DEWASA ER-ADVENT

Sermon Pekan Kebaktin Keluarga

Berngi pe-5 ken

Invocatio          : Kesusuren Raja Daud bali ras batang kayu si enggo itabah. Tapi bagi tunas si turah ibas tongkehna nari, bage me pe ibas kesusuren Daud nari keke sekalak raja (Jesaya 11:1)

Ogen               : Miha 5:2-5a

Renungen       : Lukas 1:38-45

Tema              : Dewasa er-Advent

1. Dewasa dan Advent…?

Rusur kel kata dewasa ikaitken ras usia atau kemampuan guna memimpin entah enggo mandiri tapi kepeken kedewasaan e la terjeng penampakan secara fisik saja tapi ikut pe ras batinna. Adi Rasul Paulus menggambarkan kalak si langa dewasa secara kiniteken e langa ngasup ngaloken nakan keras tapi susu denga (Heb 5:11). Ertina amin gia enggo dewasa secara umur tapi kinitekenna bagi danak-danak denga. Kalak si dewasa e eme kalak si nggit rusur iproses guna mpelimbarui kegeluhenna ibas Dibata.  amin na gia ibas proses enda labo entabeh kerina si man alankenna. Tapi adi danak-danak denga meriah akapna adi kerina seh bagi sura-surana saja.

Advent asal katana Adventus si ertina “kedatangan”, Ibas minggu gerejanta minggu advent enda igelari minggu persiapan guna nimai kerehen Tuhan Yesus. Kenca dung minggu advent enda maka biasana sirayaken me wari natal. Ibas minggu persiapen enda banci siidah uga kedewasaan sesekalak jelma ibas erkiniteken man Dibata.  Adi anak-anak persiapen siibahanna eme tarian guna menunjukkan kemampuanna, baju gelah teridah ia mejile (seragam), sepatu model kekinian, uga model rambutna pagi ras sidebanna si berhubungen guna kiniulin dirina. Adi kita kalak si enggo dewasa secara umur kai ka nge persiapen sibahan guna ngalo-ngalo kerehen Tuhan Yesus e…?. semal kel e ibas gerejanta icakapken wari natal maka mis kita ercakap kerna kai si man tanggerenken..?, uga baju seragamta, apakah bagenda model persiapen kalak si enggo dewasa erkiniteken….?. sicubaken ngenen persiapen Maria ras Elisabet ibas nimai kerehen Tuhan Yesus …

2. Maria dan penantian kedatangan Yesus

Maria ijumpai Malaikat Gabriel guna nehken berita maka Maria e ijadiken Dibata jadi nande Yesus. Ibas masa si e Maria enggo ertunangen ras Yusuf tapi langa bo pernah ia ngelakoken hubungen suami istri.  Melala kel kebiaren-kebiaren sir eh nangdangi Maria ibas ndatken berita e misalna :

1. Ibas tradisi kalak Yahudi adi sekalak diberu kedaten erlua-lua maka hukumenna ibenteri alu batu seh mate. Maria ibas masa si e enggo hamil, adi lit kalak ngetehsa kerna si e, padahal ia langa sah jadi ndehara Yusuf maka enda jadi aib janah banci pe ia kena hukumen.

2. Yusuf  pe merencanaken guna nadingken Maria alu sinik-sinik.

Kerina enda tuhu-tuhu mberat guna ngalakenca tapi Maria alu kinitekenna ngatakenca “kuendesken diringku man bandu Tuhan. Janah jadilah ibas aku bagi si enggo ikatakendu e !”

Persiapen Maria ibas ngalo-ngalo kerehen Tuhan Yesus eme PENYERAHEN DIRI SEPENUHNYA. Maria mereken dirina sepenuhna bagi sura-sura Dibata ras tek man baNa. alu sukarela ngaloken kehormaten ibas Dibata nari sekaligus celaan ibas masyarakat nari.

Perbeben kegeluhen e enggo jadi sada bagian siharus sihadapi ibas kegeluhenta ibas doni enda, banci arah keluarga, ekonomi, kesehaten ras sidebanna. Tapi uga nge persiapennta selaku kalak sierkiniteken ibas mempersiapken dirinta ngalo-ngalo kerehen Tuhan e…? erlajarlah kita arah Kedewasaan kiniteken Maria yang  mengubah BERAT menjadi BERKAT.

3. Maria dan Elisabet

Elisabet eme senina Maria, ia pe jadi aib ibas masyarakat Yahudi erkiteken enggo metua tapi lalap langa lit pupusna. Tradisi Yahudi ngatakenca maka perjabun si la lit pupusna ianggap sebagai pejabun si la ndatken pasu-pasu ibas Dibata nari janah enda rusur ihubungken ras hukumen Dibata. Emaka si Elisabet enda pe labo lit temanna. Kenca Maria jumpa ras Malaikat Gabriel ndai jenari lawes ia ku rumah Elisabet, Sebagai nande si paksana mehuli bertinna la nguraki semangatna guna lawes ku rumah Elisabet amin gia dalanna erdeleng-deleng. Banci ikataken Maria la njadiken kelemahenna jadi alasan untuk tidak menjadi berkat.

Ibas perjumpanna ras Elisabet enda tupung ikatakenna mejuah-juah, maka anak siibas bertin Elisabet minter kemuit. Secara ilmu kedokteran adi anak kemuit ibas bertin rusur ikataken kontraksi, janah biasana nande mesui nge akapna, tapi enda berbeda kel ras Elisabet, ia justru ermeriah ukur dingen idemi alu Kesah Sibadia. Kehadiran Maria maba kemalemen ate man Elisabet seh maka kinisuin pe berubah jadi keriahen.

Elisabet si enggo idemi Kesah Sibadia pe nehken pasu-pasu man Maria janah ibas perkataanna e pe teridah lit ije kiniteruken ukurna. Mungkin Elisabet enda ndauh nge tuan asangken Maria, tapi teridah ije pendahin Kesah Sibadia maka ipasu-pasuna Maria ras anak siipupusna alu dem kiniteruken ukurna. Maria ras Elisabet dewasa kinitekenna, emaka sad ape labo ia peganjangken bana, banci saja Maria meganjang ukurna erkiteken ia nande Yesus entah Elisabet erkiteken tuan ia asangken Maria. Dewasa ibas nimai kerehen Tuhan Yesus e lit ije kiniteruken ukur guna sihamaten sada ras sidebanna.

4. Refleksi

Mpesikap diri ibas ngalo-ngalo kerehen Tuhan Yesus e ula terjeng fisik saja tapi siterutamana kel eme ukurta. Erlajar arah Maria si dewasa cara kinitekenna mpersiapken diri guna ngalo-ngalo kerehen Tuhan Yesus eme :

1. Penyerahan diri seutuhna man Dibata

2. Kelemahen la jadi alasan guna menyerah

3. Jadi pasu-pasu man kalak sideban

4. Lit kiniteruken ukur ibas persadanta kerina..

Sebab sialo-alo kita e pe eme si MABA DAME , raja s idem alu kemulian dingen ngerajai rakyatna alu dem kemulian she maka rakyatna e pe nggeluh alu senang. (Miha 5:2-5a). Maka marilah kit ape kerina jadi agen-agen pembawa dame. Ula erkiteken lit natal maka lit ka perubaten gara-gara lomok-lomok si la seri takarenna, entah erkiteken la tampil vocal groupta ras sidebanna. Tapi mulihilah kita ku yang terpenting ras terutama eme YESUS e……