Ibas Ia Ngenca Lit Kegeluhen

Khotbah Natal 25 Desember 2014

Introitus      : Sabab Ia reh guna merentah doni enda. irajaiNa kerina bangsa i doni enda alu bujur ras rembang tengah. (Mazmur 98:9)

Ogen           : Mzm. 98:1-9 (Anthiponal)

Khotbah      : Johanes 1:1-9 (Tunggal)

Tema          : Ibas Ia ngenca lit kegeluhen

Masa-masa Natal memang identik kel alu symbol-simbol terang, bagi cahaya lilin, pohon terang ras  pe lampu kerlap-kerlip. Janah pe lit ka ilantunken lagu-lagu natal siberhubungen ras simbol terang e, bage pe tanda kelahiren Tuhan Jesus sendiri la terlepas arah simbol terang ntah pe cahaya, misalna saja bagi cahaya malekat si reh ndahi permakan i mbal-mbal guna meritaken kerna ketubuhen Jesus e, bage pe lit ka bintang i Timur si menunjukkan arah man orang-orang Majus, bintang tanda kelahiran Jesus. Tapi pernah kin terpikirken kita kai kin situhuna makna terang e? atau mungkin terang e terjeng ritual keagamaan ngenca man banta (adi natal ningen e lenga klop adi la nagani lilin, terjeng bage saja), la sieteh kai ertina. Terang e lit dua ertina       :

1. Terang e simbol pengorbanen →Jesus e reh Ia ku doni enda, man gunanta. Ia reh labo tanpa alasen, tapi Ia reh maba dame, Ia maba pengajaren man kalak si la megiken ajar, Ia reh maba pedang man kalak si la nggit erbahan hal si mehuli. Jesus e nggit mereken kerinana man banta, waktuNa, tenagaNa, pikirenNa, bahkan ngasamken kesahNa. Nggit Ia ianggap perdosa gelah kita manusia lanai erdosa ras pe banci ngaloken kegeluhen situhu-tuhu.

Ø  Padahal me banci saja jesus e tenang-tenang Ia i surga. Cukup itatap-tatapNa saja uga kita nggeluh i doni enda. Kenca bage, adi nggo seh masana kari ibas kerehenNa peduakaliken, tading iukumNa saja kalak si la nggit ngikutken perentahNa. Tapi kepeken Jesus perkeleng kel ia nandangi kita tinepaNa, labo ipelepasNa kita ndalani kegeluhenta, tapi ia pe nggit ikut ngenanami kai siinanami kita i doni enda. (Jesus pe pernah muas, ngenanami mesui, igombang-gombangi kalak, ifitnah, perbahanenNa simehuli ibalas salu kejahaten) kita pe me pernah ngenanami hal si e.

2. Terang e simbol penunjuk arah → Bagi orang-orang majus i Timur nari, ietehna ketubuhen Jesus arah terang bintang. Amin pe ieteh kita maka kalak majus e pe logikana ka ipakena, labo bintang ndai iikut-ikutna. Iakapna “anak Raja nge pasti situbuh e” mis ia reh ku istana herodes, piah anak-anak kitik si la ersalah pe jadi korban kerna kinilapatuhen kalak majus enda. Tapi misalna ndai binta e saja iikut-ikut kalak enda, pasti mis kel ietehna ija nge tubuhna Jesus e. terang Jesus e pe kepeken ngasup mereken arah sitepat, adi erdalan kita ibas gelap.

Ø  Adi kegelapan bagi mate lampu lah misalna me enggo terbayangken kita, apai ka ikuta nta enda, memang enggo tempa-tempa lit rosterna mate lampu. Adi mate lampu me mesera nge siakap erdalin, apaika tantangna mate lampu e, pasti kidaramen nge kita ija nge lilin, ndarami lilin e pe, pasti mesera nge siakap bagi lagu karo nina “Ula cidadap.. ula cidadap.. adi mate lampu e, cidadap kari.. cidadap kari.. kudin belanga” adi cidadap kita sangana mate lampu e, banci si kin la arusna terdadap kita, jadi terdadap. Adi kudin belanga terdadap kita, me tentu mbiring ibahanna tan nta. Bage ka nge adi kita erdalin ibas kegelapen geluh enda, cidadap denga kita ndarami apai kin dalan sipayo, piah kedungenna terdadap kita nge kudin belanga ndai, ikut arus kita kubas geluh kalak si la bujur.

