Kudus dan Tak Bercacat dimata Tuhan

Nats       : I Pet 1:13-16

Tema     : Kudus dan Tak bercacat dimata Tuhan

Adi siperdiateken tema nta enda, tempa-tempa bagi kalimat kiasen ngenca. Sebab memang labo mungkin lit manusia si sempurna. Adi kudus ikataken tentu tidak becela, lanai lit man pandangen enggo mejile kerina, mehuli perbahanenna. Tapi kai ninta rusur manusia guna membela diri. Aku enda manusia biasa, jadi wajar adi ngelakoken kesalahen/dosa.

Tapi justru hal simenarik siiangkatken Paulus ibas surat-suratna, rusur kel ia menyapa jemaat-jemaat na alu panggilen orang-orang kudus adi ibas bahasa karo ikatakenna “Anak-anak Dibata”, jadi akap kami memang lebih tepat terjemahen bahasa Indonesia. Paulus rusur menyapa jemaatna alu kata orang2 kudus labo berarti perpulungen ibas paksa sie lalit cacatna, lalit kesalahenna, lapernah erbahan dosa, Lang! Justru hal sebalikna :

ü Jemaat Korintus simengenal kelompok-kelompok, la akur sada ras sidebanna.

ü Jemaat efesus sirusur inasehati Paulus alu pedah-pedah gelah ngelakoken kekelengen, ertina jemaat enda pe lit kecenderungenna la nehken kekelengen man temanna.

Tapi engkai maka Rasul Paulus ngataken maka kalak enda eme orang-orang kudus?

Mungkin banci saja terpintas bas kita, maka rasul Paulus e mungkin atena ngajarken kerna perfeksionisme? Adi anak Dibata harus ngelakoken hal simehuli, lanai banci ngelakoken Dosa, harus badia geluhna. Tapi situhuna lang! sebab Paulus sendiri pe ngatakenca ibas I Tim 1:15 “aku siberdosana kel”. Surat I Yoh. 1:18, pe ngatakenca, adi sikataken kita la erdosa maka kita enda penipu.

adi bage uga dage caranta banci jadi kudus, badia, la cacat ilebe-lebe Dibata? tentuna labo arah gegehta, labo arah perbahenta. Tapi erkiteken keleng ate DIbata man kita manusia. Sope lenga ijadiken Dibata doni enda enggo ipilihNa kita guna jadi anak-anakNa sibakal ngaloken janji keselamaten arah Yesus nari. Engkai maka aku kalak sila benar, la jujur, la setia, banci jadi kalak Kristen? Mesera kel njelaskenca adi arah pemikirenta nari, sebab pemikirenta enda terbatas, kita siterbatas enda labo banci siangkai kerna kerina rahasia Dibata enda. Tapi sipasti keberadaanta selaku kalak Kristen, labo berarti lebih Badia kita ibandingken kalak sideban. Tapi erkiteken keleng ate Dibata silaterbatas eme sierbahanca kita ibadiaken.

Pernah iidahndu bunga si mbentar kel warnana? Uga adi bunga simbentar e sinehen alu make kacamata warna biru? Tentu bunga sindai aslina mbentar ia bakal jadi kebiru-biruan siidah arah pandangenta. Bageka pe kepeken Dibata ngenehen kita, arah kacamata Yesus Kristus. KerehenNa ku doni enda nadingken kebadianNa i surga, nusur ku doni enda ibas ingan sihina kel, gelah kita ibadiaken. Alu kacamata kekelengen lanai iidah DIbata kerina perbahanenta silamehuli, lanai iperhtungkenNa kekurangenta, tapi isempurnakenNa kita arah Jesus Kristus.

Misalna adi kita nukur mobil alu kredit pasti harus lit lebe DP-na, jadi jaminen ntah pe janjinta/ tanda jadi maka mobil e pasti silunasi. Dibata pe ibas ia erjanji man banta mereken keselamaten, lit DP-na leben iberekenNa jadi jaminen, maka keselamaten siijanjikenNa e pasti ilunasina kari ibas waktuna. saja sijadi permasalahen eme mawen2 kita la nggit ngaloken DP enda ndai. kai kin DP na? Kesah si Badia. Kesah sibadia e jadi tanda sebagian kecil kerna keselamaten sienggo ijanjiken Dibata man banta.

Misalna pe adi siidah bulan i langit, amin pe sitik dengan ia idah, pasti la pernah sikataken “nehen min lit sebagian bulan I langit” labo pernah bage ninta tapi pasti sikataken “nehen min lit bulan I langit”. Ertina alu ngidah sebagian kecil saja enggo sieteh maka situhuna labo terbagi-bagi bulan ndai tapi lenga waktuna idah kerina.

Bage ka pe gereja, mungkin siidah kita sebagian kecil ngenca gereja e ngelakoken hal sibenar, tapi situhuna e labo ngurangi kerna kebenaren gereja secara keseluruhan.  Justru orang-orang Kristen yang merasa sok benar dan sok suci, alu ngidah kesalahen gereja sitik saja pe mis itadingkenna gerejana, membenci gerejana. Padahal situhuna gereja justru membutuhkan orang-orang Kristen terbaik guna memperbaiki gereja e labo menghakimi. Adi kam kerina ngidah lit kekurangen gereja, ula mis sicap gereja e jadi gereja si bobrok. Sebab situhuna itengah-tengah sora si merdu pe pasti lit nge sibegi sora sisumbang. Emaka itengah-tengah pertikaian pe pasti lit kekelengen.

Bagelah kita arusna jadi anak-anak Dibata si la ercacat iadep-adepen, tapi tuhu badia kegeluhenta. Erkiteken tetap berusaha kita ndalani kegeluhenta bagi singena ate DIbata. labo sura-suranta sidalanken, tapi ikutkenlah sura-sura Kesah si Badia. Tetaplah erkemalangen man DIbata, alu bage Dibata pe meriah ukurna ngidah kita kalak sitek ndalani kegeluhenta bagi sisentudu ras ngena ateNa. Amin.