Tetaplah Permuliaken Ia

Ogen     : Efesus 4:24-29
Tema     : Tetaplah Permuliaken Ia

I.               Kata Perlebe
Tuhu kegeluhenta enggo jadu kalak Kristen. Tapi enggo kin kegeluhenta sebage kalak Kristen e ibas nggeluh simbaru ntah ibas nggeluh sindekah denga. Adi lenga bo lit perobahen tandana kita enggo nggeluh ibas nggeluh simbaru berarti kita ibas nggeluh sindekah denga. Seri saja caranta rukur ras perbahanenta bagi kalak silenga Kristen, umpamana perubat-rubat, megelut, merangap, ngelakoken si la payo bagi siisuraken Tuhan, lenga denga kita ibas nggeluh simbaru. Berarti perlu kita bertobat, nadingken kegeluhen sindekah enda.
Kalak sienggo ibas nggeluh simbaru, terjadi perobahen ibas carana rukur ras pengeranana pe. Kegeluhenna sienggo erpalasken ibas kiniteken man Kristus Yesus, ia enggo ibas perukuren simbaru simehuli ras pe perbahanenna tergejab mereken kemalemen ate man kalak si deban. Arah cara rukur bagepe perbahanen kalak Kristen tetaplah mpermuliaken gelar Dibata “Hidupku bukanlah aku lagi, tapi Kristus yang ada di dalamku”, kai pe siilakoken kita tetaplah aras erpalasken geluh erpengendes man Kristus Yesus.

II.             Pendalaman Nats
Kegeluhen kalak Kristen i Efesus pe megati denga terlibat kubas praktek-praktek kegeluhen sindekah, e me: la meteh mela, ngelakoken si la mehuli, sijahat, penipu, perbual, merampus, pinangko, melasken cakap haram simereha, cian ate, cikurak, rsd. Emaka Paulus mereken nasehat kerna lagu langkah kegeluhen kalak Kristen sibage berarti ibas kegeluhen simale denga. Arus maka kegeluhen si male enda itadingken jenari nggeluhlah ibas kegeluhen simbaru.
Siitekanken ibas nats enda nuduhken kerna kegeluhen simbaru, ibas erti peniadaan dosa e me:
1.       Olanai erbual! Kegeluhen ibas kebersamaan perpulungeniarapken gelah nuriken situhu-tuhu. Banci igelem cakap siibelasken teman sada perpulungen. Labo banci kalak tek man kata Dibata siibelasken adi kit ape nggeluh erbual labo ibas ketuhu-tuhun.
2.       Adi merawa, ola she erdosa. Merawa nuduhken lit si la bagi ukurta siilakoken temanta. Merawa e manusiawi nge, tapi kalak si la terkontrol rawana (merawa, seh dendam) lanai badia geluh e, janah pe banci ka iblis pe simengendaliken dirinta. Sangat berbahaya arah rawa banci ibahan iblis tindaken dosa silebih hebat denga, banci membunuh pe.
3.       Kalak si nangko gel-gel nari ola nari nangko tapi erdahinlah (encari). Ijenda nangko ijelasken sifat si lamehuli (jelek) berhubungen ras kemalasen. Arus iubah alu encari/erdahin, ge;ah jadi positif. Arah ulih encari e banci nampati kalak sideban ibas kepiceten.
4.       Adi ngerana olanai belasken cakap si la erturin-turin (perkataan kotor). Lit kalak la isadarina arah pengeranana icap kalak maka ia la mehuli ras labo lit kinitekenna. Jelas memang ijenda ikataken Paulus kerna nggeluh simbaru pengerana pe olanai la erturi-turin (cakap kotor ntah pe kasar). Cakap sierguna min siibelasken/ndarat ibas babahta nari. Maba kiniulin man kalak simegisa.
Melala nge cara rukur ras perbahanen sinuduhken maka kita enggo ibas nggeluh simbaru siarusna icidahken kalak Kristen, tapi sekali enda itekanken rasul Paulus siempat hal enda.

III.           Pengkenaina
1.       Geluh mpermuliaken Tuhan teridah min ibas kita kalak Kristen. Mekatep enggo kwalitas kegeluhen kalak Kristen lanai teridah ibas tep-tep warina. Enggo seri saja kegeluhen kalak Kristen ras kalak si la Kristen, ibas perikurenna ras perbahanenna. Bagi isingetken kata-kata kotor, sifat dusta idalanken kalak Kristen labo mpermuliaken Tuhan e.
2.       Makeken kegeluhenta ibas geluh simbaru. Lit ijenda sikap ngelawan sura-sura daging. Adi nggo ibas kegeluhen simbaru teridah lit “kontrol” Kristus, gelah ula mulihken ku kegeluhen si male. Perlu mbue latihen pengendalian diri, gelah akhirna tuhu-tuhu ngasup nadingken kegeluhen simale ras nggo nggeluh ibas kegeluhen simbaru.
3.       Aplikasi kubas perayaan natal singgo ndeher, jadikenlah natal maba dame ras keriahen ukur. Emaka la banci persiapen lahiriah saja sipesikap, tapi persiapen pusuhta guna ngalo-ngalo ketubuhen Tuhan Yesus e. Jesus mereken keterkelinen ras kemalemen ate man banta. Ola natal menjadi beban erkiteken hal lahiriah saja siakap sipentingna.