Pujilah Tuhan Erkiteken PerbahanenNa

Invocatio       : “Kata Kristus sidem alu kinibayaken nggeluh min ibas pusuh peratenndu. Siajar-ajarenlah kam alu kepentaren. Endekenlah masmur, ende-enden pujin ras ende-enden pertendin. Rendelah muji Dibata dingen ngataken bujur ibas ukurndu” (Kolose 3:16)

Ogen             : Ketangkasen 15:1-4 (Tunggal)

Khotbah        : Mazmur 47:1-10 (Responsoria)

I. Kata Perlebe

Ende-enden eme ungkapan simewakili pusuhta man Dibata, tapi rusur kel ende-enden enda la tuhu-tuhu mewakili pusuhta sebab la siendeken alu sungguh-sungguh. Bahkan sejujurnya rusur kel ende-ende siisehken kita la sesuai ras kinata kegeluhenta. Terkhusus ibas proses peribadahenta rusur kel ende-endenta e la siendeken alu sepenuh hati, tapi gelah nggo dung saja. apai ka adi melala ayatna man endeken biasana tading piga-piga kalak nari singendekenca itambah ka adi lalit iringan musik guna menghidupkan ende-enden e.

II. Invocatio-Ogen-Khotbah

˜   Introitus

Arah invocatio ngingetken kita maka kata Dibata (Firman, Alkitab) harus rusur sioge, sipelajari, sirenungken, ras sitotoken gelah Kata e diam ibas kita. Adi hal sienda enggo ilakoken kita maka pola pikirta, pengerananta, lagu langkahta, ras motivasinta pasti ipengaruhi/ iterangi Kata e ras pe ikuasai Kristus. Ende-enden pujin, Mazmur, kidung pujin ras pe ende-enden rohani arusna sipake guna nehken pengajaren kerna Kata Dibata bage pe guna mpersingeti kalak si tek gelah nggeluh setia, patuh man Kristus saja.emaka secara tidak langsung tep-tep ende-enden siiendeken kita adi alu sepenuh hati maka pasti ngajarken kita ntah pe mpersingeti kita ibas kai siilakoken kita gelah ngikuti sura-sura Dibata, bagi sitertulis ibas Efesus 5:16.

˜   Ogen

Arah nats enda kita ipersingeti mulihi kerna biak-biak Dibata sibenar ras adil. Dibata singukum ras memulihkan. Dibata si ibas kerina perbahanenNa rusur mpersingeti bangsaNa kerna perbahanen-perbahanenNa si lewat. Ibas pengenehenen Johanes (bindu 15) enda banci siidah dua hal, eme :

1.    Pengenehenen Johanes enda bali ras keadaan si tersurat ibas kitab keluaren 14 ras 15 (ay. 2). Pengenehenen enda nuriken kerna pengataken bujur bangsa Israel man Dibata kenca bangsa e berhasil menyebrangi laut Merah, ras pe iselamatken arah ayak-ayak prajurit Mesir nari si tewas i Laut Merah.

2.    Johanes pe ngidah hal simengerikan (ay. 5-8). Iidahna 7 malekat sincidahken kebadian Dibata salu maba 7 malapetaka. 7 malapetaka enda eme perwujudan murka Dibata. pengenehenen enda mpersingeti perpulungen maka tuhu-tuhu enda eme hukumen si terakhir, si mengakhiri murka Dibata. emaka memang ibas penghukumen siterakhir enda Dibata mereken penghukumen yang sebenar-benarnya dan sepenuhnya.

Ungkapen ende-enden pengataken bujur man Dibata enda, ikumandangken kalak enda lewat ende-enden pujin i tepi laut. Arah ende-enden enda lit pengakuan kekal sepanjang masa maka Dibata me simulahi bangsaNa. Bage pe ibas upacara pengorbanen domba paskah, ende-enden enda sirusur iendeken.

Hal simenarik ijenda eme dua ende-enden enda, eme ende-enden Musa ras ende-enden Anak Domba (ay.3-4). Ibas padan simbaru, anak domba eme sebutan man Jesus Kristus. Enda menandaken maka pembebasen siibahan Dibata arah arah Musa ibas padan sindekah, ngarahken kita ku bas fakta pembebasen si sempurna, sejati ibas padan simbaru, eme pengorbanen Jesus i kayu persilang.

