sipindoken terang Dibata situhu-tuhu e. sipenalem saja gegehta sendiri. Emaka rusuren nge kita ndabuh kubas gelap, ngikut arus zaman piah kari gedap me kita. Adi sekalak jelma ikataken beluh ia berenang tentu melawan arus kita lang ngikut arus kita, jadi kai nge kita e? ngikut arus kegeluhen berarti lenga kita beluh mengarungi kehidupan.

Arah ogenta sendah banci sieteh uga nabi elia sanga detik-detik pengangkaten na. elia la ia mate lebe maka ku sorga tapi langsung iangkat Dibata ku sorga. Arah kai si terjadi man elia enda adi si nehen ku pasal-pasal sebelumna uga kesetiaan Elia ibas melayani Dibata. ibas ia ndalani kegeluhenna enggo ipakena terang Dibata guna nerangi sekelewetna. Kata enda enggo seh man banta, uga nge kita gundari, enggo kin sipake terang Dibata e jadi terang man kegeluhenta? Terang manusia banci saja nimpet tapi terang Dibata labo banci nimpet. Emaka pakekenlah terang Dibata situhu-tuhu e guna ndalani kegeluhenta. Bagi kuasa elia ndai ipesusur ku elisa. Bage ka lah kita makeken kuasa Dibata sienggo ipesusurna man gunanta. Janah pe ula kita lupa pesusursa ku keturunenta, anak-anak i rumah pe perlu iajarken uga makeken berita simeriah jadi terang ibas ia ndalani masa-masa ngudana. Gelah arah perbahanen anak-anakta pe teridah maka tuhu-tuhu terang Dibata ipakeken ibas keluarga kalak si erkiniteken. Gelah alu bage payo bagi siikataken tem anta maka terang e ersinalsal ibas kegelapen, khususna kegelapen doni enda. Amin.