RAS TUHAN TENENG AKU

Khotbah Minggu 19 April 2015

Ogen               : Heber 11:32-40 (Tunggal)

Khotbah          : Mazmur 4 (Responsoria)

Tema               : Ras Tuhan Teneng Aku

Adi ngerana kita kerna ketenengen i doni enda tempa-tempa mesera sitik kita jababsa. Engkai? Erkiteken memang adi nggeluh denga kita ibas doni enda labo lit si tenengna. Ngukur-ngukuri kerna si e tersinget aku kerna sada lagu si enggo popular pasti ibas kita, bagenda nina syair lagu e “Adi ukuri nggeluh i doni enda mesera ras latih kel kepe….”. lagu enda menyiratken man banta kerna kecibalen geluhta i doni enda labo lit sitenengna sebab memang kegeluhenta enda beralih dari sada perbeben ku perbeben sideban. Bahkan lenga dung pe perbeben sipertama ndai banci ka enggo reh perbeben sipeduaken. Yakin aku kam kerina perpulungen kekelengen Tuhan pasti megati nanamindu hal sibagenda rupana. Masalah ekonomi simorat-marit, lenga ka guna nutupi pinjamin, ngelunasi utang-utang, nggalar angsuren ku CU si enggo ndeher tanggalna, itambah ka uang sekolah anak-anak sienggo nunggak apai ka ntisik nari ujian ia, adi la lunasi la ia banci ikut ujian. Lenga ka dung ngukuri si e, tambah ka lit anggota keluarga si sakit, guna pertambarna pe lanai sieteh ija man buaten. Adi bage kel kegeluhenta ma enggo tumpang tindih kel kerina. Adi bage lit denga kin sitenengna kegeluhenta enda?

Bahan ogenta sendah adi si oge mulai kin ay. 4 nari maka situhuna ije ituriken penulis kerna tokoh-tokoh si lit ibas pustaka sibadianta uga kerna kinitekenna sipaguh ibas ngikutken Yesus. Mulai kin abil nari seh ku Rahab ibas ay.31. janah sijadi bahan ogenta enda iperhadapken man banta, adi kin memang kurang tek denga kita man Dibata lanjutkenlah ngoge kisah-kisah sideban bagi Gideon, Barak, Daud, rsd. Tek aku maka kita sijenda pe enggo meteh sitik-sitik lah gia kerna turi-turin peristiwa kalak enda kerina. Singkatna kerna uga kin kiniseran siialamina, uga kinigenggengenna ibas perbeben, tapi kedungenna Dibata erbahansa kalak enda menang ibas perbeben nari. Aminna gia harus mate pe, gelah mate ibas Tuhanlah kita. Emaka kedungenna ngasup kita ngataken man dirinta “sura-sura Dibata sijadi labo sura-surangku”. Alu kalimat singkat enda situhuna kita enggo mengikrarkan kerna buah kinitekenta. Eme tetap tek man Dibata ibas situasi sikugapana pe.

Pemazmur Daud arah bahan khotbahta, nyaksiken man banta maka ibas enteremna kalak rate segat man bana tapi justru tetap iingetna Dibata, bahkan Dibata ngenca ibahanna jadi simereken ketenengen man bana. Arah mazmur Daud bindu 4 enda pe nuriken uga kiniteken Daud ras pengataken bujurna kena kerina pasu-pasu Tuhan si enggo ialokenna. Adi siperdiateken kerna tulisen pemazmur enda, banci sikataken maka pertoton enda eme pertoton sanga berngi.

Adi siperhadapken kubas kegeluhen manusia zaman genduari enda, reh Buena kalak si banci ia medem erkiteken obat tidur. Hal enda erkiteken kekhawatiranna kerna geluhna justru jadi momok sierbahanca la banci entabeh pertunduhna. Jadi uga nge ndia carana gelah banci kita medem alu teneng, lanai iawang-awang rusur pemikirenta muat tunduh e. bagi pemazmur enda kita harus meteh leben kai sijadi penyebab kita gelisah. Banci kerna dosa, lit hal-hal tertentu sienggo ilakoken kita si la sesuai ras peraten Dibata, entah mungkin kita menyakiti temanta, erkiteken pengerananta misalna enggo ia sakit hati, luka batin. Tentu pertobatan alu sungguh-sungguh sibanci memulihkan perasaan bersalahta. Mulai alu pertoton mindo ampun man Dibata, emaka upayaken ka guna memperbaiki kesalahen sienggo pernah silakoken nandangi kalak sideban. Bangun kembali relasi kita alu teng-teng ras mehuli.

Banci jadi ka bertubi-tubi kel reh masalah nimpa kita, padahal kita enggo nggeluh alu payo. Tapi justru kalak si deban memfitnah kita alu keji, tempa-tempa masalah e reh erkiteken kesalahenta, erkiteken dosanta. Emaka la mengherankan adi merawa kita, tidak terima ras pe lit keinginen guna membalas. Tapi nasehat pemazmur wari enda perlu siresapi. Amin pe merawa kita tapi harus beluh kita mengendalikan emosi sehingga la kita menghujat ntah pe mpedarat kata-kata si la man belasenken. Tapi sebalikna, ertotolah kita ibas pusuhta, tung-tungken kerina perasaanta man Dibata gelah mereda amarahta ndai, gelah alu bage reh salangna pusuhta ertenengna ka kita ndalani kegeluhenta banci ka badeh pertunduhta. Adi enggo siendesken ibas pertotonta man Tuhan pasti kita ndalani kegeluhenta pe harus ras Tuhan. Bagi sada lagu bagenda nina “Bersama Yesus lakukan perkara besar, bersama Yesus tidak ada yang sukar…..”

Adi ras Dibata kita labo ise pe ibas doni banci naklukken kita, tapi pasti kita jadi anak-anak Pemenang ibas kita ndalani kegeluhenta. Dibata simasu-masu kataNa ipengasupna kita guna ndalankenca ibas kegeluhenta. Amin.