Pakekanlah Kesah Kepentaren Dibata

 

Khotbah Minggu 23 Nov 2014
(MInggu Pendungi Tahun Gereja)

Introitus              :Kupindoken man Dibata Tuhanta jesus Kristus, Bapa siermulia gelah iberekenNa man bandu kesah kepentaren dingen ipetangkasNa diriNa man bandu gelah itandaindu Ia (Efesus 1:17)
Ogen                     :Esek. 34:20-24
Khotbah               :Yoh. 11:25-26
Tema                     : Pakekenlah Kesah Kepentaren Dibata

Perlebe
Ngerana kerna Kematen eme hal si la menyenangkan. Tempa-tempa kemaen e enggo ndeher man banta. Labo pernah ntah pe lit tapi jarang,  lit kalak si pulung I kede kopi ntah pe kantor asik ia ngerana soal kematen. Engkai? Kerna kematen ianggap sada hal si menakutkan, kematen erbahanca kalak gentar. Menurut buku jalan keselamatan lit 5 pandangen manusia kerna kematen: (1). Kematen eme titik ntah pe detik penghabisan. (2) kematen eme suatu tanda Tanya, misteri si la ieteh manusia. (3)kematen ipahami sebagai kebebasen I doni enda. (4) kematen ianggap sebagai dalan peralihen siharus ilewati jiwa manusia. (5) kematen ianggap sebagai titik dua ertina kenca kematen tading 2 hal saja kemungkinan, ndatken kegeluhen sirasa lalap ntah kematen sirasa lalap.

Isi
Daerah Palestina eme daerah agraris ibas paksa si e. emaka pertanin ras peternaken eme sumber kehidupan siutama. Permakan labo ha lasing man masyarakat ije, janah pe geluh siipermakani tergantung man komitken siermakan. Permakan i palestina nempatken dirina arah depan, ertina ia nggit mereken geluhna guna keselamtan geluh siipermakanina. Kitab esekiel encidahken cirri-ciri permakan situhu-tuhu, ia ndarami biri-biri sibene, sitersesat, mereken man ras ngerawat sisakit bage pe njagai biri-biri e arah binatang buas nari bage pe jadi hakim simehuli dingen benar.
Tema injil Yohanes secara umum eme kerna kegeluhen sirasa lalap/kegeluhen sejati siibereken man kerina kalak sitek man Kristus. Perikop enda eme pencakapen Jesus ras marta I tepi kuta Betania (gundari kuta e igelari Azariyah siberasal arah gelar lazarus nari) kuta enda kira-kira 3Km ku Jerusalem. Ungkapen Jesus ibas ayat 25-26 labo sekedar basa-basi penghiburen saja. Tapi menyangkut pernyataan siluar biasa kerna menyingkap suatu rahasia besar kerna ise Jesus e ras kai misiNa ku doni enda. Arah ayat 25-26 enda hal penting ikemukaken kerna “nggeluh”. Misi Jesus ku doni enda emem guna mereken kegeluhen man kalak si tek man Bana. Geluh siibereken Jesus la banci ikurangi ntah pe iputuskan alu kematen jasmani.kegeluhen e ibereken alu dalan kematen jasmani. Selanjutna ungkapen “Tek man Bangku…” lit 2 kali ikataken Jesus ibas ayat 25 ras 26 harus siperdiateken tuhu-tuhu. Ungkapen enda ngingetken kerna pentingna kesempaten nggeluh I Doni enda. Ertina sanga kita nggeluh I Doni enda harus kita tek man jesus, gelah kita la ndatken kematen sirasa lalap (masuk neraka). Inget pemahamen Alkitab kerna kematen idatas maka kematen eme titik dua. Alu kata sideban, kenca mate lanai lit kesempaten guna merobah nasib, ntah ertobat gelah la masuk neraka. Selama kita nggeluh me sitentuken kuja kita pagi.
Sijadi permasalahen eme enggo kin kita tuhu-tuhu tek man Jesus, maka ia nge simereken kekeken ras kegeluhen ras pe geluh kerina kalak sitek man bana labo pernah mate? Adi tek kita, marilah kita tuhu-tuhu yakin ras ndalanken geluhta bagi siikataken Paulus : Man bangku nggeluh eme Kristus, janah mate reh untungna (Filp. 1:21).
Dibata ngajuk kita gelah simafaatken waktunta nggeluh iDoni enda alu payosekaligus ersikap gelah ndatken kekekalen. Nggeluh i Doni enda amin pe kentisik ngenca, labo e sia-sia/lalit maknana. Itamaken Dibata kita ku Doni enda guan ikut muat bagin ibas pendahinNa, ngelakoken hal simehuli dingen benar ras pe ncidahken kekelengen. Kita isuruh Dibata guna merancang masa depanta ras ertanggung jawab kerna geluhta.

Pengkenaina
Arusna kematen lanai jadi kebiaren man banta. Kesaksin Alkitab jelas ngatakenca maka Jesus enggo naluken kematen alu kematen ras kekekenNa. Ertina kematen memang harus silewati, tapi tep-tep jelma sitek man Bana pasti nggeluh amin pe enggo mate ras kegeluhen e eme nggeluh situhuna, kegeluhen sirasa lalap ras Dibata Bapa i Sorga.
Erbage-bage cara manusia ndalani kegeluhen sisingkat enda. Tergantung pendekaten kai siipakena. Dosa ras sura-sura daging manusia mabai kita lupa kerna kematen sirasa lalap, ras kegeluhen sirasa lalap man kalak sisetia nggeluh ibas dalan Dibata. E sierbahanca manusia e lebih ngutamaken kesenangen doni (erta, pangkat). Kerna kecenderungen enda erbahanca manusia la sadar maka ia enggo ndauh ibas dalan Dibata nari. Kinitekennta ngatakenca maka geluh kita i doni enda lenga final. Ibalik kematen sigelap, arus lit keyakinenta maka lit dengan kegeluhen ras Dibata. Kematen labo akhir kerinana. Emaka kita pe la banci larut bas kenikmaten doni, ula kita tergoda man pesona doni enda, alu bage sope lenga terlambat teklah man Jesus maka Ia nge simereken kegeluhen situhu-tuhu.