ANAK DIBATA NGGO NUSUR KUDONI

BAHAN SERMON PERPULUNGEN JABU-JABU

12-18 NOPEMBER 2017

Ogen          : Lukas 2 : 8-14

Tema          : Anak Dibata Nggo Nusur Ku Doni

Sijadi cataten sibanci ibuat kita guna jadi perenungen ibas PJJ enda eme:

Þ    Malekat Tuhan encidahken bana man kelompok permakan si jarakna 2,2 km i kota Betlehem nari. Permakan-permakan enda me sinjaga biri-biri itengah berngi i mbal-mbal, janah kalak enda me singaloken berita ketubuhen Jesus ibas Malekat nari. Ibas berngi si gelap berubah jadi teraang ras ende-enden pujin man Dibata iendeken malekat Sorga (ay. 13)

Þ    Engkai maka Ketubuhen Tuhan Yesus maba berita keriahen? Lit telu alasen: 1. Nina Malekat e man bana “Ola mbiar, aku reh maba berita si meriah, simereken keriahen simbelin man kerina manusia” (ay. 10). 2. Berita e maba keselamaten (ay. 13), 3. Berita e maba dame man manusia ras pe bersifat ‘kosmik’ (Seluruh alam semesta), (ay. 14).

Þ    Teridah respon permakan singaloken berita e, ija permakan e minter lawes ku kota Betlehem (ay. 15), guna njumpa ras Anak Dibata juruselamat e. iturikenna man Jusup ras Maria kai sienggo ikataken Malekat man bana kerna anak e. jenari mulih permakan e, janahna rende ersurak muji Tuhan.

Ketubuhen Tuhan Yesus maba dame man banta manusia singena ateNa. Ertina kalak simaba dame iakui Dibata me ia anak-anakNa. Kinatana kegeluhen manusia melala maba kengisahen, kearun, kebiaren ras perubaten. Man kalak sibage labo ketuahen ialokenna. Emaka arah ketubuhen Tuhan Yesus Anak Dibata sienggo nusur ku doni, sicidahken ras sibaba min dame kuja pa pe kita isuruh Tuhanta. Bagi permakan simaba dame ibas ketubuhen Yesus Kristus, emaka sibaba dame e kutengah jabuta, gereja ras sekelewetta. Adi silakoken si e tentu mbelin gunana. Endaa me tanggung jawabta ibas kita ngakuken Tuhan Yesus situbuh e Juruselamatta, nggit kita maba dame man kalak si deban. ola kita maba perpecahen, perjengilen, perubaten, ras kinisuin man kalak sideban. Mari siusih teladan Tuhanta sienggo tubuh ku doni, si jadi juru dame, sindameken manusia perdosa ras Dibata si Badia. Metedeh min ateta guna ndalanken perentahNa, temtu geluhta pe iwarnai sukacita dame sejahtera.