Labo lit simetahat ibas Dibata

Bahan Sermon Khotbah Minggu

21 Desember 2014

Introitus          : Lit kin simetahat ibas Tuhan? (Kejadin 18:14a)

Ogen               : 2 Samuel 7:1, 11-16

Khotbah          : Lukas 1:26-38

Thema             : Labo lit simetahat ibas Dibata

I. Kata Perlebe

Ibas pustaka si Badia lit piga-piga ketubuhen si iikuti alu kejadin-kejadin menarik. Sanga Dibata mpeseh kataNa guna mberitaken ketubuhnen sekalak anak, lit piga-piga tanggapen siibereken calon pernanden. Contohna ibas Kejadin 15:9-15, sanga tawa Sara perbahan Dibata erbahanca mehuli kulana, padahal ia enggo metua. Iakapna e labo mungkin terjadi, lit keraguanna. Ibas Lukas 1:18, zakaria, Bapa Johanes peridiken, ia pe ragu kerna kata-kata malekat man bana. Jelas kel berbeda ras sikap siimiliki Maria, tupung ialokenna berita arah Malekat nari, amin pe mbue kel resiko si arus itanggungna, resiko si mberat tapi ikatakenna “Kuendesken diringku man Tuhan, janah jadilah ibas aku bagi sienggo ikatakenndu e!”. 

II. Pendalamen Nats

Ketubuhen Jesus Kristus ku doni enda, memang sejak awal enggo menimbulken gejolak man kerina jelma siterlibat ibas proses ketubuhen e. sikataken saja Jusuf ras Maria, amin pe kalak enda duana statusna tunangen denga tapi DIbata make peranaken Maria guna mengandung Jesus. Persoalenna, man Maria enda suatu tantangen siluar biasa. Sekalak diberu singuda denga, silenga erjabu tapi enggo mehuli kulana. Ibaratna enda bagi ndatken bencana yang besar ibas paksa si e. pasti mbue kel perkataan kalak silapayo kerna ia, mungkin kalak sienterem bakal menganggap ia sekalak pelacur. Janah pe kenca enggo melahirken, diberu sihamil diluar nikah e arus ngurus anak e sisada tanpa lit penampat arah perbulangenna nari si kin memang ibas paksa si e statusna bertunangen, ia pe kemugkinan menerima akibat maka Jusuf banci saja nulak ia jadi calon ndeharana.

Bagi Jusuf ras Maria, keajaiban ketubuhen Jesus harus berbenturen ras konsep nggeluh masyarakat paksa si e (seh gundari pe), eme menolak kehamilan sope lenga erjabu. Maka konsekwensina eme ndatken kemalun siarus itanggung Jusuf ras Maria. Memang sangana Maria ngaloken berita e lit gejolak ibas pusuhna, seh maka ikatakenna : “Kuga banci jadi e man bangku?” tapi pernyataan iman Maria teridah ibas ayat 38.

Perban kiniteruken ukur Maria sirela menyediaken geluhna guna ketubuhen Kristus, Dibata pe la pernah nadingken Ia. Adi iperdiateken, amin pe ketubuhen Jesus la sejalan ras pemikiren manusia, krina proses e tetap berjalan dengan baik ras lancer. Erkiteken kai? Perban la lit simetahat man Dibata.

Ayat 26, itegasken maka sanga reh Malekhat ndahi Maria, Elisabet enggo 6 bulan natang tuah. Lukas eme sekalak penulis simendetail ibas nulisken kerna keterangen waktu. Ibas ayat 26 enda sieteh maka kenca Elisabeth enggo 6 bulan natang tuah emaka ipebetehken ku Maria bahwa ia pe bakal mengandung. Ibas sienda berarti umur Jesus lebih muda 6 bulan ibandingken Johanes Peridiken.

Sifat kiniteruken ras kepatuhen Maria situhuna eme buah kinitekenna sihebat. Bukti nyata kinitekenta eme sibakal menakluken pikirenta, seh maka kita lanai pang erbahan alasen man Dibata, sebab keberanienta nimbak kata Dibata eme awal ketidakpercayaan. Adi kata Dibata jelas, ula pernah kita nimbaksa amin pe mungkin saja e la logis ntah pe beresiko berat. Tapi kesadaraen kerna pasu-pasu Dibata simbelin mengharuskan ras empengasup kita guna ngikut Dibata ras peratenNa.

