Kam Enggo Ipilih Tuhan Jadi si Erjaga

 

Introitus : Emaka jagailah dirindu dingen jagai pe kerina kalak sienggo itetapken Kesah Si Badia man kepkepenndu (Perb. 20:28a)

Ogen        : Roma 13:8-14
Khotbah  : Esekiel 33:1-7 (Yehezkiel 33:1-7)

Tema        : “Kam enggo ipilih Tuhan jadi sierjaga”

I.        Kata Perlebe
Ibas kegeluhen enda, manusia rusur kel erbahan kesalahan. Baik si sengaja ntah pe si la sengaja. Hal enda erkiteken, manusia lit dengan ibas kuasa kedagingenna. Perbahan biak-biak daging enda maka manusia rusur kel ngikutken kai siipikirkenna saja la ipergermetkenna bahwa kai siirencanakenna e lanai sesuai ras peraten Dibata. kerna hal si enda me maka selaku kalak si tek kita berkewajiban guna mpersingeti teman-temanta sebab kesalahan kalak si deban si ieteh kita, adi la sipersingeti maka kit ape ikut salah. Tapi sebalikna adi enggo sipersingeti ia tapi la ibegikenna maka e enggo jadi tanggungenna.

II.      Pendalaman Perikop
Ibas nats enda esekiel ipersingeti kerna tugas panggilenna sebage penjaga umat Allah, eme guna mpersingeti bangsa Israel gelah ertobat alu bage mulihken ku Dibata. pemanggilen enda penting kel sebab berkaiten ras kegeluhen bangsa Israel. Nabi esekiel ndalanken tugas panggilenna ibas pembuangan Israel ku babilon. Ibas pemanggilenna enda guna menyampaikan berita keselamaten ras pendilo dibata gelah bertobat, Dibata ngerana langsung man esekiel arah firmanna (ay. 1).
Ay. 3-6, ibas ayat enda ituriken Dibata kerna tugas-tugas esekiel selaku penjaga man bangsa Israel. Esekiel harus mpesehken berita Dibata man dua kelompok, eme kelompok kalak fasik (kalak silenga tek man Dibata singelakoken kai si la ngena ate Dibata) ras man bangsa Israel kerna sikapna nggeluh ibas Dosa ras kesalahen si enggo ilakokenna. Intina tugas esekiel enda eme guna mpersingeti kalak si jahat e gelah bertobat arah kejahatenna nari. Ras man bangsa Israel gelah ngelakoken kai singena ate Dibata, gelah ula kari bangsa enda binasa kerna dosa-dosana.
Penekanen si cukup mendasar eme kerna masalah tanggung jawab esekiel guna mpersingeti bangsa enda, baik e bangsa Israel ntah pe bangsa sideban. Adi la ipersingetina bangsa-bangsa enda maka hukumenna jadi tanggungen si penjaga. Melalui tugas si mberat enda, banci sieteh maka dibata la nggit umatna binasa. Enda ertina maka tugas esekiel e tuhu-tuhu penting, gelah umat Israel she kubas pertobaten simabai bangsa enda ku kegeluhen labi kebinasan.
Ay. 7, ibas ayat enda Dibata milih esekiel sebagai penjaga man bangsa Israel. Ia ipilih guna njagai keselamaten bangsa Israel, ertina tugasna eme gelah ipersingetina bangsa enda kerna uga carana nggeluh iadep-adepen Dibata. esekiel harus mpersingeti bangsa enda gelah njagai kinitekenna ras perbahanenna gelah ula kalak enda binasa.

III.    Pengkenaina
Dibata siisembah kita ngarapken man anak-anakNa gelah jadi anak-anak si bertanggung jawab. Ertanggung jawab ertina nggit menanggung resiko, mau berkorban, nggit menanggung beban ibas kegeluhen enda. Dibata njadiken kita jadi anak-anak yang tahan uji, la mudah meyerah apai ka menghindar dari tanggung jawab. Adi kiam denga kita ibas tanggung jawab em ertina maka lalit bedana  kita ras kalak silenga nandai Dibata. kita la banci tutup mata man teman-teman isekelewetta, harus lit sikap perduli ras saling memperhatikan ibas kita. adi memang sieteh temanta erbahan hal simehuli enda jadi tanggung jawab ibas kita guna mpersingeti ia. Alu bage kita nggo ndalanken tugas siisehken Dibata man banta guna sikeleng-kelengen (bahan ogenta). Adi kin tuhu keleng kita man temanta manusia berarti la sipediat ia erbahan si jahat (Rm. 13:10), sikelengi ia bagi kita ngkelengi dirinta sendiri.
Terkadang selaku manusia lit dengan biak acuh tak acuh ibas kita. la kita mau tau kerna temanta, padahal ikataken Dibata maka enda jadi tanggung jawabta bersama. Rusuren kita ngerana man kalak sideban kerna kinilabujuren temanta, si cikuraki ia arah pudina. Padahal hal enda labo lit untungna man banta justru merugikan dirinta sendiri. Tentu lebih baik kita ngerana man sibersangkuten secara langsung dari pada sikataken man jelma sinterem. Aku bage kita enggo empersingeti ia. Adi ibegikenna kita, berarti kita enggo nehken kekelengen man bana alu la mpediat ia erbahan si salah janah lit min perubahen sikap ibas ia nari. Tapi adi la ibegikenna berarti perbahanenna e jadi urusenna ras si Dibata.
Ibas perkembangenna gundari tugas selaku penjaga isehken man banta terutama kita serayan-serayan Tuhan. Terlebih ibas persekutuan, kita harus saling empersingeti. Tapi mekatep lit timbul masalah baru ibas proses enda. Kita kurang mpersiapken diri guna ngelakoken hal enda, terlebih-lebih kita la pang guna ndalanken tugas enda. Rasul Paulus mpersingeti kerna hokum kekelengen sebagai energy si mendasari tep-tep usahanta guna ngelakoken kehendak Dibata. Jemaat roma lanai iteruh undang-undang tapi kekelengen. Maka kekelengen e arus segera ilakoken ulanai itunda.
Uga dagena kita genduari? Ma tugas siiberekan Dibata man Esekiel, tugasta ka gundari? Kai kin si enggo ilakoken kita guna mbritaken keselamaten sienggo ibereken Dibata? adi tuhu-tuhu kita keleng man DIbata ras temanta manusia, maka pasti kita nggit nehken kekelengen e alu sada sikap nggit perduli ras mpersingeti kalak isekelewet kita.

Orang hanya akan menjadi lebih baik
Jika kita bisa membuat ia tahu cara menempatkan diri
(Anton Chekov)

Komunikasi terjadi ketika suatu sumber menyampaikan pesan kepada penerima
Dengan niat yang disadari untuk mempengaruhi perilaku penerima
(Gerald R. Miller)