Nggeluh ras Ergaken Pemere Dibata

Ogen     : I Petrus 4:7-11
Tema     :Nggeluh ras Ergaken Pemere Dibata.

Perlebe
Genduari melal kel sitonton ibas TV kerna perlumbaan, misalna: Indonesia mencari bakat, Indonesia Idol, La academia, rsd. Kai kin siakap sierbahanca maka kerina peserta “la pernah lelah ras tetap semangat” tentu gelah ndatken juara. Kerina peserta rela ikarantina ras ikeritik juri. Asi kita kalak Kristen, kai nge sierbahanca kita harus tetap semangat ibas kinitekenta eme kerehen Tuhan Jesus peduakaliken (kerina sinasa lit nggo ndeher kedungenna. Ay 7a). siinget min tetap waktu e gelah tetap min lit persikapenta guna ngalo-ngalosa, apai ka waktu e lenga ka bo sieteh ndigan pastina reh. Adi bage kai dage siban persikapenta?

Isi
Surat I Petrus encidahken kiniseran siialami perpulungen i asia kitik erkiteken kaisar romawi (Kaisar Domitianus). Penderitaan e terjadi perban kalak Kristen la nggit nembah kaisar. Kaisar eme dewa si harus isembah. Emaka tupung sangana ngalami kiniseran e, perpulungen ipegeghi ras pe tetap isuruh guna ndahiken piga-piga hal eme:
1)      Kuasai dirindu ras petenenglah dirindu gelah ngasup kam ertoto. Si nimaksudken “Kuasai diri” eme usaha njaga pikiren gelah la ikuasai sura-sura doni, la mbuesa khayalen tapi pikiren e harus ikekang tuhu-tuhu gelah tetap sehat ras jernih. Bagepe kata “petenenglah” ertina ijenda eme rukur alu dem pertimbangen gelah la ceroboh, la sembarangen, la tergesa-gesa tapi tuhu-tuhu bijaksana. Pikiren sitetap ikendaliken erbahanca terhindar ibas perbahanen si la payo bagepe kerina hal harus sipertimbangken lebe alu pertimbangen situhu-tuhu maka terhindar ibas perbahanen simerugiken kalak si deban. Apai ka encurnaken gelar Dibata.
2)      Tetap setia ndalanken kekelengen. Kekelengen ijenda eme kekelengen agape silabo luntur erkiteken kai-kai pe. Alu kekelengen e maka tetap banci nggeluh alu dame sebab kekelengen namburi mbue dosa. Labo bagi kuan-kuanta adi enggo nembeh ateta “lanai gia sada matawari pe” simenandaken mesera dengan kita ngalemi salah kalak.
3)      Mere diri jadi tumpangen kalak sideban. Nggejabken penderitaan teman e sierbahanca meriah ukur mereken tumpangen man bana alu la jungut-jungut, bagepe nggeluh la egois.
4)      Pemere sienggo sialoken ibas Dibata nari harus ipergunaken guna kiniulin kalak sideban. Biasana kalak rukur guna kiniulin dirina entah guna kiniulin keluargana tapi ijenda rukur kita guna kiniulin kalak sideban. Sebab pemere e rehna ibas Dibata nari. Baik e soal ngerana ntah nampati. Kalak si tek harus metenget ibas pengerana bagepe ibas nampati, ia ngerana sue ras kai siikataken Dibata labo pikirenna. Bagepe sanga ia nampati, maka labo erkiteken gegehna (kengasupenna) tapi erkiteken gegeh siibereken Dibata. Tujun akhir ibas kerina e, eme gelah Dibata imuliaken ibas kerinana arah Jesus Kristus.
Jadi kiniseran la ngabati kita guna erbahan hal simehuli tapi kiniseran siialami perpulungen erbahanca nggeluh la egois, tapi ngukurken kiniulin teman ras kiniulin gelar Dibata.

Pengkenaina
Biasana adi reh kiniseran si mberat nderpa geluhta maka pemikirenta banci jadi sempit, ukurta banci enggo tertutup. Kita nggeluh ngukurken kerna kiniseranta tanpa lanai terukurken kita kiniseran kalak sideban. Apalagi ngukurken kerna kiniulinna. La pe kita ibas kiniseran banci jadi kita ngukurken dirinta sendiri saja, apai ka lit kiniseran si nderpa geluhta. Saja ngenca harus ka kepeken sisedari maka ibas pribadi-pribadinta enda lit pemere Dibata si pelain-lain. Janah e sialoken alu Cuma-Cuma ibas Dibata nari. Tujun Dibata meeken pemere e gelah banci kerina mehuli.
Emaka marilah kgelah sikuasai pikirenta gelah la tergoda nandangi doni enda, misalna adi kita ndabuh kubas mencintai uang emaka lanai bo terukurken hal simehuli man kalak sideban sue ras siniarapken Dibata man banta. Uga kelp e kita pasti tetap ngukurken kerna uang. Emaka kendaliken pikirenta tetap sehat, tetap ertimbang alu mbages gelah banci siidah kiniseran kalak sideban, nggeluh kita alu kekelengen, banci nggejabken kinisuin temanta. Silakoken simehuli man kalak sideban arah pemere Dibata e man banta. Kerina sie silakoken gelah terpuji Dibata arah kita. Sibahanlah maka kerehen Jesus peduakaliken e silabo sieteh ndigan waktuna tetap simemotivasi kita guna ngergaken alu makeken pemere Dibata e bagi siniarapken Dibata.