Ibas salam siikataken Malekat man Bana, Maria sadar maka ia ndatken psu-pasu idur Dibata nari. Kesadaren Maria erbahanca ia meteh maka situhuna labo ia pantas ndatken pasu-pasu e. ia sadar maka pasu-pasu Dibata e nge sierbahanca Dibata milih ia. Selanjutna ia pe sadar maka Dibata pasti empengasup ia gelah patuh. Memang mbue resikona tapi Malekat e mpersingeti ia maka Kesah si Badia pagi nusur ibabo Maria guna melindungi ras mpengasup ia. Dua alasen enda me sierbahanca Maria patuh nandangi sura-sura Dibata sibakal terjadi man bana.

III. Pengkenaina

Arah cuplikan peristiwa petubuhen Jesus simenghebohkan enda, pernah kin kita ngadi kentisik ibas kerina aktifitas ras kesibukenta, jenari ngerenungken sada pertanyaan sederhana : engkai maka Kristus nggit reh ku Doni si dem alu dosa enda? Jawaben pertanyaan sederhana e enggo menghasilkan bejilid-jilid buku siitulisken para ahli, si kin memang membeberken sada hal ngenca , eme “Keleng ate Dibata nandangi doni enda”. Adi Maria ngueken kai siikataken Malekat Gabriel man bana, perbahan keyakinenna kerna keajaiban Dibata. ibas situasi si sulit pe Maria tetap ngatakenca “kundesken diringku man Tuhan. Janah jadilah ibas aku kai sienggo ikatakenndu e”.

Ibandingken ras bahan ogenta pe Raja Daud ncidahken uga kinitekenna nandangi kai siijanjiken Dibata man bana. Jadi sekalak raja tentu labo hal sigampang, tapi perbahan kai sienggo ikataken Dibata man bana, tetap me ukur Daud maka ia pasti ipengasup Dibata guna mpekena-kena bangsa Israel, bangsa si memang cukup mbelin adi iperentah sekalak raja. Sura-sura Daud janah pe keyakinen bangsa Israel ibas paksa si e adi la kin Dibata ras kalak enda, emaka pasti talu nge bangsa e adi iserang bangsa sideban. Emaka ibas sura-sura Daud guna majekken rumah pertototn man Dibata, situhuna pemikiren Daud menganggap maka Dibata e banci ikungkung ibas sada ingan (rumah pertoton) gelah lanai lawes Dibata e nadingken kalak enda. Pemikiren sibagenda rupana banci saja muncul arah pengangkan Daud selaku manusia biasa, mbiar ia la ngasup jadi sekalak Raja guna mimpin bangsa simbelin, bangsa sitandai memang keras kepala. Tapi perbahan perkatan Dibata arah nabi Natan, ipetetap Dibata ukur Daud, maka amin pe la ipajekken rumah man Dibata, tapi situhuna Dibata e tetap ras ia. Janah hal siluar biasa, Dibata erpadan maka sekalak anak raja Daud (Salomo) jadi raja gancihken ia kenca Daud mate, janah penampat Dibata man anak Raja Daud e la pernah ibuatna mulihi. Emaka kenca Salomo jadi raja, amin pe ia erbahan salah tetap denga ia jadi raja seh mate. Janah janji Dibata maka sekalak ibas kesusuren raja Daud e kerajaanna la erpeltep-peltep ras tetap paguh, igenapi Dibata ibas ketubuhen Jesus Kristus (Kerajaan Tuhan Yesus la ermasap-masap seh rasa lalap). Tuhu-tuhu luar biasa janji Dibata man kalak si ngikutken pedah Dibata.

Adi sendah Dibata maka kerina kegeluhenta guna ngelai ia, la kin e pasu-pasuna man banta, nginget maka kita enda bagi sampah si lalit ertina? Nggit kin kita ipake Dibata amin pe harus nadingken kerina impian ras sura-suranta? Adi lit denga keraguenta guna ngelai Dibata, la kin Dibata simenopang kita? Mari dage kita ngelai Dibata ali gegeh sienggo iberekenna man banta. Kerjakan baginta, maka Dibata pasti ngerjaken baginNa. Bagi kiniteken Maria singasup ngatakenca “Jadilah man bangku”. Encidahken maka ibas kemustahilan ipikiren manusia, tapi ibas Dibata lalit simetahat.