Wari Tuhan Reh Me

 

Bahan Khotbah Minggu 16 November 2014

Ogen                     : I Tes. 5:1-11
Khotbah               : Sepanya 1:7, 12-18
Tema                     : Wari Tuhan Reh Me.

 

Biasana adi manusia ngerana kerna wari Tuhan, pasti ibas pikirenna eme kerna kerehen Tuhan Jesus sipedua kaliken. Uga wari Tuhan e inubuatken bakal terjadi ibas kitab wahyu, wari Tuhan si seh kel ngerina. Apai ka adi iperdiateken sada persada sanga malekat niup terompet, tiap sada terompet itiupna maka terjadi kehancuran I doni enda.  Tapi kepeken labo sesempit e saja pengertin kerna wari Tuhan e. sepanya ngatakenca maka wari Tuhan e eme wari ija Dibata ngukum kalak sierbahan jahat. Alu uga? Ibas ayat 13, ikatakenna maka bakal irampasi kerina kebayakenna janah rumahna pe iradasken. Erkiteken kai? Kepeken kalak si jahat siimaksudken sepanya ijenda eme kalak si memang lebih mengandalkan erta doni asangken kuasa Dibata. Lanai ia tek man Dibata, janah memang hal simenarik ibas ay. 9 amin pe ayat enda la masuk ibas bahan khotbahta sendah tapi akap kami sendalanen dengan nge ayat e. ije ikataken “Kuukum kerina kalak sinembah bagi perbegu”, mungkin biasana siibegi kita rusur eme kalak sinembah man perbegu tapi sepanya ngangkatken sada topic simenarik nembah bagi perbegu. Berarti bangsa e situhuna nembah man Dibata nge Allah Yahwe, tapi carana nembah e bagi ia nembah man perbegu.

Biasana dakam adi nembah man baal ningen e, ibereken sesajen, sesembahen2 gelah ibereken baal ndai min pasu-pasu. Bage nge kalak enda ersembah man Dibata ibas paksa si e. iberekenna pe persembahen tutungenna labo kerna memang igejabna kerna pasu-pasu Dibata e lit ibas kegeluhenna, tapi gelah ia ipasu-pasu. Berarti me ibas si e ia la nggejabken maka Dibata situhuna enggo leben masu-masu kegeluhenna. Emaka nyambung memang bahan ta minggu enda ras ogen nta minggu silewat “Ciga ateKu korban persembahendu, ende-enden ndu e pe gejek kuakap”. Erkiteken kai? Erkiteken memang kegeluhen bangsa ibas paksa si e lanai bagi si ngena ate Dibata. Emaka nina tem anta “Wari Tuhan reh me”. Ije nge pagi kerina kalak sijahat bakal sinik ngenca banci. Bagi ibas ay.7(ogeken…)ije nge kari nina Tuhan, ulanai ngelawan, ulania njawabi janah memang lanai banci membela diri. “Sinik saja kam” nina Tuhan, erkiteken memang enggo jelas tuhu-tuhu kegeluhen bangsa ibas paksa si e, lanai bagi sura-sura Dibata.

Kitab sepanya jelas nurikenca maka wari Tuhan e labo terjeng kerehen Tuhan Jesus peduakaliken, tapi wari Tuhan e lit nge sendah. Ibas sudut pandang sepanya, ketika kerina kalak si jahat ras megombang man Dibata iukum, ndatken kiniseran, ije nge wari Tuhan e.

Janah ibas kitab padan Simbaru, mabai kita uga kita ibas nimai wari Tuhan sipedua kaliken e. wari kerehen Tuhan Jesus e. amin pe inubuatken maka ibas kerehen Tuhan Jesus sipeduakaliken ibabana pedang. Tapi bahan ogennta I tes. 5:1-11 ngatakenca, maka la perlu kita mbiar. Sebab kita iipilih Dibata labo guna ndatken ukumen tapi gelah sialoken kselamaten e.

Jadi memang jelas konsep berpikirta ituriken Paulus arah suratna e. ay. 1 “la perlu isuratken kami kerna ndigan warina” janah memang la perlu sieteh. Engkai? Adi kerinalah kerna Dibata sieteh, kai nari sibakal tersisa man Dibata nta. Tentu memang biarlah ndigan pe warina kerehen Tuhan Jesus sipeduakaliken e, sipenting man banta eme harus kita ersikap gelah banci memang sialoken keselamaten sienggo isikapken Dibata man gunanta. Sipekena-pekena banta. Janah perlu memang kita nungkun man pusuhta sekalak2, enggo kin payo cara ku ersembah man Dibata, entah bagi siisuratken sepanya ndai kita, tempa-tempa man ilah sideban kita ersembah e. sipekena gereja-nta, mejile si ban, tama ka AC gelah nyaman kita kebaktin bas, sentabi aku piah man pe la banci bas gereja, tapi rubat banci (e, sentabi kel aku).  Cuba sigar-gari pusuhta sekalak2. Gelah ula kita ndabuh bagi siisuratken sepanya, banci memang mawen2 la kita sadar, maka kita kebaktin minggu, PJJ bage pe PA-PA, gelah kita mindo ipasu-pasu Tuhan. Tapi mari aminken bas pusuhta, maka ibas kita erkebaktin pe situhuna, kerna sigejab maka Dibata setia nemani kegeluhenta maka patut kita pe setia nembah man Bana.

Alu bage banci siigejabken maka ibas kerehen wari Tuhan e, labo terjeng kerehen Jesus peduakaliken. Tapi tiap wari siidalani kita, eme wari Tuhan si harus sidalani alu erkemalangen man Dibata. Enda me sijadi persikapenta, mari nggeluhlah kita ibas persadan nta ras Dibata, janah Dibata nge simasu-masu kataNa. Termulia gelar Dibata nta ibas kerina dampar kegeluhenta. Amin.