Kam Kap Bapa Kami O Tuhan

Khotbah Minggu 30 November 2014

(Advent I)

Introitus: Tapi Kam kap Bapa kami o TUHAN; kami taneh dah, janah desken sekalak pande kudin, itepandu kami .(Jes. 64:8)
Ogen                     : Mark. 13:24-37 (Tunggal)
Khotbah              : Jesaya 64: 1-9 (Anthiponal)
Tema                    : Kam Kap Bapa Kami, O Tuhan !

I.               Kata Perlebe
Statusta selaku anak-anak Dibata sangat menentuken kerina aspek kegeluhenta. Kesah si Badia njadiken kita anak-anak Dibata siberhak jadi ahli waris guna ndatken janji-janji Dibata. Janah pe sekali kita jadi anak Dibata maka seterusna kita anak Dibata, labo pernah Dibata lupa kerna janjiNa man anak-anakNa. Tapi lit kin statusta selaku anak Dibata e tuhu-tuhu lit meningkatken kualitas kegeluhenta? Ntah tetap denga kita jadi anak-anak si mengecewakan ras erbahan mela Bapanta. Kita iajuk guna nggeluh sebage anak-anak Dibata situ-tuhu bertekun ibas rancangen ras dalan Dibata.

II.             Pendalaman Nats
Nats enda eme bagin doa siipeseh alu bentuk mazmur guna nuriken uga kiniseran siialami bangsa Israel akibat dosana, emaka Dibata mbuniken ayoNa. Kiniseran siialami bangsa Israel i pembuangen erbahansa sebagin kalak enda nadingken Dibata, lawes nembah ku dewa-dewa bangsa Babel. Ibas ayat 1-2, nabi Jesaya ngungkapken pemindonna man Dibata “Caingken min langit, nusurlah Kam Tuhan…”. Pemindon enda eme keyakinan bangsaNa maka Dibata siisembahna eme Dbata sierkuasa i langit ras I bumi. Dibata ngasup ncaingken langit alu kinimbisanNa. kerehenNa erbahan deleng-deleng ngir-ngir. Pemindon end ape isehken man Dibata alu pengarapen gelah Dibata muat tindakenNa, man kalak si la tek nandangi kuasaNa. Nabi Jesaya sedak akapna ngidah perbahanen kalak si menganggap Dibata la ngasup guna memulihken mulihi bangsaNa. Nabi Jesaya mewakili bangsa Israel mindo perkuah ate Dibata selaku Bapa  kalak enda, iungkapkenna gelah Dibata ulanai nginget perbahanen bangsaNa si la muli. Dibata selaku Bapa meteh kesalahen bangsaNa selaku anak simemerluken pengampunan. Alu gambaren sideban maka Dibata selaku pembentuk bangsaNa ras bangsa e eme buah karya Dibata sendiri. Bangsa e labo kai pe adi tanpa Dibata, enda me ungkapen sijujurna i adepen Dibata.
Pertoton enda ungkapken uga belinna kuasa DIbata si la banci ibandingken ras dibata-dibata sideban, sebab Dibata pasti megiken ras erbahan tindaken alu kuasaNa simbelin adi bangsaNa e ngelakoken hal simehuli, sibenar (ay. 5). Emaka ibas pertoton enda bangsaNa mindo man Dibata gelah ulanai nginget kerna dosa ras kesalahen alu kekelengenNa selaku Bapa man kerina bangsa sienggo ipilihNa (ay. 8-9). Banci siidah tanggapen Dibata man pertoton bangsaNa enda ibas bindu 65, ija situhuna Dibata enggo berseru ku umatNa “enda Aku, banci kam Kusampati”. Enda encidahken maka Dibata situhuna ertedeh ate guna ijumpai, bahkan tep-tep wari Dibata nudurken tan-Na man kalak si memberontak ras nadingken Dibata.
Sebagin bangsa merefleksiken maka kai siialami bangsa e eme sada tanda maka Dibata siselama enda njayam kegeluhenna enggo nadingken bangsa e. ibas ay. 7 “Lali kami si ertoto man Bandu, la lit si nggit njemak tanNdu. Sebab ayoNdu itutupiNdu nandangi kami, janah ipediatNdu kami ikuasai dosa kami”. Li sebagin bangsa enda si kecewa ras putus asa kerna kiniseran siialamina. Selanjutna lawes me kalak e nadingken Dibata, berbalik kudewa-dewa bangsa Babel. Kalak enda la tahan alu keadaan siialamina, ibas penantinna akhirna ia putus asa ras nadingken Dibata. Umat siiwakili nabi Jesaya enda ncidahken maka keberadan kalak enda memerluken penampat, perkuah ate Dibata. Nabi Jesaya ngatakenca “Tatap min kami kerina, bangsaNdu kap kami enda” (ay. 9). Bangsa e lalap tertima nandangi perkuah ate Dibata. Amin pemindon e ngungkapken maka Dibata lenga bertindak tapi kalak enda tetap nimai penampat ibas DIbata nari. Bangsa e nimai penampat DIbata si la ietehna ndigan waktuna tapi tetap bangsa e setia.

III.           Pengkenaina
Bangsa Israel tetap setia alu keadaan la pasif tapi aktif. Bangsa e aktif menilai diri sendiri, ngkoreksi diri ras ngakuken keberdosaanna. Kalak enda jujur ibas menilai diri sendiri janah ertobat. Iakuina maka Dibata siempuna geluhna.
Memasuki masa advent, kita ipersingeti gelah tuhu-tuhu memaknai masa advent enda. Alu bage perayaan natalta pe banci menggambarken pengataken bujurta man Dibata siselama enda encidahken kekelengenNa ibas kerina dampar kegeluhenta.  Ibas minggu-minggu advent enda kita pe iajuk gelah tetap nimai penampat Dibata alu setia. Penampat e sitimai alu hubungen pergumulen pribadinta, keluarganta, gereja ras bangsanta bahkan dunia. Janah pe silebih utama eme sitimai kerehen Tuhan Jesus sipeduakaliken alu setia. Ibas nimai e kit ape harus terus menilai dirinta, mengoreksi, empekena pusuh ras perukurenta guna semakin serupa ras Ia. Ula kita jadi lemah dalam penantian tapi tetap megegeh amin pe la sieteh ndigan waktuna. Masa-masa advent eme masa guna merenung, ngadi kentisik guna ngidah perdalinen geluhta. Alu bage la sianggap enteng ntah pe la perduli kerna dosa-dosanta iadepen Dibata. Alu ketutusen ingin berubah ku kegeluhen simbaru gelah ibas kerehen Tuhan Jesus sipeduakaliken kita enggo tuhu-tuhu siap guna bengket kubas kegeluhen sidem alu sukacita.