Pesikaplah Dalan Man Dibata

Khotbah Minggu 07 Desember 2014

Introitus     : “Lit sora erlebuh nina, "Pekena dalan TUHAN i bas taneh si mesawang, i bas gurun pasir, pesikap dalan man Dibatanta.” (Jesaya 40: 3)

Ogen           : Jesaya 40:1-11
Khotbah`   : 2 Petrus 3:8-15
Tema           : Pesikaplah Dalan Man Dibata

Minggu enda kita enggo memasuki minggu advent sipeduaken. Berarti lanai bo ndekah, tading 2 minggu nari kita bakal ngerayaken wari ketubuhen Tuhanta. Emaka memang tem anta pe ibas masa2 advent enda, lalap nge ngajuk kita gelah ersikap, mpekena banta, gelah atan min kita guna ngalo2 kerehen Tuhanta. “Pesikaplah dalan man DIbata” nina tem anta sendah, adi mpesikap dalan tentu lit bahan2 na, ntah semenna, pasirna, batu, rsd. Janah pe tentu perlu tukang guna mpekenasa. Engkai maka dalan e harus ipekena? Berarti lit siceda. Bageka nge kita gundari enda, engkai maka ikataken tem anta enda maka kita harus mpesikap dalan man Dibata, berarti lit sierbahansa dalan e ceda ntah pe lenga mejile dalan e gelah reh Tuhan ndai. Adi bage kin ia kai dage siperlu si man pesikapenken?
Introitusta ngatakenca (oge introitus…). I daerah Jerusalem, jah me daerah gurun pasir jadi memang adi erdalan kita mentasi sada dalan banci kari muat mulih e lanai kita mentas arah dalan siilewati kita pertama ndai muat berkat. Sebab memang kenca silewati dalin e minter nge itutupi alu pasir, jadi memang jejakta ndai pe mis nge lanai bo siidah. Tapi adi zaman gundari lanai bob age dalan I Jerusalem ah nina, sebab enggo ban na lampu2 guna jadi petunjuk dalan, gelah banci arah dalan kita berkat ndai ka nge banci kita arah e ka mulih.
Pesikap dalan man Tuhan nina, enda labo ngerana kerna fisik dalan ndai saja, tapi lebih kubas hal rohani nta selaku kalak sierkiniteken. Ibas 2 pet. 3:8 ndai nina “Ibas Tuhan sada wari bali kap ras seribu tahun” mungkin siibayangken kita enda kerna dua dunia siberbeda perputaren waktuna. Padahal situhuna sudut pandang Dibata lebih cenderung kubas kekekalan. kai si menurut manusia perlu waktu seribu tahun guna ndugisa, Dibata banci ndugisa ibas waktu 1 wari saja. tapi Dibata banci mengambil waktu seribu tahun guna ngelakoken sesuatu hal yang justru kita inginkan terjadi ibas waktu 1 wari. Emakana memang, ibas kitab 2 Petrus enda melala kel guru2 palsu simeragukan bahwa Tuhan Jesus bakal reh sipeduakaliken. Sebab memang enggo ndekah inubuatken kerna kerehen Tuhan Jesus sipeduaken enda, tapi seh surat enda man jemaat pe, Tuhan Jesus ndai lenga reh2.
“lanai bo reh Tuhan e” nina guru2 palsu man perpulungen paksa si e, “enggo lupa nge Ia” nina kalak sinterem. Tapi kai nina surat Petrus, “Tuhan la kap melet, saber Ia nandangi kap sebab la atena sada pe kap ikernepken”nina. Berarti memang labo Dibata menunda2 kerna kerehenNa ku doni enda, tapi memang saber kel Tuhan nta, gelah ula sada pe kita bene. Emaka kai nina surat Petrus “Kam arus nggeluh bagi si ngena ate Tuhan”. Bagi si ngena ate Tuhan, labo bagi si ngena ateku. Adi iibaratken sekalak jelma silit pantangenna pangan2 kerna lit pinakitna, tentu man ndai pe lanai bo banci ate2na, harus ikut aturen dokterlah, adi lang tentu erparahna pinakit ndai. Me bage? Kita pe arus nggeluh bagi singena tae Tuhan, adi lang bene me kita. Sia2 kesabaren Tuhan ndai adi tetap denga sura2nta sipebelin, sura2nta denga sidalanken la sura2 dibata. wari kerehen Tuhan e adi man kalak si memang erkemalangen man Dibata, tentu e wari kesenangen, tapi adi man kalak si la ia ersikap tentu wari kerehen Tuhan e, eme wari kebiaren sebab labo ia ndatken keselamaten tapi justru sebalikna ndatken ukumen.
Kai siisuratken ibas introitusta ndai jelas enggo igenepi Johanes peridiken. Ia ipilih Dibata lako mpesikap dalan ngalo2 kerehen Tuhan Jesus. Janah pe carana guna mpesikap diri pe jelas ituriken Johanes peridiken, kai nina? “jeralah kam ibas dosa2ndu nari, bertobatlah”.
Janah memang lit ka singatakenca, kenca Injil iberitaken seh kubelang2 doni, kenca kerina jelma enggo mbegi kerna injil e, je me pagi reh Tuhan Jesus sipeduakaliken. Sebab memang uga kalak banci tek man Tuhan Jesus janah datkenna keselamaten adi Ia sendiri pe la pernah begi kerna ise kin Juruselamat situhu2 e. Ise kin Jesus e? lenga itandaina. Sebab memang gundari e mbue denga suku2 terabaikan si lenga mbegi kerna berita keselamaten e. tugas ise enda kerina? Tentu tugasta bersama.
Labo berarti harus kita jadi misionaris, penginjil ku suku2 pedalamen, erlajar ka kita lebe uga bahasa suku2 pedalamen, Lang! kita saja pe seri kita kalak karo banci nge beda bahasa nta. Apaika suku2 pedalamen si memang jelas berbeda kel ras kita, cara hidupna, adat istiadatna, budayana, bage pe kebiasanna hidup. Tapi cukup erberita lah kita man tetangga nta si la sada kiniteken ras kita, atau mungkin ku keluarganta si mbarenda Kristen Ia tapi perban satu lain hal beralih ia ku kiniteken sideban. Enda jadi utangta man Dibata. Dibata sendiri La Ia egois, nggit nge Ia nusur ku doni enda, emaka kita pe la banci egois mementingkan keselamaten nta sendiri. Tapi bagi bahan ogenta ndai nina ”Momoken…” momoken, beritaken maka memang tuhu2 lit nge keselamaten ibas erkiniteken man Jesus. Alu bage enggo kita muat bagin ibas mpesikap dalan guna kerehen Tuhan nta Jesus si peduakaliken. Selamat Ermomo, Selamat Erberita, ras Selamat mpesikap dalan guna Tuhan nta. Amin.