˜   Khotbah

Mazmur enda eme undangen man kerina bangsa gelah muji Dibata. ende-enden enda ibukaken alu pengajuk man kerina bangsa gelah bertepuk tangan, ersurak muji Dibata. undangen sibagenda rupana pe lit ka ibas beberapa mazmur sidebanna. Ajaken enda bersifat umum la itujuken man pribadi ntah pe kelompok tertentu tapi man kerina bangsa iajuk guna muji Dibata si mbisa alu tepuk tan sijadi tanda sukacita. Pengajuk guna ersurak enda idasarken arah perbahanen Dibata man manusia. Arah hal enda ituriken maka Dibata e Raja sierkuasa, Allah yang dahsyat erkiteken enggo italukenNa bangsa-bangsa iteruh kekuasaan Israel. Italuken ijenda terarah ku perebuten taneh kanaan jadi taneh pusaka man bangsa Israel. Taneh Israel siawalna iduduki bangsa sideban tapi Dibata nyerahken taneh e man Israel. Ibas kai sienggo ilakoken Dibata enda arusna lit ka min tanggapen/ responta simehuli. Dibata enggo nusur mereken penampat eme sebabna bangsa Israel ndatken kemenangen.

Arah ps. 47 enda igambarken kebesaren Dibata siisembah pemazmur. Rasa kagum ras hormat icidahkenna, ras pe mereken pengajuk man bangsa-bangsa guna mpermuliaken gelar Dibata. enterem kel kalak Kristen kurang menyadari hal enda, seh maka geluhna pe la bergairah guna muji ras mpermuliaken Dibata bagi arusna. Bangsa Israel erbahan Didata e setara ras keberadaan manusia si la abadi. Ibadahna terjeng perentah manusia saja siihafalken ras rutinitas belaka. Labo e saja, tapi bangsa Israel pe erbahan patung anak lembu emas guna sesembahenna janah menyebut gelar patung e alu sebuten “tuan” sehingga menyamakan kebesaren Dibata alu istilah-istilah manusia. Hal serupa pe terjadi man Jesus, anak Dibata, manusia la menaruh rasa hormat janah pe kerehenNa tempa-tempa la iarapken, padahal Jesus e Raja sitertinggi. Adi sisedari ise situhuna kita enda, arusna lanai bo lit alasenta guna la erbahan hal si la mehuli ras pe ngutamaken Dibata ibas kerinana.

III. Pengkenaina

Rende alu sepenuh hati ras penuh kesadaren merupaken tantangen serius man banta. Ibas kegeluhenta enda marilah siwujudnyataken kekelengen situhu-tuhuman Dibata alu erpengendes man bana saja. alu bage kita pe ngasup ngungkapken kejujurenta kerna kekelengenNa man bnata. Payo nge kita muji Dibata erkiteken Ia layak ipermuliaken alu ende-enden pujinta. Kita pe harus mpermuliaken Ia erkiteken kebenaren ras karya-karyaNa siajaib ras pe erkiteken kerina pasu-pasuNa jasmani bage pe rohani sienggo iberekenNa man banta. Ende-enden pujinta harus sipersembahken terus-menerus, adi kerina puji-pujinta siendesken alu ketulusen pasti banci mpermuliaken gelar Dibata.

Tuhan Jesus enggo njanjiken pasu-pasu man kalak si setia. Janji-janji DIbata e labo omong kosong saja tapi tuhu-tuhu igenepina. Ibas ketangkasen 15:1-4 banci siidah maka Dibata ngasup nggenepi janji-janjiNa, perbahan Ia sienggo naluken musuh-musuhta bage pe ise pe si menganiaya kalak sierkiniteken pasti italuken Jesus e, segelah alu bage ise siteraniaya ndatken penghiburen ras pe idorong guna tetap setia ibas kiniseran terlebih-lebih ngasup tetap muji gelar Dibata ibas keadaan sikugapana pe.

IV. Penutup

Kita harus bangga sebab kita empuna Dibata si nggeluh ibas gelar Tuhan Jesus Kristus, sebab Ia me raja seluruh bumi. Adi Dibata simada doni enda nemani kita tentu lanai lit alasenta gentar ras mbiar. Amin pe mekatep dor kita menghadapi perbeben, kiniseran, tantangen nggeluh ntah pe hal-hal sierbahanca kita lemah ras tak berdaya. Memang labo situhuna kita ngasup guna mnegatasi situasi nggeluh enda adi sibelinken gegeh kemanusianta saja, emaka kita harus tek maka Dibata e labo saja sinjagai geluhta ras mereken gegeh man banta tapi Ia pe hadir jadi penampat man banta ibas kerina kinata geluh siihadapi kita. Adi sisadari kerna kebenaren enda maka pasti ngasup kita naksiken man kalak si deban bagi kai sienggo isaksiken pemazmur. Mungkin kita la sedang berada ibas bencana alam tapi mungkin kita lit ibas bencana sideban sierbahanca banci saja aru ateta. Tapi amin pe bage gia mberatna baban geluhta aruslah siinget maka kai pe siterjadi, Kata Dibata ngajarken kita gelah ula kita mbiar janah ibas dampar kegeluhan siuga pe tetap harus kita ngasup mpenangkih ende-enden pujinta man Dibata.