Kita Idilo Maba Berita si Mehuli

Khotbah Minggu 14 Desember 2014

(Advent III)

Introitus        : Kesah Tuhan si Erdolat lit i babongku. Enggo ipilihNa aku, lako maba berita si mehuli man kalak musil. IsuruhNa aku guna pepalem kalak sigetem pusuhna, meritaken kebebasen man kalak si tertaban; janah si ibas penjara enggo banci ndarat ia. (Jesaya 61:1)

Ogen              : I Tesalonika 5:16-24

Khotbah        : Jesaya 61:1-4; 8-11

Tema              : Kita idilo maba berita si mehuli

…, lit telu tugas gereja si arus idalanken kita kerina, eme Koinonia (bersekutu)*tugas sipertama enda idalanken kita alu ngikuti ibadah minggu, PA-PA, ras PJJ. Sebab memang ibas kegiaten sibage teridah persekutunta ras temanta sisada kiniteken*. Sipeduaken Diakonia (Melayani) * tugas diakoni enda pe enggo idalanken kita alu program2 si lit i gerejanta, misalna ngapuli, ndahi kalak sakit, ndahi lakon/kerja-kerja, Rsd*. Janah sipeteluken eme Marturia (bersaksi) *eh... enda me si jadi bahan khotbahta wari enda. Kerna bersaksi. Adi ibas program2 gerejanta adi kerna bersaksi ningen e biasana kurang kel mengena man banta sebab kai? Biasa program nta e eme bersaksi keluar, bagi tim PI, eme bersaksi keluar, ntah pe Dialog antar umat beragama, tapi si enda biasana la melibatken kerina perpulungen, adi PI kin, tim PI saja, adi dialog ndai kin biasana pandita2 nge. Sebab memang ibas pikirenta sibage ka kin ngenca ikataken bersaksi*. Tapi kepeken ibas bahan ogenta, enggo iperluas erti ersaksi enda. Siiakap kita ndai tugas ersaksi e eme tugas si mberat, ibas bahan ogenta lebih menahang banci iangkai kita kerna tugasta guna ersaksi e. *ibas kita ermeriah ukur e, kepeken enggo e jadi kesaksinta man kalak sideban. Me nukah kel enda situhuna e, “Meriahlah atendu katawari pe” ujungna e nge si agak mberat biasana. Katawari pe, adi ibas seh sura-suranta e banci nge meriah siakap, tapi ibas la seh sura-suranta e, je nge mesera kita ermeriah ukur. (baca ayat 17-18a) mawen2 lupa kang nge kita  adi ertoto e, apai ka adi enggo melihe kel, krukk…krukk.. nina beltek e ka pe, e lanai bo siinget ertoto ndai. biasana biakta manusia, adi ertoto ningen e, ibas waktu2 terjepit min paksana kita, e banci siinget ertoto man Tuhan. Sinangkihi misalna angkuten umum, supir angkot e empetna saja gas motor e, kita si jadi penumpang me nggo biaren kel kita datas, je nge maka siinget Tuhan ndai. emakana nina simbuena kel kari ibas surga ah eme supir angkot. Erkiteken ibas ia maba angkot e ertoto banna kerina penumpangna e. erkiteken kai? Kebiarenta. Adi tenang2 saja pergeluhta, aman2 kel siakap, seh kerina sura-suranta ntah lanai bo mungkin siinget Tuhan e. emaka pandita, vicaris, detaser ntah pe pertua/diaken kari labo enterem bas surga ah, latih pe ia mbelasi kata Dibata e, labo lit piga kel pe perpulungen e ertutusna ertoto, sebab memang ibas mbegiken kata Dibata kita i gereja e, me tenang kel siakap. Piah nina kuan-kuan kalak pe, adi medem bas gereja apaika sangana kebaktin pasti badeh kel pertunduhta, sebab SETAN pe la ia pang ngganggusa. Padahal me labo situhuna bage, justru perbahan ganggu setan ndai nge makana madat kel mata nta, me bage?