Ilustrasi

Lit sekalak mandor ibas proyek bangunan sitinggina lit 10 lantai. Sangana mandor e i tingkat 7, mentas nge sekalak buruhna i lantai 2. Mandor enda ndai atena ngerana man buruhna e, jadi mulai me ia teriak-teriak, ngelebuhi buruhna e. tapi perbahan jarak lantai 7 ku lantai 2 ndauh kel, emaka sora mandor e la ibegi buruhna ndai. tapi la kehabisen akal mandor e ndai, ibuatna sen logam erga 500, benterkenna ku buruhna ndai, pas kel ndabuhna la ndauh arah buruh e nari, (adi kita manusia biasana me, adi sen ningen pasti jeli kel) emaka buruh e pe ipungutna sen 500 ndai minter kantongina, la ipernenna ku datas. Ndarami akal ka me mandor e ndai, buatna ka batu kitik, benterkenna ka ku buruh e ndai, pas kel kena takal buruhna ndai, spontan kel buruhna e ngenehen ku datas, ise ka kin si mbenter aku e ‘te na? kenca nehenna ku datas, emakana banci me ngerana mandorna ndai man bana.

Makna

Dibata pe mawen-mawen ngelakoken hal si erbahanca kita nge-nen Ia. Adi pasu-pasu siiberekenNa bagi sen 500 ndai la banci erbahan kita nge-nen Dibata, maka banci saja iberekenNa man banta kiniseran, gelah kiniseran e lah gia erbahanca kita nge-nen ku Dibata.

Selaku Ia dalan kegeluhen nta, pasti enggo isikapkenNa rancangen-rancangen si mulia man banta, rancangen si erbahanca banci kita senang i doni enda, tapi adi kesenangen e justru erbahanca kita lupa nandangi Ia, pasti cara sideban nge ilakoken Dibata man kita.

Dibata e simereken terang kegeluhen man kita kalak Kristen tapi lit piga-piga tipe terang kalak Kristen sibanci iperdiateken kita :

1. Terang lampu listrik

     ↔ Lampu listrik cahayana me tergantung PLN nari, adi iputusken PLN arus listrik, maka lampu ndai tentu la menyala. Ibas kita kalak Kristen, lit deba-deba ketergantungen man kalak si deban. Bagi lampu ndai ketergantungen man PLN. Adi lalit kalak sideban si menopang kita ntah pe sada organisasi, persadan si mengangkat kita, lanai teridah terangta ndai.

2. Terang lampu petromak

     ↔ me itandai kita denga lampu petromak? Lampu siperlu ipompa ia gelah gara. Bage ka terang kalak Kristen si lampu petromak, la ia banci memicu dirina sendiri, la ia banci menyemangati dirina sendiri. Harus lit kalak si deban ngiahken ia gelah reh gereja. Adi lalit pendorongna la ia ku gereja, biasana e siteridah kel ibas singuda-nguda anak perana, perban lit siikeker2na, singena atena, makana reh ia ku gereja “gelah ieteh adek ah aku rajin, gelah ieteh abg ah aku tutus”, tapi kenca lanai je sijadi pemompana ndai, lanai ia idah-idah, piah redup nge terangna ndai.

3. Terang obor

     ↔ adi mbarenda sope lenga lit lampu listrik bage gundari, lampu obor nge ipake kita. Tapi lampu obor e lit kelemahenna eme, ipedaratna asap mbiring. Asap mbiring enda siibaratken roh kesombongen. Mungkin saja arah darat teridah kita sekalak situtus kel erkiniteken, tempa-tempa erkemalangen kita man Dibata. tapi justru perbahan si e, turah pengakapenta maka ganjangen siakap kita ibandingken kalak si deban. Terang obor enda, bagi malekat Lucifer, awalna ia pemimpin puji-pujin i sorga tapi perban meganjang ukurna, iambekken ia ku doni, lanai ia jadi pemimpin puji-pujin i sorga.

4. Terang lilin

     ↔ Lilin enda memang adi ibandingken ras terang sideban ndai labo uga kel terangna. Tapi adi ibas ruangen gelap, terang sikitik epe terakap kel. Janah pe perlu kita mencontoh tabiat hidup lilin enda, lilin enda seh keri ia tertutung, tetap ia gara, nggit ia ngorbanken dirina seh keri gelah isekelewetna iterangi amin pe alu terang si kitik.

Ø  Dibata Bapanta si i sorga pe, iarapkenNa kel kita bagi lilin enda. Seh ku penghujung kesahta pe tetaplah kita ncidahken terang kinitekenta i doni enda. Lanai kita pasang-surut ibas erkiniteken, tapi terangta e tetap, lanai milep-ilep. Emaka gelah tetaplah terangta e ersinalsal, haruslah kita nggeluh ibas dalan si enggo itetapken Dibata man banta.

Dibata simasu-masu kataNa ras ipengasupna kita ndalankenca ibas kegeluhenta. Selamat wari Natal. Amin.