…, i sebuah Negara barat si memang mengenal 4 musim. Lit sada gereja si enterem kel jemaatna. Iantara jemaat e kerina lit sekalak perbapan si seh kel semangatna, rusur ia reh kebaktin minggu, adi rende ningen pe tutus kel atena rende, sepenuh hati kel ia ngendekenca, lagu puji-pujin man Tuhan, ibas megiken kata DIbata pe tuhu-tuhu nutus kel ia. Adi ninta banci ikataken me perbapan e jemaat teladan. Tapi kepeken ibas sada paksa, lanai idah2 perbapan ndai. seminggu, dua minggu.. seh ku telu minggu pe lanai perbapan e reh-reh. Emaka singkat cerita reh me Pandita, majelis jemaat ras piga2 perpulungen ku rumah perpaban e guna erbahan perkunjungan pastoral/PRT. Rembangka musimna paksa sie eme musim dingin/salju. Iidah pandita ras pepulungen e me perbapan ndai sangana kundul deher perapian, sangana cudu ia. Kundul me kalak e kerina, tenang kel suasanana lalit sora kai pe. Bapak pandita pe la ia ngengerana. Sinik ia! Si sekalak perbapan ndai pe sinik ka ia. Ibas kesenyapan e i capit pandita me arang si lit ibas perapian e, tama kudarat. Enca bage kundul ka pandita e, tapi tetap denga sinik ia, jemaat siikut pe sinik ka. Kerina kalak sipulung e ndai natap arang siipedarat pandita e, tatap kalak enda maka idarat perapian, berubah me warna bara I arang e, perlahan-lahan redup seh maka lanai gara. Kenca bage tama pandita ka arang si nggo padam ndai bas perapian, balik ka mulihi gara arang ndai. kenca ibahan pandita ndai bage, berpamiten me kalak enda kerina man perbapan e. i lebe-lebe pintu rumahna, alu sora si pero ngerana nge perbapan ndai “Terima kasih untuk khotbah bapak. Saya akan datang kembali minggu depan”. Hal siluar biasa, alu la lit kata kai pe, tergerak pusuh perbapan ndai, maka kepeken ersada ras perpulungen nge maka tetap gara kinitekenku e ‘tena.

Kuakap entah perlu nge sesekalin bage ban carana kita guna mpersingeti temanta si la rusur ikut kebaktin minggu. Lanai perlu latih2 pertua/ diaken e, ngerana panjang lebar man bana. Cukup pegara aja api i halamen rumahna, ajak piga2 perpulungen e, cudu kam je. Kenca ndarat ia i rumahna nari, kundul ia, mis siban bagi cerita ndai. entah bage nge kari maka ersuruh pusuhna. Ibas kita erbahan sibage enggo kita ersaksi man temanta. Labo perlu ngerana kita panjang lebar man temanta e kepeken alu bagi siibahan pandita ndai pe dorek kepeken. Adi bage, me labo mberat situhuna tugasta guna maba berita simehuli enda ndai.

Janah hal si luar biasa ibas kita maba berita e, ipake Dibata kita guna erbahan kalak sideban ermeriah ukur. Lanai bo terjeng keriahen ukurta jadi kesaksin tapi kepeken ipengasup DIbata kita erbahanca kalak sideban ermeriah ukur. Uga ningen lang? adi man kalak sitertaban siberitaken kebebasen, kalak sibas penjara ipulahi, iberekenNa keriahen jadi gancih ndele ate, ende-enden pujin e banci nambari ukur si kote. Me senang kel adi ibas hal sie kel kita ipake Tuhan. Enda kari hal sebalikna nge siban. Lit misalna ibas perpulungen nta e sekalak permain rubati rusur ras simetuana, reh permain na e nuri2 man banta, kita ndai tugasta maba berita simehuli nge isuruh Dibata, tapi justru kai sikataken man temanta e ndai? “Engko ka kin la meteh muli, adi la kin engko banci sicocoken ras simetua mu e, ndarat ngko bas rumahna nari, enda nggo tading ko bas rumahna la banci sitik kel pe iangkaimu ukur simetua mu e, engko kin la meteh rorat” ninta ka. Eh….. me nggo salah bage, temanta ndai gelah tenang kel nge akapna nuri2 ia man banta, tapi kepeken marah ergulutna siban ukurna, erpicetna iakapna. Aturna ndai me banci sikataken “adi bage ka kel nggo rehna biak simetua mu e, bagem aloken. Erlajar kam sitik2 muat ukurna, ula sura2ndu bahan adi gundari pe bas rumah simetuandu denga ka nge kena tading. Adi simuli bandu rusur man bana, pekene-kenandu ia, pasti ia pe sitik-sitik erkusur nge kari pusuhna ah ku simehuli”. Adi bage min ndai pengaloi kita man bana ibas ia nuri2 e me tenang kel akapna. Ernyamanna pe ia ndeher ras kita, janah hal simehuli siikataken kita ndai banci ka teralokenna.

…., ibas kita ndalanken tugasta guna maba berita si mehuli e lit janji Tuhan man banta. Ibas ayat 9, nina… (Bacaken Jes.61:9…). Puji Tuhan! Upah si sungguh luar biasa ijanjiken Dibata, labo terjeng kita nggejabken pasu-pasuNa saja. tapi kalak sideban pe meteh maka kita ipasu-pasu DIbata. adi enggo bage kel riahna janji siibereken Dibata man banta, ulanai situnda-tunda tugas ta e, mari dalanken, erberita kita kerna berita si mehuli seh maka kalak sideban meriah iakapna nggeluh adi rembak ras kita, dingen itandaiNa me Dibatanta e.

Terpuji Tuhan ibas KataNa, janah ipengasupNa me kita guna ndalankenca. Amin.